മുസ്ലീങ്ങള്‍ക്ക് ഇന്ത്യയില്‍ ജീവിക്കാന്‍ കഴിയാത്ത അവസ്ഥയാണ് പ്രധാനമന്ത്രി സൃഷ്ടിക്കുന്നത് എന്നായിരുന്നു അദ്ദേഹം നടത്തിയ പരാമര്‍ശം.

ലക്‌നോ: മദ്രസകള്‍ ഒരിക്കലും ഗാന്ധി ഘാതകന്‍ നാഥൂറാം ഗോഡ്‌സെയേയും മലെഗാവ് സ്‌ഫോടനക്കേസ് പ്രതി പ്രഗ്യ സിങ് താക്കൂറിനേയും പോലുള്ളവരെ സൃഷ്ടിക്കുന്നില്ലെന്ന് സമാജ്‌വാദി പാര്‍ട്ടി നേതാവ് അസം ഖാന്‍. മദ്രസകളെ പൊതുവിദ്യാഭ്യാസവുമായി ബന്ധിപ്പിക്കാനുള്ള കേന്ദ്രസര്‍ക്കാറിന്റെ തീരുമാനത്തോട് പ്രതികരിക്കുകയായിരുന്നു അദ്ദേഹം.

ആദ്യം ഗോഡ്‌സെയുടെ ആശയങ്ങള്‍ പ്രചരിപ്പിക്കുന്നവര്‍ ജനാധിപത്യത്തിന്റെ ശത്രുക്കളാണെന്ന് പ്രഖ്യാപിക്കട്ടെ. അതുപോലെ ഭീകരവാദക്കേസുകളില്‍ പ്രതിയായവര്‍ക്ക് ആനുകൂല്യങ്ങള്‍ നല്‍കുന്നതും നിര്‍ത്തട്ടെ-അദ്ദേഹം പറഞ്ഞു. മദ്രസകളെ സഹായിക്കണമെന്ന് കേന്ദ്രസര്‍ക്കാര്‍ ആഗ്രഹിക്കുന്നുണ്ടെങ്കില്‍ മദ്രസകളുടെ നിലവാരം ഉയര്‍ത്തുകയാണ് വേണ്ടത്. മദ്രസകളില്‍ മതാധ്യാപനങ്ങളോടൊപ്പം ഇംഗ്ലീഷും ഹിന്ദിയും ഗണിതവും പഠിപ്പിക്കുന്നുണ്ട്. അത് പതിവായി ചെയ്തുപോരുന്നതാണ്. ഇനി നിങ്ങള്‍ മദ്രസകളെ സഹായിക്കണമെന്ന് ആഗ്രഹിക്കുന്നുണ്ടെങ്കില്‍ നിലവാരം ഉയര്‍ത്തുകയാണ് വേണ്ടത്. മദ്രസകള്‍ക്കുവേണ്ടി കെട്ടിടങ്ങള്‍ പ
ണിയുകയും ഫര്‍ണിച്ചറുകള്‍ നല്‍കുകയും ഉച്ചഭക്ഷണ സൗകര്യം ഒരുക്കുകയും വേണം-ഖാന്‍ ആവശ്യപ്പെട്ടു.

മദ്രസകളെ ആധുനികവത്കരിക്കാനുള്ള പദ്ധതികള്‍ കൊണ്ടുവരുമെന്ന് ന്യൂനപക്ഷകാര്യ മന്ത്രിയുമായ മുഖ്താര്‍ അബ്ബാസ് നഖ്‌വി പ്രഖ്യാപിച്ചിരുന്നു. മദ്രസ അധ്യാപകര്‍ക്ക് പരിശീലനം നല്‍കുന്ന പരിപാടി അടുത്ത മാസം ആരംഭിക്കുമെന്നും അദ്ദേഹം അറിയിച്ചിട്ടുണ്ട്.

മുസ്‌ലിംകളുടെ പ്രാര്‍ത്ഥനയെ സൂര്യനെ വന്ദിക്കുന്നതുമായി താരതമ്യം ചെയ്യുന്നതിന്റെ ഉദ്ദേശശുദ്ധി ശരിയല്ലെന്നും പറഞ്ഞ അസംഖാന്‍ അറവുശാലകള്‍ വ്യാപകമായി അടച്ചുപൂട്ടുന്നതിനെതിരേയും ആഞ്ഞടിച്ചു. മറ്റുള്ളവരുടെ മതവികാരം വ്രണപ്പെടാതിരിക്കാന്‍ മുസ്‌ലിംകള്‍ പച്ചക്കറികള്‍ കഴിക്കാന്‍ നിര്‍ബന്ധിക്കപ്പെടുകയാണ്. പുലി പുല്ല് തിന്നുകയില്ല. എന്നാല്‍ ജീവിക്കാന്‍ മാര്‍ഗ്ഗമില്ലാതായാല്‍ അങ്ങനെ ചെയ്യേണ്ടി വരുമെന്നും അദ്ദേഹം കൂട്ടിച്ചേര്‍ത്തു.

കഴിഞ്ഞ ദിവസം ലക്‌നൗവ്വില്‍ നടന്ന ചടങ്ങിലാണ് യോഗി സൂര്യനമസ്‌ക്കാരത്തേയും നിസ്‌ക്കാരത്തേയും കുറിച്ച് പറഞ്ഞത്. ഇവ രണ്ടും ബന്ധമുള്ളവയാണ്. നിസ്‌ക്കാരത്തിലെ ചില ക്രമങ്ങളും ചലനങ്ങളും സൂര്യനമസ്‌ക്കാരവുമായി ബന്ധപ്പെട്ടിരിക്കുന്നുവെന്നായിരുന്നു യോഗിയുടെ പരാമര്‍ശം. എന്നാല്‍ ഇവര രണ്ടും ഒരുമിച്ച് കൊണ്ടുവരുന്നതിനെ എതിര്‍ക്കുന്നുവെന്നും യോഗി പറഞ്ഞിരുന്നു.

ഉത്തര്‍പ്രദേശില്‍ മുഖ്യമന്ത്രിയായി യോഗി ആദിത്യനാഥ് അധികാരമേറ്റതിന് ശേഷമാണ് സംസ്ഥാനത്തെ അറവുശാലകള്‍ അടച്ചുപൂട്ടാന്‍ തുടങ്ങിയത്. അനധികൃത അറവുശാലകളാണ് പൂട്ടുന്നതെങ്കിലും സംസ്ഥാനത്ത് വ്യാപകമായി ശിവസേന അറവുശാലകള്‍ പൂട്ടിക്കുകയാണ്.