കേരളത്തില്‍ ആരും ബ്ലുവെയില്‍ ഗെയിം ഡൗണ്‍ലോഡ് ചെയ്തതായി സ്ഥിരീകരിക്കാനായിട്ടില്ലെന്ന് അദ്ദേഹം അറിയിച്ചു. ഇതിനെക്കുറിച്ച് ഡിജിറ്റല്‍ സാങ്കേതിക വിദ്യ ഉപയോഗിച്ചുളള അന്വേഷണമുണ്ടാകും. ഇതുവരെ ഇതിന്റെ ലിങ്ക് കിട്ടിയെന്നോ, ഡൗണ്‍ലോഡ് ചെയ്‌തെന്നോയുളള ഒരു സംഭവം പോലും കേരളത്തില്‍ റിപ്പോര്‍ട്ട് ചെയ്യപ്പെട്ടിട്ടില്ല. പോലീസ് വളരെ കാര്യക്ഷമമായി ഇതിനെ നിരീക്ഷിക്കുന്നുണ്ട്. കേരളത്തില്‍ അതിന്റെ ഒരു ലിങ്ക് പോലും കാണാന്‍ സാധിച്ചിട്ടില്ല. സൈബര്‍ ഡോം, സൈബര്‍ സെല്‍ എന്നിവയും നിരീക്ഷിക്കുകയും ഇതുമായി ബന്ധപ്പെട്ടുളള കൗണ്‍സലിങ് നല്‍കുകയും ചെയ്യുന്നുണ്ടെന്നും അദ്ദേഹം പറഞ്ഞു.

തിരുവനന്തപുരത്ത് മരിച്ച മനോജിന്റെ ലക്ഷണങ്ങളെക്കുറിച്ച് അറിഞ്ഞപ്പോഴാണ് മകന്റെ മരണത്തിലും ഇത്തരത്തിലുള്ള സൂചനകള്‍ ഉണ്ടായിരുന്നുവെന്ന് കണ്ണൂരില്‍ ആത്മഹത്യ ചെയ്ത സാവന്തിന്റെ അമ്മ പറഞ്ഞത്. രാത്രി മുഴുവന്‍ ഗെയിം കളിക്കാറുണ്ടെന്നും കയ്യില്‍ കോംമ്പസ്സുകൊണ്ട് മുറിവുണ്ടാക്കിയിരുന്നെന്നും അമ്മ പറയുന്നു. മകന് മാനസിക പ്രശ്‌നമാണെന്ന് കരുതി പലപ്പോഴും കൗണ്‍സിലിങ്ങിന് വിധേയമാക്കിയതായും അവര്‍ അറിയിച്ചു.

നിരവധി യുവാക്കളെയും കുട്ടികളേയും ആത്മഹത്യ ചെയ്യാന്‍ വരെ പ്രേരിപ്പിച്ച ബ്ലു വെയില്‍ ഗെയിമുകള്‍ക്ക് രാജ്യത്ത് നിരോധിക്കണമന്നാവശ്യപ്പെട്ട് കേരള മുഖ്യമന്ത്രി പിണറായി വിജയന്‍ പ്രധാനമന്ത്രി നരേന്ദ്ര മോദിക്ക് കത്തയച്ചു. സമൂഹ മാധ്യമങ്ങള്‍ വഴിയും മറ്റു ഇന്റര്‍നെറ്റ് ലിങ്കുകളിലൂടെയുമാണ് കുട്ടികള്‍ ഈ അപകടകരമായ ഗെയിമുമായി ബന്ധപ്പെടുന്നത്. ഇത് അവരുടെ ജീവന്‍ വരെ അപകടത്തിലാക്കുന്നു. രാജ്യത്തെ വിവിധ വകുപ്പുകള്‍ ചേര്‍ന്ന് സംയുക്തമായ പ്രവര്‍ത്തനത്തിലൂടെ ഈ ഗെയിമിന്റെ ലഭ്യത നിയന്ത്രിക്കുകയും ഉപയോഗം നിരോധിക്കുകയും ചെയ്യല്‍ അനിവാര്യമാണെന്നാണ് മാധ്യമങ്ങളിലൂടെ മനസ്സിലാകുന്നതെന്ന് മുഖ്യമന്ത്രി കത്തിലൂടെ പ്രധാനമന്ത്രിയോട് ആവശ്യപ്പെട്ടു.