Bharat Jodo Yatra – Chandrika Daily

ഭാരത് ജോഡോ ന്യായ് യാത്ര: ഉദ്ഘാടനവേദിക്ക് മണിപ്പൂർ സർക്കാർ അനുമതി നിഷേധിച്ചു

webdesk14 — Wed, 10 Jan 2024 09:36:00 +0000

ന്യൂഡല്‍ഹി: രാഹുല്‍ ഗാന്ധിയുടെ ഭാരത് ജോഡോ ന്യായ് യാത്രയ്ക്ക് ഇംഫാലില്‍ അനുമതി നിഷേധിച്ച് മണിപ്പൂര്‍ സര്‍ക്കാര്‍. ഭാരത് ജോഡോ യാത്രയുടെ രണ്ടാംഘട്ടമായ ഭാരത് ജോഡോ ന്യായ് യാത്ര ഞായറാഴ്ച മണിപ്പൂരിലെ ഇംഫാല്‍ പാലസ് ഗ്രൗണ്ടില്‍ നിന്നും തുടങ്ങാനായിരുന്നു കോണ്‍ഗ്രസ് തീരുമാനിച്ചിരുന്നത്.

യാത്രയുടെ ഉദ്ഘാടനം പാലസ് ഗ്രൗണ്ടില്‍ നടത്തുന്നതിന് സംസ്ഥാന സര്‍ക്കാര്‍ അനുമതി നിഷേധിച്ചു എന്ന് കോണ്‍ഗ്രസ് നേതാക്കള്‍ എഐസിസി ആസ്ഥാനത്തു നടത്തിയ വാര്‍ത്താ സമ്മേളനത്തില്‍ അറിയിച്ചു. സുരക്ഷാ കാരണങ്ങള്‍ ചൂണ്ടിക്കാട്ടിയാണ് മണിപ്പൂര്‍ സര്‍ക്കാരിന്റെ നടപടിയെന്ന് എഐസിസി ജനറല്‍ സെക്രട്ടറി കെ സി വേണുഗോപാല്‍ പറഞ്ഞു.

രാജ്യത്തിന്റെ കിഴക്കുനിന്ന് പടിഞ്ഞാറോട്ട് ഒരു യാത്ര നടത്തുമ്പോൾ മണിപ്പൂരിനെ ഒഴിവാക്കാനാവില്ല. ഇത് രാഷ്ട്രീയ പരിപാടിയല്ല. കേന്ദ്ര-സംസ്ഥാന സർക്കാരുകൾ ഈ യാത്രയെ പേടിക്കുന്നുണ്ട്. അതുകൊണ്ടാണ് ഇത്തരമൊരു തീരുമാനം. സംഘർഷനാളുകളിൽ മണിപ്പൂർ സന്ദർശിച്ച് സമാധാന സന്ദേശം നൽകിയ നേതാവാണ് രാഹുൽ ഗാന്ധി. വേദിക്ക് അനുമതി നിഷേധിച്ചതിലൂടെ എന്ത് സന്ദേശമാണ് സർക്കാർ നൽകുന്നതെന്നും വേണുഗോപാൽ ചോദിച്ചു.

ഭാരത് ജോഡോ യാത്രയുടെ രണ്ടാം ഘട്ടം അടുത്ത മാസം, ഒരുങ്ങുന്നത് ഹൈ ബ്രിഡ് യാത്ര

webdesk13 — Fri, 10 Nov 2023 09:56:07 +0000

രാഹുൽ ഗാന്ധി നയിക്കുന്ന ഭാരത് ജോഡോ യാത്രയുടെ രണ്ടാം ഘട്ടം 2023 ഡിസംബറിനും 2024 ഫെബ്രുവരിക്കും ഇടയിൽ നടത്താൻ കോൺഗ്രസ് നീക്കം. കാൽനടയായും വാഹനങ്ങളിലുമായി ഹൈബ്രിഡായാണ് രണ്ടാം ഭാരത് ജോഡോ യാത്ര നടത്തുന്നത്.

ഭാരത് ജോഡോ യാത്രയുടെ ആദ്യ ഘട്ടം 2022 സെപ്റ്റംബർ ഏഴിന് തമിഴ്‌നാട്ടിലെ കന്യാകുമാരിയിലാണ് ആരംഭിച്ചത്. ഏകദേശം 4,080 കിലോമീറ്റർ പിന്നിട്ട യാത്ര 2023 ജനുവരിയിൽ ജമ്മു കശ്മീരിലെ ശ്രീനഗറിൽ സമാപിച്ചു. 126 ദിവസം കൊണ്ട് 12 സംസ്ഥാനങ്ങളിലെ 75 ജില്ലകളിലൂടെയാണ് യാത്ര കടന്നുപോയത്.

ആദ്യ യാത്ര തെക്കുനിന്ന് വടക്കോട്ടായതിനാൽ, കിഴക്കുനിന്നു പടിഞ്ഞാറോട്ട് മറ്റൊരു ഭാരത് ജോഡോ യാത്ര നടത്തണമെന്ന് കോൺഗ്രസ് പ്രവർത്തക സമിതി അംഗങ്ങൾ ആവശ്യപ്പെട്ടിരുന്നു. ഒന്നാം ഭാരത് ജോഡോ യാത്ര കോൺഗ്രസിന് ഇന്ത്യയിലുടനീളം മികച്ച മുന്നേറ്റമാണ് സമ്മാനിച്ചത്. കർണാടകയിൽ കോൺഗ്രസിന്റെ തിരിച്ചുവരവിന് ഭാരജ് ജോഡോ യാത്ര കളമൊരുക്കിയെന്നാണ് പാർട്ടി വിലയിരുത്തൽ.

ഭാരത് ജോഡോ യാത്ര രണ്ടാംഘട്ടത്തിലേക്ക്; പോര്‍ബന്ദറില്‍ നിന്ന് തുടക്കം

webdesk14 — Tue, 07 Feb 2023 05:53:42 +0000

രാഹുല്‍ ഗാന്ധി നയിക്കുന്ന ഭാരത് ജോഡോ യാത്രയുടെ രണ്ടാംഘട്ടത്തിന് തയ്യാറെടുത്ത് കോണ്‍ഗ്രസ്. രാഹുല്‍ ഗാന്ധിയുടെ നേതൃത്വത്തില്‍ ഗുജറാത്തിലെ പോര്‍ബന്ദറില്‍ നിന്നും അസമിലേക്ക് പദയാത്രക്കൊരുങ്ങുന്നതായി പാര്‍ട്ടിവൃത്തങ്ങള്‍ അറിയിച്ചു. പദയാത്രയുടെ തിയ്യതിയും മറ്റും തീരുമാനിച്ചിട്ടില്ല. മഹാത്മാഗാന്ധിയുടെ ജന്മസ്ഥലമായ പോര്‍ബന്ദറില്‍ നിന്നും മാര്‍ച്ചില്‍ യാത്ര ആരംഭിക്കാനാണ് കരുതുന്നത്. യാത്രയുടെ സമാപനവ ചടങ്ങില്‍ തന്നെ രണ്ടാംഘട്ട യാത്രയുടെ കാര്യങ്ങള്‍ രാഹുല്‍ഗാന്ധി സൂചിപ്പിച്ചിരുന്നു.

രാജ്യത്തിന്റെ പടിഞ്ഞാറന്‍ അതിര്‍ത്തിയില്‍ നിന്നും കിഴക്കന്‍ സംസ്ഥാനങ്ങളിലേക്ക് യാത്ര നടത്തുന്നതിനെപ്പറ്റി ആലോചിക്കുന്നുണ്ടെന്നായിരുന്നു രാഹുല്‍ പറഞ്ഞത്. മണ്‍സൂണിന് ശേഷമോ വര്‍ഷാവസാനമോ യാത്ര നടക്കാന്‍ സാധ്യതയുണ്ടെന്നാണ് വിവരം. രാഹുല്‍ ഗാന്ധിയുടെ ഭാരത് ജോഡോ യാത്രയ്ക്ക് മികച്ച പ്രതികരണമാണ് രാജ്യമെമ്പാടും ലഭിച്ചത്. തൊഴിലില്ലായ്മ, വിലക്കയറ്റം, അസമത്വം തുടങ്ങിയ വിഷയങ്ങള്‍ ഉയര്‍ത്തിക്കാട്ടുന്നതില്‍ ഈ യാത്രയിലൂടെ രാഹുലും പാര്‍ട്ടിയും വിജയിച്ചിട്ടുണ്ട്.

ഭാരത് ജോഡോ യാത്ര; ‘തന്റെ ജീവിതത്തിലെ ഏറ്റവും മനോഹരവും ആഴമേറിയതുമായ അനുഭവമെന്ന്’ രാഹുല്‍ഗാന്ധി

webdesk14 — Mon, 30 Jan 2023 05:05:24 +0000

കന്യാകുമാരിയില്‍ കഴിഞ്ഞ വര്‍ഷം സെപ്റ്റംബര്‍ 7നാണ് കോണ്‍ഗ്രസ് നേതാവ് രാഹുല്‍ ഗാന്ധി നയിക്കുന്ന ഭാരത് ജോഡോ യാത്ര തുടങ്ങിയത്. 4000 കിലോമീറ്ററോളം താണ്ടി കഴിഞ്ഞ ദിവസം ശ്രീനഗറില്‍വച്ച് യാത്ര അവസാനിച്ചപ്പോള്‍, ഇത് തന്റെ ജീവിതത്തിലെ ഏറ്റവും ആഴമേറിയതും മനോഹരവുമായ അനുഭവമാണെന്ന് അദ്ദേഹം പറഞ്ഞു.

‘ഭാരത് ജോഡോ യാത്രയ്ക്ക് രാജ്യത്ത് മികച്ച പ്രതികരണമാണ് ലഭിച്ചത്. ഈ യാത്രയില്‍ ഇന്ത്യയിലെ ജനങ്ങളുടെ പ്രതിരോധവും ശക്തിയും ഞങ്ങള്‍ക്ക് കാണാനായി. രാജ്യത്തെ കര്‍ഷകരും തൊഴിലില്ലാത്ത യുവാക്കളും നേരിടുന്ന പ്രശ്നങ്ങളെക്കുറിച്ചും ഞങ്ങള്‍ക്ക് നേരിട്ടറിയാന്‍ സാധിച്ചെന്നും ശ്രീനഗറില്‍ വച്ച് മാധ്യമപ്രവര്‍ത്തകരോട് രാഹുല്‍ പ്രതികരിച്ചു. ‘ഭാരത് ജോഡോ യാത്രയുടെ ഫലം രാജ്യത്തിന് മുഴുവന്‍ ലഭിക്കുമെന്നും അദ്ദേഹം കൂട്ടിച്ചേര്‍ത്തു.

ജമ്മു കശ്മീരിലെ സുരക്ഷാ സ്ഥിതിഗതികള്‍ സംബന്ധിച്ച് കേന്ദ്രസര്‍ക്കാരിനെ ലക്ഷ്യമിട്ട് കേന്ദ്രഭരണപ്രദേശത്ത് ക്രമസമാധാനം അത്ര മികച്ചതാണെങ്കില്‍ ബിജെപി നേതാക്കള്‍ ജമ്മുവില്‍ നിന്ന് കശ്മീരിലേക്ക് യാത്ര നടത്തണമെന്നാണ് അദ്ദേഹം ആവശ്യപ്പെട്ടത്. അമിത് ഷാ ജമ്മുവില്‍ നിന്ന് കശ്മീരിലേക്ക് കാല്‍നടയായി പോകണമെന്നും അദ്ദേഹം കൂട്ടിച്ചേര്‍ത്തു.

സാധ്യമായ ബിജെപി വിരുദ്ധ മുന്നണിയില്‍ പ്രതീക്ഷ നിലനിര്‍ത്തിക്കൊണ്ട്, പ്രതിപക്ഷ പാര്‍ട്ടികള്‍ക്ക് അഭിപ്രായവ്യത്യാസങ്ങളുണ്ടാകുമെങ്കിലും ആര്‍എസ്എസിനും ബിജെപിക്കുമെതിരെ അവര്‍ എപ്പോഴും ഒറ്റക്കെട്ടായി നില്‍ക്കുമെന്ന് രാഹുല്‍ പറഞ്ഞു. നേരത്തെ ഭാരത് ജോഡോ യാത്രയുടെ ഭാഗമായി ശ്രീനഗറിലെ ലാല്‍ ചൗക്കിലെ ചരിത്രപ്രസിദ്ധമായ ക്ലോക്ക് ടവറില്‍ ദേശീയ പതാക ഉയര്‍ത്തിയതിനു ശേഷം താന്‍ ഇന്ത്യക്ക് നല്‍കിയ വാഗ്ദാനങ്ങള്‍ നിറവേറ്റിയതായി പറഞ്ഞു.

അമിത് ഷാ എന്തുകൊണ്ട് ജമ്മു-കശ്മീരില്‍ യാത്ര നടത്തുന്നില്ല: രാഹുല്‍ ഗാന്ധി

webdesk12 — Sun, 29 Jan 2023 15:28:21 +0000

കശ്മീര്‍: ഭാരത് ജോഡോ യാത്രയിലൂടെ ഒരുപാട് കാര്യങ്ങള്‍ മനസിലാക്കാന്‍ സാധിച്ചെന്ന് രാഹുല്‍ ഗാന്ധി. ഒരുപാട് ആളുകളെ നേരില്‍ കണ്ടു.യാത്രയ്ക്ക് മികച്ച പ്രതികരണമാണ് ലഭിച്ചത്. ജീവിത്തിലെ ഏറ്റവും മികച്ച അനുഭവമായിരുന്നു ഭാരത് ജോഡോ യാത്ര. വിദ്വേഷത്തിനെതിരായ സ്‌നേഹത്തിന്റെ രാഷ്ട്രീയമാണ് ജനങ്ങളോട് പറഞ്ഞതെന്നും രാഹുല്‍ ഗാന്ധി വ്യക്തമാക്കി.

ജമ്മു കശ്മീരിലെ ജനങ്ങള്‍ തൃപ്തരല്ല. തൊഴിലില്ലായ്മ, വിലക്കയറ്റം എന്നിവയില്‍ ജനങ്ങള്‍ അതൃപ്തരാണ്. യാത്രയുടെ ഫലം രാജ്യത്തിന് മുഴുവനാണെന്നും മാധ്യമങ്ങള്‍ പ്രതിപക്ഷത്തിന് വേണ്ട പരിഗണന നല്‍കുന്നില്ലെന്നും രാഹുല്‍ പറഞ്ഞു. ജമ്മു-കശ്മീരില്‍ കണ്ട കാഴ്ചകളില്‍ സന്തോഷവാനല്ല. എനിക്ക് ചെയ്യാന്‍ കഴിയുന്നതെല്ലാം ജമ്മു കാശ്മീരിന് വേണ്ടി ചെയ്യുമെന്നും രാഹുല്‍ കൂട്ടിച്ചേര്‍ത്തു.പ്രതിപക്ഷത്തിന് പല അഭിപ്രായങ്ങളുമുണ്ടാകും , എന്നാല്‍ എല്ലാവരും ഒരുമിച്ച്‌ മുന്നോട്ട് പോകുമെന്നും രാഹുല്‍ ഗാന്ധി വ്യക്തമാക്കി.

ഭാരത് ജോഡോ യാത്ര; പതാക ഉയര്‍ത്തി നടത്തം അവസാനിപ്പിച്ച് രാഹുല്‍ ഗാന്ധി

webdesk14 — Sun, 29 Jan 2023 10:01:38 +0000

രാഹുല്‍ ഗാന്ധി നയിക്കുന്ന ഭാരത് ജോഡോ യാത്രയുടെ പദയാത്ര കശ്മീരില്‍ അവസാനിപ്പിച്ചു. ലാല്‍ ചൗക്കില്‍ രാഹുല്‍ ഗാന്ധിയും പ്രിയങ്ക ഗാന്ധിയും ദേശീയ പതാക ഉയര്‍ത്തിയതോടെയാണ് യാത്ര നിര്‍ത്തിവെച്ചത്. നാളെയാണ് സമാപന സമ്മേളനം. ഇതുവരെ 3,570 കിലോമീറ്റര്‍ യാത്രചെയ്താണ് രാഹുല്‍ ഗാന്ധി കശ്മീരിലെത്തിയത്. 145 ദിവസമാണ് ഈ യാത്രക്ക് വേണ്ടി അദ്ദേഹം ചിലവഴിച്ചത്.

https://twitter.com/INCIndia/status/1619592043621138432

കഴിഞ്ഞ വര്‍ഷം സെപ്റ്റംബര്‍ 7നാണ് യാത്ര തുടങ്ങിയത്. പന്താചൗക്കില്‍ നിന്ന് രാവിലെ 10 മണിക്ക് ആരംഭിച്ച യാത്ര ഉച്ചയ്ക്ക് 12 മണിയോടെ ലാല്‍ ചൗക്കില്‍ അവസാനിക്കുകയായിരുന്നു. നേരത്തെ പാര്‍ട്ടി ഓഫീസിന് മുന്നില്‍ അല്ലാതെ മറ്റൊരിടത്തും പതാക ഉയര്‍ത്താന്‍ പൊലീസ് അനുമതി നിഷേധിച്ചെന്ന് കോണ്‍ഗ്രസ് നേതാവ് ജയ്‌റാം രമേഷ് ആരോപിച്ചിരുന്നു. എന്നാല്‍ പിന്നീട്, പതാക ഉയര്‍ത്താന്‍ അനുമതി നല്‍കി.

ഭാരത് ജോഡോ യാത്ര പുനരാരംഭിച്ചു; സുരക്ഷാ വീഴ്ചയുണ്ടായില്ലെന്ന് ജമ്മു കശ്മീര്‍ പൊലീസ്

webdesk12 — Sat, 28 Jan 2023 05:37:59 +0000

ന്യുഡല്‍ഹി; കോണ്‍ഗ്രസ് നേതാവ് രാഹുല്‍ ഗാന്ധി നയിക്കുന്ന ഭാരത് ജോഡോ യാത്ര വീണ്ടും പുനരാരംഭിച്ചു.അവന്തിപോരയിലെ ചുര്‍സൂ ഗ്രാമത്തില്‍ നിന്നാണ് യാത്ര പുനരാരംഭിച്ചത്. സുരക്ഷാ പ്രശ്നങ്ങളെ തുടര്‍ന്ന് ഇന്നലെ യാത്ര നിര്‍ത്തിവച്ചിരുന്നു. ഇന്ന് ഉച്ചയ്ക്ക് ശേഷം യാത്രയുണ്ടാകില്ല. പന്താര ചൗക്കില്‍ ഇന്ന് ഉച്ചയോടെ യാത്ര അവസാനിപ്പിക്കുമെന്നും കോണ്‍ഗ്രസ് അറിയിച്ചു.

അതിനിടെ സുരക്ഷാ വീഴ്ച സംഭവിച്ചെന്ന കോണ്‍ഗ്രസിന്റെ ആരോപണം ജമ്മു കശ്മീര്‍ പൊലീസ് നിഷേധിച്ചു. “ഒരു കിലോമീറ്റര്‍ പിന്നിട്ട ശേഷം യാത്ര നിര്‍ത്തിവെക്കാന്‍ തീരുമാനമെടുക്കുന്നതിന് മുമ്ബ് പൊലീസുമായി കൂടിയാലോചന നടത്തിയിട്ടില്ല. ഒരു കിലോമീറ്ററോളം യാത്ര സമാധാനപരമായാണ് നീങ്ങിയത്. പൊലീസിന്‍റെ ഭാഗത്ത് നിന്ന് സുരക്ഷ വീഴ്ച ഉണ്ടായിട്ടില്ല. പഴുതടച്ച സുരഷയാണ് യാത്രക്ക് വേണ്ടി ഒരുക്കിയത്”- ജമ്മു കശ്മീര്‍ പൊലീസ് ട്വീറ്റ് ചെയ്തു.

സുരക്ഷ വീഴ്ച; ഭാരത് ജോഡോ യാത്ര താല്‍ക്കാലികമായി നിര്‍ത്തിവെച്ചു

webdesk14 — Fri, 27 Jan 2023 08:22:08 +0000

ഭാരത് ജോഡോ യാത്ര താല്കാലികമായി നിര്‍ത്തിവെച്ചു. മതിയായ സുരക്ഷ ഉറപ്പാക്കതിനാലാണ് പുതിയ തീരുമാനം. ജമ്മുവിന്‍ പര്യാടനം നടത്തുന്നതിനിടയില്‍ ബനിഹാലില്‍ ജനക്കൂട്ടം യാത്രക്കിടയില്‍ ഇരച്ചുകയറിയിരുന്നു. ഇത്തരമൊരു സംഭവം വലിയ സുരക്ഷാവീഴ്ചയാണെന്ന് കോണ്‍ഗ്രസ് പ്രതികരിച്ചു. പൊലീസിന്റെ ഭാഗത്തു നിന്നുള്ള നിഷ്‌ക്രിയത്വമാണ് ഇത്തരത്തിലൊരു വീഴ്ചയ്ക്ക് കാരണമെന്ന് കോണ്‍ഗ്രസ് ചൂണ്ടിക്കാട്ടി. പൂര്‍ണമായ സുരക്ഷ ഉറപ്പാക്കിയതിനുശേഷം യാത്ര പുനരാരംഭിക്കും.

ഭാരത് ജോഡോ യാത്ര; രാഹുല്‍ ഗാന്ധിക്ക് മുന്നറിയിപ്പുമായി സുരക്ഷാ ഏജന്‍സികള്‍

webdesk14 — Tue, 17 Jan 2023 06:21:27 +0000

രാഹുല്‍ ഗാന്ധി നയിക്കുന്ന ഭാരത് ജോഡോ യാത്രയ്ക്ക് മുന്നറിയിപ്പുമായി സുരക്ഷ ഏജന്‍സികള്‍. ജമ്മു കശ്മീരിലെ ചിലയിടങ്ങളില്‍ ജോഡോ യാത്രയില്‍ കാല്‍നട യാത്ര ഒഴിവാക്കണമെന്നാണ് സുരക്ഷ ഏജന്‍സികളുടെ മുന്നറിയിപ്പ്. സുരക്ഷ ഭീഷണിയുള്ള സ്ഥലങ്ങളില്‍ കാറില്‍ യാത്ര ചെയ്യാനാണ് നിര്‍ദേശം.

ഭീകാരാക്രമണം മുന്നില്‍ കണ്ടാണ് ഇത്തരമൊരു മുന്നറിയിപ്പ്. ജോഡോ യാത്ര ഇന്ന് വൈകീട്ട് പഞ്ചാബ് ഹിമാചല്‍ അതിര്‍ത്തിയിലെത്തും. യാത്ര സുരക്ഷിതമാക്കാന്‍ സുരക്ഷ ഏജന്‍സികള്‍ നടപടികള്‍ സ്വീകരിച്ചിട്ടുണ്ടെന്നാണ് വിവരം. 25ന് രാഹുല്‍ ഗാന്ധിക്ക് ഇസ്ഡ് പ്ലസ് കാറ്റഗറി സുരക്ഷയാണുള്ളത്. ഒന്‍പതോളം സുരക്ഷാ ഭടമ്മാരാണ് 24 മണിക്കൂറും രാഹുല്‍ ഗാന്ധികൊപ്പമുള്ളത്.

ഭാരത് ജോഡോ യാത്ര; അണിചേര്‍ന്ന് മുന്‍ സൈനിക ഉദ്യോഗസ്ഥരും, കരസേന മേധാവികളും

webdesk12 — Sun, 08 Jan 2023 17:32:36 +0000

രാഹുല്‍ ഗാന്ധിയുടെ നേതൃത്വത്തില്‍ നടക്കുന്ന ഭാരത് ജോഡോ യാത്രയില്‍ അണിചേര്‍ന്ന് മുന്‍ കരസേനാ മേധാവി ദീപക് കപൂര്‍ അടക്കമുള്ള മുന്‍ സൈനിക ഉദ്യോഗസ്ഥര്‍. സേനയില്‍ ഉന്നത പദവി വഹിച്ചിരുന്ന ഇവര്‍ ഹരിയാനയിലെ കുരുക്ഷേത്രയില്‍ വെച്ചാണ് രാഹുല്‍ ഗാന്ധിക്കൊപ്പം നടന്നത്.

മുന്‍ ആര്‍മി ചീഫ് ജനറല്‍ ദീപക് കപൂര്‍, ലഫ്റ്റന്റ് ജനറല്‍ ആര്‍കെ ഹൂഡ, ലഫ്റ്റനെന്റ് ജനറല്‍ വികെ നരുല, മേജര്‍ ജനറല്‍ എസ്.എസ് ചൗധരി, മേജര്‍ ജനറല്‍ ധര്‍മ്മേന്ദര്‍ സിങ്, കേണല്‍ ജിതേന്ദര്‍ ഗില്‍, കേണല്‍ പുഷ്‌പേന്ദര്‍ സിങ്, ലഫ്റ്റനെന്റ് ജനറല്‍ ഡിഡിഎസ് സന്ധു, മേജര്‍ ജനറല്‍ ബി ദയാല്‍ എന്നിവരുള്‍പ്പെടെ നിരവധി മുന്‍ സൈനിക ഉദ്യോഗസ്ഥരും ഭാരത് ജോഡോ യാത്രയില്‍ പങ്കെടുത്തു.