ashwin – Chandrika Daily

വിരമിക്കല്‍ പ്രഖ്യാപിച്ചതിന് പിന്നാലെ നാട്ടില്‍ തിരിച്ചെത്തി ആര്‍. അശ്വിന്‍

webdesk18 — Thu, 19 Dec 2024 11:07:25 +0000

ചെന്നൈ: വിരമിക്കല്‍ പ്രഖ്യാപിച്ചതിന് പിന്നാലെ നാട്ടിലേക്കെത്തി ഇന്ത്യന്‍ സ്പിന്നര്‍ ആര്‍. അശ്വിന്‍. ബോര്‍ഡര്‍ഗവാസ്‌കര്‍ ട്രോഫിക്കുള്ള ഇന്ത്യന്‍ സംഘത്തില്‍ ഉള്‍പ്പെട്ട അശ്വിന്‍ മൂന്നാം ടെസ്റ്റിന് പിന്നാലെയാണ് വിരമിക്കല്‍ പ്രഖ്യാപിച്ചത്.

”ഞാന്‍ ചെന്നൈ സൂപ്പര്‍ കിങ്‌സിനായി കളിക്കാന്‍ പോകുകയാണ്. ഒരുപാട് കാലം കളിക്കണമെന്ന് തന്നെയാണ് എന്റെ ആഗ്രഹം. അശ്വിനെന്ന ക്രിക്കറ്റര്‍ അവസാനിച്ചുവെന്ന് ഞാന്‍ കരുതുന്നില്ല. അശ്വിനെന്ന ഇന്ത്യന്‍ ക്രിക്കറ്ററുടെ കരിയര്‍ മാത്രമാണ് അവസാനിച്ചത്”

”പലര്‍ക്കും വിരമിക്കല്‍ ഒരു വൈകാരിക നിമിഷമാകും. പക്ഷേ എനിക്കിത് ആശ്വാസത്തിന്റെയും സംതൃപ്തിയുടേയും നിമിഷമാണ്”അശ്വിന്‍ പ്രതികരിച്ചു.

അനില്‍ കുംബ്ലെക്ക് ശേഷം ഇന്ത്യക്കായി കൂടുതല്‍ വിക്കറ്റ് വീഴ്ത്തിയ ബൗളറായ അശ്വിന്‍ മിക്ക മത്സരങ്ങളിലും ഇന്ത്യയുടെ രക്ഷക്കെത്തിയ താരമാണ്. 13 വര്‍ഷത്തെ ദീര്‍ഘകരിയറിലായി 537 വിക്കറ്റ് വീഴ്ത്തിയിരുന്നു. ഇന്ത്യക്കായി 106 ടെസ്റ്റിലും 116 ഏകദിനത്തിലും 65 ടി20യിലും താരം കളിച്ചിട്ടുണ്ട്. മൂന്ന് ഫോര്‍മാറ്റിലുമായി 775 വിക്കറ്റുകള്‍ അശ്വിന്‍ നേടി.

ബോര്‍ഡര്‍ ഗവാസ്‌കര്‍ ട്രോഫിയിലെ ആദ്യമത്സരത്തില്‍ അശ്വിനെ കളത്തിലിറക്കിയിരുന്നില്ല. രണ്ടാം ടെസ്റ്റില്‍ ഇടം ലഭിച്ചിരുന്നു. തുടര്‍ന്ന് മൂന്നാം മത്സരത്തില്‍ അശ്വിനെ വീണ്ടും കളത്തിലിറക്കിയില്ല. രവീന്ദ്ര ജഡേജ ഫോമിലായിരിക്കേ പേസ് ബൗളിങ്ങിനെ പിന്തുണക്കുന്ന തുടര്‍ ടെസ്റ്റുകളില്‍ കളത്തിലിറക്കില്ല എന്ന തിരിച്ചറിവിലാണ് അശ്വിന്‍ വിരമിക്കല്‍ പ്രഖ്യാപിച്ചത്. പരമ്പരയുടെ പാതിവഴിയില്‍ വെച്ച് അശ്വിന്‍ വിരമിക്കല്‍ പ്രഖ്യാപിച്ചതില്‍ വിമര്‍ശനവുമായി സുനില്‍ ഗവാസ്‌കര്‍ അടക്കമുള്ളവര്‍ രംഗത്തെത്തിയിട്ടുണ്ട്.

ടെസ്റ്റില്‍ വീണ്ടും ചരിത്രവുമായി അശ്വിന്‍

chandrika — Sat, 05 Aug 2017 15:49:04 +0000

കൊളംബോ: രവിചന്ദ്രന്‍ അശ്വിന്‍ തന്റെ ജൈത്രയാത്ര തുടരുന്നു. ലങ്കക്കെതിരായ രണ്ടാം ടെസ്റ്റില്‍ 69 റണ്‍സ് വിട്ടുകൊടുത്ത് അഞ്ച് വിക്കറ്റുകള്‍ വീഴ്ത്തിയ അശ്വിന്റെ 26ാമത് അഞ്ച് വിക്കറ്റ് പ്രകടനമാണിത്. 51 മത്സരങ്ങളില്‍ നിന്നാണ് അശ്വിന്റെ നേട്ടം. ഇതോടെ ടെസ്റ്റിലെ അഞ്ച് വിക്കറ്റ് നേട്ടത്തില്‍ ഹര്‍ഭജന്‍ സിങിനെ അശ്വിന്‍ പിന്നിലാക്കി. 103 ടെസ്റ്റുകളില്‍ നിന്ന് 25 ‘ഫൈഫര്‍’ ആയിരുന്നു ഭാജി നേടിയിരുന്നത്. ഇന്ത്യന്‍ ബൗളര്‍മാരില്‍ ഇനി അശ്വിന് മുന്നിലുള്ളത് ഇതിഹാസ സ്പിന്നര്‍ അനില്‍ കുംബ്ലെയാണ്. 132 ടെസ്റ്റ് മത്സരങ്ങളില്‍ 35 തവണയാണ് കുംബ്ലെ അഞ്ച് വിക്കറ്റ് നേട്ടം കരസ്ഥമാക്കിയത്. അശ്വിന്‍ ഈ വേഗത്തില്‍ കുതിപ്പ് തുടര്‍ന്നാല്‍ രണ്ട് സീസണുകള്‍ക്കുള്ളില്‍ ഫൈഫര്‍ നേട്ടത്തില്‍ കുംബ്ലെ അശ്വിന് പിന്നിലാകുമെന്നാണ് കണക്കുകൂട്ടല്‍. 32 വര്‍ഷംപഴക്കമുള്ള ഒരു ലോകറെക്കോഡും അശ്വിന്‍ കഴിഞ്ഞ ദിവസം തിരുത്തിക്കുറിച്ചിരുന്നു. ടെസ്റ്റ് ക്രിക്കറ്റില്‍ ഏറ്റവും കുറവ് മത്സരങ്ങളില്‍ നിന്ന് 2,000 റണ്‍സും 250 വിക്കറ്റുകളും സ്വന്തമാക്കുന്ന താരമെന്ന റെക്കോഡാണ് അശ്വിന്‍ സ്വന്തം പേരിലാക്കിയത്. ന്യൂസിലാന്‍ഡ് ഇതിഹാസ താരം റിച്ചാര്‍ഡ് ഹാഡ്‌ലിയുടെ റെക്കോഡാണ് അശ്വിന്‍ മറികടന്നത്. 54 ടെസ്റ്റുകളില്‍ നിന്നായിരുന്നു ഹാഡ്‌ലിയുടെ നേട്ടം. 51 മത്സരങ്ങളില്‍ നിന്ന് അശ്വിന്‍ അത് കരസ്ഥമാക്കി. 281 വിക്കറ്റുകളാണ് അശ്വിന്‍ ടെസ്റ്റില്‍ നേടിയിരിക്കുന്നത്. ലങ്കയ്‌ക്കെതിരായ രണ്ടാം് ടെസ്റ്റിലെ ആദ്യ ഇന്നിങ്ങ്‌സിലാണ് അശ്വിന്‍ 2,000 റണ്‍സ് കടന്നത്. അഞ്ച് ഫോറുകളും ഒരു സിക്‌സറുമടക്കം 54 റണ്‍സും അശ്വിന്‍ നേടി.

ചെന്നൈ സൂപ്പര്‍ കിങ്‌സ് തിരിച്ചുവരവ്; മതിമറന്ന സന്തോഷത്തില്‍ അശ്വിന് പാരയായത് ഉപമ

chandrika — Sat, 22 Jul 2017 07:05:47 +0000

ചെന്നൈ: ഐപിഎല്ലിലെ ചെന്നൈ സൂപ്പര്‍ കിങ്‌സിനെ ഇംഗ്ലീഷ് പ്രീമിയര്‍ ലീഗിലെ മാഞ്ചസ്റ്റര്‍ യുനൈറ്റഡിനോട് ഉപമിച്ച് ഇന്ത്യന്‍ താരം ആര്‍ അശ്വിന്‍ കുടുങ്ങി. മ്യൂണിക്ക് ദുരന്തത്തിന് ശേഷം ഉയര്‍ത്തെഴുന്നേറ്റ മാഞ്ചസ്റ്റര്‍ ടീമിനോടാണ് അശ്വിന്‍ ചെന്നൈ സൂപ്പര്‍ കിങ്‌സിനെ ഉപമിച്ചത്. ഇതോടെ ചെന്നൈ ആരാധകരുള്‍പ്പെടെ അശ്വിനെതിരെ രംഗത്തെത്തുകയായിരുന്നു. ഇതോടെ വിശദീകരണവുമായി അശ്വിന് വീണ്ടും രംഗത്ത് വരേണ്ടി വന്നു. മ്യൂണിക് ദുരന്തത്തില്‍നിന്നും മാഞ്ചസ്റ്റര്‍ യുണൈറ്റഡ് ഫുട്‌ബോള്‍ ടീം തിരിച്ചുകയറിയതുപോലെയാവും രണ്ടുവര്‍ഷത്തെ സസ്‌പെന്‍ഷനു ശേഷം ഐ.പി.എല്ലിലേക്ക് ചെന്നൈ സൂപ്പര്‍ കിങ്‌സിന്റെ തിരിച്ചുവരവെന്നായിരുന്നു അശ്വിന്റെ വിവാദ പരാമര്‍ശം. സൂപ്പര്‍ കിങ്‌സിന്റെ ആരാധകരും സാമൂഹികമാധ്യമങ്ങളും ഇതിനെതിരെ രംഗത്തുവന്നതോടെ കാര്യങ്ങള്‍ വിശദമാക്കിക്കൊണ്ട് അശ്വിന് ട്വീറ്റു ചെയ്യേണ്ടിവന്നു. 1958ലെ മ്യൂണിക് ദുരന്തത്തില്‍ മാഞ്ചസ്റ്റര്‍ യുണൈറ്റഡിന്റെ എട്ടുതാരങ്ങളടക്കം 23 പേരാണ് മരിച്ചത്. ബല്‍ഗ്രേഡില്‍ യൂറോപ്യന്‍ കപ്പ് കളിച്ചശേഷം മാഞ്ചെസ്റ്റര്‍ താരങ്ങള്‍ കയറിയ ബ്രിട്ടീഷ് യൂറോപ്യന്‍ എയര്‍വേസ് വിമാനം ഇന്ധനം നിറച്ച് പറന്നുയരുമ്പോള്‍ തകര്‍ന്നുവീഴുകയായിരുന്നു. ദുരന്തത്തില്‍ രക്ഷപ്പെട്ട ബോബി ചാള്‍ട്ടനും ബില്‍ ഫൂക്‌സുമടങ്ങിയ ടീം 10 വര്‍ഷത്തിനുശേഷം യൂറോപ്യന്‍ കപ്പുനേടുന്ന ആദ്യ ഇംഗ്ലീഷ് ടീമായിമാറി. ഇക്കാര്യം ഓര്‍മ്മിപ്പിച്ചായിരുന്നു അശ്വിന്റെ ചെന്നൈ ടീമുമായുളള താരതമ്യം. ഐ.പി.എല്ലില്‍ രണ്ടുവര്‍ഷത്തെ സസ്‌പെന്‍ഷന്‍ കഴിഞ്ഞ് അടുത്ത സീസണില്‍ സൂപ്പര്‍ കിങ്‌സ് വീണ്ടുമെത്തുകയാണ്. ഇതാണ് അശ്വിനെ ഇത്തരമൊരു താരതമ്യത്തിന് പ്രേരിപ്പിച്ചത്. എന്നാല്‍ അശ്വിന്റെ ഉപമ അതിശയോക്തിപരമാണെന്നും അനാവശ്യമാണെന്നുമാണ് ഒരു വിഭാഗം ആരാധകര്‍ വാദിക്കുന്നത്. കുറ്റവും ദുരന്തവും തമ്മില്‍ എങ്ങനെയാണ് താരതമ്യം അര്‍ഹിക്കുന്നതെന്നും ഇവര്‍ ചോദിക്കുന്നു. ഇതോടെ തന്റെ അഭിപ്രായം അടര്‍ത്തിയെടുത്ത് തെറ്റായ രീതിയില്‍ വ്യാഖ്യാനിക്കുകയാണുണ്ടായതെന്ന് അശ്വിന്‍ വിശദമാക്കി. രണ്ടുവര്‍ഷത്തെ ഇടവേളയ്ക്കുശേഷം പൂര്‍വാധികം ശക്തിയോടെ ടീം തിരിച്ചുവരുമെന്നാണ് താന്‍ ഉദ്ദേശിച്ചതെന്നും അശ്വിന്‍ പറഞ്ഞു. അശ്വിന്റെ വിശദീകരണത്തിന് ശേഷവും സാമുഹ്യ മാധ്യമങ്ങളില്‍ ഇക്കാര്യത്തെ കുറിച്ച് ചര്‍ച്ച പൊടിപൊടിക്കുകയാണ്.

തന്റെ പ്രചോദനം അശ്വിനെന്ന് പാക് ക്രിക്കറ്റര്‍

Web Desk — Mon, 17 Oct 2016 19:09:34 +0000

ദുബൈ: ഇന്ത്യന്‍ ഓഫ് സ്പിന്നര്‍ രവിചന്ദ്രന്‍ അശ്വിന്റെ വാക്കുകള്‍ ദുബൈ ടെസ്റ്റില്‍ മികച്ച പ്രകടനം നടത്താന്‍ സഹായിച്ചെന്ന് പാകിസ്താന്‍ സ്പിന്നര്‍ യാസിര്‍ ശാ. വെസ്റ്റിന്‍ഡീസിനെതിരെ അഞ്ചു വിക്കറ്റ് പ്രകടനവുമായി വേഗത്തില്‍ നൂറു ടെസ്റ്റ് വിക്കറ്റുകള്‍ എന്ന നേട്ടത്തില്‍ രണ്ടാം സ്ഥാനം പങ്കിടാന്‍ യാസിറിന് കഴിഞ്ഞിരുന്നു. പതിനേഴ് മത്സരങ്ങളില്‍ നിന്നായിരുന്നു നേട്ടം.

‘നന്മകള്‍ ആശംസിച്ചതില്‍ അദ്ദേഹത്തോട് നന്ദിയുണ്ട്. വേഗത്തില്‍ 200 വിക്കറ്റ് നേടിയതിന്റെ റെക്കോര്‍ഡ് പങ്കിടുന്ന ഒരു മഹാനായ ബൗളര്‍ അത്തരത്തില്‍ സന്ദേശമയക്കുമ്പോള്‍ പ്രചോദനം ലഭിക്കുന്നത് സ്വാഭാവികമാണ്’ അശ്വിന്റെ ട്വീറ്റിനെ കുറിച്ച് പ്രതികരിക്കുകയായിരുന്നു യാസിര്‍ ശാ.
ന്യൂസിലാന്‍ഡിനെതിരെ ഇക്കഴിഞ്ഞ ടെസ്റ്റ് പരമ്പരയില്‍ വേഗത്തില്‍ 200 ടെസ്റ്റു വിക്കറ്റുകള്‍ സ്വന്തമാക്കുന്ന രണ്ടാമത്തെ താരമെന്ന നേട്ടം അശ്വിന്‍ സ്വന്തമാക്കിയിരുന്നു. മികച്ച ഫോമില്‍ നില്‍ക്കുന്ന അശ്വിന്റെ വാക്കുകള്‍ യാസിറിന് ആത്മവിശ്വാസം പകരുകയും ചെയ്തു. ‘ഗുഡ് ലക്ക്. കരുത്ത് അദ്ദേഹത്തോടൊപ്പമുണ്ടായിരിക്കട്ടെ. അദ്ദേഹത്തെ (ബൗളിങ്) കണ്ടിരിക്കല്‍ ആഹ്ലാദകരമാണ്’ പാകിസ്താന്‍ – വെസ്റ്റിന്‍ഡീസ് ടെസ്റ്റിനിടെ കഴിഞ്ഞയാഴ്ച യാസിറിനെ പുകഴ്ത്തിക്കൊണ്ട് അശ്വിന്‍ ട്വീറ്റ് ചെയ്തു.

സമീപ ഭാവിയില്‍ തന്നെ ഇന്ത്യ-പാകിസ്താന്‍ മത്സരത്തിന് കളമൊരുങ്ങിയേക്കുമെന്നും യാസിര്‍ ശുഭാപ്തി വിശ്വാസം പ്രകടിപ്പിച്ചു. രാഷ്ട്രീയ സമ്മര്‍ദം കാരണം 2007നു ശേഷം ഇന്ത്യയും പാകിസ്താനും ടെസ്റ്റ് പരമ്പര കളിച്ചിട്ടില്ല. ‘പാകിസ്താന്റേയും ഇന്ത്യയുടേയും ഓരോ കളിക്കാരും പരസ്പരം കളിക്കണമെന്നാഗ്രഹിക്കുന്നവരാണ്. ഞാന്‍ ഇന്ത്യക്കെതിരെ ടെസ്റ്റ് കളിച്ചിട്ടില്ല. അതിനാല്‍ എനിക്ക് ഏതായാലും ആഗ്രഹം ഉണ്ട്’ യാസിര്‍ കൂട്ടിച്ചേര്‍ത്തു.

കിവീസ് ബാറ്റ്‌സ്മാന്‍മാരെ വട്ടം കറക്കി അശ്വിന്റെ മാസ്മരിക ബൗളിങ്; ആ പ്രകടനം കാണാം

Web Desk — Tue, 11 Oct 2016 18:13:52 +0000

ഇന്‍ഡോറിലെ ഹോള്‍ക്കര്‍ സ്‌റ്റേഡിയത്തില്‍ സ്പിന്നര്‍ അശ്വിന്‍ സംഹാര രൂപം പൂണ്ടപ്പോള്‍ മറുപടിയുണ്ടായിരുന്നില്ല ന്യൂസിലാന്റിന്. ഇന്ത്യ വെച്ചു നീട്ടിയ 475 റണ്‍സെന്ന പടുകൂറ്റന്‍ ലക്ഷ്യത്തിലേക്ക് ബാറ്റേന്തിയ കിവീസ് താരങ്ങള്‍ അശ്വിന് മുന്നില്‍ കറങ്ങി വീഴുകയായിരുന്നു. ഏഴു താരങ്ങളാണ് തമിഴ്‌നാട്ടുകാരന് മുന്നില്‍ ബാറ്റു വെച്ച് കീഴടങ്ങിയത്.

ഏഴു വിക്കറ്റുകളില്‍ നാലു പേരും അശ്വിന്റെ ദൂസ്രക്ക് മുന്നില്‍ വിക്കറ്റ് തെറിച്ചാണ് പുറത്തായത്. കെയ്ന്‍ വില്യംസണ്‍, റോസ് ടെയ്‌ലര്‍, ലൂക്ക് റോഞ്ചി, മിച്ചല്‍ സാന്റ്‌നര്‍ തുടങ്ങി ന്യൂസിലാന്റിന്റെ മുന്‍നിരയെ എറിഞ്ഞിട്ട അശ്വിന്‍ വാലറ്റക്കാരെയും വന്ന വഴിക്ക് തിരിച്ചയച്ചു.

ആദ്യ ഇന്നിങ്‌സില്‍ ആറു വിക്കറ്റ് വീഴ്ത്തിയ താരം രണ്ടിന്നിങ്‌സിലുമായി 13 വിക്കറ്റുകളാണ് വീഴ്ത്തിയത്. ഇരട്ട ശതകം തികച്ച ക്യാപ്റ്റന്‍ കോഹ്ലിയെ പിന്തള്ളി മാന്‍ഓഫ്ദ മാച്ച് പുരസ്‌കാരം നേടാനും ഈ ബൗളിങ് മികവ് അശ്വിനെ തുണച്ചു.

റോസ് ടെയ്‌ലര്‍, ലൂക്ക് റോഞ്ചി എന്നിവരെ വീഴ്ത്തിയ അശ്വിന്റെ ബോളുകള്‍ അതിമനോഹരമായിരുന്നു. ഓഫ്‌സൈഡില്‍ കുത്തിയ ശേഷം ലെഗിലേക്ക് ടേണ്‍ ചെയ്ത പന്തുകള്‍ക്കു മുമ്പില്‍ ദിശയറിയാതെ വിക്കറ്റു തെറിക്കുകയായിരുന്നു.

കാണാം അശ്വിന്റെ ആ മാസ്മരിക ബൗളിങ് പ്രകടനം.

https://www.youtube.com/watch?v=pv2mPX4Bt9c