ന്യൂഡല്‍ഹി: രാജ്യത്തെ സാമ്പത്തിക വളര്‍ച്ചയുടെ വേഗം കുറഞ്ഞെന്ന് കേന്ദ്രസര്‍ക്കാര്‍. കേന്ദ്ര ധനമന്ത്രി അരുണ്‍ ജെയ്റ്റ്‌ലിയാണ് ഇക്കാര്യം പാര്‍ലമെന്റില്‍ വ്യക്തമാക്കിയത്.

2016-2017 വര്‍ഷത്തിലെ മൊത്ത ആഭ്യന്തര ഉല്‍പാദന (ജി. ഡി.പി) നിരക്ക് 8 ശതമാനത്തി ല്‍ നിന്ന് 7.1 ശതമാനമായി കുറഞ്ഞു. വ്യവസായ സേവന മേഖലകളിലെ കുറഞ്ഞ വളര്‍ച്ചാ നിരക്കാണ് സമ്പദ് വ്യവസ്ഥയ്ക്ക് തിരിച്ചടിയായത്. ആഗോള സാമ്പത്തിക രംഗത്ത് വളര്‍ച്ച കുറവാണെന്നും ഇത് രാജ്യത്തെ നിക്ഷേപത്തെയും ബാധിച്ചിട്ടുണ്ടെന്നും ധനമന്ത്രി പറഞ്ഞു. ജി.ഡി.പി നിരക്ക് കുറഞ്ഞതിന് ഇതും കാരണമായി.

നിലവിലെ സാഹചര്യത്തില്‍ കോര്‍പ്പറേറ്റുകള്‍ക്ക് ഇത് പ്രതിസന്ധി സൃഷ്ടിക്കുന്നുണ്ടെന്നും ജയ്റ്റ്‌ലി വ്യക്തമാക്കി. 2016 ല്‍ ആഗോള തലത്തില്‍ സാമ്പത്തിക വളര്‍ച്ചയുടെ വേഗം കുറഞ്ഞതടക്കം നിരവധി കാരണങ്ങളാണ് 2016 -17 ലെ വളര്‍ച്ചയുടെ വേഗം കുറച്ചതെന്ന് ധനമന്ത്രി അവകാശപ്പെട്ടു. സാമ്പത്തിക വളര്‍ച്ചയുടെ വേഗം കുറഞ്ഞുവെങ്കിലും ഐഎംഎഫിന്റെ കണക്കുകളനുസരിച്ച് ലോകത്തില്‍ അതിവേഗം വളരുന്ന പ്രധാന സമ്പദ് വ്യവസ്ഥയാകാന്‍ 2016ല്‍ രാജ്യത്തിന് കഴിഞ്ഞുവെന്ന് അദ്ദേഹം ചൂണ്ടിക്കാട്ടി. 2017ല്‍ അതിവേഗം വളരുന്ന രണ്ടാമത്തെ പ്രധാന സമ്പദ് വ്യവസ്ഥയാകാന്‍ കഴിഞ്ഞുവെന്നും അദ്ദേഹം അവകാശപ്പെട്ടു. ലോക്‌സഭയിലെ ശൂന്യവേളയിലാണ് വളര്‍ച്ച നിരക്ക് കുറയുന്നതിനെ സംബന്ധിച്ച് കേന്ദ്ര ധനമന്ത്രി പ്രസ്താവന നടത്തിയത്.

സാമ്പത്തിക ഉത്തേജനത്തിനായി നേരിട്ടുള്ള വിദേശ നിക്ഷേപം, ടെക്‌സ്റ്റൈല്‍ മേഖലക്കായുള്ള പ്രത്യേക പാക്കേജ്, നഗര, ഗ്രാമ മേഖലകളിലെ പശ്ചാതല വികസനം, ഗതാഗതം, ഊര്‍ജ്ജം തുടങ്ങിയ മേഖലകള്‍ക്ക് ഉത്തേജക പാക്കേജുകള്‍ നടപ്പിലാക്കുന്നുണ്ടെന്നും അദ്ദേഹം പറഞ്ഞു.

മുഖ്യ സാമ്പത്തിക ഉപദേഷ്ടാവ് അരവിന്ദ് സുബ്രഹ്മണ്യം

നോട്ട് അസാധുവാക്കല്‍ സംബന്ധിച്ച് പ്രഖ്യാപനമുണ്ടായ നവംബര്‍ എട്ടു മുതല്‍ സാമ്പത്തിക വളര്‍ച്ചയില്‍ കാര്യമായ ഇടിവ് വന്നതായാണ് വിവരം. 2016-17 സാമ്പത്തിക വര്‍ഷത്തില്‍ സാമ്പത്തിക വളര്‍ച്ച 6.75 മുതല്‍ 7.5 ശതമാനം വരെയായി ഉയരുമെന്നാണ് റിപ്പോര്‍ട്ടില്‍ പറയുന്നത്. എന്നാല്‍ നടപ്പു സാമ്പത്തിക വര്‍ഷത്തില്‍ 7.1 ശതമാനം മാത്രം നേട്ടം കൈവരിക്കാനാകൂവെന്നാണ് റിപ്പോര്‍ട്ടില്‍ പറയുന്നത്. നോട്ടു അസാധുവാക്കിയതിനു പിന്നാലെ രാജ്യം നേരിട്ട ഏറ്റവും വലിയ വെല്ലുവിളിയാണ് കറന്‍സി ക്ഷാമം. ഇത് ചരക്കുവില്‍പനയില്‍ വന്‍ ഇടിവിനു കാരണമായി. കൂടാതെ കാര്‍ഷിക വരുമാനവും കൂപ്പുക്കുത്തി. ഇവക്കു പുറമെ ഡിസംബര്‍ 31 വരെ തൊഴില്‍ നഷ്ടവും സാമൂഹ്യ പ്രശ്‌നങ്ങളുമുണ്ടായതായി സാമ്പത്തിക സര്‍വേയില്‍ രേഖപ്പെടുത്തുന്നു.

നോട്ടു അസാധുവാക്കലിന്റെ പ്രശ്‌നങ്ങള്‍ പരിഹരിക്കുന്നതിന് മോദി ആവശ്യപ്പെട്ടത് അമ്പതു ദിവസങ്ങളായിരുന്നു. എന്നാല്‍ കറന്‍സി പ്രതിസന്ധി ഏപ്രിലോടു കൂടി പരിഹരിക്കാനാകുമെന്നാണ് കേന്ദ്ര സര്‍ക്കാര്‍ ഇപ്പോള്‍ പറയുന്നത്. അതേസമയം നോട്ടു നിരോധനത്തിന്റെ നേട്ടങ്ങളും സാമ്പത്തിക സര്‍വേയില്‍ എടുത്തു പറയുന്നു. കള്ളപ്പണം തടയാന്‍ സാധിച്ചുവെന്നതാണ് ഇതില്‍ പ്രധാനം. ബാങ്ക് ഇടപാടുകളില്‍ നിയന്ത്രണം ഏര്‍പ്പെടുത്തിയതോടെ ഡിജിറ്റല്‍ ഇടപാടുകള്‍ പ്രോത്സാഹിപ്പിക്കാനായതും ക്യാഷ് ലെസ് ഇന്ത്യ എന്ന ആശയത്തിന് തുടക്കംകുറിക്കാനായതും സര്‍വേ റിപ്പോര്‍ട്ടില്‍ പറയുന്നു.