australian open – Chandrika Daily

സിഡ്നിയിൽ ലക്ഷ്യ സെന്നിന്റെ അത്ഭുത പ്രകടനം; ആസ്‌ട്രേലിയൻ ഓപ്പൺ സൂപ്പർ 500 കിരീടം സ്വന്തമാക്കി

webdesk18 — Sun, 23 Nov 2025 16:53:30 +0000

സിഡ്നി: സെമിഫൈനലിലെ അതേ ജോഷും ആക്രമണാത്മകതയും തുടർന്നാണ് ഇന്ത്യയുടെ ലക്ഷ്യ സെൻ ആസ്‌ട്രേലിയൻ ഓപ്പൺ സൂപ്പർ 500 ബാഡ്മിന്റൺ കിരീടം സ്വന്തമാക്കിയത്. ഫൈനലിൽ ജപ്പാന്റെ സീഡ് ചെയ്യാത്ത താരമായ യുഷി തനാകയെ നേരിട്ടുള്ള സെറ്റുകളിൽ വീഴ്ത്തിയാണ് ലക്ഷ്യ 2025ലെ തന്റെ ആദ്യ കിരീടം ഉറപ്പിച്ചത്. സ്കോർ: 21–15, 21–11.

പാരിസ് ഒളിമ്പിക്‌സിൽ നാലാമതെത്തിയ ശേഷമുള്ള പരിക്കുകളും കിരീടദൗർലഭ്യവും പിന്നിലാക്കി ടൂർണമെന്റിലെത്തിയ ലോക 14ാം നമ്പർ താരം, ആദ്യ മത്സരത്തിൽ നിന്നുതന്നെ താൻ പഴയ ഫോം തിരിച്ചുകിട്ടിയെന്ന സൂചന കൃത്യമായി നൽകി. സെമിയിൽ ലോക ആറാം നമ്പർ താരത്തെ ഒരു പോയിന്റ് അകലെ നിന്ന് മറികടന്ന അദ്ദേഹത്തിന്റെ തിരിച്ചുവരവ് മത്സരത്തിന് നിറം നൽകി.

ഫൈനലിൽ എന്നാൽ മത്സരം ഒരിക്കലും കടുപ്പമായി തോന്നാനില്ല. തനാകയുടെ പ്രതിരോധം ആദ്യ സെറ്റ് തുടക്കത്തിൽ ചെറിയൊരു സമ്മർദ്ദം സൃഷ്ടിച്ചെങ്കിലും ലക്ഷ്യയുടെ കൃത്യമായ ഷോട്ടുകളും തകർപ്പൻ ഡ്രോപ്പുകളും തുടർച്ചയായി പോയിന്റുകൾ നേടിക്കൊടുത്തു. 6–3ന് ലീഡ് എടുത്തതിന് പിന്നാലെ തനാക 9–7 വരെ എത്തിച്ചെങ്കിലും അതിന് ശേഷമാണ് ഇന്ത്യൻ താരം പൂർണ നിയന്ത്രണം സ്ഥാപിച്ചത്.

കോർട്ടിന്റെ എല്ലാ കോണുകളിലേക്കും പായുന്ന അതിവേഗ ചലനങ്ങളും അസാധ്യമായെന്ന് തോന്നുന്ന ഡൈവിങ് റെറ്റേണുകളും കൊണ്ട് ലക്ഷ്യ ദൃശ്യമഹോത്സവം സൃഷ്ടിച്ചു. ഗാലറിയുടെ ആർപ്പു മുഴങ്ങിയപ്പോഴൊക്കെ ലക്ഷ്യയുടെ ആത്മവിശ്വാസവും വീര്യവും ഇരട്ടിയായി. രണ്ടാം സെറ്റ് ആരംഭം മുതൽ ലക്ഷ്യയുടെ മേൽക്കോയ്മ വ്യക്തമായിരുന്നു. 10–5, 13–6, തുടർന്ന് 19–8 എന്ന നിലയ്ക്ക് മുന്നേറിക്കൊണ്ടിരിക്കെ വിജയമുറപ്പിച്ചത് നിമിഷങ്ങളുടെ കാര്യമായിരുന്നു.

2023ലെ കാനഡ ഓപ്പൺ സൂപ്പർ 500ന് ശേഷം ഇന്ത്യയ്ക്ക് പുറത്തുള്ള ലക്ഷ്യയുടെ ആദ്യ കിരീടമാണിത്. കഴിഞ്ഞ നവംബറിൽ ഇന്ത്യയിൽ സയിദ് മോദി ഇന്റർനാഷണൽ സൂപ്പർ 300 കിരീടം നേടിയിട്ടുമുണ്ട്. ലോക ബാഡ്മിന്റൺ രംഗത്ത് ലക്ഷ്യയുടെ തിരിച്ചുവരവ് ശക്തമാണെന്ന് ഈ കിരീടം തെളിയിക്കുന്നു.

അഭിമാനം ബൊപ്പണ്ണ; 43-ാം വയസ്സില്‍ ഓസ്‌ട്രേലിയന്‍ ഓപ്പണ്‍ ഡബിള്‍സ് ചാമ്പ്യന്‍

webdesk13 — Sun, 28 Jan 2024 10:15:44 +0000

ഓസ്‌ട്രേലിയന്‍ ഓപ്പണില്‍ ചരിത്രവിജയം സ്വന്തമാക്കി ഇന്ത്യയുടെ രോഹന്‍ ബൊപ്പണ്ണ. 43-ാം വയസില്‍ പുരുഷ ഡബിള്‍സ് കിരീടം സ്വന്തമാക്കിയിരിക്കുകയാണ് ബൊപ്പണ്ണ. ഫൈനലില്‍ ഇറ്റലിയുടെ സിമോണ്‍ ബോറെല്ലി- ആന്ദ്രേ വാവസോറി സഖ്യത്തെ പരാജയപ്പെടുത്തിയാണ് ബൊപ്പണ്ണ- മാത്യു എബ്ഡന്‍ സഖ്യം കിരീടം സ്വന്തമാക്കിയത്. നേരിട്ടുള്ള സെറ്റുകള്‍ക്കായിരുന്നു വിജയം. സ്‌കോര്‍: 7(7)-6, 7-5.

ഇഞ്ചോടിഞ്ച് പോരാട്ടമായിരുന്നു ഫൈനലില്‍ നടന്നത്. ആദ്യ സെറ്റ് ടൈ ബ്രേക്കറിലാണ് ഇന്തോ- ഓസീസ് സഖ്യം നേടിയത്. രണ്ടാം സെറ്റിലായിരുന്നു ഇറ്റാലിയന്‍ സഖ്യത്തിന്റെ വെല്ലുവിളി മറികടന്ന് ബൊപ്പണ്ണയും എബ്ഡനും വിജയത്തിലെത്തിയത്. രണ്ടാം സെറ്റില്‍ തിരിച്ചുവരാന്‍ പൊരുതിനോക്കിയെങ്കിലും മത്സരം ബൊപ്പണ്ണ- എബ്ഡന്‍ സഖ്യത്തിന് അനുകൂലമാവുകയായിരുന്നു.

ചരിത്രത്തിലെ പ്രായം കൂടിയ ഗ്രാന്‍ഡ് സ്‌ലാം വിജയിയാണ് രോഹന്‍ ബൊപ്പണ്ണ. താരത്തിന്റെ കരിയറിലെ രണ്ടാമത് ഗ്രാന്‍ഡ്സ്ലാം കിരീടവും ആദ്യ പുരുഷ ഡബിള്‍സ് കിരീടവുമാണിത്.

ഓസ്‌ട്രേലിയന്‍ ഓപ്പണ്‍: റോജര്‍ ഫെഡറര്‍ സെമിയില്‍

chandrika — Wed, 24 Jan 2018 13:55:55 +0000

മെല്‍ബണ്‍: നിലവിലെ ചാമ്പ്യനും ലോക രണ്ടാം നമ്പര്‍ താരവുമായ റോജര്‍ ഫെഡറര്‍ ഓസ്‌ട്രേലിയന്‍ ഓപ്പണ്‍ സെമിയില്‍ പ്രവേശിച്ചു. ഇത് പതിനാലാം തവണയാണ് സ്വിസ് താരം ഓസ്‌ട്രേലിയന്‍ ഓപ്പണ്‍ സെമിയില്‍ ഇടം നേടുന്നത്. ക്വാര്‍ട്ടറില്‍ ചക്ക് റിപ്പബ്ലിക്കിന്റെ തോമസ് ബെര്‍ഡിക്കിനെ നേരിട്ടുള്ള സെറ്റുകള്‍ക്കാണ് ഫെഡറര്‍ പരാജയപ്പെടുത്തിയത്. സ്‌കോര്‍ 7-6, 6-3, 6-4.

peRFection

Our defending champion @rogerfederer hits 61 winners to advance to his 14th #AusOpen semifinal, knocking out 19th seed Tomas #Berdych for the 3rd straight year 7-6(1) 6-3 6-4. pic.twitter.com/hZprdid2Op

— #AusOpen (@AustralianOpen) January 24, 2018

ദക്ഷിണ കൊറിയയുടെ സീഡില്ല താരം ചുങ് ഹിയോനാണ് സെമിയില്‍ ഫെഡററുടെ എതിരാളി. നേരത്തെ റാഫേല്‍ നദാല്‍, ദ്യോകോവിച്ച് തുടങ്ങി പ്രമുഖര്‍ പുറത്തായ സാഹചര്യത്തില്‍ പുതുവര്‍ഷത്തിലെ ആദ്യ ഗ്രാന്റ് സ്ലാം കിരീടം നിലവിലെ ചാമ്പ്യനായ ഫെഡറര്‍ തന്നെ നിലനിര്‍ത്തുമെന്നാണ് വിദഗ്ധരുടെ അഭിപ്രായം.

.@RogerFederer sets an #AusOpen SF date with Hyeon #Chung!

pic.twitter.com/sNLo82WDkj

— #AusOpen (@AustralianOpen) January 24, 2018

ഓസ്‌ട്രേലിയന്‍ ഓപണ്‍ ബാഡ്മിന്റണ്‍ കിരീടം കിഡംബി ശ്രീകാന്തിന്

ചന്ദ്രിക വെബ് ഡെസ്‌ക്‌ — Sun, 25 Jun 2017 06:51:19 +0000

സിഡ്‌നി: ഓസ്‌ട്രേലിയന്‍ ഓപണ്‍ സൂപ്പര്‍ സീരീസ് ബാഡ്മിന്റണ്‍ കിരീടം ഇന്ത്യന്‍ താരം കിഡംബി ശ്രീകാന്തിന്. ചൈനയുടെ ചെന്‍ലോങിനെ നേരിട്ടുള്ള സെറ്റുകള്‍ക്ക് വീഴ്ത്തിയാണ് ശ്രീകാന്ത് കരിയറിലെ ആദ്യ ഓസ്‌ട്രേലിയന്‍ ഓപണില്‍ മുത്തമിട്ടത്. 45 മിനുട്ട് നീണ്ട മത്സരത്തില്‍ സ്‌കോര്‍ 22-20, 21-16 നായിരുന്നു ഗുണ്ടൂര്‍ സ്വദേശിയുടെ ജയം. ഈ വര്‍ഷം തുടര്‍ച്ചയായി മൂന്ന് സൂപ്പര്‍ സീരീസ് ഫൈനലുകളിലെത്തുന്ന ശ്രീകാന്തിന്റെ രണ്ടാം കിരീടമാണിത്. നേരത്തെ ഇന്തോനേഷ്യ ഓപണ്‍ 24-കാരന്‍ നേടിയിരുന്നു.

https://www.chandrikadaily.com/wp-content/uploads/2017/06/Produce_0.wmv

ആള്‍ ഇംഗ്ലണ്ട് ഫൈനലിസ്റ്റായ ചൈനയുടെ ഷി യുഖിയെ സെമിയില്‍ തോല്‍പ്പിച്ച് മുന്നേറിയ ശ്രീകാന്തിന് കനത്ത വെല്ലുവിളിയാണ് കലാശപ്പോരില്‍ ചെന്‍ ലോങ് ഉയര്‍ത്തിയത്. നിലവിലെ ഒളിംപിക് ചാമ്പന്യനും രണ്ടുതവണ ലോകചാമ്പ്യനുമായ ചെന്‍ ലോങ് അവസാന നിമിഷം വരെ പോരാടിയാണ് ആദ്യ സെറ്റ് അടിയറവെച്ചത്. രണ്ടാം സെറ്റിന്റെ പകുതിയില്‍ വെച്ചു തന്നെ അഞ്ച് പോയിന്റ് ലീഡ് നേടിയ ശ്രീകാന്ത് പിന്നീട് വിട്ടുകൊടുക്കാതെ കളിച്ച് കിരീടനേട്ടത്തിലെത്തുകയായിരുന്നു.

2015-ല്‍ ചൈന ഓപണും ഇന്ത്യ ഓപണും ഈ വര്‍ഷം ഇന്തോനേഷ്യ ഓപണും നേടിയ ശ്രീകാന്തിന്റെ നാലാമത്തെ സൂപ്പര്‍ സീരീസ് കിരീടമാണിത്. ഈ വര്‍ഷം സിംഗപ്പൂര്‍ ഓപണില്‍ ശ്രീകാന്ത് ഇന്ത്യന്‍ താരം സായ് പരിണീതിനോടാണ് ഫൈനലില്‍ തോറ്റത്.

സൂപ്പര്‍ ശ്രീകാന്ത്; യുഖി ഷിയെ തകര്‍ത്ത് ഓസ്‌ട്രേലിയന്‍ ഓപ്പണ്‍ സൂപ്പര്‍ സീരീസ് ഫൈനലില്‍

chandrika — Sat, 24 Jun 2017 07:36:28 +0000

സിഡ്‌നി: ഇന്തോനേഷ്യന്‍ സൂപ്പര്‍ സീരീസ് കിരീട നേട്ടത്തിന് പിന്നാലെ ഇന്ത്യയുടെ കിടംബി ശ്രീകാന്ത് ഓസ്‌ട്രേലിയന്‍ ഓപ്പണ്‍ സൂപ്പര്‍ സീരീസിന്റെ കലാശപ്പൊരാട്ടത്തില്‍. ഇന്തോനേഷ്യന്‍ സൂപ്പര്‍ കിരീടത്തിന്റെ ആവേശം വിടാതെയാണ് താരം ഓസ്‌ട്രേലിയന്‍ ഓപ്പണ്‍ ഫൈനലില്‍ കുതിച്ചെത്തികയായിരുന്നു.
ചൈനയുടെ യുഖി ഷിയെ നേരിട്ടുള്ള സെറ്റുകള്‍ക്ക് വീഴ്ത്തിയായിരുന്നു കെ.ശ്രീകാന്തിന്റെ ഫൈനല്‍ പ്രവേശം. വെറും 37 മിനുട്ട് നീണ്ട മത്സരത്തില്‍ നാലാം സീഡും ഓള്‍ ഇംഗ്ലണ്ട് ഫൈനലിസ്റ്റുമായ യുഖി ഷിയെ 21-10, 21-14 സ്‌കോറിലാണ് തകര്‍ത്തത്.

ഇന്തൊനീഷ്യന്‍ ഓപ്പണില്‍ കിരീട നേട്ടത്തിന് തുടര്‍ന്ന് ലോക 11ാം നമ്പര്‍ താരമായ ശ്രീകാന്ത് തുടര്‍ച്ചയായിത് മൂന്നാം സൂപ്പര്‍ സീരീസ് ഫൈനലാണ് പ്രവേശിക്കുന്നത്.

ഇന്റൊനേഷ്യന്‍ സൂപ്പര്‍ സീരീസ്: ലോക ഒന്നാം റാങ്കുകാരരെ അട്ടിമറിച്ച് ശ്രീകാന്ത് ഫൈനലില്‍

chandrika — Sat, 17 Jun 2017 14:55:32 +0000

ജക്കാര്‍ത്ത: ലോക ഒന്നാം നമ്പര്‍ റാങ്കുകാരന്‍ സണ്‍ വാന്‍ ഹുവിനെ അട്ടിമറിച്ച് ഇന്ത്യന്‍ താരം കെ. ശ്രീകാന്തി ഇന്‍ഡൊനീഷ്യന്‍ സൂപ്പര്‍ സീരീസ് ഫൈനലില്‍. ഒരു മണിക്കൂറും 12 മിനിറ്റും നീണ്ട വാശിയേറിയ പോരാട്ടത്തില്‍ 21-15, 18-21, 24-22 എന്ന സ്‌കോറിലാണ് ശ്രീകാന്തിന്റെ വിജയം. മൂന്ന് ഗെയിം നീണ്ട മത്സരത്തില്‍ ശക്തമായ പ്രകടനമാണ് താരം പുറത്തെടുത്ത്.

ആറു കോടി 44 ലക്ഷം രൂപയെന്ന ഭീമ സമ്മാനത്തുകയുള്ള ഇന്‍ഡൊനീഷ്യന്‍ സൂപ്പര്‍ സീരീസിന്റെ ഫൈനലിലെത്തുന്ന ആദ്യ ഇന്ത്യന്‍ പുരുഷ താരമെന്ന റെക്കോഡാണ് ഇതോടെ ശ്രീകാന്ത് സ്വന്തമാക്കിയത്. തുടര്‍ച്ചയായി ഒരു ഇന്ത്യന്‍ പുരുഷ താരം സൂപ്പര്‍ സീരിസിന്റെ ഫൈനലിനെത്തുന്നതും ഇതാദ്യമാണ്. ഈ വര്‍ഷം സിംഗപ്പൂര്‍ ഓപ്പണ്‍ സീരീസിലും ശ്രീകാന്ത് ഫൈനലില്‍ എത്തിയിരുന്നു. ലോക 22-ാം റാങ്കുകാരനായ ശ്രീകാന്ത് ഒരു സൂപ്പര്‍ സീരീസ് ടൂര്‍ണമെന്റിന്റെ ഫൈനലിലെത്തുന്നത് ഇത് നാലാം തവണയാണ്.

2nd successive SS final for @srikidambi . Edges past the current World no.1 Son Wan Ho 21-15, 14-21, 24-22.

#IndonesiaSSP pic.twitter.com/ykTgwEy8Ur

— BAI Media (@BAI_Media) June 17, 2017

ഞായറാഴ്ചയാണ് ഫൈനല്‍. സെമിയില്‍ മലയാളിയായ എച്ച്.എസ് പ്രണോയിയെ പരാജയപ്പെടുത്തിയ കസുമാസ സകായിയാണ് കലാശപ്പോരാട്ടത്തില്‍ ശ്രീകാന്തിന്റെ എതിരാളി. യോഗ്യതാ റൗണ്ട് മുതല്‍ ശക്തമായ പോരാട്ടം നടത്തി കപ്പിനടുത്തെത്തിയ സകായിയുടെ കരിയറിലെ ആദ്യ സൂപ്പര്‍ സീരീസ് കലാശപ്പോരാട്ടമാണിത്. ലോകറാങ്കിങ്ങില്‍ നാല്‍പതിന് മുകളിലാണ് സകായിയുടെ സ്ഥാനം.

ചരിത്രം കുറിച്ച് സെറീന വില്യംസ്: 23ാം ഗ്രാന്‍ സ്‌ലാം കിരീടം

chandrika — Sat, 28 Jan 2017 10:27:38 +0000

സിഡ്‌നി: ചരിത്ര നേട്ടത്തോടെ സെറീന വില്യംസന് ഓസ്‌ട്രേലിയന്‍ ഓപ്പണ്‍ കിരീടം. സഹോദരി വീനസ് വില്യംസണെ 6-4, 6-3 എന്ന സ്‌കോറിന് തോല്‍പിച്ചാണ് സെറീന 23ാം ഗ്രാന്‍സ്‌ലാം കിരീടം ചൂടിയത്. ആധുനിക ടെന്നീസില്‍ കൂടുതല്‍ ഗ്രാന്‍ഡ് സ്ലാം കിരീടം നേടുന്ന താരമെന്ന നേട്ടമാണ് സെറീന സ്വന്തം പേരിലാക്കിയത്. സെറീനയുടെ ഏഴാം ഓസ്‌ട്രേലിയന്‍ കിരീടം കൂടിയാണിത്.

സ്വന്തം നാട്ടുകാരി കൂടിയായ സ്റ്റെഫി ഗ്രാഫിന്റെ 22 കിരീട നേട്ടമെന്ന റെക്കോര്‍ഡാണ് സെറീന മറികടന്നത്. 14 വര്‍ഷങ്ങള്‍ക്ക് ശേഷമാണ് സെറീന-വീനസ് പോരാട്ടം അരങ്ങേറിയത്. ഇരുവരും നേര്‍ക്കു നേര്‍ വന്ന ഒമ്പതാം ഗ്രാന്‍സ്‌ലാം ഫൈനലായിരുന്നു ഇത്.