കഴിഞ്ഞ ജൂണ്‍ 29-നാണ് രാംഗഢില്‍ അലിമുദ്ദീനെ ബീഫ് കൈവശം വെച്ചെന്നാരോപിച്ച് ഗോസംരക്ഷകര്‍ തല്ലിക്കൊന്നത്. 200 കിലോ ഇറച്ചിയുമായി വാനില്‍ പോകുന്നതിനിടെയായിരുന്നു ആക്രമണം. വാന്‍ തീവെച്ച ഗോസംരക്ഷകര്‍ അലിമുദ്ദീനെ മര്‍ദ്ദിച്ചവശനാക്കി. പൊലീസ് എത്തി അലീമുദ്ദീനെ ആസ്പത്രിയില്‍ എത്തിച്ചെങ്കിലും രക്ഷിക്കാനായില്ല. രാജ്യത്ത് ആദ്യമായാണ് ബീഫ് കൊലയില്‍ ശിക്ഷ വിധിക്കുന്നത്.

സമരവേദിയിലെത്തും മുമ്പ് മുതിര്‍ന്ന കോണ്‍ഗ്രസ് നേതാവ് ദിഗ്‌വിജയ് സിങുമായി കൂടിക്കാഴ്ച നടത്തിയ കുടുംബം ഡല്‍ഹിയില്‍ വാര്‍ത്താ സമ്മേളനവും നടത്തി. പിതാവിനെ ആക്രമിക്കുന്നതിന്റെ വീഡിയോ മാധ്യമങ്ങളിലൂടെ ലോകം മുഴുവന്‍ കണ്ടതാണ്. ആ വീഡിയോയില്‍ കാണുന്നവര്‍ അല്ല തന്റെ പിതാവിനെ കൊന്നതെങ്കില്‍ പിന്നെ ആരാണെന്ന് പൊലീസ് പറയണമെന്ന് പെഹ്‌ലുഖാന്റെ മകന്‍ ഇര്‍ഷാദ് മാധ്യമങ്ങളോട് പറഞ്ഞു.
പിതാവിനൊപ്പം തന്നെയും പശുഭീകരര്‍ ആക്രമിച്ചിരുന്നു. സംഭവത്തിലെ ഇരയും പിതാവിന്റെ കൊലപാതകത്തിലെ ദൃക്‌സാക്ഷിയുമാണ് താന്‍. എന്നിട്ടും ഒരിക്കല്‍പോലും രാജസ്ഥാന്‍ പൊലീസ് തന്നെ വിളിപ്പിക്കുകയോ പ്രതികളെ തിരിച്ചറിയാന്‍ ആവശ്യപ്പെടുകയോ ചെയ്തിട്ടില്ല. 13 പ്രതികളുള്ളതില്‍ ആറു പേര്‍ക്കാണ് പൊലീസ് ക്ലീന്‍ ചിറ്റ് നല്‍കിയത്. ഇവര്‍ പുറത്തിറങ്ങുന്നത് തങ്ങളുടെ കുടുംബത്തിലെ മറ്റ് അംഗങ്ങള്‍ക്ക് കൂടി ഭീഷണിയാണ്. താന്‍ ജീവിച്ചിരിക്കുന്നിടത്തോളം കാലം നീതിക്കു വേണ്ടിയുള്ള നിയമപോരാട്ടം തുടരും. എന്നാല്‍ രാജസ്ഥാനിലാണെങ്കില്‍ അത് സാധ്യമാവില്ല. അതുകൊണ്ട് കേസ് രാജസ്ഥാന് പുറത്തേക്ക് മാറ്റണം. സുപ്രീംകോടതിയില്‍ മാത്രമാണ് ഇനി തങ്ങള്‍ക്ക് വിശ്വാസമുള്ളതെന്നും ഇര്‍ഷാദ് ഖാന്‍ കൂട്ടിച്ചേര്‍ത്തു.
പെഹ്‌ലുഖാന്റെ ഭാര്യ ജെബുന, എട്ടു വയസ്സുള്ള മകന്‍ ഇന്‍സാദ്, അമ്മാവന്‍ ഹുസൈന്‍ ഖാന്‍, ബന്ധുക്കളായ ഹകാമദ്ദീന്‍, ജമീല്‍ അഹമ്മദ് എന്നിവരും സമരത്തില്‍ പങ്കെടുക്കാന്‍ ഡല്‍ഹിയില്‍ എത്തിയിരുന്നു.

ന്യൂനപക്ഷ വിഭാഗത്തിനു നേരെ കലാപം ഉണ്ടാകാവുന്ന സ്ഥിതി നിലനില്‍ക്കുന്നു എന്നതിനാലാണ് 144 ഏര്‍പ്പെടുത്തിയതെന്നും സ്ഥിതിഗതികള്‍ ഏറെക്കുറെ നിയന്ത്രണ വിധേയമാണെന്നും ഐ.ജി എം.എല്‍ മീന പറഞ്ഞു. ജില്ലയിലെ ആറ് പ്രശ്‌നബാധിത പ്രദേശങ്ങളില്‍ അധിക സുരക്ഷാ സേനയെ നിയോഗിച്ചിട്ടുണ്ട്. മൂന്നിലധികം പേര്‍ പൊതുസ്ഥലങ്ങളില്‍ കൂട്ടം ചേരുന്നത് വിലക്കിയിട്ടുണ്ട്. കൊലപാതകവുമായി ബന്ധപ്പെട്ട് രാംഗഡ് പോലീസ് സ്‌റ്റേഷനില്‍ രണ്ട് എഫ്.ഐ.ആര്‍ ആണ് രജിസ്റ്റര്‍ ചെയ്തിട്ടുള്ളത്. കേസിലെ തുടര്‍ നടപടികള്‍ക്ക് ഫോറന്‍സിക് ലബോറട്ടറിയില്‍ നിന്നുള്ള റിപ്പോര്‍ട്ട് കാത്തിരിക്കുകയാണെന്ന് എസ്.പി കിശോര്‍ കൗശല്‍ പറഞ്ഞു.

രാംഗഡ് പോലീസ് സ്‌റ്റേഷന്റെ പരിധിയില്‍ വെച്ച് തൊട്ടടുത്ത ഹസാരിബാഗ് ജില്ലക്കാരനായ അലീമുദ്ദീന്‍ അന്‍സാരി സഞ്ചരിച്ച വാഹനം അക്രമികള്‍ തടയുകയും അദ്ദേഹത്തെ വലിച്ചിറക്കി ക്രൂരമായി മര്‍ദിക്കുകയുമായിരുന്നു. വിവരം ലഭിച്ച പോലീസ് സ്ഥലത്തെത്തി അന്‍സാരി ആശുപത്രിയില്‍ എത്തിച്ചെങ്കിലും അപ്പോഴേക്കും മരിച്ചിരുന്നു. ബീഫ് കടത്തിയെന്നാരോപിച്ച് അലീമുദ്ദീന്റെ വാഹനം അക്രമികള്‍ അഗ്നിക്കിരയാക്കി.

ബീഫിന്റെ പേരില്‍ അലീമുദ്ദീനില്‍ നിന്ന് അക്രമികള്‍ മുമ്പ് പണം പിടിച്ചുപറിക്കാറുണ്ടായിരുന്നുവെന്നും രാജ്യത്തിന്റെ വിവിധ ഭാഗങ്ങളില്‍ നടക്കുന്ന സംഭവങ്ങളുടെ തുടര്‍ച്ചയായി ആസൂത്രിത കൊലപാതകമാണ് നടന്നതെന്ന് കരുതുന്നതായും ജാര്‍ഖണ്ഡ് പോലീസ് എ.ഡി.ജി ആര്‍.കെ മുല്ലിക് പറഞ്ഞു. ഒരു കുട്ടിയെ തട്ടിക്കൊണ്ടു പോയി കൊലപ്പെടുത്തി എന്ന പേരില്‍ അന്‍സാരിക്കെതിരെ എഫ്.ഐ.ആര്‍ നിലവിലുണ്ട്. ഇതിനു പിന്നില്‍ അന്‍സാരിയെ ഭീഷണിപ്പെടുത്തി പണം വാങ്ങിയ സംഘമാണെന്ന സംശയമുണ്ടെന്നും മുല്ലിക് വ്യക്തമാക്കി.

ഗിഡ്ഡിയിലെ തന്റെ വീട്ടില്‍ നിന്ന് അന്‍സാരി പുറപ്പെട്ടപ്പോള്‍ തന്നെ അക്രമികള്‍ അദ്ദേഹത്തിന്റെ പിന്നിലുണ്ടായിരുന്നുവെന്നും ഒരു സംഘം അക്രമികള്‍ രാംഗഡില്‍ അദ്ദേഹത്തെ കാത്തുനില്‍ക്കുകയായിരുന്നുവെന്നും പ്രാദേശിക പോലീസ് പറഞ്ഞു.