Appunni – Chandrika Daily

അനുജ അകത്തൂട്ടിന് കേന്ദ്ര സാഹിത്യ അക്കാദമി പുരസ്‌കാരം; ബാലസാഹിത്യത്തില്‍ മലയത്ത് അപ്പുണ്ണി

chandrika — Fri, 14 Jun 2019 13:05:17 +0000

കൊച്ചി: കേന്ദ്രസാഹിത്യ അക്കാദമിയുടെ 2019 ലെ ബാലസാഹിത്യ പുരസ്‌കാരങ്ങള്‍ പ്രഖ്യാപിച്ചു. എഴുത്തുകാരി അനുജ അകത്തൂട്ടിന് കേന്ദ്ര സാഹിത്യ അക്കാദമിയുടെ യുവ സാഹിത്യ പുരസ്‌കാരം. അമ്മ ഉറങ്ങുന്നില്ല എന്ന കവിത സമാഹാരത്തിനാണ് അമ്പതിനായിരം രൂപയും താമ്ര ഫലകവും അടങ്ങുന്ന പുരസ്‌കാരം. ഡി.സി ബുക്സ് പ്രസിദ്ധീകരിച്ച ‘അമ്മ ഉറങ്ങുന്നില്ല’ കവിത സമാഹാരാത്തില്‍ 32 കവിതകളാണുള്ളത്.

ചുരുക്കും വാക്കുകള്‍ കൊണ്ട് കഠോര സത്യധ്വനിപ്പെരുക്കം സൃഷ്ടിക്കുന്ന നല്ല കവിതകളെന്നാണ് അവതാരികയില്‍ ലീലാവതി ടീച്ചറുടെ കുറിപ്പ്. പൊതുവാക്യ സമ്മേളനം, അരോമയുടെ വസ്ത്രങ്ങള്‍ തുടങ്ങിയ കഥാ സമാഹാരങ്ങളും അനുജ അകത്തൂട്ടിന്റേതായി പ്രസിദ്ധീകരിച്ചിട്ടുണ്ട്. ഒ.എന്‍.വി യുവ സാഹിത്യ പുരസ്‌കാരം, വെണ്‍മണി അവാര്‍ഡ്, തിരൂര്‍ തുഞ്ചന്‍ സ്മാരക സമിതി പുരസ്‌കാരം, വൈലോപ്പിള്ളി അവാര്‍ഡ്, ഡോ.അയ്യപ്പപണിക്കര്‍ സ്മാരക കവിത പുരസ്‌കാരം, അറ്റ്ലസ്-കൈരളി കവിത പുരസ്‌കാരം, അങ്കണം പുരസ്‌കാരം തുടങ്ങിയ അംഗീകാരങ്ങള്‍ നേരത്തെ ലഭിച്ചിരുന്നു.
സാഹിത്യ അക്കാദമി മുന്‍ സെക്രട്ടറി പായിപ്ര രാധാകൃഷ്ണന്റെയും എഴുത്തുകാരി നളിനി ബേക്കലിന്റെയും മകളാണ്. കേരള വെറ്റിനറി സര്‍വകലാശാലയിലെ അസി.പ്രൊഫസര്‍ ഡോ.മുഹമ്മദ് അസ്ലമാണ് ഭര്‍ത്താവ്. ഡല്‍ഹി ഇന്ത്യന്‍ അഗ്രികള്‍ച്ചറല്‍ സ്റ്റാറ്റിസ്റ്റിക്സ് റിസര്‍ച്ച് ഇന്‍സ്റ്റിറ്റ്യൂട്ടില്‍ ശാസ്ത്രജ്ഞയായി ജോലി ചെയ്യുന്ന അനൂജയ്ക്ക് ഐ.ആര്‍.എസില്‍ ഒന്നാം റാങ്കും ലഭിച്ചിരുന്നു.

ബാലസാഹിത്യത്തില്‍ മലയാളത്തില്‍ നിന്ന് മലയത്ത് അപ്പുണ്ണിയ്ക്കാണ് പുരസ്‌കാരം. ബാലസാഹിത്യത്തിന് നല്‍കിയ സമഗ്രസംഭാവനകള്‍ പരിഗണിച്ചാണ് പുരസ്‌കാരം. 50,000 രൂപയും ഫലകവുമാണ് അവാര്‍ഡ്. ശിശുദിനമായ നവംബര്‍ 14ന് അവാര്‍ഡുകള്‍ വിതരണം ചെയ്യും.

യുഎ ഖാദര്‍, ഡോ. കെഎസ് രവി കുമാര്‍, ഇളവൂര്‍ ശ്രീകുമാര്‍ എന്നിവരായിരുന്നു ബാലസാഹിത്യപുരസ്‌കാര ജൂറി അംഗങ്ങള്‍. ഡോ. ഗീത പുതുശ്ശേരി, ഡോ. പിഎസ് രാധാകൃഷ്ണന്‍, ഡോ. നെടുമുടി ഹരികുമാര്‍ എന്നിവരായിരുന്നു യുവപുരസ്‌കാരത്തിന്റെ ജൂറി അംഗങ്ങള്‍

നടന്‍ ദിലീപിനെ വീണ്ടും ചോദ്യം ചെയ്യുന്നു; നിര്‍ണായക നീക്കവുമായി പൊലീസ്

chandrika — Wed, 15 Nov 2017 05:57:58 +0000

ആലുവ: കൊച്ചിയില്‍ നടി ആക്രമിക്കപ്പെട്ട കേസുമായി ബന്ധപ്പെട്ട് നടന്‍ ദിലീപിനെ വീണ്ടും അന്വേഷണ സംഘം ചോദ്യം ചെയ്യുന്നു. ആലുവ പൊലീസ് ക്ലബില്‍ വെച്ചാണ് ദിലീപിനെ ചോദ്യം ചെയ്യുന്നത്. ജാമ്യ വ്യവസ്ഥ ലംഘിച്ചതുമായി ബന്ധപ്പെട്ടാണ് ചോദ്യം ചെയ്യലെന്നാണ് വിവരം. കേസുമായി ബന്ധപ്പെട്ട് ദിലീപ് 86 ദിവസത്തോളം ജയിലില്‍ കഴിഞ്ഞിരുന്നു. കര്‍ശന വ്യവസ്ഥകള്‍ മുന്നോട്ടുവെച്ചാണ് കോടതി ദിലീപിന് ജാമ്യം അനുവദിച്ചിരുന്നത്. സാക്ഷികളെ സ്വാധീനിക്കരുത്, തെളിവ് നശിപ്പിക്കരുത് തുടങ്ങിയ കോടതി മുന്നോട്ടുവെച്ച വ്യവസ്ഥകള്‍ ദിലീപ് ലംഘിച്ചുവെന്ന് സൂചന ലഭിച്ച സാഹചര്യത്തിലാണ് പൊലീസ് ചോദ്യം ചെയ്യലിന് അടിയന്തരമായി ദിലീപിനെ വിളിപ്പിച്ചത്.
ചോദ്യം ചെയ്യല്‍ ഒരു മണിക്കൂറോളം പിന്നിട്ടു കഴിഞ്ഞു. ദിലീപിന്റെ മാനേജര്‍ അപ്പുണ്ണിയെയും ചോദ്യം ചെയ്യുന്നുണ്ട്. എസ്.പി സുദര്‍ശനന്‍, സി.ഐ ബിജു പൗലോസ് എന്നിവരാണ് ഇരുവരെയും ചോദ്യം ചെയ്യുന്നത്.

‘അപ്പുണ്ണി പൊലീസിനോട് എന്താ പറഞ്ഞത്’? കോടതിവളപ്പില്‍ മാധ്യമങ്ങളോട് ചോദിച്ച് പള്‍സര്‍ സുനി

chandrika — Tue, 01 Aug 2017 07:41:11 +0000

കൊച്ചി: കൊച്ചിയില്‍ നടി കാറില്‍ ആക്രമിക്കപ്പെട്ട സംഭവത്തില്‍ കോടതി വളപ്പില്‍ മാധ്യമങ്ങളോട് പ്രതികരിച്ച് വീണ്ടും കേസിലെ പ്രധാന പ്രതി പള്‍സര്‍ സുനി. അങ്കമാലി കോടതിയില്‍ എത്തിയപ്പോഴായിരുന്നു സുനി വീണ്ടും മാധ്യമങ്ങളോട് പ്രതികരിച്ചത്. കേസില്‍ എല്ലാ പ്രതികളും പിടിയിലായിട്ടില്ലെന്ന് പള്‍സര്‍ സുനി ആവര്‍ത്തിച്ചു. എല്ലാവരും വലപൊട്ടിച്ച് പുറത്തു വരുമോയെന്ന് കാണാമെന്നും സുനി പറഞ്ഞു. അതേസമയം ചോദ്യം ചെയ്യലില്‍ ദിലീപിന്റെ മാനേജര്‍ അപ്പുണ്ണി പറഞ്ഞതെന്ത് മാധ്യമങ്ങളോട് സുനി ചോദിച്ചു.
റിമാന്റ് അവസാനിച്ചതിനെത്തുടര്‍ന്നാണ് സുനിയെ കോടതിയില്‍ ഹാജരാക്കിയത്. കേസിലെ മറ്റു പ്രതികളെയും ഇന്ന് കോടതിയില്‍ ഹാജരാക്കി.
തന്റെ രഹസ്യമൊഴി രേഖപ്പെടുത്തണമെന്ന സുനിയുടെ അപേക്ഷയും ഇന്ന് അഭിഭാഷകനായ ആളൂര്‍ കോടതിയില്‍ സമര്‍പ്പിക്കും. കേസില്‍ ഉള്‍പ്പെട്ട മറ്റു സിനിമാ രംഗത്തെ പ്രമുഖരെക്കുറിച്ച് പറയാനുള്ളതിനാല്‍ തന്റെ രഹസ്യമൊഴി രേഖപ്പെടുത്തണമെന്നാണ് സുനിലിന്റെ അപേക്ഷ. അതേസമയം പ്രോസിക്യൂഷന്‍ അപേക്ഷ അംഗീകരിച്ച് സുനിയുടെയും കൂട്ടുപ്രതികളുടെയും റിമാന്റ് കാലാവധി കോടതി ഈ മാസം 16 വരെ നീട്ടി.