നാലര പതിറ്റാണ്ടിലെ പ്രവാസത്തിനിടയില്‍ ആദ്യത്തെ രണ്ട് വര്‍ഷം അല്‍ഐനില്‍ ശൈഖ് ഖലീഫയുടെ റൂളേര്‍സ് പ്രൈവറ്റ് ഡിപ്പാര്‍ട്ട്‌മെന്റിലും തുടര്‍ന്ന് 24 വര്‍ഷക്കാലം അല്‍ഐന്‍ വൈദുതി ഡിപ്പാര്‍ട്ട്‌മെന്റിന്‍ കീഴില്‍ പവര്‍ഹൗസില്‍ ഫയര്‍ കണ്‍ട്രോള്‍ റൂം ഓപ്പറേറ്ററായി ജോലി ചെയ്ത് വിരമിച്ച ശേഷം കഴിഞ്ഞ പതിനെട്ട് വര്‍ഷമായി സ്വന്തം കച്ചവടസ്ഥാപനം നടത്തിവരുന്ന അഷ്‌റഫ് ഫെബ്രവരി അവസാനത്തോടുകൂടിയാണ് പ്രവാസത്തോട് വിട പറഞ്ഞ് നാട്ടിലേക്ക് മടങ്ങുന്നത്. പ്രവാസജീവിതത്തിനു മുമ്പേ നാട്ടില്‍ ഹോസ്ദുര്‍ഗ്ഗ് മണ്ഡലം യൂത്ത്‌ലീഗ് ജനറല്‍ സെക്രട്ടരി, അവിഭക്ത കണ്ണൂര്‍ ജില്ലാ മുസ്ലിം യൂത്ത്‌ലീഗ് പ്രവര്‍ത്തക സമതി അംഗം, പി.കെ.കെ. ബാവ സാഹിബ് യൂത്ത് ലീഗ് പ്രസിഡണ്ടായ അവസരം സംസ്ഥാന യൂത്ത്‌ലീഗ് കൗണ്‍സിലര്‍ തുടങ്ങിയ പദവികള്‍ അഷ്‌റഫ് വഹിച്ചു. മുസ്ലിം ലീഗിലെ പിളര്‍പ്പിന്റെ കാലത്ത്, സി.എച്ച് മുഹമ്മദ് കോയാ സാഹിബിന്റെ നിര്‍ദ്ദേശ പ്രകാരം എം.സി. വടകരയും റഹീം മേച്ചേരിയും മുന്‍കയ്യെടുത്തു രൂപീകരിച്ച മുസ്ലിം ലീഗിലെ യുവ പ്രാസംഗിക സംഘടനയുടെ ട്രഷററുമായിരുന്നു അഷ്‌റഫ് പള്ളിക്കണ്ടം. ചന്ദ്രിക സഹ പത്രാധിപന്‍മാരായിരുന്ന ടി.സി. മുഹമ്മദ് ചെയര്‍മാനും ജാഫര്‍ അത്തോളി ജനറല്‍ സെക്രട്ടറിയുമായിരുന്ന പ്രാസംഗിക സംഘടനയാണ് ഒട്ടേറെ യുവപ്രതിഭകളെ കണ്ടെത്തിയതും വളര്‍ത്തിയതും. എം.എസ്.എഫ്, മുസ്ലിം യൂത്ത് ലീഗ് വേദികളിലെ സജീവ സാന്നിധ്യം ഉപേക്ഷിച്ചാണ് അഷറഫ് പ്രവാസജീവിതം തെരഞ്ഞെടുത്തത്.

അല്‍ ഐനിലെത്തി മൂന്ന് മാസത്തിനകം അല്‍ഐന്‍ ചന്ദ്രികാറീഡേര്‍സ് ഫോറം ജനറല്‍ സെക്രട്ടറിയുടെ ചുമതലയില്‍ അഷ്‌റഫ് നിയമിതനായി. ചന്ദ്രികാ റീഡേര്‍സ് ഫോറം കേന്ദ്ര കമ്മിറ്റി ജോ. സെക്രട്ടറി, ചന്ദ്രികാ റീഡേര്‍സ് ഫോറവും കെ.എം.സി.സി.യും ലയിച്ചതിന് ശേഷം പുത്തൂര്‍ റഹ്‌മാന്‍ പ്രസിഡണ്ടായ കമ്മറ്റിയില്‍ കെ.എം.സി.സി നാഷണല്‍ കമ്മിറ്റി സീനിയര്‍ വൈസ് പ്രസിഡണ്ട് പദവികളും വഹിച്ചു. അല്‍ഐനിലെ സാമൂഹിക സാംസ്‌കാരിക രംഗത്തെ അനിഷേധ്യ വ്യക്തിത്വമായും അഷ്‌റഫ് പള്ളിക്കണ്ടം ശോഭിക്കുകയുണ്ടായി. അല്‍ഐന്‍ ഇന്ത്യന്‍ സോഷ്യല്‍ സെന്ററില്‍ 1984ലെ ഭരണസമതിയില്‍ ജോ:സെക്രട്ടറിയുടെ പദവി വഹിച്ച അദ്ദേഹം പിന്നീട് രണ്ട് ടേമുകളില്‍ ഐ.എസ്.സി. ഉപാദ്ധ്യക്ഷനും 2003-2005 വര്‍ഷം തുടര്‍ച്ചയായി ജനറല്‍ സെക്രട്ടറിയുമായി. 2014ല്‍ ഐ.എസ്.സി. പ്രസിഡണ്ടായും അഷ്‌റഫ് പള്ളിക്കണ്ടം തെരഞ്ഞെടുക്കപ്പെട്ടു. അല്‍ഐനിലെ ഐ.എസ്.സിയുടെ ഭരണ സമതിയെ കഴിഞ്ഞ പത്ത് വര്‍ഷക്കാലമായി അധികാരത്തില്‍ എത്തിക്കുന്ന യുനൈറ്റഡ് മൂവ്‌മെന്‍് എന്ന ഒരു ഡസനോളം സാമൂഹ്യസംഘടനകള്‍ ഐക്യപെട്ട് പ്രവര്‍ത്തിക്കുന്ന ഏകീകൃത കൂട്ടായ്മയുടെ ചെയര്‍മാനായും അഷ്‌റഫ് പ്രവര്‍ത്തിച്ചുവരുന്നു.

പ്രവാസജീവിതം നയിക്കുമ്പോഴും നാട്ടിലെ പൊതുപ്രവര്‍ത്തകന്റെ വേഷം അഴിച്ചുവെക്കാതെ സ്വദേശത്തും സജീവമാണ് അഷ്‌റഫ് പള്ളിക്കണ്ടം. ചെറുവത്തൂര്‍ പഞ്ചായത്ത് മുസ്ലിം ലീഗ് കമ്മിറ്റിയെ പ്രതിനിധീകരിച്ച് തൃക്കരിപ്പൂര്‍ മണ്ഡലം കമ്മിറ്റി അംഗമായും കാസറഗോഡ് ജില്ലാ മുസ്ലിംലീഗ് കൗണ്‍സിലറായും അദ്ദേഹം നാട്ടിലും സാന്നിധ്യമറിയിക്കുന്നു. മികച്ച സേവനത്തിന് നിരവധി പുരസ്‌കാരങ്ങളും അദ്ദേഹത്തെ തേടിയെത്തിയിട്ടുണ്ട്. യു.എ.ഇ രൂപീകൃതമായതിനു തൊട്ടപിന്നാലെ അല്‍ഐനിലെത്തിയ അഷ്റഫ് ഐക്യ അറബ് നാടുകളുടെ വളര്‍ച്ചക്കൊപ്പം സഞ്ചരിക്കാനായതിലും രാജ്യത്തിന്റെ പുരോഗതിയിലും അതോടൊപ്പം സന്തോഷകരമായ ജീവിതം നയിക്കാന്‍ കഴിഞ്ഞതിലുമുള്ള നിറസംതൃപ്തിയുമായാണ് നാട്ടിലേക്കു മടങ്ങുന്നത്. നാട്ടിലെ പൊതുരംഗത്തുനിന്നും മാറിനിന്ന പ്രവാസം കഴിഞ്ഞു തിരിച്ചെത്തുമ്പോള്‍ നാട്ടിലെ പൊതുജീവിതത്തില്‍ സജീവമാകാന്‍ കഴിയുമെന്നും അദ്ദേഹം പ്രത്യാശിക്കുന്നു. ഭാര്യ ഖദീജ അഷ്‌റഫ്‌, ഷാര്‍ജയിലുള്ള ആയിഷത്ത് ഹിബ പുത്രിയും അല്‍ ഐനില്‍ തന്നെയുള്ള അബ്ദുള്‍ റഹിമാന്‍ പള്ളിക്കണ്ടം മകനുമാണ്.

യാത്രയയപ്പിന് നന്ദി പ്രകാശിപ്പിച്ചു കൊണ്ട് പ്രിയപ്പെട്ട അഷ്‌റഫ്‌ പള്ളികണ്ടം സംസാരിച്ചു.”നാലര പതിറ്റാണ്ട് കാലത്തെ എന്റെ പ്രവാസ ഭൂമികയായ അൽ ഐനിലെ തൃശൂർ ജില്ലക്കാരായ കെ.എം.സി.സി. സഹ പ്രവർത്ത കർ ഇന്നലെ നൽകിയ സ്നേഹത്തിൽ കുതിർന്ന യാത്രയയപ്പ് എന്റെ കരളും കണ്ണും നനയിക്കുന്ന തായിരുന്നു. ഒരു കെ.എം.സി.സി ക്കാരനാകാൻ കഴിഞ്ഞ എന്റെ പ്രവാസ ജീവിതം ധന്യമാണ്, ഞാൻ ഭാഗ്യവാനുമാണ് എന്നും അദ്ദേഹം പറഞ്ഞു.

ആഖിബ് ഹഫ്സലിന്റെ ഖിറാഅത്തോടെ ചടങ്ങ് ആരംഭിച്ചു..മുൻ അൽ ഐൻ കെ എംസി സി കാസർകോട് ജില്ലാ പ്രസിഡന്റും നിലവിലെ അബുദാബി സംസ്ഥാന ട്രഷറുമായ അസ്ലം കാഞ്ഞങ്ങാടിന്റെ രോഗ ശമനത്തിനായി പ്രത്യേക പ്രാർത്ഥനക്ക് സയ്യിദ് ശിഹാബുദ്ധീൻ തങ്ങൾ ബാ അലവി നേതൃത്വം നൽകി..ജില്ലാ കെ സി സി സി പ്രസിഡന്റ് ഫൈസൽ ഹംസയുടെ അധ്യക്ഷതയിൽ ചേർന്ന യോഗം, അൽ ഐൻ സംസ്ഥാന കെ എം സി സി പ്രസിഡണ്ട്‌ സയ്യിദ് ശിഹാബുദ്ധീൻ തങ്ങൾ ഉദ്ഘാടനം നിർവഹിച്ചു..സംസ്ഥാന ആക്ടിങ് ജന. സെക്രട്ടറി അബ്ദുൽ സലാം മാസ്റ്റർ ,ട്രഷറർ തസ്വീർ,വൈസ് പ്രസിഡണ്ട്‌ ബീരാൻകുട്ടി കാരക്കാട്, സെക്രട്ടറിമാരായ അലിമോൻ,അയ്യൂബ് പൂമാടം,ISC അസിസ്റ്റന്റ് സെക്രട്ടറി ഖാലിദ് പാഷ, സമദ് പൂന്താനം, വിവിധ ജില്ലാ ഭാരവാഹികളായ മജീദ് പറവണ്ണ മലപ്പുറം,അബ്ദുൽ നാസർ കാസർകോട്, അബ്ദു റഹ്മാൻ ഹാജി കോഴിക്കോട്,അബ്ദുൽ ലത്തീഫ് മാസ്റ്റർ കണ്ണൂർ,റജീഫ് വയനാട് ,ഷെല്ലി തൃശൂർ തുടങ്ങിയവർ ആശംസകൾ നേർന്നു. ജില്ലാ ജനറൽ സെക്രട്ടറി മുത്തലിബ് ചാവക്കാട് സ്വാഗതവും ട്രഷറർ കെ എ ബദർ നന്ദിയും പറഞ്ഞു.