asian games – Chandrika Daily

ഏഷ്യന്‍ ഗെയിംസ്; താരങ്ങള്‍ക്ക് പാരിതോഷികം പരിഗണിക്കാതെ മന്ത്രിസഭ; വീണ്ടും അവഗണന

webdesk13 — Wed, 11 Oct 2023 10:52:41 +0000

ഏഷ്യന്‍ ഗെയിംസ് മെഡല്‍ ജേതാക്കള്‍ക്കുള്ള പാരിതോഷികം മന്ത്രിസഭ ഇന്ന് പരിഗണിച്ചില്ല. മന്ത്രിസഭായോഗത്തില്‍ മന്ത്രി വി. അബ്ദുറഹിമാന്‍ വിഷയം അവതരിപ്പിച്ചുമില്ല. 2018 ലെ ജക്കാര്‍ത്ത ഏഷ്യന്‍ഗെയിംസില്‍ സ്വര്‍ണമെഡല്‍ നേടിയവര്‍ക്ക് 20 ലക്ഷവും വെള്ളി നേടിയവര്‍ക്ക് പതിനഞ്ചും വെങ്കലം നേടിവര്‍ക്ക് പത്ത് ലക്ഷം രൂപയുമാണ് സംസ്ഥാന സര്‍ക്കാര്‍ നല്‍കിയത്.

അതിനെക്കാള്‍ കൂടുതല്‍ തുക ഇത്തവണ കായിക വകുപ്പ് ശുപാര്‍ശ ചെയ്തു. എന്നാല്‍ എന്തുകൊണ്ടാണ് ശുപാര്‍ശ ഈ മന്ത്രിസഭായോഗം പരിഗണിക്കാത്തതെന്ന് വ്യക്തമല്ല. പുരസ്‌കാരത്തുക മുഖ്യമന്ത്രിക്ക് തീരുമാനിക്കാമെന്നാണ് കായിക വകുപ്പിന്റെ നിലപാട്

മെഡല്‍ വേട്ടയില്‍ സെഞ്ച്വറിയടിച്ച് ഇന്ത്യ; വനിതകളുടെ കബഡിയിലും സ്വര്‍ണം

webdesk11 — Sat, 07 Oct 2023 04:25:21 +0000

ഏഷ്യന്‍ ഗെയിംസ് മെഡല്‍ വേട്ടയില്‍ സെഞ്ച്വറി തികച്ച് ഇന്ത്യ. വനിതാ കബഡിയിലെ സ്വര്‍ണ നേട്ടത്തോടെ 100 മെഡലെന്ന ചരിത്ര നേട്ടം ഇന്ത്യ പിന്നിട്ടത്. ചൈനീസ് തായ്‌പേയിയെ തോല്‍പ്പിച്ചാണ് ഇന്ത്യ ഫൈനല്‍ ജയിച്ചത്. ശനിയാഴ്ച അമ്പയ്ത്തിലെ രണ്ട് സ്വര്‍ണ മെഡല്‍ നേട്ടത്തോടെയായിരുന്നു ഇന്ത്യയുടെ തുടക്കം. ഇതോടെ 25 സ്വര്‍ണവും 35 വെള്ളിയും 40 വെങ്കലവുമടക്കം 100 മെഡലാണ് ഇന്ത്യ നേടിയത്.

അതേസമയം പുരുഷ ക്രിക്കറ്റ് ഫൈനലിൽ ഇന്ത്യ ഇന്ന് അഫ്ഗാനിസ്ഥാനെ നേരിടും. ബാഡ്മിന്‍റണിലും കബഡിയിലുമാണ് ഇന്ത്യയുടെ മറ്റ് സ്വര്‍ണ പ്രതീക്ഷകള്‍. രാവിലെ പതിനൊന്നരയ്ക്ക് തുടങ്ങുന്ന ക്രിക്കറ്റിൽ അഫ്ഗാനിസ്ഥാനാണ് എതിരാളികൾ.

ഏഷ്യന്‍ ഗെയിംസ്: മിക്‌സഡ് സ്‌ക്വാഷില്‍ ഇന്ത്യക്ക് സ്വര്‍ണം; ബാഡ്മിന്റണില്‍ എച്ച്.എസ് പ്രണോയ് സെമിയില്‍

webdesk14 — Thu, 05 Oct 2023 07:32:31 +0000

ഏഷ്യന്‍ ഗെയിംസില്‍ ഇന്ത്യക്ക് 20ാം സ്വര്‍ണം. സ്‌ക്വാഷ് മിക്‌സഡ് ഡബിള്‍സില്‍ മലയാളിയായ ദീപിക പള്ളിക്കല്‍ ഹരീന്ദര്‍ പല്‍ സിങ് സന്ധു സഖ്യമാണ് ഇന്ത്യക്ക് സുവര്‍ണത്തിളക്കം നേടിക്കൊടുത്തത്. ഫൈനലില്‍ രണ്ടാം സീഡായ മലേഷ്യയെ 20ത്തിന് തകര്‍ത്താണ് ഒന്നാം സീഡായ ഇന്ത്യ ഒന്നാമതെത്തിയത്.

ഏഷ്യന്‍ ഗെയിംസില്‍ ബാഡ്മിന്റണില്‍ എച്ച്എസ് പ്രണോയ് മെഡല്‍ ഉറപ്പിച്ചു. ക്വര്‍ട്ടര്‍ ഫൈനലില്‍ മലേഷ്യന്‍ താരത്തെ മൂന്ന് ഗെയിം പോരാട്ടത്തില്‍ തോല്‍പ്പിച്ചാണ് സെമിബെര്‍ത്ത് ഉറപ്പാക്കിയത്. ബാഡ്മിന്റണില്‍ ഇന്ത്യയുടെ മെഡല്‍ പ്രതീക്ഷയായ പിവി സിന്ധു ക്വാര്‍ട്ടര്‍ ഫൈനല്‍ മത്സരത്തില്‍ ചൈനീസ് താരത്തോട് പരാജയപ്പെട്ടു. 1982ല്‍ വെങ്കലം നേടിയ സയ്യിദ് മോദിക്ക് ശേഷം ഏഷ്യന്‍ ഗെയിംസ് ബാഡ്മിന്റണ്‍ പുരുഷ സിംഗിള്‍സില്‍ മെഡല്‍ ഉറപ്പാക്കുന്ന ആദ്യ ഇന്ത്യന്‍ താരമാണ് പ്രണോയ്.

വനിതകളുടെ കോമ്പൗണ്ട് അമ്പെയ്ത്ത് ടീമിന് സുവർണനേട്ടം ;ഏഷ്യൻ ഗെയിംസിൽ ഇന്ത്യക്ക് 19 ആം സ്വർണം

webdesk15 — Thu, 05 Oct 2023 05:33:59 +0000

ഏഷ്യൻ ഗെയിംസിൽ ഇന്ത്യക്ക് 19ആം സ്വർണം. വനിതകളുടെ ടീം കോമ്പൗണ്ട് അമ്പെയ്ത്ത് ഇനത്തിലാണ് ഇന്ത്യൻ സഖ്യം സുവർണനേട്ടം കുറിച്ചത്. ജ്യോതി സുരേഖ, അദിതി സ്വാമി, പർനീത് കൗർ എന്നിവരടങ്ങുന്ന ടീം ഫൈനലിൽ ചൈനീസ് തായ്പേയ് സഖ്യത്തെ പരാജയപ്പെടുത്തുകയായിരുന്നു. മെഡൽ നിലയിൽ ഇന്ത്യ നാലാം സ്ഥാനത്ത് തുടരുകയാണ്. ഏഷ്യൻ ഗെയിംസ് ചരിത്രത്തിലെ തന്നെ ഏറ്റവും മികച്ച മെഡൽ വേട്ടയാണ് ഇന്ത്യ നടത്തുന്നത്. 19 സ്വർണവും 31 വെള്ളിയും 32 വെങ്കലവുമടക്കം 81 മെഡലുകളാണ് ഇന്ത്യക്ക് ആകെയുള്ളത്.

4×400 മീറ്റര്‍ റിലേയില്‍ ഇന്ത്യക്ക് സ്വര്‍ണം; ടീമില്‍ മൂന്ന് മലയാളി താരങ്ങള്‍

webdesk11 — Wed, 04 Oct 2023 14:16:11 +0000

ഏഷ്യന്‍ ഗെയിംസ് അറ്റ്‌ലറ്റിക്‌സില്‍ മെഡല്‍ വേട്ട തുടര്‍ന്ന് ഇന്ത്യ. 4*400 മീറ്റര്‍ പുരുഷറിലേയില്‍ ഇന്ത്യന്‍ താരങ്ങള്‍ സ്വര്‍ണം നേടി. മലയാളികളായ മുഹമ്മദ് അനസ്, മുഹമ്മദ് അജ്മല്‍, അമോജ് ജേക്കബ് എന്നിവര്‍ക്ക് പുറമേ രാജേഷ് രമേശ് കൂടി ഉള്‍പ്പെട്ട ടീമാണ് ഒന്നാമതെത്തിയത്.

മൂന്ന് മിനിറ്റും ഒരു സെക്കന്‍ഡ് എടുത്താണ് ടീം സ്വര്‍ണ്ണം സ്വന്തമാക്കിയത്. ഖത്തര്‍,ശ്രീലങ്ക ടീമുകള്‍ യഥാസമയം വെള്ളിയും വെങ്കലവും സ്വന്തമാക്കി. വനിതകളുടെ റിലേ മത്സരത്തില്‍ വനിതകള്‍ വെള്ളി നേടി.

അതേസമയം ഏഷ്യന്‍ ഗെയിംസ് ജാവലിന്‍ ത്രോയില്‍ സ്വര്‍ണ്ണവും വെള്ളിയും സ്വന്തമാക്കി ഇന്ത്യ. ഇന്ത്യന്‍ താരം നീരജ്വപ്ര സ്വര്‍ണം നേടിയപ്പോള്‍ കിഷോര്‍കുമാര്‍ ജനയ്ക്ക് വെള്ളി സ്വന്തമായി. നാലാം അവസരത്തില്‍ 88.88 മീറ്റര്‍ പിന്നിട്ടാണ് നീരജ് സ്വര്‍ണം സ്വന്തമാക്കിയത്. 87.54 മീറ്റര്‍ ദൂരത്തേക്ക് ജാവലിന്‍ പായിച്ചാണ് കിഷോര്‍ കുമാര്‍ വെള്ളി സ്വന്തമാക്കിയത്.

ജാവലിനില്‍ ഇന്ത്യയ്ക്കു ഡബിള്‍; നീരജിന് സ്വര്‍ണം, കിഷോര്‍ കുമാറിന് വെള്ളി

webdesk11 — Wed, 04 Oct 2023 13:27:59 +0000

ഏഷ്യന്‍ ഗെയിംസ് ജാവലിന്‍ ത്രോയില്‍ സ്വര്‍ണ്ണവും വെള്ളിയും സ്വന്തമാക്കി ഇന്ത്യ. ഇന്ത്യന്‍ താരം നീരജ്വപ്ര സ്വര്‍ണം നേടിയപ്പോള്‍ കിഷോര്‍കുമാര്‍ ജനയ്ക്ക് വെള്ളി സ്വന്തമായി. നാലാം അവസരത്തില്‍ 88.88 മീറ്റര്‍ പിന്നിട്ടാണ് നീരജ് സ്വര്‍ണം സ്വന്തമാക്കിയത്. 87.54 മീറ്റര്‍ ദൂരത്തേക്ക് ജാവലിന്‍ പായിച്ചാണ് കിഷോര്‍ കുമാര്‍ വെള്ളി സ്വന്തമാക്കിയത്.

വനിത ലോങ് ജമ്പിൽ മലയാളി താരം ആൻസി സോജന് വെള്ളി

webdesk14 — Mon, 02 Oct 2023 13:53:29 +0000

ഏഷ്യന്‍ ഗെയിംസ് അത്‌ലറ്റിക്‌സില്‍ ഒരു മലയാളി താരത്തിനു കൂടി മെഡല്‍ തിളക്കം. വനിതകളുടെ ലോങ് ജംപില്‍ ഇന്ത്യക്കായി മത്സരിച്ച ആന്‍സി സോജന്‍ വെള്ളി മെഡല്‍ നേടി. കരിയറിലെ ഏറ്റവും മികച്ച പ്രകടനം തന്നെ ആന്‍സി ഹാങ്ചൗവില്‍ പുറത്തെടുത്തു.

അഞ്ചാം ശ്രമത്തില്‍ 6.63 മീറ്റര്‍ ചാടിയാണ് 19കാരി രണ്ടാം സ്ഥാനത്തേക്ക് കുതിച്ചത്. 6.73 മീറ്റര്‍ ചാടിയ ചൈനയുടെ സിയോങ് ഷിഖിക്കാണ് സ്വര്‍ണം. 6.48 മീറ്റര്‍ ചാടിയ മറ്റൊരു ഇന്ത്യന്‍ താരം ഷൈലി സിങ് അഞ്ചാമതായാണ് ഫിനിഷ് ചെയ്തത്.

ആദ്യ ശ്രമത്തില്‍ 6.13, രണ്ടാം ശ്രമത്തില്‍ 6.49, മൂന്നാം ശ്രമത്തില്‍ 6.56, നാലാം ശ്രമത്തില്‍ 6.30 മീറ്റര്‍ എന്നിങ്ങനെയായിരുന്നു ആന്‍സിയുടെ മുന്നേറ്റം. അഞ്ചാം ശ്രമത്തില്‍ ചാടിയ 6.63 മീറ്റര്‍ താരത്തിന്റെ മികച്ച വ്യക്തിഗത പ്രകടനം കൂടിയായി മാറി.

വിദ്യ രാംരാജ് പി.ടി ഉഷയുടെ റെക്കോര്‍ഡിനൊപ്പം; ഏഷ്യന്‍ ഗെയിംസില്‍ മെഡല്‍ പ്രതീക്ഷ

webdesk13 — Mon, 02 Oct 2023 06:06:23 +0000

ഇന്ത്യ കണ്ട എക്കാലത്തെയും മികച്ച ഓട്ടക്കാരിയായ പി ടി ഉഷയ്‌ക്കൊപ്പം എത്തി വിദ്യ രാംരാജ്. വനിതകളുടെ 400 മീറ്റര്‍ ഹര്‍ഡില്‍സില്‍ പിടി ഉഷ കുറിച്ച റെക്കോര്‍ഡിനൊപ്പമാണ് വിദ്യ രാംരാജ് എത്തിയത്.

ഏഷ്യന്‍ ഗെയിംസ് ഹര്‍ഡില്‍സില്‍ 55.42 സെക്കന്‍ഡില്‍ വിദ്യ രാംരാജ് ഫിനിഷ് ചെയ്തപ്പോഴാണ് പിടി ഉഷയുടെ റെക്കോര്‍ഡിനൊപ്പം എത്തിയത്. പി ടി ഉഷ 1984ല്‍ ലൊസാഞ്ചലസില്‍ സൃഷ്ടിച്ച റെക്കോര്‍ഡിനൊപ്പമാണ് വിദ്യാ രാംരാജ് എത്തിയത്.

ഹീറ്റ്‌സില്‍ ഒന്നാമതെത്തിയ വിദ്യാ രാംരാജ് 400 മീറ്റര്‍ ഹര്‍ഡില്‍സില്‍ ഫൈനലില്‍ പ്രവേശിച്ച് ഇന്ത്യയ്ക്ക് മെഡല്‍ പ്രതീക്ഷ നല്‍കി. കഴിഞ്ഞ മാസം ചണ്ഡിഗഡില്‍ നടന്ന ഇന്ത്യന്‍ ഗ്രാന്‍പ്രി അത്‌ലറ്റിക്‌സിന്റെ അഞ്ചാംപാദത്തില്‍ ഒരു സെക്കന്‍ഡിന്റെ വ്യത്യാസത്തിലാണ് വിദ്യാ രാംരാജിന് ദേശീയ റെക്കോര്‍ഡ് നഷ്ടമായത്.

അന്ന് സ്വര്‍ണം നേടിയെങ്കിലും 55.43 സെക്കന്‍ഡിലാണ് ഫിനിഷ് ചെയ്തത്. 1984ലെ ലൊസാഞ്ചലസ് ഒളിംപിക്‌സില്‍ പിടി ഉഷ കുറിച്ച 55.42 സെക്കന്‍ഡാണ് വനിതാ 400 മീറ്റര്‍ ഹര്‍ഡില്‍സിലെ ദേശീയ റെക്കോര്‍ഡ് സമയം. ഇതേ മത്സരത്തിലാണ് നിമിഷാര്‍ധങ്ങളുടെ വ്യത്യാസത്തിലാണ് ഉഷയ്ക്ക് മെഡല്‍ നഷ്ടമായത്.

ഏഷ്യന്‍ ഗെയിംസ്; 3000 മീറ്റർ സ്റ്റീപ്ൾ ചേസിൽ അവിനാശ് സാബ്‌ലെക്ക് സ്വര്‍ണം

webdesk13 — Sun, 01 Oct 2023 12:15:29 +0000

ഏഷ്യൻ ഗെയിംസ് അത്‌ലറ്റിക്‌സിൽ ഇന്ത്യക്ക് ആദ്യ മെഡൽ. 3000 മീറ്റർ സ്റ്റീപ്പ്ൾ ചേസിൽ അവിനാശ് സാബ്‌ലെയാണ് സ്വർണം നേടിയത്. എട്ട് മിനിറ്റും 19 സെക്കൻഡും കൊണ്ടാണ് അവിനാശ് ഫിനിഷ് ചെയ്തത്. മറ്റു താരങ്ങളെ ബഹുദൂരം പിന്നിലാക്കി 25 മീറ്ററോളം വ്യത്യാസത്തിലാണ് അവിനാശ് സ്വർണ മെഡൽ നേട്ടത്തിലേക്ക് ഓടിക്കയറിയത്.

ജക്കാര്‍ത്തയില്‍ നടന്ന കഴിഞ്ഞ ഏഷ്യന്‍ ഗെയിംസില്‍ ഇറാന്‍ താരം ഹൊസൈന്‍ കെയ്ഹാനി സ്ഥാപിച്ച റെക്കോഡാണ് അവിനാഷ് മറികടന്നത്. 8:22.29 സെക്കന്‍ഡിലായിരുന്നു ഇറാന്‍ താരം അന്ന് ഫിനിഷ് ചെയ്തത്. ഈയിനത്തില്‍ നിലവിലെ ദേശീയ റെക്കോഡ് ഉടമകൂടിയാണ് അവിനാഷ്.

2019ൽ എട്ട് മിനിറ്റും 30 സെക്കൻഡും കൊണ്ട് ഏഷ്യൻ ചാമ്പ്യൻഷിപ്പിൽ വെള്ളി നേടിയിരുന്നു. അത് മറികടക്കുന്ന പ്രകടനമാണ് അവിനാശ് ഹാങ്‌ചോയിൽ നടത്തിയത്. മഹാരാഷ്ട്രയിലെ ഒരു കർഷക കുടുംബത്തിൽ ജനിച്ച അവിനാശ് ആറു കിലോമീറ്ററോളം നടന്നാണ് സ്‌കൂളിൽ പോയിരുന്നത്. ബാല്യകാലത്തെ ഈ അനുഭവങ്ങളാണ് അദ്ദേഹത്തിലെ അത്‌ലറ്റിനെ രൂപപ്പെടുത്തിയത്.

അത്‌ലറ്റിക്‌സില്‍ ഇന്ത്യക്കിന്ന് രണ്ട് മലയാളി ഫൈനല്‍; ശ്രീശങ്കര്‍, ജിന്‍സണ്‍ ഇന്ന് മെഡലിന്

webdesk11 — Sun, 01 Oct 2023 04:50:29 +0000

ഹാങ്‌ചോ: ഇന്ന് അത്‌ലറ്റിക്‌സില്‍ ഇന്ത്യക്ക് രണ്ട് മലയാളി ഫൈനല്‍. പുരുഷന്മാരുടെ ലോങ്ജമ്പില്‍ മുരളി ശ്രീശങ്കറും 1500 മീറ്ററില്‍ ജിന്‍സണ്‍ ജോണ്‍സണുമാണ് ഫൈനലില്‍ ഇറങ്ങുന്നത്. ഇന്നലെ നടന്ന പ്രാഥമിക റൗണ്ടില്‍ പാലക്കാട്ടുകാരനായ മുരളി ശ്രീശങ്കര്‍ 7.97 മീറ്റര്‍ ചാടയാണ് ഫൈനല്‍ ബെര്‍ത്ത് സ്വന്തമാക്കിയത്. ഏഷ്യന്‍ ചാമ്പ്യന്‍ഷിപ്പില്‍ വെള്ളി നേടിയ ശ്രീശങ്കറിന്റെ ഫൈനല്‍ ഇന്ന് 4-40 മുതല്‍. ഇന്ത്യയുടെ തന്നെ ജെസ്‌വിന്‍ ആല്‍ഡ്രിനും ഫൈനലിലുണ്ട്. 1500 മീറ്ററില്‍ മെഡല്‍ പ്രതീക്ഷയായ ജിന്‍സണ്‍ വൈകുന്നേരം ആറിനാണ് ഫൈനലിനിറങ്ങുന്നത്. അജയ് കുമാര്‍ സരോജും ഈ ഇനത്തില്‍ ഫൈനലിനുണ്ട്. വനിതകളുടെ 100 മീറ്റര്‍ ഹര്‍ഡില്‍സില്‍ ഇന്ത്യയുടെ ജ്യോതി യരാജിയും ഇന്ന് ഫൈനലിനിറങ്ങുന്നുണ്ട്. നിത്യ രാംരാജും ഈ ഇനത്തില്‍ ഫൈനലിനുണ്ട്.