Athletic – Chandrika Daily

താരമായി അനസ്; താരോദയം ഹിമ

chandrika — Tue, 10 Apr 2018 18:32:27 +0000

ഗോള്‍ഡ് കോസ്റ്റ്: കോമണ്‍വെല്‍ത്ത് ഗെയിംസില്‍ ഇന്ത്യയെ ഇന്നലെ ഹരം കൊള്ളിച്ചത് ട്രാക്കിലെ രണ്ട് പ്രകടനങ്ങളാണ്. 400 മീറ്റര്‍ ഫൈനലില്‍ മലയാളി താരം മുഹമ്മദ് അനസ് കരിയര്‍ ബെസ്റ്റ് പ്രകടനം പുറത്തെടുത്തിട്ടും തലനാരിഴക്ക് മെഡല്‍ നഷ്ടമായത് രാജ്യത്തിന്റെ നെടുവീര്‍പ്പായപ്പോള്‍ വനിതകളുടെ 400 മീറ്ററില്‍ ഫൈനല്‍ ബെര്‍ത്തുറപ്പിച്ച് 18-കാരി ഹിമ ദാസ് ചരിത്രം കുറിച്ചു. ഒരു വര്‍ഷം മുമ്പു മാത്രം അത്‌ലറ്റിക്‌സിലേക്ക് തിരിഞ്ഞ ഹിമയുടെ ഫൈനല്‍ ഇന്നാണ്.
1958-ലെ മില്‍ഖ സിങിന്റെ സ്വര്‍ണ നേട്ടത്തിനു ശേഷം 400 മീറ്റര്‍ ഫൈനലിലെത്തുന്ന ആദ്യതാരമെന്ന ബഹുമതിയോട് നൂറു ശതമാനം നീതി പുലര്‍ത്തുന്ന പ്രകടനമാണ് നിലമേല്‍ സ്വദേശിയായ അനസ് കാഴ്ചവെച്ചത്. ആറാം ലാപ്പില്‍ ഓടിയ അനസ് സ്വന്തം മികച്ച സമയവും ദേശീയ റെക്കോര്‍ഡുമായ 45.32 എന്ന സമയം ഭേദിച്ച് 45.31 എന്ന പുതിയ സമയം കുറിച്ചെങ്കിലും ജമൈക്കന്‍ താരം ജാവന്‍ ഫ്രാന്‍സിസ് 0.2 സെക്കന്റ് വ്യത്യാസത്തില്‍ (45.11) വെങ്കലം റാഞ്ചുകയായിരുന്നു. 44.35 സമയം കുറിച്ച ബോട്‌സ്വാനയുടെ ഇസാക് മക്‌വാല സ്വര്‍ണവും 45.09-ല്‍ അതേ രാജ്യത്തിന്റെ ബബോലോകി തെബെ വെള്ളിയും നേടി.
നിലമേല്‍ നാദം ആര്‍ട്‌സ് ആന്റ് സ്‌പോര്‍ട്‌സ് ക്ലബ്ബിലൂടെ ഓടിത്തുടങ്ങിയ അനസിലെ ഭാവിതാരത്തെ നിലമേല്‍ സ്‌കൂളിലെ കായികാധ്യാപകന്‍ അന്‍സാറാണ് കണ്ടെത്തിയത്. യു.പി സ്‌കൂളില്‍ പഠിക്കുമ്പോള്‍ ജി.വി രാജ സ്‌കൂളിലെത്തിയ താരത്തെ അവിടത്തെ പരിശീകലരായ മുഹമ്മദ് കുഞ്ഞിയും ജയകുമാറും ചേര്‍ന്നാണ് . നിലമേല്‍ വിളയിടത്തെ പരേതനായ യഹ്‌യയും ഷീനയുമാണ് മാതാപിതാക്കള്‍.
അസമില്‍ നിന്ന് പ്രതികൂലമായ ജീവിത സാഹചര്യങ്ങളോട് പടപൊരുതി എത്തിയ ഹിമ ദാസിന് സ്വപ്‌ന തുല്യമായ നേട്ടമാണ് കന്നി ഗെയിംസില്‍ തന്നെ കുറിക്കാന്‍ കഴിഞ്ഞത്. കര്‍ഷക പുത്രിയായ ഒരു വര്‍ഷം മുമ്പു മാത്രമാണ് തന്റെ കരിയര്‍ അത്‌ലറ്റിക്‌സാണെന്ന് തിരിച്ചറിഞ്ഞത്. വിദേശത്തെ തന്റെ ആദ്യ ഇവന്റായ ഗോള്‍ഡ് കോസ്റ്റ് സെമിഫൈനലില്‍ 51.53 എന്ന കരിയര്‍ ബെസ്റ്റ് പ്രകടനമായിരുന്നു ഹിമയുടേത്. അഞ്ചാം ഹീറ്റില്‍ മൂന്നാം സ്ഥാനത്താണ് ഹിമ ഓടിയെത്തിയത്. എട്ട് ഫൈനലിസ്റ്റുകളില്‍ ഏഴാം സ്ഥാനത്താണ് ഹിമയുടെ വേഗമെങ്കിലും ഓരോ മത്സരം കഴിയുമ്പോഴും സ്വയം മെച്ചപ്പെടുത്തുന്ന 18-കാരി ഫൈനലില്‍ അത്ഭുതം സൃഷ്ടിക്കുമെന്നാണ് ഇന്ത്യന്‍ ക്യാംപിന്റെ പ്രതീക്ഷ.

0.2 സെക്കന്റിന്റ വില!

chandrika — Tue, 10 Apr 2018 18:31:45 +0000

ഗോള്‍ഡ് കോസ്റ്റ്: കോമണ്‍വെല്‍ത്ത് ഗെയിംസ് ആറാം ദിനത്തില്‍ ഇന്ത്യക്ക് ശുഭവാര്‍ത്തകള്‍. ഇന്നലെ വനിതകളുടെ 25 മീറ്റര്‍ പിസ്റ്റല്‍ ഇവന്റില്‍ ഹീന സിധു സ്വര്‍ണം നേടിയപ്പോള്‍ പാരാ ലിഫ്റ്റര്‍ സച്ചിന്‍ ചൗധരി വെങ്കലം സ്വന്തമാക്കി. ബോക്‌സിങില്‍ മുഹമ്മദ് ഹിസ്സമുദ്ദീന്‍, മനോജ് കുമാര്‍, സതീഷ് കുമാര്‍, അമിത് പങ്കാല്‍, നമന്‍ തന്‍വാര്‍ എന്നിവര്‍ സെമിഫൈനലിലെത്തി മെഡലുറപ്പിച്ചിട്ടുണ്ട്. ഇതിനു പുറമെ, ഹോക്കി, സ്‌ക്വാഷ് തുടങ്ങിയവയില്‍ ഇന്ത്യ മെഡല്‍ പ്രതീക്ഷ നിലനിര്‍ത്തി. ഹോക്കിയില്‍ മലേഷ്യയെ തോല്‍പ്പിച്ച് പുരുഷ ടീമും ദക്ഷിണാഫ്രിക്കയെ വീഴ്ത്തി വനിതാ ടീമും സെമിയിലെത്തി. മില്‍ഖാ സിങിനു ശേഷം 400 മീറ്റര്‍ ഫൈനലിലെത്തിയ മലയാളി താരം മുഹമ്മദ് അനസ് ദേശീയ റെക്കോര്‍ഡ് സമയം കുറിച്ചെങ്കിലും ഫോട്ടോഫിനിഷില്‍ മെഡല്‍ നഷ്ടമായി. പ്രതീക്ഷകളുയര്‍ത്തി 1500 മീറ്റര്‍ ഫ്രീസ്റ്റൈല്‍ നീന്തല്‍ ഫൈനലിലെത്തിയ മലയാളി താരം സാജന്‍ പ്രകാശിന് ഏഴാം സ്ഥാനത്തെത്താനേ കഴിഞ്ഞുള്ളൂ.
ആറാം ദിനം പിന്നിടുമ്പോള്‍ 11 സ്വര്‍ണവും നാല് വെള്ളിയും ആറ് വെങ്കലവുമടക്കം 21 മെഡലുമായി മൂന്നാം സ്ഥാനത്താണ് ഇന്ത്യ. 50 സ്വര്‍ണമടക്കം 130 മെഡലോടെ ഓസ്‌ട്രേലിയയും 24 സ്വര്‍ണമടക്കം 74 മെഡലുമായി ഇംഗ്ലണ്ടും ആണ് ഒന്നും രണ്ടും സ്ഥാനങ്ങളില്‍.
ഹീനയുടെ സ്വര്‍ണവേട്ട
ബെല്‍മണ്ട് ഷൂട്ടിങ് സെന്ററില്‍ നിന്നാണ് ഇന്നലെ ഇന്ത്യ കേള്‍ക്കാന്‍ കൊതിച്ച സ്വര്‍ണവാര്‍ത്ത എത്തിയത്. ഞായറാഴ്ച 10 മീറ്റര്‍ എയര്‍ പിസ്റ്റളില്‍ വെള്ളി നേടിയിരുന്ന ഹീന സിധു വ്യക്തമായ ആധിപത്യം പുലര്‍ത്തിയാണ് 25 മീറ്ററില്‍ സ്വര്‍ണം സ്വന്തമാക്കിയത്. എട്ടുപേര്‍ മത്സരിച്ച ഫൈനലില്‍ റെക്കോര്‍ഡ് പോയിന്റായ 38 സ്വന്തമാക്കിയായിരുന്നു 28-കാരിയുടെ പൊന്നിന്‍ പ്രകടനം. വെള്ളി നേടിയ ഓസ്‌ട്രേലിയക്കാരി എലാന ഗലിയബോവിച്ച്, വെങ്കലം നേടിയ മലേഷ്യന്‍ താരം ആലിയ അസ്ഹരി എന്നിവരുടെ സമ്മര്‍ദം അതിജീവിച്ചായിരുന്നു ഹീനയുടെ വിജയം. ഹീന ഇതാദ്യമായാണ് കോമണ്‍വെല്‍ത്ത് ഗെയിംസ് വ്യക്തിഗത ഇനത്തില്‍ സ്വര്‍ണം നേടുന്നത്. 2010-ലെ ഡല്‍ഹി കോമണ്‍വെല്‍ത്ത് ഗെയിംസില്‍ ഹീന സിധു ടീം ഇനത്തില്‍ സ്വര്‍ണം നേടിയിരുന്നു.
ഹോക്കി സന്തോഷം
പൂള്‍ ബി.യില്‍ മലേഷ്യയെ ഒന്നിനെതിരെ രണ്ടു ഗോളുകള്‍ക്ക് വീഴ്ത്തിയാണ് ഇന്ത്യന്‍ പുരുഷ ഹോക്കി സംഘം സെമിഫൈനലിലേക്ക് മുന്നേറിയത്. ഹര്‍മന്‍പ്രീത് സിങിന്റെ ഇരട്ട ഗോളുകള്‍ വിജയമൊരുക്കിയത്. മൂന്നാം മിനുട്ടില്‍ തന്നെ ലീഡ് നേടിയ ഇന്ത്യ ശക്തമായ ആക്രമണം അഴിച്ചുവിട്ടപ്പോള്‍ മലേഷ്യക്കാര്‍ക്ക് സ്വന്തം ഗോള്‍മുഖം സംരക്ഷിക്കുകയായിരുന്നു പ്രധാന ജോലി. രണ്ടാം ക്വാര്‍ട്ടറിന്റെ തുടക്കത്തില്‍ വലതുവിങിലൂടെ ഓടിക്കയറി പാസ് സ്വീകരിച്ച ഫൈസല്‍ സാറി, പി.ആര്‍ ശ്രീജേഷിനെ മറികടന്ന് മലേഷ്യയെ ഒപ്പമെത്തിച്ചു. ഇന്ത്യക്ക് പെനാല്‍ട്ടി കോര്‍ണറുകള്‍ തുടരെ ലഭിച്ചെങ്കിലും മലേഷ്യ ചെറുത്തുനിന്നു.
മൂന്നാം ക്വാര്‍ട്ടറിന്റെ അവസാന നിമിഷങ്ങളില്‍ പെനാല്‍ട്ടി കോര്‍ണര്‍ കരുത്തുറ്റ ഷോട്ടിലൂടെ വലയിലാക്കിയാണ് ഹര്‍മന്‍പ്രീത് ലീഡ് തിരിച്ചുപിടിച്ചത്. അവസാന മിനുട്ടുകളിലെ മലായ് ആക്രമണത്തെ ഇന്ത്യ ഫലപ്രദമായി പ്രതിരോധിച്ചു.
ക്യാപ്ടന്‍ റാണി രാംപാല്‍ 47-ാം മിനുട്ടില്‍ നേടിയ ഏക ഗോളിനാണ് ഇന്ത്യന്‍ വനിതകള്‍ ദക്ഷിണാഫ്രിക്കയെ തോല്‍പ്പിച്ചത്. ഇതോടെ പൂള്‍ എയില്‍ ഇംഗ്ലണ്ടുമായി പോയിന്റ് പങ്കിട്ട് രണ്ടാം സ്ഥാനത്തെത്താന്‍ ഇന്ത്യക്കു കഴിഞ്ഞു.
മെഡല്‍ ബോക്‌സിങ്
ബോക്‌സിങില്‍ 49 കിലോ വിഭാഗത്തില്‍ അമിത് പങ്കാല്‍ ആണ് ഇന്നലെ ആദ്യം സെമിയിലെത്തിയത്. സ്‌കോട്ട്‌ലാന്റിന്റെ അഖീല്‍ അഹ്മദിനെതിരെ 4-1 നായിരുന്നു പങ്കാലിന്റെ ജയം. 91 കിലോ വിഭാഗത്തില്‍ സമോവയുടെ ഫ്രാങ്ക് മാസോയെ ഏകപക്ഷീയമായ 5-0 ന് തറപറ്റിച്ച് നമന്‍ തന്‍വാറും ക്വാര്‍ട്ടര്‍ കടന്നു. 56 കിലോ വിഭാഗത്തില്‍ സാംബിയയുടെ മുലിംഗ എവറിസ്‌റ്റോയെ ഹുസ്സമുദ്ദീന്‍ 5-0 ന് ഇടിച്ചിട്ടപ്പോള്‍ 69 കിലോയില്‍ ഓസ്‌ട്രേലിയയുടെ ടെറി നിക്കോളാസിനെതിരെ 4-1 ന് മനോജ് കുമാറും ജയിച്ചു കയറി. 91+ വിഭാഗത്തില്‍ 4-1 നായിരുന്നു സതീഷിന്റെ ജയം.
മിക്‌സഡ് ഡബിള്‍സ് സ്‌ക്വാഷില്‍ ദീപിക പള്ളിക്കലും സൗരവ് ഘോഷാലും പാകിസ്താന്റെ മദീന സഫര്‍ – തയ്യബ് അസ്‌ലം സഖ്യത്തെ 2-0 ന് തോല്‍പ്പിച്ച് സെമി സാധ്യത ശക്തമാക്കി. പൂള്‍ ഇയിലെ മത്സരം വെറും 13 മിനുട്ടേ നീണ്ടുനിന്നുള്ളൂ. ഓക്‌സന്‍ഫോര്‍ഡ് സ്റ്റുഡിയോസില്‍ നടന്ന മത്സരത്തില്‍ 11-2, 11-3 സ്‌കോറിനായിരുന്നു ഇന്ത്യന്‍ ജയം. നേരത്തെ ഗയാനയുടെ മേരി ഫുങ് – ജേസണ്‍ റേ ഖലീല്‍ എന്ന സഖ്യത്തെയും ഇന്ത്യന്‍ സഖ്യം 13 മിനുട്ടില്‍ കീഴടക്കിയിരുന്നു.