രാജ്യത്തിന്റെ വിവധ ഭാഗങ്ങളില്‍ സാമൂഹിക പ്രവര്‍ത്തകരെയും ബുദ്ധിജീവികളെയും ലക്ഷ്യമാക്കി നടക്കുന്ന പോലീസ് റെയ്ഡിനെതിരെ എഴുത്തുകാരി അരുന്ധതി റോയ്. ഇത്തരം നീക്കങ്ങള്‍ അത്യന്തം ആപത്കരമാണെന്നും അടിയന്തിരാവസ്ഥയ്ക്കു വളരെ അടുത്താണെന്നും അരുന്ധതി റോയ് ആരോപിച്ചു.

ദലിത് അവകാശ പ്രവര്‍ത്തകര്‍, ബുദ്ധിജീവികള്‍, കവികള്‍, അഭിഭാഷകര്‍ തുടങ്ങിയവരുടെ വീടുകളിലാണു പരിശോധന നടക്കുന്നത്. കൊലപാതകികളെ ആദരിക്കുകയും ആഘോഷിക്കുകയും ചെയ്യുകയാണ്. നീതിക്കു വേണ്ടിയോ ഹിന്ദു ഭൂരിപക്ഷവാദത്തിനെതിരെയോ ആരെങ്കിലും സംസാരിച്ചാല്‍ അവരെ കുറ്റവാളികളാക്കുന്നു. വരുന്ന തെരഞ്ഞെടുപ്പിനുള്ള തയാറെടുപ്പാണ് ഇതിന് പിന്നില്‍. ഇത്തരം കാര്യങ്ങള്‍ അനുവദിക്കരുത്. ഇതിനെതിരെ എല്ലാവരും ഒരുമിക്കണം. അല്ലെങ്കില്‍ നമ്മള്‍ ആസ്വദിക്കുന്ന സ്വാതന്ത്രം എല്ലാം നഷ്ടമാകും അരുന്ധതി റോയ് പറഞ്ഞു.

ഓരോരുത്തരും കൂടുതല്‍ ധൈര്യം കാണിക്കേണ്ട സമയമാണിത്. രാജ്യത്തെ ധനവും പ്രകൃതി വിഭവങ്ങളുമെല്ലാം കുറച്ച് പേരുടെ കൈവശമാണ്. കാരണം പോലും അറിയാതെ നിരവധി പേര്‍ ജയിലുകളില്‍ കിടക്കുന്നു. ജന്ദര്‍മന്ദര്‍ പോലെ വന്‍ സമരങ്ങള്‍ നടന്നിരുന്ന ഇടങ്ങളെല്ലാം അടച്ചു പൂട്ടുകയാണ്. കൂടുതല്‍ അടച്ചുപൂട്ടലുകള്‍ ഉണ്ടാകാതിരിക്കാന്‍ ധൈര്യം കാണിക്കണം. നോട്ട് അസാധുവാക്കലും ജിഎസ്ടിയും വന്‍കിടകാര്‍ക്ക് തുണയായപ്പോള്‍ ചെറുകിട സംരംഭങ്ങള്‍ക്ക് ഇല്ലാതാകുകയാണ്. സാഹിത്യോത്സവങ്ങളധികവും കോര്‍പ്പറേറ്റുകള്‍ സ്‌പോണ്‍സര്‍ ചെയ്യുന്ന സാഹചര്യത്തിലാണ് ഇത്തരം പരിപാടികളില്‍ നിന്ന് വിട്ടു നിന്നിരുന്നത്. തന്റെ പുതിയ പുസ്തകത്തെ കുറിച്ചും എഴുത്തിന്റെയും യാത്രയുടെയും വഴികളെ കുറിച്ചും അരുന്ധതി റോയ് മനസ്സ് തുറന്നു.