Aryadan Muhammed – Chandrika Daily

പ്രഥമ പിടി തോമസ് സ്മാരക അവാര്‍ഡ് ആര്യാടന്‍ ഷൗക്കത്തിന്

webdesk13 — Mon, 20 Feb 2023 12:04:47 +0000

അബുദാബി:ഏറ്റവും നല്ല പൊതുപ്രവര്‍ത്തകനുള്ള യുഎഇയിലെ കലാ സാംസ്‌കാരിക സംഘടനയായ ഇന്ദിരാഗാന്ധി വീക്ഷണം ഫോറം യു.എ .ഇ സെന്‍ട്രല്‍ കമ്മിറ്റി ഏര്‍പ്പെടുത്തിയ പ്രഥമ പിടി തോമസ് സ്മാരക അവാര്‍ഡിന് കെ പി സി സി ജനറല്‍ സെക്രട്ടറിയും സംസ്‌കാര സാഹിതി ചെയര്‍മാനുമായ ആര്യാടന്‍ ഷൗക്കത്ത് അര്‍ഹനായി.

രാഷ്ട്രീയ നിരീക്ഷകയും സാഹിത്യകാരിയുമായ സുധാ മേനോന്‍ അധ്യക്ഷയായ സമിതിയാണ് അവാര്‍ഡ് ജേതാവിനെ തിരഞ്ഞെടുത്തത്. രാഷ്രീയ സാമൂഹിക പ്രവര്‍ത്തനങ്ങള്‍ക്കു പുറമെ കലാ, സാംസ്‌കാരിക,സാഹിത്യ,പാരിസ്ഥിക,സിനിമാ രംഗത്തെ സംഭാവനകളും കണക്കിലെടുത്താണ് അവാര്‍ഡ് സമ്മാനിക്കുന്നതെന്ന് സംഘാടകര്‍ വ്യക്തമാക്കി.

ഫെബ്രുവരി 26 ന് ഷാര്‍ജ ഇന്ത്യന്‍ അസോസിയേഷനില്‍ വെച്ചുനടക്കുന്ന വീക്ഷണം മഹോത്സവം സാംസ്‌കാരിക പരിപാടിയില്‍വെച്ചു അവാര്‍ഡ് സമ്മാനിക്കും. പിടിയുടെ സഹധര്‍മിണിയും തൃക്കാക്കര എംഎല്‍എയുമായ ഉമാ തോമസ് അടക്കം കലാ സാംസ്‌കാരിക രാഷ്ട്രീയ രംഗത്തെ പ്രമുഖര്‍ ചടങ്ങില്‍ സംബന്ധിക്കും

തുടര്‍ വര്‍ഷങ്ങളിലും അവാര്‍ഡിനുള്ള മാനദണ്ഡം രാഷ്ട്രീയ പ്രവര്‍ത്തനത്തോടൊപ്പം മറ്റു മേഖലകളിലെ പ്രവര്‍ത്തന മികവ് കൂടിയായിരിക്കുമെന്ന് ഭാരവാഹികളായ എന്‍.പി മുഹമ്മദലി, ഇപി ജോണ്‍സന്‍,രഞ്ജന്‍ ജേക്കബ്, എന്‍ കെ സജീവന്‍ എന്നിവര്‍ വാര്‍ത്താകുറിപ്പില്‍ അറിയിച്ചു.

ലീഗ് നേതാക്കളെ വിശ്വാസത്തിലെടുക്കാം; എസ്.ഡി.പി.ഐ ആശയക്കുഴപ്പം ഉണ്ടാക്കാന്‍ ശ്രമിക്കുന്നു: ആര്യാടന്‍

ചന്ദ്രിക വെബ് ഡെസ്‌ക്‌ — Sat, 16 Mar 2019 08:15:56 +0000

കോട്ടക്കല്‍: മുസ്‌ലിംലീഗ് നേതാക്കളും എസ്.ഡി.പി.ഐ നേതാക്കളും സംസാരിച്ചു എന്ന രീതിയില്‍ വാര്‍ത്തകള്‍ വരുത്തി ജനങ്ങള്‍ക്കിടയില്‍ ആശയ കുഴപ്പമുണ്ടാക്കേണ്ടത് എസ്.ഡി.പി.ഐയുടെ ആവശ്യമാണെന്നും അതിനവര്‍ ശ്രമിക്കുമെന്നും കോണ്‍ഗ്രസ് നേതാവ് ആര്യാടന്‍ മുഹമ്മദ് പറഞ്ഞു.
ഈ വിഷയത്തില്‍ മുസ്‌ലിംലീഗ് നേതാക്കളായ പി.കെ കുഞ്ഞാലിക്കുട്ടിയെയും, ഇ.ടി മുഹമ്മദ് ബഷീറിനെയും അവിശ്വസിക്കേണ്ട കാര്യമില്ലെന്നും അവര്‍ പറയുന്നതാണ് ഇതില്‍ ശരിയെന്നും ആര്യാടന്‍ പറഞ്ഞു. ഇടതു സ്ഥാനാര്‍ഥിയും പലരുമായും സംസാരിക്കുന്നുണ്ടെന്നും പലരെയും കാണുന്നുണ്ടെന്നും അത് പോലെ തന്നെ ഇതും കരുതിയാല്‍ മതിയെന്നും അദ്ദേഹം പറഞ്ഞു. കോട്ടക്കലില്‍ മാധ്യമ പ്രവര്‍ത്തകരോട് സംസാരിക്കുകയായിരുന്നു ആര്യാടന്‍. എസ്.ഡി.പിയുമായി ചര്‍ച്ച നടന്നിട്ടില്ലെന്ന് മുസ്‌ലിംലീഗി നേതാക്കള്‍ വ്യക്തമാക്കിയിരുന്നു.

സോളാര്‍കേസ്; ഉമ്മന്‍ചാണ്ടിക്കും തിരുവഞ്ചൂരിനുമെതിരെ കേസ്

chandrika — Wed, 11 Oct 2017 07:34:22 +0000

തിരുവനന്തപുരം: സോളാര്‍ കേസിലെ അന്വേഷണ കമ്മീഷന്‍ റിപ്പോര്‍ട്ട് പുറത്തുവിട്ട് സര്‍ക്കാര്‍. ജസ്റ്റിസ് ജി.ശിവരാജന്‍ കമ്മീഷന്‍ റിപ്പോര്‍ട്ട് പ്രകാരം മുന്‍ മുഖ്യമന്ത്രി ഉമ്മന്‍ചാണ്ടിക്കെതിരെ കേസെടുക്കാമെന്ന് സര്‍ക്കാരിന് നിയമോപദേശം ലഭിച്ചുവെന്ന് മുഖ്യമന്ത്രി പിണറായി വിജയന്‍ പറഞ്ഞു. മുന്‍ ആഭ്യന്തരമന്ത്രിയായിരുന്ന തിരുവഞ്ചൂര്‍ രാധാകൃഷണനെതിരേയും റിപ്പോര്‍ട്ടില്‍ പരാമര്‍ശമുണ്ട്. തിരുവഞ്ചൂരിനെതിരെ ക്രിമിനല്‍ കേസെടുക്കുമെന്നും മുഖ്യമന്ത്രി വാര്‍ത്താസമ്മേളനത്തില്‍ അറിയിച്ചു.

കുറ്റകരമായ ഗൂഢാലോചന, പ്രതികളെ സഹായിക്കല്‍ എന്നിവ പ്രകടമാണ്. ഉമ്മന്‍ചാണ്ടിക്കെതിരെ വിജിലന്‍സ് അന്വേഷണവും തിരുവഞ്ചൂരിനെതിരെ ക്രിമിനല്‍ കേസ് എടുക്കാനും ശുപാര്‍ശയുണ്ടെന്നും മുഖ്യമന്ത്രി വ്യക്തമാക്കി. ഉമ്മന്‍ചാണ്ടിക്കെതിരെയുള്ള വിജിലന്‍സ് അന്വേഷണം പ്രത്യേകസംഘം അന്വേഷിക്കും. ഐ.ജി.പത്മകുമാര്‍, ഡി.വൈ.എസ്.പി ഹരികൃഷ്ണന്‍ എന്നിവര്‍ക്കെതിരേയും പോലീസ് അസോസിയേഷന്‍ മുന്‍ഭാരവാഹി ജി.ആര്‍ അജിത്തിനെതിരേയും കേസെടുക്കും. അജിത്തിനെതിരെ വകുപ്പുതല നടപടിക്കും തീരുമാനമുണ്ട്. കോണ്‍ഗ്രസ് നേതാക്കളായ തമ്പാനൂര്‍ രവിയും ബെന്നി ബെഹനാനും, ആര്യാടന്‍ മുഹമ്മദിനെതിരേയും കേസെടുക്കുമെന്നും മുഖ്യമന്ത്രി കൂട്ടിച്ചേര്‍ത്തു. കൂടാതെ സരിതയുടെ കത്തില്‍ പേരു പറഞ്ഞിരിക്കുന്ന നേതാക്കള്‍ക്കെതിരെ മാനഭാഗത്തിനും കേസെടുക്കും.

സെപ്തംബര്‍ 26 നാണ് കമ്മീഷന്‍ അധ്യക്ഷന്‍ റിട്ടയേഡ് ജസ്റ്റിസ് ജി. ശിവരാജന്‍ റിപ്പോര്‍ട്ട് സര്‍ക്കാരിന് സമര്‍പ്പിച്ചത്. തുടര്‍ന്ന് സര്‍ക്കാര്‍ റിപ്പോര്‍ട്ടിന്‍മേല്‍ ഡയറക്ടര്‍ ജനറല്‍ ഓഫ് പ്രോസിക്യൂഷന്‍, അഡ്വക്കേറ്റ് ജനറല്‍ എന്നിവരോട് നിയമോപദേശം തേടുകയായിരുന്നു. റിപ്പോര്‍ട്ടിനകത്തുള്ള പരാമര്‍ശത്തെക്കുറിച്ചുള്ള നിയമോപദേശമാണ് ലഭിച്ചിരിക്കുന്നത്. ആറ് മാസത്തിനകം ഇത് നിയമസഭയില്‍ സമര്‍പ്പിക്കും.