മഹാത്മാ അയ്യങ്കാളിയുടെ ജന്മദിനം കടന്നു പോവുമ്പോള്‍ ആ അത്ഭുത മനുഷ്യനെ ഓര്‍ത്തെടുക്കാന്‍ അദ്ദേഹം രചിച്ച പുസ്തകങ്ങളൊന്നും തന്നെയില്ലെങ്കിലും സാഗരങ്ങളെല്ലാം മഷിയാക്കിയാലും എഴുതി തീര്‍ക്കാനാവാത്തത്ര ആശയങ്ങളും ചിന്തകളും ജീവിതത്തിലൂടെയും പ്രവര്‍ത്തനങ്ങളിലൂടെയും സാധുജന പരിപാലന സംഘം എന്ന സംഘടനയിലൂടെയും മനുഷ്യകുലത്തിന് സംഭാവന ചെയ്താണ് അദ്ദേഹം കടന്നുപോയതെന്ന് മനസിലാക്കാന്‍ കഴിയും. ഒരു പുസ്തകം പോലും എഴുതാതെ പോയ മഹാത്മാ അയ്യങ്കാളിയുടെ നാല്‍പതോളം ജീവചരിത്ര കൃതികള്‍ മലയാളത്തിലിന്നും ലഭ്യമാണ് എന്നതും ശ്രദ്ധേയമാണ്. അതൊക്കെ തന്നെയാണ് അദ്ദേഹത്തെ മഹാത്മാവാക്കിയതും.
ഇന്നത്തെ ലോക സാമൂഹിക വ്യവഹാരങ്ങളും സംഭവ വികാസങ്ങളും പരിശോധിച്ചാല്‍ മഹാത്മാ അയ്യങ്കാളിയുടെ ജീവിതവും പ്രവര്‍ത്തന മാതൃകകളും ഈ അത്യാധുനിക കാലഘട്ടത്തിലും ഏറെ പ്രശസ്തവും ഗവേഷണ യോഗ്യവുമാണെന്ന് കാണാന്‍ കഴിയും. ലോകത്താകെയുള്ള വിവേചനങ്ങള്‍ പരിശോധിച്ചാല്‍ അത് ഭാഷയുടെയും വര്‍ണ്ണത്തിന്റെയും വര്‍ഗത്തിന്റെയും മതത്തിന്റെയും ജാതിയുടെയും ഉപജാതിയുടെയും ലിംഗത്തിന്റെയും അങ്ങനെയങ്ങനെ ബഹുവിധത്തിലാണ്. ഇത്തരത്തിലുള്ള വിവേചനങ്ങളെല്ലാംതന്നെ ഒരുതരത്തിലല്ലെങ്കില്‍ മറ്റൊരു തരത്തില്‍ ലോകത്തിന്റെ വിവിധയിടങ്ങളില്‍ ഇന്നും അതിന്റെയെല്ലാ സ്വരൂപങ്ങളെയും ഉയര്‍ത്തിത്തന്നെ നിലനില്‍ക്കുന്നുവെന്നത് സൂചിപ്പിക്കുന്നത് അതൊക്കെ മനുഷ്യന്റെ മനസുകളെയും ജീവിത ക്രമത്തെയും എത്ര ആഴത്തിലാണ് സ്വാധീനിച്ചിരിക്കുന്നത് എന്നതാണ്. ട്രംപിന്റെ പുതിയ അമേരിക്കയില്‍ നിരന്തരമായും ട്രംപിന് മുമ്പുള്ള അമേരിക്കയില്‍ ഇടക്കിടെയുമെല്ലാം ഇത്തരത്തിലുള്ള കോമരങ്ങളുടെ നിറഞ്ഞാടല്‍ നടന്നുകൊണ്ടിരിക്കുന്നു. അതിനെല്ലാം കാരണമായി മാറുന്നത് ചിലരില്‍ നിന്ന് മറ്റു ചിലര്‍ക്ക് ജന്മനാതന്നെ ഔന്നത്യമുണ്ടെന്ന മിഥ്യാബോധമാണ്. ആ മിഥ്യാബോധം ഭൗതിക വിദ്യാഭ്യാസം കൊണ്ടോ വിവര സാങ്കേതിക വിദ്യ കൊണ്ടോ മാറ്റാന്‍ കഴിയുന്നതല്ലെന്നും അടിച്ചമര്‍ത്തപ്പെട്ടവന്റെ സ്വയമായുള്ള ഉയര്‍ന്നുവരലിലൂടെ മാത്രമേ അതില്ലാതാക്കാനാവുകയുള്ളൂവെന്നുമുള്ള അയ്യങ്കാളിയുടെ ജീവിത പാഠം തന്നെയാണ് ഇവിടെയും ഇന്നും പ്രസക്തമാവുന്നത്.
ശ്രുതിയും മനുസ്മൃതിയും ഭരണഘടനയായി അംഗീകരിച്ചു കൊണ്ട് ഇന്ത്യയില്‍ തന്നെ സവര്‍ണ ഭരണത്തിന്റെ ഏറ്റവും വലിയ ഇടമായിരുന്ന തിരുവിതാംകൂര്‍ രാജ്യത്തില്‍ വെള്ളക്കാളകളെ പൂട്ടിയ വില്ലുവണ്ടിയില്‍ തെരുവിലൂടെ വെളുത്ത വസ്ത്രധാരിയായി ജൈത്രയാത്ര നടത്തിയതിലൂടെ മഹാത്മാ അയ്യങ്കാളി കാണിച്ചു തന്ന മാതൃക തന്നെയാണ് എല്ലാ കാലത്തും പ്രസക്തം. തന്റെ വ്യക്തിപരമായ പ്രവര്‍ത്തന ശൈലിയിലൂടെയും മൂന്ന് പതിറ്റാണ്ട് കാലം നേതൃത്വം കൊടുത്ത സാധുജന പരിപാലന സംഘം എന്ന സംഘടനയുടെ പ്രവര്‍ത്തനങ്ങളിലൂടെയും ലോകത്തെ അനീതിക്കും അസമത്വത്തിനും വിവേചനങ്ങള്‍ക്കുമെതിരായി പോരാട്ടം നടത്തുന്ന ലോകത്തെ എല്ലാ വ്യക്തികള്‍ക്കും സംഘടനകള്‍ക്കും കൃത്യമായ മാര്‍ഗദര്‍ശനമാണ് അദ്ദേഹം നല്‍കിയത്. കാലം കഴിയുന്തോറും അദ്ദേഹത്തിന്റെ ദര്‍ശനങ്ങള്‍ക്ക് പ്രസക്തി ഏറിയേറി വരികയാണ്. അതുകൊണ്ട് തന്നെയാവാം അദ്ദേഹത്തെ മഹാത്മാ അയ്യങ്കാളിയെന്ന് വിളിക്കുന്നതും. 1893 ലെ വില്ലുവണ്ടി സമരത്തിന്റെ തുടര്‍ച്ചയായി അയ്യങ്കാളിപ്പടക്ക് രൂപം കൊടുക്കുകയും തമിഴ്‌നാട്ടില്‍നിന്ന് പ്രത്യേക പരിശീലകരെയെത്തിച്ച് അഞ്ച് വര്‍ഷത്തോളം നിരന്തര പരിശീലനത്തിലൂടെ നായര്‍ പട്ടാളത്തെ നേരിടാന്‍ പ്രാപ്തരാക്കുകയും 1898 ല്‍ സവര്‍ണ രാജ നിയമങ്ങളെ പരസ്യമായി വെല്ലുവിളിച്ചു ബാലരാമപുരം തെരുവിലൂടെ മഹാത്മാവിന്റെ തന്നെ നേതൃത്വത്തില്‍ സായുധ പദയാത്ര നടത്തുകയും ചെയ്തതിന് ശേഷമാണ് സാധുജന പരിപാലന സംഘം എന്ന സംഘടന രൂപീകരിക്കുന്നത്. അയിത്തം തൊട്ടുകൂടായ്മ എന്നിവയില്ലാതാക്കാനും തന്റെ സഹോദരങ്ങള്‍ക്ക് സ്‌കൂളില്‍ പോകാനും പൊതുവഴിയിലൂടെ സഞ്ചരിക്കാനും നിയമ പരിരക്ഷക്കായി കോടതികളെ സമീപിക്കാനും ആശുപത്രിയില്‍ ചികിത്സ ലഭിക്കാനുംവേണ്ടിയാണ് അയ്യങ്കാളി ഇതൊക്കെ ചെയ്തത്. തന്റെ ജീവിതവും പോരാട്ടങ്ങളും ഒരു സമൂഹത്തിന്റെ അവകാശങ്ങള്‍ക്കും സ്വാതന്ത്ര്യങ്ങള്‍ക്കുമായി സമര്‍പ്പിക്കുകയും പിന്നീടത് ലോകത്തെ തന്നെ സമാന അവസ്ഥകള്‍ക്ക് ഉത്തമവും ഉന്നതവുമായ മാതൃകയാവുന്നതുമാണ് അദ്ദേഹത്തെ മനസിലാക്കാന്‍ ശ്രമിക്കുമ്പോള്‍ ആദ്യം കണ്ടെത്താന്‍ കഴിയുന്നത്.
വിവേചനങ്ങളും ജാതി വെറിയും കേരളത്തില്‍ പോലുമിന്നും പൂര്‍ണമായി മാറിപ്പോയിട്ടില്ലെന്നതാണ് ഏറ്റവും ഗുരുതരമായ വസ്തുത. ദുരഭിമാന കൊലകളും അവര്‍ണന്റെ കുഞ്ഞുങ്ങളെ കൊല്ലുന്നതും മാനഭംഗപ്പെടുത്തുന്നതും കെട്ടിയിട്ടാക്രമിക്കുന്നതും നിത്യ വാര്‍ത്തകളാവുന്നതും വേണ്ടത്ര ചര്‍ച്ച ചെയ്യപ്പെടാതെ പോകുന്നതും വാളയാറിലടക്കം കണ്ടത് പോലെ പ്രതികള്‍ സ്വതന്ത്ര വിഹാരം നടത്തുന്നതും പ്രബുദ്ധരെന്ന് സ്വയം വിശേഷിപ്പിക്കുന്നവരായ നമ്മുടെ നാട്ടിലാണ്. മാറിയ ഫാസിസ്റ്റ് കാലത്തെ ഇന്ത്യന്‍ ഗ്രാമങ്ങളുടെയും തെരുവുകളുടെയും കഥ പറയാതിരിക്കുന്നതാണുചിതം. ഓരോ മണിക്കൂറിലും നിരവധി കേസുകളാണ് പുറത്ത്‌വന്നുകൊണ്ടിരിക്കുന്നത്. അതിലെത്രയോ മടങ്ങ് പുറത്ത്‌വരാത്തതായുമുണ്ട്. വര്‍ത്തമാനകാല ലോകത്ത് ഏറെ ഗൗരവത്തില്‍ പഠനത്തിനും ഗവേഷണത്തിനും വിധേയമാക്കേണ്ട അത്യപൂര്‍വ വ്യക്തിത്വത്തിനുടമയായ മഹാത്മാ അയ്യങ്കാളിയുടെ ജന്മദിനത്തില്‍ പട്ടികജാതി, പട്ടികവര്‍ഗ വിഭാഗങ്ങള്‍ക്കായി അനുവദിച്ച 502 കോടിയില്‍ ഒരു രൂപ പോലും ചിലവഴിക്കാതെ പാഴാക്കിയ വാര്‍ത്ത മനസിനെ അലട്ടുകയും പട്ടിക ജാതിക്കാരനായ കൊടിക്കുന്നില്‍ സുരേഷ് പാര്‍ലിമെന്റിലെ പ്രവര്‍ത്തനം ഇരുപത്തി അഞ്ച് വര്‍ഷം തികച്ച വാര്‍ത്ത മനസിന് കുളിര്‍മയേകുകയും ചെയ്യുന്നുവെന്നതാണ് കേരള സാഹചര്യത്തിലുള്ള അനുഭവം.
(ദലിത് ലീഗ് സംസ്ഥാന കമ്മറ്റി പ്രസിഡന്റ്ാണ് ലേഖകന്‍)

യു.സി രാമന്‍

ആധുനിക കേരള സൃഷ്ടിയില്‍ പത്തൊന്‍മ്പതും ഇരുപതും നൂറ്റാണ്ടുകള്‍ക്കിടയിലായി നടന്ന ചെറുതും വലുതുമായ സാമൂഹിക സാംസ്‌കാരിക രാഷ്ട്രീയ സംഭവവികാസങ്ങള്‍ക്ക് നിര്‍ണായകമായ പങ്കുണ്ട്. കേരളത്തില്‍ നിലനിന്നിരുന്ന ജാതി വ്യവസ്ഥ അതിസങ്കീര്‍ണമായ ഒന്നായി ഈ അത്യാധുനിക സമയത്തും തുടരുകയാണ്. മഹാത്മാ അയ്യങ്കാളി എന്ന നാമധേയം ആധുനിക കേരളത്തിന്റെ ചരിത്രനിര്‍മ്മിതിയില്‍ ഒഴിവാക്കാന്‍ കഴിയുന്ന ഒന്നല്ല. (ഇ.എം.എസ് എഴുതിയ ‘കേരളം മലയാളിയുടെ മാതൃഭൂമി’ എന്ന പുസ്തകം കൂടുതല്‍ ശ്രദ്ധേയമായത് അയ്യങ്കാളിയെ തമസ്‌ക്കരിക്കാന്‍ നടത്തിയ ശ്രമങ്ങളുടെ പേരിലായിരുന്നു). ജാതിശ്രേണിയുടെ ചരിത്ര വിശകലനത്തേക്കാള്‍ അയ്യങ്കാളി സൃഷ്ടിച്ച മാനസിക പരിവര്‍ത്തനത്തിന്റെ നീതിശാസ്ത്രം വിലയിരുത്താനാണ് ആഗ്രഹിക്കുന്നത്. ജാതിയുടെ സൃഷ്ടിയിലൂടെ ഒരു വ്യക്തിയുടെ ജനിതക ഘടനയില്‍ അപകര്‍ഷതാബോധത്തിന്റെ അടിവേരറുത്തു എന്നതിലൂടെയാണ് മഹാത്മാ അയ്യങ്കാളി ചരിത്രത്തില്‍ ഇടം നേടുന്നത്.
വിദ്യാഭ്യാസം, വസ്ത്രധാരണം സാമൂഹിക തുല്യത, തൊഴിലിടങ്ങളില്‍ ലഭിക്കേണ്ട സംരക്ഷണവും തൊഴിലിന്റെ മഹത്വത്തെ അംഗീകരിക്കലും തുടങ്ങിയ സമൂഹത്തിന്റെ ജീവിത ഘടനയെ മാറ്റിമറിക്കുന്ന എല്ലാ ഘടകങ്ങളിലും അയ്യങ്കാളി സ്വജീവിതംകൊണ്ട് മാതൃകയായി മാറി. ലോക തൊഴിലാളി പ്രസ്ഥാനങ്ങള്‍ രൂപം കൊള്ളുന്നതിന് എത്രയോ മുമ്പ് 1913 ജൂണ്‍ മാസത്തില്‍ അയ്യങ്കാളിയുടെ നേതൃത്വത്തില്‍ വേങ്ങാന്നൂരിലെ കര്‍ഷക തൊഴിലാളികള്‍ ആരംഭിച്ച പണിമുടക്ക് സമരം 1914 മെയ് മാസത്തില്‍ ഒന്നാം ക്ലാസ് മജിട്രേറ്റ് കുണ്ടല നാഗപ്പന്‍ പിള്ളയുടെ മധ്യസ്ഥതയില്‍ അവസാനിക്കുമ്പോള്‍ അയ്യങ്കാളിയുടെ വിജയത്തിന്റെ ചിരി കേരളമാകെ മുഴങ്ങിരുന്നു. എന്നാല്‍ ഇ.എം.എ സിനെ പോലെയുള്ള തൊഴിലാളി വര്‍ഗ ചിന്തകന്റെ കേരള ചരിത്രവിശകലനത്തില്‍ വെങ്ങാത്തുര്‍ സമരവും അയ്യങ്കാളിയും വിഷയമാകാതെ പോയത് കൂടുതല്‍ ജനിതകപഠനം ആവശ്യപ്പെടുന്ന സാംസ്‌കാരിക വിഷയമാണ്. ഒരു വ്യക്തിയുടെ സാമൂഹ്യമായ അന്തസ്സ് വസ്ത്ര ധാരണത്തിലൂടെയും രൂപം കൊള്ളുന്നുണ്ട്. ജാതി ശ്രേണിയുടെ അതിര്‍വരമ്പുകള്‍ സൃഷ്ടിച്ചപ്പോള്‍ കല്ലുമാലകളും അര്‍ധ നഗ്‌നതയും കാല്‍ മുഴുവന്‍ മറയാത്ത പകുതി മുണ്ടും സൃഷ്ടിച്ചു നല്‍കിയവരുടെ മനഃശാസ്ത്രം മനസ്സിലാക്കിയ ആളായിരുന്നു അയ്യങ്കാളി. കസവ് നേരിയത് കൊണ്ട് തലപ്പാവ്‌കെട്ടി തോളില്‍ ഷാളും തൂക്കി നെറ്റിയില്‍ വലിയ വട്ടപൊട്ടുമിട്ട് കാതില്‍ കടുക്കനുമണിഞ്ഞു മണികെട്ടിയ വെള്ളക്കാളയെ പൂട്ടിയ അലങ്കരിച്ച വില്ലുവടിയില്‍ യാത്ര ചെയ്ത അയ്യങ്കാളി വലിയൊരു സന്ദേശമാണ് തലമുറകള്‍ക്ക് നല്‍കിയത്. 2019 എത്തിനില്‍ക്കുമ്പോഴും ആ സന്ദേശം വേണ്ട രീതിയില്‍ ഉള്‍കൊണ്ടിട്ടുേേണ്ടാ എന്ന ആത്മപരിശോധന നടത്തേണ്ടിയിരിക്കുന്നു. 1888 ലെ അരുവിപ്പുറം ശിവ പ്രതിഷ്ഠയോടെ ശ്രീനാരായണ ഗുരുദേവന്‍ കേരളത്തില്‍ ആരംഭിച്ച നവോത്ഥന പ്രക്രിയ 1903ലെ എസ്.എന്‍.ഡി.പി യോഗം രൂപീകരണം വഴി ആത്മീയതയും ഭൗതികതയും ഒത്തുചേര്‍ത്തുള്ള അപൂര്‍വമായ രസകൂട്ടിന് വഴിമരുന്നിട്ടു. മഹാത്മാ അയ്യങ്കാളിയെ ശ്രീനാരായണ ഗുരുദേവ ദര്‍ശനം വളരെയധികം സ്വാധീനിച്ചിരുന്നു. ആത്മീയമായ അന്വേഷണം മാത്രം നടത്തി ആത്മ സായൂജ്യത്തിന്റെ അപാരതയില്‍ ലയിക്കാന്‍ തീരുമാനിച്ച സന്യാസി ആയിരുന്നില്ല ശ്രീനാരായണഗുരു. ഗുരുദര്‍ശനത്തിന്റെ കാതല്‍ അതിന്റെ പൂര്‍ണതയോടെ അയ്യങ്കാളി മനസ്സിലാക്കി. ജാതിജന്മി കൂട്ടായ്മയുടെ എല്ലാ വെല്ലുവിളികളെയും അതിജീവിച്ച് പഞ്ചമി എന്ന ദലിത് ബാലികക്ക് സ്‌കൂള്‍ പ്രവേശനം സാധ്യമാക്കുന്ന അയ്യങ്കാളിയെ വിസ്മരിക്കാന്‍ ഏത് ചരിത്രകാരനാണ് കഴിയുക. അയിത്ത ജാതികാരന്റെ കുട്ടിപ്പള്ളികൂടത്തിന് ആവര്‍ത്തിച്ചു തീയിട്ടിരുന്ന ആത്മീയതയുടെ മൊത്തകച്ചവടക്കാരെ അദ്ദേഹം നേരിട്ടത് ആ പള്ളിക്കൂടം വീണ്ടും പുന:സൃഷ്ടിച്ചുകൊണ്ടാണ്. സ്വസമുദായത്തില്‍നിന്നും പത്തു ബി.എക്കാര്‍ ഉണ്ടാക്കണം എന്നതിനേക്കാള്‍ എന്ത് വലിയ സന്ദേശമാണ് അദ്ദേഹത്തിന് ഗാന്ധിജിക്ക് നല്‍കാനുണ്ടായിരുന്നത്. അയ്യങ്കാളി തുറന്ന് തന്ന അവസരങ്ങളിലൂടെ കലാലയങ്ങളിലേക്ക് എത്തുന്ന യുവത്വത്തിന്റെ കൈകളിലേക്ക് കഠാര നല്‍കുന്നവരും അവരുടെ ചുടുചോരകൊണ്ട് കോടികള്‍ പിരിക്കുന്നവരും അയ്യങ്കാളിയെ ഭയക്കുന്നുണ്ടാകും. ആ ഭയത്തില്‍നിന്നും നമസ്‌കരണം ആയിക്കൂടാ എന്നില്ല. സ്വന്തം ശരീരത്തിന് മേലുള്ള അവകാശംപോലും അടിയറവുവെക്കേണ്ടിവരുന്ന ഗതികേടില്‍നിന്നും ആ കാലഘട്ടത്തിലെ സ്ത്രീ സമൂഹത്തെ മോചിപ്പിക്കുകയായിരുന്നു. കല്ലുമാല ബഹിഷ്‌കരണത്തിലൂടെ അയ്യങ്കാളി ചെയ്തത് രാഷ്രീയ താല്‍പര്യത്തിന് മതിലു കെട്ടാനല്ല മറിച്ച്, രാഷ്ട്രനിര്‍മാണത്തില്‍ അഭിമാനത്തോടെ തലയുയര്‍ത്തി നില്‍ക്കാനാണ് സ്ത്രീ സമൂഹത്തെ അദ്ദേഹം പഠിപ്പിച്ചത്. എസ്.എന്‍.ഡി.പി യോഗത്തിന്റെ ചുവട്പിടിച്ച് 1907ല്‍ രൂപീകരിച്ച സാധൂജന പരിപാലന സംഘം കേരളത്തിന്റെ സാമൂഹ്യ രാഷ്രീയ സംഘടന സവിധാനങ്ങളില്‍ പുതിയൊരു ചുവടുവെപ്പായിരുന്നു. കായിക പരിശീലനവും അച്ചടക്കത്തോടെയുള്ള ജീവിതവും ആത്മധൈര്യമുള്ള യുവ സമൂഹത്തെ സൃഷ്ടിക്കുകയെന്നും അദ്ദേഹം സ്വപ്‌നം കണ്ടു. നിര്‍ഭാഗ്യവശാല്‍ അച്ചടക്കമില്ലാത്ത കായിക പരിശീലത്തിന്റെ വരും വരായ്കകളെക്കുറിച്ച് ചിന്തിക്കാതെ സ്വന്തം ജീവന്‍ ഹോമിക്കുന്നവരായി സ്വപ്‌നം കണ്ട യുവാക്കളില്‍ ചിലരെങ്കിലും മാറുന്നു. സാമൂഹ്യനീതിയുടെ അര്‍ഥം തന്നെ നഷ്ടമായി തുടങ്ങുന്ന, രാഷ്ട്രമായി നാം മാറുന്നതിന്റെ ലക്ഷണങ്ങള്‍ കണ്ടുതുടങ്ങുന്നു. കപട ദേശീയതയുടെ കാവി പുതപ്പിനുള്ളില്‍ കറുത്തവന്റെ ചോര വീഴ്ത്താനുള്ള ആയുധങ്ങള്‍ ഒളിപ്പിച്ചുവെച്ചിട്ടുണ്ടെന്ന തിരിച്ചറിവാണ് അയ്യങ്കാളിയുടെ ഈ ജന്മദിനത്തില്‍ ഉണ്ടാാകേണ്ടത്. അതിന് പക്വതാബോധമുള്ള യുവ സമൂഹം സൃഷ്ടിക്കപ്പെടണം. അയ്യങ്കാളി ആഗ്രഹിച്ച പോലെ പത്തു ബി.എക്കാരല്ല, തസ്‌കരിക്കപ്പെട്ട ചരിത്രങ്ങള്‍ കണ്ടെത്താന്‍ പ്രാപ്തിയുള്ളവര്‍, വളച്ചൊടിക്കപ്പെടുന്ന ചരിത്രത്തെ നേര്‍വഴിക്ക് നയിക്കാന്‍ പ്രാപ്തിയുള്ളവര്‍ അങ്ങനെ ഒരു തലമുറയെ സൃഷ്ടിക്കുന്നതാണ് മഹാത്മാ അയ്യങ്കാളിക്ക് നല്‍കാവുന്ന ഏറ്റവും വലിയ ആദരവ്.