bharat – Chandrika Daily

പാഠപുസ്തകങ്ങളില്‍ ഇന്ത്യക്ക് പകരം ഭാരത്; ശുപാര്‍ശ എന്‍.സി.ഇ.ആര്‍.ടി അംഗീകരിച്ചു

webdesk14 — Wed, 25 Oct 2023 10:29:06 +0000

പാഠപുസ്തകങ്ങളില്‍ രാജ്യത്തിന്റെ പേര് ‘ഇന്ത്യ’യെന്നതിന് പകരം ഭാരത് എന്ന് ഉപയോഗിക്കാന്‍ എന്‍സിഇആര്‍ടി സമിതിയുടെ ശുപാര്‍ശ. ഏഴ് അംഗസമിതി ഏകകണ്ഠമായാണ് ശുപാര്‍ശ ചെയ്തതെന്ന് സമിതി അധ്യക്ഷന്‍ സിഐ ഐസക് പറഞ്ഞു.

ജി20 ഉച്ചകോടയിലാണ് ഇന്ത്യക്ക് പകരം ഭാരത് എന്ന് ഉപയോഗിച്ച് തുടങ്ങിയത്. രാഷ്ട്രപതിയുടെ അത്താഴവിരുന്നിന് രാഷ്ട്രതലവന്‍മാര്‍ക്ക് നല്‍കിയ കത്തില്‍ ഭാരത് എന്നായിരുന്നു ഉപയോഗിച്ചിരുന്നത്. ഇത് വിവാദമായിതോടെ ഇന്ത്യ അല്ലെങ്കില്‍ ഭാരത് എന്ന് ഉപയോഗിക്കുന്നതില്‍ തെറ്റില്ലെന്നായിരുന്നു കേന്ദ്രസര്‍ക്കാരിന്റെ പ്രതികരണം.

ഭാരത് എന്നത് ഏറെ പഴക്കമുള്ള പേരാണെന്നും ഏഴായിരം വര്‍ഷം പഴക്കമുള്ള വിഷ്ണുപുരാണത്തില്‍ പോലും ഭാരതമെന്നാണ് പറയുന്നതെന്നും അദ്ദേഹം പറഞ്ഞു. ഇന്ത്യ എന്ന് പേര് വ്യാപകമായി ഉപയോഗിക്കാന്‍ തുടങ്ങിയത് ഈസ്റ്റ് ഇന്ത്യാകമ്പനിയുടെ വരവോടെയാണ്. പുരാതന ചരിത്രമെന്നത് ഇനി മുതല്‍ ക്ലാസിക്കല്‍ ചരിത്രമെന്നാക്കും. പുരാതന, മധ്യകാല, ആധുനിക കാല ചരിത്രമെന്ന വിഭജനം ഒഴിവാക്കണമെന്നും സിഐ ഐസക് പറഞ്ഞു.

ഹിന്ദുവിജയങ്ങള്‍ക്ക് പാഠപുസ്തകങ്ങളില്‍ പ്രാധാന്യം നല്‍കണമെന്നും ശുപാര്‍ശയില്‍ പറയുന്നു. ‘നമ്മുടെ പരാജയങ്ങളാണ് നിലവില്‍ പാഠപുസ്തകങ്ങളില്‍ പരാമര്‍ശിക്കപ്പെടുന്നത്. എന്നാല്‍ മുഗളന്‍മാര്‍ക്കും സുല്‍ത്താന്‍മാര്‍ക്കുമെതിരായ നമ്മുടെ വിജയങ്ങള്‍ നിലവില്‍ ഇല്ല’- സിഐ ഐസക് കൂട്ടിച്ചേര്‍ത്തു
.

ജി20 ഉച്ചകോടിയിൽ ഇന്ത്യയില്ല, ‘ഭാരത്’ മാത്രം

webdesk14 — Sat, 09 Sep 2023 07:44:16 +0000

ഡല്‍ഹിയില്‍ ആരംഭിച്ച ജി20 ഉച്ചക്കോടിയിലും ‘ഇന്ത്യ’ക്ക് പകരം രേഖപ്പെടുത്തിയത് ‘ഭാരത്’. പ്രധാനമന്ത്രി നരേന്ദ്ര മോദിയുടെ ഇരിപ്പിടത്തിലാണ് ഭാരതത്തിന്റെ ബോര്‍ഡ് പ്രത്യക്ഷപ്പെട്ടത്. ഭാരതത്തിന്റെ രാഷ്ട്രതലവന്‍ എന്നാണ് മോദിയെ ബോര്‍ഡില്‍ വിശേഷിപ്പിച്ചിരിക്കുന്നത്. നേരത്തെ ജി20 ഉച്ചക്കോടിക്ക് മുമ്പ് പ്രസിഡന്റ് ദ്രൗപതി മുര്‍മ്മുവിന്റെ അത്താഴവിരുന്നിന്റെ ക്ഷണക്കത്തിലും ഭാരത് പ്രത്യക്ഷപ്പെട്ടിരുന്നു. ക്ഷണക്കത്തില്‍ ‘പ്രസിഡന്റ് ഓഫ് ഭാരത്’ എന്നായിരുന്നു മുര്‍മ്മുവിനെ വിശേഷിപ്പിച്ചിരുന്നത്. ഇതിനിടെയാണ് ജി20 ഉച്ചകോടി വേദിയിലും ഭാരത് പ്രത്യേക്ഷപ്പെട്ടിരിക്കുന്നത്.

രാജ്യത്തിന്റെ പേര് പൂര്‍ണമായും ഭാരത് എന്ന് മാറ്റാന്‍ കേന്ദ്രസര്‍ക്കാര്‍ നീക്കം നടത്തുകയാണെന്ന് ചര്‍ച്ചകളും വിമര്‍ശനവും സജീവമാകുന്നതിനിടെയാണ് നെയിംബോര്‍ഡിലെ പേരുമാറ്റം. 2022 വരെ ജി20 ഉച്ചകോടിയില്‍ ഇന്ത്യ എന്നാണ് രാജ്യത്തിന്റെ പേര് രേഖപ്പെടുത്തിയിരുന്നത്.

സെപ്തംബര്‍ 18 മുതല്‍ 22 വരെ നടക്കുന്ന പാര്‍ലമെന്റ് പ്രത്യേക സമ്മേളനത്തില്‍ ഇതുസംബന്ധിച്ച ബില്‍ അവതരിപ്പിച്ചേക്കുമെന്നും വിവരമുണ്ട്. അടിമത്വത്തിന്റെ ചിന്താഗതിയില്‍ നിന്ന് പൂര്‍ണമായും പുറത്തുകടക്കാനാണ് ‘ഇന്ത്യ’ എന്ന വാക്ക് ഒഴിവാക്കുന്നതെന്നാണ് അനൗദ്യോഗിക വിശദീകരണം. നേരത്തെ ആര്‍എസ്എസ് മേധാവി മോഹന്‍ ഭാഗവതും ‘ഇന്ത്യ’ എന്ന പേര് ഒഴിവാക്കണമെന്ന് ആവശ്യപ്പെട്ടിരുന്നു.

‘ഇന്ത്യ’ ലോകം അംഗീകരിച്ച നാമം: ശശി തരൂർ

webdesk14 — Wed, 06 Sep 2023 02:13:21 +0000

രാജ്യത്തിന്റെ രണ്ട് ഔദ്യോഗിക നാമങ്ങളിൽ ഒന്നായ ഇന്ത്യയെ “ഭാരത്” എന്ന് വിളിക്കുന്നതിൽ ഭരണഘടനാപരമായ എതിർപ്പില്ലെങ്കിലും, നൂറ്റാണ്ടുകളായി കണക്കാക്കാനാവാത്ത ബ്രാൻഡ് മൂല്യമുള്ള “ഇന്ത്യ”യെ പൂർണ്ണമായും ഉപേക്ഷിച്ച് കേന്ദ്ര സർക്കാർ വിഡ്ഢിയാകില്ലെന്ന് പ്രതീക്ഷിക്കുന്നുവെന്ന് കോൺഗ്രസ് പ്രവർത്തകസമിതിയംഗം ശശി തരൂർ പറഞ്ഞു.

ലോകമെമ്പാടും അംഗീകരിക്കപ്പെട്ട, ചരിത്രത്തിന്റെ പുനർനിർമ്മാണ നാമത്തിനായുള്ള അവകാശവാദം ഉപേക്ഷിക്കുന്നതിനുപകരംരണ്ട് വാക്കുകളും ഉപയോഗിക്കുന്നത് തുടരണം. – തരൂർ അഭിപ്രായപ്പെട്ടു.

പ്രധാനമന്ത്രിയും പേരുമാറ്റി ; ഇന്ത്യക്ക് പകരം ഭാരത്

webdesk14 — Tue, 05 Sep 2023 17:03:52 +0000

ഇന്തോനേഷ്യൻ സന്ദർശനം പ്രമാണിച്ച് തയ്യാറാക്കിയ കത്തിൽ ഇന്ത്യൻ പ്രധാനമന്ത്രി എന്നതിന് പകരം ഭാരതത്തിൻ്റെ പ്രധാനമന്ത്രി അഥവാ പ്രൈം മിനിസ്റ്റർ ഓഫ് ഭാരത് എന്ന് രേഖപ്പെടുത്തി കേന്ദ്രസർക്കാർ.നേരത്തെ ജി ട്വൻറി രാഷ്ട്ര നേതാക്കൾക്കുള്ള രാഷ്ട്രപതിയുടെ വിരുന്നിലും ‘പ്രസിഡണ്ട് ഓഫ് ഇന്ത്യ’ക്ക് പകരം ‘ പ്രസിഡണ്ട് ഓഫ് ഭാരത് ‘എന്ന് രേഖപ്പെടുത്തിയിരുന്നു.

ഇതാദ്യമായാണ് ഇന്ത്യയുടെ പേര് ഔദ്യോഗിക രേഖകളിൽ ഭാരത് എന്നാക്കുന്നത്. അടുത്ത 11 ന് ആരംഭിക്കുന്ന പ്രത്യേക പാർലമെൻറ് സമ്മേളനത്തിൽ രാജ്യത്തിന്റെ പേര് ഇന്ത്യ എന്ന് മാറ്റി ഭാരത് എന്നാകുമെന്ന് അഭ്യൂഹം ഉണ്ട് ഇതിനിടെയാണ് ഔദ്യോഗിക രേഖകളിൽ ഭാരത് എന്ന നാമമാറ്റം .സുരക്ഷിതത്വം ഇല്ലാത്ത സർക്കാരിൻറെ ലക്ഷണമാണ് ഈ പേരുമാറ്റമെന്ന് കോൺഗ്രസ് പരിഹസിച്ചു.