bath – Chandrika Daily

നിങ്ങൾ എത്ര തവണ കുളിച്ചാലും ശരീരത്തിലെ ഈ ഭാഗങ്ങളിലെ അഴുക്ക് പൂര്‍ണമായും പോകില്ല ?

webdesk14 — Fri, 23 Jan 2026 08:22:14 +0000

ദിവസവും കുളിക്കുന്നതിലൂടെ ശരീരം മുഴുവൻ വൃത്തിയാകുമെന്നാണ് പലരും കരുതുന്നത്. എന്നാൽ എല്ലായ്‌പ്പോഴും അങ്ങനെയല്ല. നമ്മൾ എല്ലാ ദിവസവും കുളിച്ചാലും ശരീരത്തിന്റെ എല്ലാ ഭാഗങ്ങളിൽനിന്നും അണുക്കളെ നീക്കം ചെയ്യണമെന്നില്ല. കാരണം, ചില ശരീരഭാഗങ്ങളിൽ കൂടുതൽ വിയർപ്പ്, എണ്ണമയം എന്നിവ ഉണ്ടാകുകയും അവിടെ അഴുക്ക് അടിഞ്ഞ് കൂടുകയും ചെയ്യുന്നു. എന്നാൽ, ഈ ഭാഗങ്ങൾ വൃത്തിയാക്കുന്നത് പലപ്പോഴും അവഗണിക്കപ്പെടുകയും ചെയ്യുന്നു.

ഇപ്പോഴിതാ ന്യൂയോർക്കിൽ നിന്നുള്ള ഡോ. ടോണി ഈ ശരീരഭാഗങ്ങൾ ഏതൊക്കെയാണെന്ന് വിശദീകരിക്കുന്നു. പൊക്കിൾ, ചെവിക്ക് പിന്നിലുള്ള ഭാഗം, കാൽ വിരലുകൾക്കിടയിലെ ഭാഗം, നഖങ്ങളുടെ അടിയിലെ ഭാഗം, കക്ഷം, കഴുത്ത് എന്നീ ശരീരഭാഗങ്ങളിൽ അഴുക്ക് അധികമായി പുരളാൻ സാധ്യതയുണ്ടെന്നും ഇവിടെ ബാക്ടീരിയകൾ ഒളിഞ്ഞിരിക്കാമെന്നും അദ്ദേഹം പറയുന്നു.

ഇവിടെ വിയർപ്പ്, കേടായ ചർമ്മം, ഈർപ്പം എന്നിവ അടിഞ്ഞു കൂടുന്നു. ഇത് ബാക്ടീരിയകൾക്കും ഫംഗസുകൾക്കും വളരാൻ അനുയോജ്യമായ അന്തരീക്ഷം സൃഷ്ടിക്കുന്നു. ദിവസങ്ങളോളം വൃത്തിയാക്കാതെ വരുമ്പോൾ ഇവിടെനിന്ന് ദുർഗന്ധം, ചർമത്തിൽ കേടുപാടുകൾ, അണുബാധകൾ എന്നിവയ്ക്ക് കാരണമാകും. പൊക്കിളിൽ ചൂട് അനുഭവപ്പെടുകയും കാൽവിരലുകൾ എപ്പോഴും വിയർത്തിരിക്കുകയും ചെയ്യും. നഖങ്ങൾക്കിടയിൽ അഴുക്ക് അടിഞ്ഞ് കൂടുകയും ചെവികൾക്ക് പിന്നിൽ എണ്ണമയം വർധിക്കുകയും ചെയ്യും. ഈ ഭാഗങ്ങൾ വൃത്തിയായിരിക്കാൻ ദിവസേനയുള്ള കുളി മാത്രം പോരായെന്ന് സാരം. മിക്കപ്പോഴും മറന്നുപോകുന്ന ഈ ഭാഗങ്ങൾ വൃത്തിയായിരിക്കാൻ പ്രത്യേക ശ്രദ്ധ ആവശ്യമാണ്.

‘ദുർഗന്ധവും ചർമ്മ പ്രശ്‌നങ്ങളുമുണ്ടാക്കും’

”എല്ലാ ദിവസവും കുളിക്കുന്നത് നിങ്ങൾ വൃത്തിയുള്ളവരാണെന്ന് അർത്ഥമാക്കുന്നില്ല. ചില ശരീര ഭാഗങ്ങൾ ശരിയായി സ്‌ക്രബ് ചെയ്തില്ലെങ്കിൽ ബാക്ടീരിയ, വിയർപ്പ്, നശിച്ച കോശങ്ങൾ എന്നിവ അടിഞ്ഞ് കൂടാൻ ഇടയാക്കും. ഇവിടെ നിന്ന് പലപ്പോഴും ദുർഗന്ധം, ചർമപ്രശ്‌നങ്ങൾ, ഫംഗസ് ബാധ എന്നിവയ്ക്ക് തുടക്കമിടും,” ഡോ. ടോണി പറഞ്ഞു.

”പരിഹാരം വളരെ ലളിതമാണ്, ചെറു ചൂടുള്ള വെള്ളം, വീര്യം കുറഞ്ഞ സോപ്പ്, ഒരു തുണി എന്നിവ ഉപയോഗിച്ച് ഈ ഭാഗങ്ങൾ വൃത്തിയാക്കുക. ഇവിടം പതിവായി വൃത്തിയാക്കുന്നതിലൂടെ ഇവിടെ നിന്നുള്ള ദുർഗന്ധം കുറയുകയും ചർമ്മം നശിക്കുന്നത് തടയുകയും മൊത്തത്തിൽ ആരോഗ്യമുള്ള ചർമം സ്വന്തമാക്കുകയും ചെയ്യും. മിക്ക ചർമ്മ അണുബാധകളും ആളുകൾ വൃത്തിയാക്കാൻ മറക്കുന്ന ശരീരഭാഗങ്ങളിൽ നിന്നാണ് തുടക്കമിടുന്നതെന്ന് നിങ്ങൾക്കറിയാമോ,” ഡോ. ടോണി ചോദിച്ചു.

ഡോക്ടറെ അഭിനന്ദിച്ച് സോഷ്യൽ മീഡിയ

”ഞാൻ വീട്ടിലെത്തി എന്റെ നഖങ്ങൾക്കടിയിൽ സ്‌ക്രബ് ചെയ്തു. മറ്റ് ശരീരഭാഗങ്ങളും ഞാൻ വൃത്തിയാക്കി, അത് ഞാൻ ശരിയായ വണ്ണം ചെയ്തു,” ഒരാൾ പറഞ്ഞു. ”കുട്ടിക്കാലത്തേ ഞാൻ കാൽവിരലുകൾക്കിടയിലും പൊക്കിൾ, ചെവികൾ എന്നിവടങ്ങളും വൃത്തിയാക്കാൻ ശീലിച്ചിരുന്നു. രാത്രിയും രാവിലെയും കുളിക്കുക,” മറ്റൊരാൾ പറഞ്ഞു.

വോട്ട് ചെയ്ത് വീട്ടിലേക്ക് മടങ്ങുമ്പോള്‍ ചെക്ക് ഡാമില്‍ കുളിക്കാനിറങ്ങിയ യുവാവ് മുങ്ങി മരിച്ചു

webdesk18 — Tue, 09 Dec 2025 10:21:48 +0000

ഇടുക്കി: വോട്ട് ചെയ്ത് വീട്ടിലേക്ക് മടങ്ങുകയായിരുന്ന ശ്രീജിത്ത് (20) ചെക്ക് ഡാമില്‍ മുങ്ങിമരിച്ച നിലയില്‍. കരുണാപുരം ചാലക്കുടിമേട് സ്വദേശിയാണ് മരിച്ചത്. ഉച്ചയ്ക്ക് 12 മണിയോടെ ചെക്ക് ഡാമില്‍ കുളിക്കാനിറങ്ങിയപ്പോള്‍ അപകടം സംഭവിച്ചതായി നാട്ടുകാര്‍ അറിയിച്ചു.

കരുണാപുരം ഗ്രാമപഞ്ചായത്ത് 13ാം വാര്‍ഡിലെ അപ്പാപ്പികട രണ്ടാം ബൂത്തില്‍ വോട്ട് രേഖപ്പെടുത്തി വീട്ടിലേക്ക് മടങ്ങുന്നതിനിടെയാണ് ഇയാള്‍ കുളിക്കാന്‍ ഇറങ്ങിയത്. ശ്രീജിത്തിനെ നാട്ടുകാരും പൊലീസും ചേര്‍ന്ന് പുറത്തെടുത്ത് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.

തടയണയില്‍ കുളിക്കാനിറങ്ങിയ യുവാവ് മുങ്ങിമരിച്ചു

webdesk13 — Thu, 12 Oct 2023 17:22:23 +0000

തടയണയില്‍ കുളിക്കാനിറങ്ങിയ യുവാവ് മുങ്ങിമരിച്ചു. കോട്ടയം പൂഞ്ഞാര്‍ മങ്കുന്നത്ത് ബോസ് ഈപ്പന്റെ മകന്‍ ജെയിംസ് (22) ആണ് മരിച്ചത്. വ്യാഴാഴ്ച വൈകിട്ട് 6.30-ഓടെയാണ് അപകടം.

വെള്ളത്തിന്റെ തള്ളലില്‍ ഇവിടെ അകപ്പെട്ടുപോയ ജെയിംസിനെ പുറത്തെടുക്കാനായില്ല.

ഈരാറ്റുപേട്ടയില്‍നിന്ന് അഗ്‌നിരക്ഷാസേനയെത്തി ജെയിംസിനെ പുറത്തെടുത്ത് ഈരാറ്റുപേട്ടയിലെ സ്വകാര്യ ആശുപത്രിയിലെത്തിച്ചെങ്കിലും മരിച്ചു. മാതാവ്: മിനി. സഹോദരന്‍ അബു ബോസ്.

തിരുവനന്തപുരത്ത് കടലില്‍ കുളിക്കാനിറങ്ങിയ മൂന്ന് പേരെ കാണാതായി

webdesk13 — Sun, 25 Dec 2022 15:24:49 +0000

തിരുവനന്തപുരം: തിരുവനന്തപുരത്ത് ക്രിസ്മസ് ആഘോഷത്തിനിടെ കടലില്‍ കുളിക്കാനിറങ്ങിയ മൂന്ന് പേരെ കാണാതായി. പുത്തന്‍തോപ്പില്‍ കടലില്‍ കുളിക്കാനിറങ്ങിയ രണ്ടുപേരെയും അഞ്ചുതെങ്ങില്‍ ഒരാളെയുമാണ് കാണാതായത്. പുത്തന്‍തോപ്പ് സ്വദേശി ശ്രേയസ് (16), സാജിദ് (19) എന്നിവരെയാണ് പുത്തന്‍തോപ്പ് കടലില്‍ കാണാതായത്. കൂടെയുണ്ടായിരുന്ന ഒരാളെ രക്ഷപ്പെടുത്തി. അഞ്ചുതെങ്ങില്‍ മാമ്പള്ളി സ്വദേശി സാജന്‍ ആന്റണിയെയുമാണ് കാണാതായത്. ഇവര്‍ക്കായുള്ള തെരച്ചില്‍ പുരോഗമിക്കുകയാണ്.