Bar bribe case – Chandrika Daily

ബാര്‍കോഴ: മാണിയെ കുറ്റവിമുക്തനാക്കി വീണ്ടും റിപ്പോര്‍ട്ട്

chandrika — Mon, 05 Mar 2018 06:15:55 +0000

തിരുവനന്തപുരം: ബാര്‍കോഴ കേസില്‍ കെ.എം മാണിയെ കുറ്റവിമുക്തനാക്കി വീണ്ടും വിജിലന്‍സ് റിപ്പോര്‍ട്ട്. വിജിലന്‍സ് തിരുവനന്തപുരം കോടതിയിലാണ് റിപ്പോര്‍ട്ട് സമര്‍പ്പിച്ചിരിക്കുന്നത്. മാണിക്കെതിരെ തെളിവ് കണ്ടെത്താനായില്ലെന്ന് റിപ്പോര്‍ട്ടില്‍ വിജിലന്‍സ് ആവര്‍ത്തിക്കുന്നു. നേരത്തെ, ഹൈക്കോടതിയിലും നല്‍കിയ റിപ്പോര്‍ട്ടില്‍ വിജിലന്‍സ് ഇതേ നിലപാടാണ് സ്വീകരിച്ചിരുന്നത്.

ബാര്‍ കോഴ: സി.ബി.ഐ അന്വേഷണം ആവശ്യപ്പെട്ടുള്ള ഹര്‍ജി സുപ്രീംകോടതി തള്ളി

chandrika — Fri, 23 Feb 2018 07:35:35 +0000

ന്യൂഡല്‍ഹി: കെ.എം മാണി ഉള്‍പ്പെട്ട ബാര്‍ കോഴക്കേസില്‍ സി.ബി.ഐ അന്വേഷണം ആവശ്യപ്പെട്ടുള്ള ഹര്‍ജി സുപ്രീം കോടതി തള്ളി. ബി.ജെ.പി സംസ്ഥാന കമ്മിറ്റി അംഗം നോബിള്‍ മാത്യു നല്‍കിയ ഹര്‍ജിയാണ് തള്ളിയത്. വിജിലന്‍സ് അന്വേഷണം നടക്കുന്നതിനാല്‍ ഇടപെടാനാകില്ലെന്ന് കോടതി അറിയിച്ചു.

വിജിലന്‍സ് അന്വേഷണം നടക്കുന്നതിനാല്‍ അത് പൂര്‍ത്തിയാകട്ടേയെന്നും കേസില്‍ ഇടപെടുന്നില്ലെന്നും കോടതി പറഞ്ഞു. അന്വേഷണം സമാപിച്ച ശേഷം പരാതിക്കാരന് പരാതികളുണ്ടെങ്കില്‍ ഉചിതമായ കോടതിയെ സമീപിക്കാവുന്നതാണെന്നും കോടതി ചൂണ്ടിക്കാട്ടി. അതേസമയം, വിധി സ്വാഗതാര്‍ഹമാണെന്ന് കെ.എം മാണി പ്രതികരിച്ചു.

ബാര്‍ കോഴക്കേസ്: വിജിലന്‍സ് അന്വേഷണം അവസാനിപ്പിക്കുന്നു

chandrika — Wed, 17 Jan 2018 06:32:30 +0000

കൊച്ചി: കേരള രാഷ്ട്രീയത്തില്‍ ഏറെ ചര്‍ച്ച ചെയ്ത ബാര്‍ കോഴക്കേസിന്റെ അന്വേഷണം വിജിലന്‍സ് അവസാനിപ്പിക്കുന്നു. കേസില്‍ സാഹചര്യ തെളിവുകളോ ശാസ്ത്രീയ തെളിവുകളോ കണ്ടെത്താനായിട്ടില്ലെന്ന് ചൂണ്ടിക്കാട്ടിയാണ് കേസ് അവസാനിപ്പിക്കുന്നത്.
മുന്‍ മന്ത്രിയും കേരള കോണ്‍ഗ്രസ് നേതാവുമായ കെ.എം മാണി കോഴ വാങ്ങിയതിന് തെളിവും കണ്ടെത്താനായിട്ടില്ല. പരാതിക്കാരനായ ബിജു രമേശ് തെളിവായി കോടതിയില്‍ ഹാജരാക്കിയ സിഡിയില്‍ കൃത്രിമമുണ്ടെന്ന് ഫോറന്‍സിക് പരിശോധനയില്‍ തെളിഞ്ഞു. ഈ സാഹചര്യത്തില്‍ അന്വേഷണം മുന്നോട്ടു കൊണ്ടുപോകാനാവില്ലെന്ന് വിജിലന്‍സ് കോടതിയെ അറിയിക്കുകയായിരുന്നു. ഇക്കാര്യം അറിയിച്ചുള്ള അന്തിമ റിപ്പോര്‍ട്ട് മുദ്രവെച്ച കവറില്‍ കോടതിയില്‍ സമര്‍പ്പിക്കുകയും ചെയ്തു.
മുന്‍ മുഖ്യമന്ത്രി വി.എസ് അച്യുതാനന്ദന്‍, എല്‍ഡിഎഫ് കണ്‍വീനര്‍ വൈക്കം വിശ്വന്‍, മന്ത്രി വി.എസ് സുനില്‍കുമാര്‍, ബാറുടമ ബിജു രമേശ്, ബിജെപി നേതാവ് വി.മുരളീധരന്‍ എന്നിവരുടെ പരാതിയിലാണ് വിജിലന്‍സ് അന്വേഷണം നടത്തിയിരുന്നത്. കെ.എം മാണി ബാറുടമകളില്‍ നിന്ന് ഒരു കോടി രൂപയുടെ കൈക്കൂലി വാങ്ങിയെന്നാണ് ആരോപണം.
അതിനിടെ, അന്വേഷണം പൂര്‍ത്തിയാക്കി റിപ്പോര്‍ട്ട് സമര്‍പ്പിക്കുന്നതിന് വിജിലന്‍സ് സംഘത്തിന് ഹൈക്കോടതി 45 ദിവസത്തെ സമയം കൂടി അനുവദിച്ചു.