രാജ നടത്തിയ ക്രിമിനല്‍ കുറ്റകൃത്യത്തിന് എല്ലാ ഒത്താശയും നല്‍കിയത് സിപിഎമ്മാണ്.ഇതിന് കൂട്ടുനിന്ന എല്ലാവര്‍ക്കും എതിരെ ക്രിമിനല്‍ കേസെടുക്കണം. വ്യാജ ജാതി സര്‍ട്ടിഫിക്കറ്റ് ലഭിക്കുന്നതിന് രാജയ്ക്ക് സര്‍ക്കാരിന്റെ സഹായവും ലഭിച്ചിട്ടുണ്ട്. ഏത് വളഞ്ഞ വഴിയിലൂടെയും അധികാരം നിലനിര്‍ത്താന്‍ എന്തുനെറികേടും നടത്താന്‍ മടിക്കാത്ത വംശമാണ് സിപിഎമ്മുകാര്‍. കുടുംബ രജിസ്റ്റര്‍ ഉള്‍പ്പെടെ എ.രാജ തിരുത്തിയെന്ന് കോടതിക്ക് പോലും ബോധ്യപ്പെട്ടതാണ്.

എന്നാല്‍ കേവലം രാഷ്ട്രീയ നേട്ടത്തിന് വേണ്ടി വോട്ടര്‍മാരോട് വിശ്വാസവഞ്ചന കാട്ടിയ വ്യക്തിക്ക് വേണ്ടി സിപിഎം ഇപ്പോഴും പാറപോലെ ഉറച്ചുനില്‍ക്കുകയാണ്.ചെയ്ത കുറ്റം ഏറ്റുപറഞ്ഞ് പ്രബുദ്ധരായ വോട്ടര്‍മാരോട് മാപ്പുപറയാനുള്ള മാന്യതപോലും സിപിഎമ്മും രാജയും ഇതുവരെ കാട്ടിയില്ല.വ്യാജരേഖ ചമയ്ക്കുന്നതും രേഖകള്‍ തിരുത്തുന്നതും ഇന്ത്യന്‍ ശിക്ഷാ നിയമപ്രകാരം ഏഴുവര്‍ഷത്തിലധികം തടവുശിക്ഷ ലഭിക്കാവുന്ന കുറ്റമാണ്. എന്നിട്ടും എ.രാജക്ക് മേല്‍ നടപടി സ്വീകരിക്കാതെ നിയമത്തിന്റെ പഴുതുപയോഗിച്ച് സംരക്ഷണം നല്‍കുന്നത് നീതിന്യായ സംവിധാനത്തോടുള്ള വെല്ലുവിളിയാണ്. ദേവികുളത്ത് ഉപതിരഞ്ഞെടുപ്പിന് ആവശ്യമായ നപടികള്‍ തിരഞ്ഞെടുപ്പ് കമ്മീഷന്‍ സ്വീകരിക്കണമെന്നും സുധാകരന്‍ പറഞ്ഞു.

സംവരണതത്വങ്ങള്‍ അട്ടിമറിച്ച് രാജയെ പൂര്‍ണ്ണമായി പിന്തുണയ്ക്കുന്ന സിപിഎം പിന്നാക്ക വിഭാഗങ്ങളെ വഞ്ചിക്കുകയാണ്. നിയമനിര്‍മ്മാണ സഭയില്‍ പട്ടികജാതിക്കാര്‍ക്ക് അവരുടെ പ്രാതിനിധ്യം ഉറുപ്പുവരുത്താന്‍ സംവരണം ചെയ്യപ്പെട്ട മണ്ഡലത്തിലാണ് ആ പരിധിയില്‍ വരാത്ത വ്യക്തിയെ സിപിഎം മത്സരിപ്പിച്ചത്. സിപിഎമ്മിന്റെ ദളിത് വിരുദ്ധ മനോഭാവത്തിന്റെ പ്രതിഫലനം കൂടിയാണിതെന്നും സുധാകരന്‍ ചൂണ്ടിക്കാട്ടി.

പ്രതിരോധം തകര്‍ന്ന് സി.പി.എംദേവികുളത്തെ തിരഞ്ഞെടുപ്പ് റദ്ദാക്കിയ ഹൈക്കോടതി വിധി സി.പി.എമ്മിനുള്ളിലും പുറത്തും പുതിയ വിവാദങ്ങള്‍ക്ക് തിരികൊളുത്തി. പട്ടികജാതി സംവരണ സീറ്റില്‍ അര്‍ഹതയില്ലാത്തയാളെ മല്‍സരിപ്പിച്ചത് സി.പി.എമ്മിനെ രാഷ്ട്രീയമായി പ്രതിരോധത്തിലാക്കി. അതേ സമയം ദേവികുളത്തെ സ്ഥാനാര്‍ഥി നിര്‍ണ്ണയം മുതല്‍ പാര്‍ട്ടിയില്‍ ഉടലെടുത്ത വിവാദം വീണ്ടും ആളിക്കത്തുമെന്ന ആശങ്കയിലാണ് നേതൃത്വം. നിയമ സഭയില്‍ ഭരണ പ്രതിപക്ഷ ഏറ്റുമുട്ടലുകള്‍ സംസ്ഥാന രാഷ്ട്രീയത്തെ ചൂടുപിടിപ്പിക്കുമ്പോള്‍ എ.രാജ എം.എല്‍.എക്കെതിരായ ഹൈക്കോടതി വിധി സി.പി.എമ്മിന് കനത്ത ആഘാതമായി.
കഴിഞ്ഞ തിരഞ്ഞെടുപ്പില്‍ ദേവികുളത്ത് സിറ്റിംഗ് എം. എല്‍. എ എസ്.രാജേന്ദ്രനെ മാറ്റിയാണ് എ. രാജക്ക് സീറ്റ് കൊടുത്തത്. ഇതേ തുടര്‍ന്ന് രാജേന്ദ്രന്‍ ഇടഞ്ഞു. തെരഞ്ഞെടുപ്പില്‍ എ. രാജയെ പരാജയപ്പെടുത്താന്‍ രാജേന്ദ്രന്‍ ശ്രമിച്ചുവെന്ന ആരോപണം പാര്‍ട്ടിക്കുള്ളില്‍ ചില കേന്ദ്രങ്ങള്‍ ഉയര്‍ത്തി. എം.എം മണി പരസ്യമായി രാജേന്ദ്രനെതിരെ രംഗത്തുവന്നു. അതിരുവിട്ട പ്രതികരണങ്ങളില്‍ ഇരുവരും കൊമ്പുകോര്‍ത്തു. സംഘടനാ തെരഞ്ഞെടുപ്പ് കാലത്ത് രാജേന്ദ്രന്‍ സസ്‌പെന്‍ഷനിലായി. ഇതിന്റെ അലയൊലികള്‍ ഇനിയും കെട്ടടങ്ങിയിട്ടില്ല. ഹൈക്കോടതി വിധിയെ തുടര്‍ന്ന് സംജാതമായ സാഹചര്യങ്ങള്‍ സ്ഥാനാര്‍ഥി നിര്‍ണ്ണയ വിവാദങ്ങളെ വീണ്ടും സജീവമാക്കും. എ.രാജയെ സ്ഥാനാര്‍ഥിയാക്കാന്‍ ചരടു വലിച്ച നേതാക്കളും സംഭവത്തില്‍ പ്രതിക്കൂട്ടിലാണ്.
ജനങ്ങളെ അഭിമുഖീകരിക്കാന്‍ കഴിയാത്ത അവസ്ഥയിലെത്തി് സി.പി.എം. വിശദീകരണം നല്‍കാന്‍ സി.പി.എമ്മിന് കഴിയുന്നില്ല. പട്ടികജാതിക്കാര്‍ക്ക് സംവരണം ചെയ്ത മണ്ഡലത്തില്‍ മറ്റൊരു സമുദായക്കാരനെ നിര്‍ത്തി മല്‍സരിപ്പിക്കുകയും ഹൈക്കോടതി തെരഞ്ഞെടുപ്പ് റദ്ദാക്കുകയും ചെയ്തത് വലിയ പ്രാധാന്യമുള്ള രാഷ്ട്രീയ വിഷയമായി മാറിക്കഴിഞ്ഞു.
പട്ടികജാതിക്കാര്‍ക്ക് സംവരണ മണ്ഡലങ്ങള്‍ ഭരണ ഘടന ഉറപ്പുനല്‍കുന്നതാണ്. ഇത് മറ്റുള്ളവര്‍ തട്ടിയെടുക്കുന്നത് ഭരണഘടനയോടുള്ള വെല്ലുവിളിയാണ്. സി.പി.എമ്മിന്റെ പിന്നോക്ക സ്‌നേഹത്തിന്റെ പൊയ്മുഖം അഴിഞ്ഞു വീഴുമ്പോള്‍ സംസ്ഥാന, ജില്ലാ നേതൃത്വങ്ങള്‍ മറുപടിയില്ലാതെ ഒളിച്ചോടുകയാണ്. കൈയേറ്റവും വന്യമൃഗ ശല്യവും വാര്‍ത്തകളില്‍ നിറഞ്ഞിരുന്ന ദേവികുളത്ത് സി.പി.എമ്മിനകത്തും പുറത്തും രാഷ്ട്രീയ പോര്‍മുഖങ്ങള്‍ തുറക്കപ്പെട്ടിരിക്കുന്നു.