BLUE WHILE – Chandrika Daily

ബ്ലൂ വെയില്‍ ബുദ്ധികേന്ദ്രമായ പെണ്‍കുട്ടി അറസ്റ്റില്‍

chandrika — Thu, 31 Aug 2017 14:57:28 +0000

മോസ്‌കോ: നൂറിലേറെ പേരെ ആത്മഹത്യയിലേക്ക് തള്ളിവിടുകയും ഭരണകൂടങ്ങളുടെ ഉറക്കംകെടുത്തുകയും ചെയ്യുന്ന ബ്ലൂ വെയില്‍ ചലഞ്ചിനു പിന്നിലെ ബുദ്ധികേന്ദ്രമെന്ന് സംശയിക്കുന്ന പതിനേഴുകാരി റഷ്യയില്‍ അറസ്റ്റില്‍. ഖബറോവ്‌സ്‌ക്ക്രായില്‍നിന്നാണ് പെണ്‍കുട്ടിയെ പൊലീസ് കസ്റ്റഡിയിലെടുത്തത്. ഡത്ത് ഗ്രൂപ്പ് അഡ്മിനിസ്്‌ട്രേറ്റര്‍ എന്ന പേരില്‍ അറിയപ്പെട്ടിരുന്ന പെണ്‍കുട്ടി ബ്ലൂ വെയില്‍ കളിച്ചുകൊണ്ടാണ് അഡ്മിനായി മാറിയത്.
ബ്ലൂ വെയില്‍ ചാലഞ്ചിന്റെ പേരിലുള്ള നിരവധി സംഘങ്ങളെ നിയന്ത്രിച്ചിരുന്നത് ഈ പെണ്‍കുട്ടിയാണ്. ഗെയിമില്‍നിന്ന് പിന്മാറുന്നവരെ കൊല്ലുമെന്നും ബന്ധുക്കളെ ഉപദ്രവിക്കുമെന്നും ഭീഷണിപ്പെടുത്തി നിരവധി പേരെ ആത്മഹത്യയിലേക്ക് തള്ളിയതില്‍ പെണ്‍കുട്ടിക്ക് പങ്കുണ്ടെന്ന് പൊലീസ് കണ്ടെത്തി. ബ്ലൂ വെയില്‍ ഗെയിം രൂപകല്‍പന ചെയ്ത ഫിലിപ് ബുഡയ്കിന്‍ എന്ന 22കാരനായ റഷ്യന്‍ യുവാവ് സൈബീരിയയില്‍ തടവില്‍ കഴിയുകയാണ്. 50 ദിവസം നീണ്ട കളിയില്‍ പങ്കെടുക്കുന്നവര്‍ക്ക് നിര്‍ദ്ദേശങ്ങള്‍ നല്‍കുന്നത് അഡ്മിനിസ്‌ട്രേറ്റര്‍മാരാണ്. റഷ്യയില്‍ അറസ്റ്റിലായ പെണ്‍കുട്ടിയും അതില്‍ അംഗമായിരുന്നു. പുരുഷനാണെന്ന വ്യാജേനയാണ് അവര്‍ നിര്‍ദേശങ്ങള്‍ നല്‍കിയിരുന്നത്. ഇന്ത്യയുള്‍പ്പെടെ ലോകത്തിന്റെ വിവിധ ഭാഗങ്ങളില്‍ 130ലേറെ പേര്‍ ബ്ലൂ വെയില്‍ കളിച്ച് മരിച്ചിട്ടുണ്ട്. വ്യാഴാഴ്ച തമിഴ്‌നാട്ടില്‍ പത്തൊമ്പതുകാരന്‍ ബ്ലൂവെയില്‍ കളിച്ച് ആത്മഹത്യ ചെയ്തിരുന്നു. റഷ്യക്കാരിയുടെ അറസ്‌റ്റോടെ കളിയെക്കുറിച്ചുള്ള കൂടുതല്‍ വിവരങ്ങള്‍ പുറത്തുവരുമെന്നാണ് പ്രതീക്ഷ.

ബ്ലൂ വെയില്‍ ഇഫക്ട്, സുരക്ഷിത ഇന്റര്‍നെറ്റ് ഉപയോഗത്തിന് സി.ബി.എസ്.ഇ ഗൈഡ് ലൈന്‍ പ്രസിദ്ധീകരിക്കുന്നു

chandrika — Sat, 19 Aug 2017 06:43:48 +0000

ഇന്റര്‍നെറ്റ് ഉപയോഗത്തില്‍ കര്‍ശന നിയന്ത്രണങ്ങള്‍ ആവശ്യപ്പെട്ടുള്ള സി.ബി.എസ്.ഇ യുടെ സര്‍ക്കുലര്‍ സ്‌കൂളുകളിലേക്ക് അയക്കും. കമ്പ്യൂട്ടറുകളില്‍ ഫലപ്രദമായ ഫയര്‍വാള്‍ ഇന്‍സ്റ്റാള്‍ ചെയ്യുക, മറ്റു അനാവശ്യ വെബ്‌സൈറ്റുകളുടെ നിയന്ത്രണവും നിരീക്ഷണവും ഏര്‍പ്പെടുത്തുക തുടങ്ങിയ നിര്‍ദ്ദേശങ്ങള്‍ ഉള്‍ക്കൊള്ളിച്ചാണ് സര്‍ക്കുലര്‍ പുറത്തിറക്കുന്നത്.

ബ്ലൂ വെയില്‍ പ്രചരിക്കുന്ന ലിങ്കുകളെ ഇന്റര്‍നെറ്റില്‍ നിന്ന് നീക്കം ചെയ്യാനുള്ള കേന്ദ്ര സര്‍ക്കാര്‍ ഉത്തരവ് പുറത്തിറങ്ങിയതിന് പിന്നാലെയാണ് വിദ്യാര്‍ത്ഥികളെ നേരിട്ടു തന്നെ ജാഗ്രതപ്പെടുത്തുക എന്ന ഉദ്ദേശ്യത്തോടെ സി.ബി.എസ് ഇ യും രംഗത്തെത്തിയിരിക്കുന്നത് ശ്രദ്ധേയമാണ്.

സി.ബി.എസ് ഇയില്‍ അഫ്‌ലിയേറ്റ് ചെയ്ത രാജ്യത്തുടനീളമുള്ള 18000 സ്‌കൂളുകളിലാണ് സര്‍ക്കുലര്‍ വിതരണം ചെയ്തിരിക്കുന്നത്.

ആത്മഹത്യയിലൊതുങ്ങില്ല ബ്ലൂ വെയ്ല്‍ ഗെയിം

chandrika — Wed, 16 Aug 2017 17:05:12 +0000

കഴിഞ്ഞ ദിവസം മുംബൈയില്‍ പതിനാലു വയസുള്ള മന്‍പ്രീത് കെട്ടിടത്തിനു മുകളില്‍ നിന്നു ചാടി മരിക്കുകയും കൂട്ടുകാര്‍ അവന്‍ ‘മോബൈലില്‍ ബ്ലൂ വെയ്ല്‍ കളിക്കാറുണ്ട്’ എന്ന മൊഴി നല്‍കുകയും ചെയ്തതോടെയാണ് ബ്ലൂ വെയ്ല്‍ വീണ്ടും ചര്‍ച്ചയായത്. പിന്നീട് പാലക്കാട്ടെ പിള്ളേര്‍ കൊയിലാണ്ടിക്ക് പോയത് ബ്ലൂ വെയ്ല്‍ കളിച്ചിട്ടാണെന്ന മറ്റൊരു കഥ കേരളത്തിലും റിലീസായി. ഇവരുടെയൊക്കെ മോബൈലില്‍ ബ്ലൂവെയ്ല്‍ ഗെയിം കളിച്ച ആപ് കണ്ടു എന്നൊക്കെയാണ് പറയുന്നത്. ബ്ലൂ വെയ്ല്‍ എന്ന ടാസ്‌ക് മാത്രമുള്ള ഈ കളിക്ക് ഇല്ലാത്ത ആപ് എങ്ങിനെ കണ്ടു എന്ന് ചോദിച്ചാല്‍ ആര്‍ക്കും ഉത്തരമില്ല.
നാലു വര്‍ഷത്തെ പഴക്കമുണ്ട് ബ്ലൂ വെയ്ല്‍ ഗെയിമിന്. അതില്‍ തുടങ്ങുന്ന ആത്മഹത്യകള്‍ക്കു രണ്ട് വര്‍ഷവും. എന്താണ് ബ്ലൂ വെയ്ല്‍ ഗെയിം? റഷ്യയില്‍ വി കെ എന്നൊരു സോഷ്യല്‍ വെബ്‌സൈറ്റുണ്ട്. വി കോണ്ടാക്ട് (ഇന്‍ കോണ്ടാക്ട്) എന്ന് അര്‍ത്ഥം. കെട്ടിലും മട്ടിലും പഴയകാല ഫെയ്‌സ്ബുക്കിനെ അനുസ്മരിപ്പിക്കുന്നു. ഇന്ന് ഉപയോഗിക്കുന്ന ടെലഗ്രാം ആപിന്റെ ഡെവലപര്‍ പാവേല്‍ ഡുറോവ് ആണ് വി കെ സൈറ്റിന്റെയും ഉടമ. വി കെയില്‍ 2013 ല്‍ തുടങ്ങിയ ഒരു ഗ്രൂപ്പിലാണു ബ്ലൂ വെയ്ല്‍ ഗെയിം ആരംഭിക്കുന്നത്. 2015ല്‍ ആണ് ആദ്യമായി ഈ ഗെയിമിന്റെ പേരില്‍ ആത്മഹത്യ റിപ്പോര്‍ട്ട് ചെയ്യപ്പെടുന്നത്. ബുഡൈകിന്‍ എന്ന ആളാണ് ഗെയിമിന്റെ ഉപജ്ഞാതാവ്.
ഗെയിമില്‍ പങ്കെടുക്കാന്‍ വി കെയില്‍ ബ്ലൂവെയ്ല്‍ എന്നും എഫ് 56, 57 എന്നൊക്കെ ചില ടാഗുകള്‍ ഉള്ള സ്റ്റാറ്റസുകള്‍ ആദ്യം പോസ്റ്റ് ചെയ്യണം. പിന്നീട് ഗെയിമിന്റെ കുറേറ്റര്‍ എന്ന പേരില്‍ ബന്ധപ്പെടുന്ന ആള്‍ നിങ്ങളെ അവരുടെ പ്രൈവറ്റ് ഗ്രൂപ്പിലേക്ക് ക്ഷണിക്കും. പിന്നീട് നിങ്ങളുമായി അവര്‍ ആദ്യത്തെ ടാസ്‌ക് പങ്കുവയ്ക്കുന്നു. അതിരാവിലെ 4.20 ന് എഴുന്നേല്‍ക്കുക, അവര്‍ പറയുന്ന എന്തെങ്കിലും കാര്യം സേര്‍ച്ച് ചെയ്യുക, ഇതാണു ആദ്യ ടാസ്‌ക്. പിന്നീട് അതികഠിനമായ ടാസ്‌കുകളിലേക്ക് നീങ്ങുന്നു. സ്വയം മുറിവേല്‍പ്പിക്കുക. മറ്റുള്ളവരെ ഹിംസിക്കുക തുടങ്ങിയ സാഡിസ്റ്റ് ചിന്തകളുള്ള പല ടാസ്‌കുകളും അതില്‍ ഉള്‍പ്പെടും. ഒപ്പം അതി സാഹസങ്ങളായ മറ്റു ചില ടാസ്‌കുകളുമുണ്ടാകും. ഏറ്റെടുക്കപ്പെടുന്ന എല്ലാ ടാസ്‌കുകളുടേയും ഫോട്ടോകള്‍ കുറേറ്റര്‍ക്ക് നല്‍കണം എന്ന നിബന്ധനയും ഉണ്ട്. അവസാനത്തെ ടാസ്‌കാണ് ആത്മഹത്യ.
49 ടാസ്‌കുകള്‍ക്കിടയില്‍ ചലഞ്ചില്‍ പങ്കെടുക്കുന്നവരെ ബ്ലാക്ക്‌മെയില്‍ ചെയ്യാന്‍ തക്ക എന്തോ കാര്യങ്ങള്‍ അവര്‍ കണ്ടെത്തുന്നു. അത് മോബൈല്‍ ഹാക്ക് ചെയ്താണ് കണ്ടെത്തുന്നതെന്ന് പറയുന്നത് ശരിയല്ല. പ്രായം കുറവുള്ള കുട്ടികളില്‍ നിന്നും ബ്ലാക്ക്‌മെയില്‍ ചെയ്യപ്പെടാന്‍ മാത്രം എന്ത് കാര്യമാണ് അവര്‍ക്ക് കിട്ടുക? ആപ്ലിക്കേഷന്‍ ഉപയോഗിച്ചുള്ള ഗെയിമല്ല ഇത്. ചെയ്യേണ്ട ടാസ്‌ക് വി കെയിലെയോ ടെലഗ്രാമിലേയോ പ്രൈവറ്റ് ഗ്രൂപ്പുകളിലൂടെ കുറേറ്റര്‍ നല്‍കുകയാണ് പതിവ്. വി കെ എന്നത് ഒരു നിയന്ത്രണവുമില്ലാത്ത, റഷ്യയില്‍ വെബ്‌റാങ്കിങില്‍ ഒന്നാം സ്ഥാനമുള്ള വെബ്‌സൈറ്റ് ആണ്. ആര്‍ക്കും ജോയിന്‍ ചെയ്യാം. എന്തും പോസ്റ്റാം. സര്‍ക്കാരുമായോ സുരക്ഷാ ഏജന്‍സികളുമായോ ഒരു ഡാറ്റയും പങ്കുവെക്കാന്‍ താല്‍പര്യം കാണിക്കാത്തവരുമാണ്. അതുകൊണ്ടു തന്നെയാണ് ഇത്തരം കാര്യങ്ങള്‍ക്ക് അവിടം താവളമാകുന്നതും.
ഇതൊരു ഗെയിം അല്ല, നല്‍കുന്ന ചലഞ്ച് ഏറ്റെടുക്കുക എന്നതാണ്. അതുകൊണ്ട് തന്നെ മോബൈലില്‍ ഒന്നും ഇന്‍സ്റ്റാള്‍ ചെയ്യേണ്ടതുമില്ല. കമ്പ്യൂട്ടറിലും ഇന്‍സ്റ്റാള്‍ ചെയ്യാന്‍ ഒന്നുമില്ല ഈ കളിക്ക്. എന്നാല്‍ മാധ്യമങ്ങള്‍ പറയുന്നത് ഇന്ത്യയില്‍ നാല്‍പതിനായിരം ഡൗണ്‍ ലോഡ് കഴിഞ്ഞു എന്നൊക്കെ ആണ്. അതൊരു തെറ്റായ വിവരമാണ്. ബ്ലൂ വെയ്ല്‍ എന്ന പേരില്‍ ഷെയര്‍ ചെയ്യുന്ന എ പി കെ ഫയലൊക്കെ ഫേക്ക് ആപുകളാണ്. അവയില്‍ ചിലത് മോബൈല്‍ ഫോണിനെ പൂര്‍ണ്ണമായും നിയന്ത്രിക്കാന്‍ ഹാക്കര്‍മാര്‍ നിര്‍മ്മിച്ചിരിക്കുന്ന റിമോട്ട് അഡ്മിനിസ്‌ട്രേഷന്‍ സൗകര്യം ഉള്ളവയുമാണ്. അതിനാല്‍ ബ്ലൂ വെയിലിന്റെ പുറകേ പോയി അത് ഇന്‍സ്റ്റാള്‍ ചെയ്യാതിരിക്കുക.
ബ്ലൂ വെയ്ല്‍ എന്നത് ആ ഒരു ഗ്രൂപ്പുകൊണ്ട് തീരുന്ന ഗെയിം മാത്രമല്ല. അതിന്റെ ഉപജ്ഞാതാവിനെ പൊലീസ് അറസ്റ്റ് ചെയ്തുവെങ്കിലും ഗെയിമിന്റെ ചലഞ്ചുകളും അതിന്റെ കോപ്പികളും പിന്തുടരുന്ന ഒട്ടേറെ സീക്രട്ട് ഗ്രൂപ്പുകള്‍ ഇനിയും പല സോഷ്യല്‍ മീഡിയ ഗ്രൂപ്പുകളിലുമുണ്ട്. ടെലഗ്രാമും വാട്ട്‌സാപ്പും പുതുതായി ഇറങ്ങുന്ന പ്രൈവസി കൂടിയ മെസ്സഞ്ചര്‍ ആപുമെല്ലാം ഇത്തരക്കാര്‍ വ്യാപകമായി ഉപയോഗിക്കുന്നുണ്ട്.
ബ്ലൂ വെയിലിന്റെ ഉപജ്ഞാതാവ് അറസ്റ്റിലായപ്പോള്‍ പറഞ്ഞത് സമൂഹത്തിനു ആവശ്യമില്ലാത്ത കീടങ്ങളെ ഉന്മൂലനം ചെയ്യാനാണു ഈ ഗെയിം ഉണ്ടാക്കിയത് എന്നാണ്. എന്നാല്‍ അദ്ദേഹം ജയിലിലായപ്പോഴും ഗെയിം തുടരുന്നു. അതില്‍ നിന്നും ഈ ചലഞ്ച് മറ്റു പലരും ഏറ്റെടുത്തിരിക്കുന്നു എന്ന് മനസ്സിലാക്കാം. അങ്ങിനെ ഏറ്റെടുത്തിരിക്കുന്നവര്‍ കുട്ടികളെക്കൊണ്ട് നിയമവിരുദ്ധമായ കാര്യങ്ങള്‍ എന്തെങ്കിലും ടാസ്‌കില്‍ ഉള്‍പ്പെടുത്തി ചെയ്യിച്ചിട്ടുണ്ടാകാം. ധൈര്യശാലി എന്ന് തെളിയിക്കാന്‍ നടക്കുന്ന കുട്ടികള്‍ അത് ചെയ്തിട്ടുണ്ടാകാം. അതിന്റെ തെളിവുകള്‍ കാണിച്ച് അവരെ സമ്മര്‍ദ്ദത്തിലാക്കി അത്മഹത്യ ചെയ്യിച്ച് തെളിവില്ലാതാക്കിയതാകാം ഈ അന്‍പതാമത്തെ സൂയിസൈഡ് ടാസ്‌ക്.
ബ്ലൂ വെയ്ല്‍ ഇപ്പോള്‍ വന്‍ പ്രചാരമായി കഴിഞ്ഞു. ഇനിയാണ് സൂക്ഷിക്കേണ്ടത്. ഇത് എന്തെന്ന് അറിയാന്‍ കുട്ടികള്‍ നെറ്റില്‍ തിരഞ്ഞിറങ്ങും. ചെയ്യരുത് എന്ന് പറയുന്നത് ചെയ്യാന്‍ ആണല്ലോ എല്ലാവര്‍ക്കും താല്‍പര്യം. അങ്ങിനെ കുട്ടികള്‍ എത്തിപ്പെടുന്നത് തീവ്രവാദ, മയക്കുമരുന്ന് മാഫിയകള്‍ ക്രിയേറ്റ് ചെയ്ത ബ്ലൂ വെയ്ല്‍ ചലഞ്ച് ഗ്രൂപ്പുകളിലായിരിക്കും. ടാസ്‌കുകള്‍ എന്ന പേരില്‍ അവര്‍ കുട്ടികളെ ഉപയോഗിക്കും. കയ്യിലും ദേഹത്തും സ്വയം മുറിവേല്‍പ്പിക്കുക എന്നത് ബ്ലൂ വെയിലിലുള്ള ഒരു ടാസ്‌കാണ്. അതു ചെയ്യാന്‍ നല്ല ധൈര്യമുള്ളവര്‍ക്കേ സാധിക്കൂ. അങ്ങിനെ സ്വയം മുറിവേല്‍പ്പിക്കുന്ന ടാസ്‌കുകള്‍ വിജയിക്കുന്ന കുട്ടികളെ, അവര്‍ക്ക് ചെറിയ ബ്രെയിന്‍ വാഷിങും സ്വല്‍പം പണവും ഒഴുക്കിയാല്‍ ടാസ്‌കെന്ന പേരില്‍ തന്നെ തീവ്രവാദികള്‍ക്കും മയക്കു മരുന്നു മാഫിയകള്‍ക്കും അവരുടെ ആവശ്യങ്ങള്‍ക്ക് ഉപയോഗിക്കാനാകും. ചാവേര്‍ ആകാന്‍ പോലും ടാസ്‌കിന്റെ പേരില്‍ ആളെ ചുളുവില്‍ അവര്‍ക്ക് കിട്ടുമെന്ന് അര്‍ത്ഥം.
കുട്ടികള്‍ക്ക് കളിക്കാന്‍ നല്‍കുന്ന ഗെയിമുകള്‍ പരിശോധിച്ച് ഗൂഗിള്‍ പ്ലേ സ്‌റ്റോറില്‍ ഉള്ളതാണെന്നും നല്ല റിവ്യൂ ഉള്ളതാണെന്നും ഉറപ്പുവരുത്തിയ ശേഷം മാത്രം ഇന്‍സ്റ്റാള്‍ ചെയ്യുക. ഒരു കാരണവശാലും പ്ലേ സ്‌റ്റോറിനു പുറത്തു നിന്നു ലഭിക്കുന്നതോ, പ്ലേ സ്‌റ്റോറില്‍ അപ്‌ലോഡ് ചെയ്ത് അധികമാവാത്തതോ ആയ ഗെയിമുകള്‍ ഇന്‍സ്റ്റാള്‍ ചെയ്യാതിരിക്കുക. ക്രാക്കുകള്‍, പാച്ചുകള്‍ ഒന്നും ഇന്‍സ്റ്റാള്‍ ചെയ്യാതിരിക്കുക. ഒരു ഹാക്കര്‍ നിര്‍മ്മിച്ച് റിമോട്ട് അഡ്മിനിസ്‌ട്രേഷനുള്ള ഒരു ആപ് ആണ് മോബൈലില്‍ ഇന്‍സ്റ്റാള്‍ ചെയ്യുന്നതെങ്കില്‍ ആ മോബൈലിനെ പൂര്‍ണ്ണ നിയന്ത്രണത്തിലാക്കി അതിലെ ഫയലുകളും ക്യാമറയുമൊക്കെ ആക്‌സസ് ചെയ്ത് അവര്‍ക്ക് ഡാറ്റകള്‍ സ്വരൂപിക്കാം. അങ്ങിനെ കിട്ടുന്ന ഡാറ്റ സ്വകാര്യതയെ ബാധിക്കുന്ന ഒന്നാണെങ്കില്‍ ബ്ലാക്ക് മെയില്‍ ചെയ്ത് വരുതിയിലാക്കാന്‍ ഹാക്കര്‍മാര്‍ക്ക് സാധിക്കും.
കുട്ടികളെ മാതാപിതാക്കള്‍ കെയര്‍ ചെയ്യുന്നില്ല എന്ന് തോന്നുമ്പോഴാണ് അവര്‍ മറ്റു സ്ഥലങ്ങള്‍ തേടി അലയുന്നത്. കുട്ടിയുമായി കുറച്ച് നേരമെങ്കിലും ദിവസേന സംസാരിക്കാന്‍ സമയം കണ്ടെത്തണം. കുട്ടിയുടെ ദിന ചര്യയിലും സ്വഭാവത്തിലും മാറ്റം വന്നാല്‍ കഴിവതും മോബൈല്‍ നല്‍കാതിരിക്കാന്‍ ശ്രദ്ധിക്കുക. കുട്ടികളുടെ മോബൈല്‍ ലോക്ക് ചെയ്യാതെ മാത്രം ഉപയോഗിക്കാന്‍ നിര്‍ബന്ധമായും ആവശ്യപ്പെടുക. കിടക്കുന്ന സമയത്തിനു തൊട്ടു മുമ്പെങ്കിലും മോബൈലില്‍ മെസ്സഞ്ചര്‍ ആപുകളും ഗ്യാലറിയും പരിശോധിക്കുക. പരിചയമില്ലാത്തവരുമായി കൂട്ടുകൂടാതിരിക്കാന്‍ പ്രത്യേകം ശ്രദ്ധിക്കുക.
കുട്ടിക്ക് ശരീരത്തില്‍ ഉണ്ടാകുന്ന പോറലുകളും മറ്റും എങ്ങനെ സംഭവിച്ചുവെന്ന് അന്വേഷിച്ച് സത്യമെന്തെന്ന് ഉറപ്പാക്കുക. രാത്രികാലങ്ങളില്‍ ടിവി, മോബൈല്‍ എന്നിവയില്‍ കുട്ടി നടത്തുന്ന സകല ആക്റ്റിവിറ്റികളും നിരീക്ഷണ വിധേയമാക്കുക. കാണുന്ന സിനിമകള്‍ ഹൊറര്‍ ആണോ എന്ന് പ്രത്യേകിച്ചും. മോബൈലില്‍ ഏതെങ്കിലും ആപ് റിമോട്ട് അഡ്മിനിസ്‌ട്രേഷനോടെ ഇന്‍സ്റ്റാള്‍ ചെയ്യപ്പെട്ടിട്ടുണ്ടോ എന്ന് സെറ്റിങ്‌സില്‍ സെക്യൂരിറ്റി എന്നതില്‍ ഡിവൈസ് അഡ്മിനിസ്‌ട്രേറ്റര്‍ എന്നതില്‍ ഇടക്ക് നോക്കുക. ഉണ്ടെങ്കില്‍ അത് നിങ്ങള്‍ അറിയാതെ ഇന്‍സ്റ്റാള്‍ ചെയ്യപ്പെട്ടവ ആണെങ്കില്‍ ഡിസേബിളാക്കുക, മോബൈലില്‍ അവാസ്റ്റ് ആന്റിവൈറസ് ഇന്‍സ്റ്റാള്‍ ചെയ്ത് ഇടക്ക് സ്‌കാന്‍ ചെയ്യുക. സ്‌പൈ ആപുകളെ കണ്ടുപിടിക്കാനുള്ള കഴിവ് ഏറ്റവും കൂടുതലുള്ളത് അവാസ്റ്റിന് ആണ്.
ബ്ലൂവെയില്‍ എന്നത് സര്‍ക്കാരിന് ഒരിക്കലും നിരോധിക്കാന്‍ കഴിയില്ല. കാരണം പ്രത്യേക പ്ലാറ്റ് ഫോമോ പ്രത്യേക ആപോ ഒന്നും ഇല്ലാത്ത മെസ്സേജിലൂടെ വരുന്ന ടാസ്‌കുകള്‍ മാത്രമാണ് ഇതില്‍ ഉള്ളത്. ഹാക്കര്‍മാര്‍ സ്‌പൈ ആപ്പുകള്‍ ആ പേരില്‍ ധാരാളം പുറത്തിറക്കിയിട്ടുണ്ട്.

കേരളത്തിലും ബ്ലുവെയില്‍ ആത്മഹത്യ; പതിനാറുകാരന്റെ മരണം ബ്ലുവെയില്‍ കളിച്ചെന്ന്‌ അമ്മ

chandrika — Tue, 15 Aug 2017 11:20:56 +0000

തിരുവനന്തപുരം: പതിനാറുവയസുളള മകന്‍ ബ്ലുവെയില്‍ കളിച്ചാണ് ആത്മഹത്യ ചെയ്തതെന്ന് തിരുവനന്തപുരത്ത അമ്മയുടെ വെളിപ്പെടുത്തല്‍. ലോകത്തിന്റെ വിവിധ ഭാഗങ്ങളില്‍ ബ്ലൂ വെയില്‍ ഗെയിമിന്റെ ഭീതി പടര്‍്ത്തുന്നതിനിടെയാണ് കേരളത്തിലും ഇത്തരം സംഭവം റിപ്പോര്‍ട്ട് ചെയ്തിരിക്കുന്നത്.

പ്ലസ് വണ്‍ വിദ്യാര്‍ത്ഥിയായ മനോജ് സി മനു എന്ന കുട്ടി നീന്തലറിയാഞ്ഞിട്ടും പുഴയില്‍ ചാടി ആത്മഹത്യ ചെയ്യുകയായിരുന്നു. മകന്‍ ബ്ലു വെയില്‍ കളിച്ചതായും ടാസ്‌കുകള്‍ പൂര്‍ത്തിയാക്കിയതായുമുള്ള അമ്മയുടെ വെളിപ്പെടുത്തല്‍ മനോരമ ന്യൂസ് റിപ്പോര്‍ട്ട്യ്തു.

മനോജ് ഒന്‍പത് മാസങ്ങള്‍ക്ക് മുന്‍പാണ് ബ്ലുവെയില്‍ ഗെയിം കളിക്കാന്‍ ആരംഭിച്ചത്.
നവംബറില്‍ ഗെയിം കളിക്കാന്‍ തുടങ്ങിയ കാര്യം അമ്മയോട് സൂചിപ്പിക്കുകയും ചെയ്തു. തുടര്‍ന്ന് ജൂലൈ 26നാണ് ആത്മഹത്യ ചെയ്യുന്നത്. ഗെയിം കളിക്കാന്‍ തുടങ്ങിയശേഷം വീട്ടുകാരുമായി മകന്‍ അകന്നിരുന്നു. പിന്തിരിപ്പിക്കാന്‍ ശ്രമിച്ചിരുന്നെങ്കിലും സാധിച്ചില്ലെന്നും അമ്മ പറയുന്നു.

നീന്തലറിയാത്ത മനോജ് ബ്ലുവെയില്‍ ടാസ്‌കായി ചുഴിയില്‍ ചാടി, കൂടാതെ വീട്ടില്‍ പറയാതെ കടല്‍ കാണാന്‍ പോയി, കൈയില്‍ മുറിവേല്‍പ്പിച്ച് സെമിത്തേരിയില്‍ പോയെന്നും റിപ്പോര്‍ട്ടുകളുണ്ട്. കുട്ടിയുടെ മൊബൈല്‍ ഫോണ്‍ സൈബര്‍ സെല്ലിന് കൈമാറുമെന്നാണ് വിവരങ്ങള്‍. കുട്ടി ആത്മഹത്യ ചെയ്തത് ഫോണിലെ ഗെയിമുകള്‍ ഡിലീറ്റ് ചെയ്തതിനുശേഷമാണെന്നാണ് ആദ്യ വിവരം.

ബ്ലൂ വെയിലിന് മറ്റൊരു ഇര കൂടി, ബംഗാളില്‍ വിദ്യാര്‍ത്ഥി ആത്മഹത്യ ചെയ്തു

chandrika — Sun, 13 Aug 2017 09:45:39 +0000

ബ്ലൂ വെയില്‍ ഗെയിം കളിച്ച് പശ്ചിം ബംഗാളില്‍ 10ാം ക്ലാസുകാരന്‍ ആത്മഹത്യ ചെയ്തു. എന്നാല്‍ ഡെറാഡൂണില്‍ മരണത്തിന്റെ വക്കില്‍ എത്തി നില്‍ക്കുന്ന അഞ്ചാം ക്ലാസുകാരനെ അധ്യാപകരുടെ ഇടപെടല്‍ മരണത്തില്‍ നിന്ന് രക്ഷപ്പെടുത്തി.

പശ്ചിമ ബംഗാളില്‍ അങ്കന്‍ ഡേ എന്ന കുട്ടിയാണ് ഗെയിം കളിച്ച് ശനിയാഴ്ച ആത്മഹത്യ ചെയ്തത്. സ്‌കൂളില്‍ നിന്നു തിരിച്ചു വന്ന ശേഷം കമ്പ്യൂട്ടറില്‍ കളിക്കുകയായിരുന്നു അങ്കന്‍. ഊണു കഴിക്കാന്‍ അമ്മ വിളിച്ചപ്പോള്‍ ഊണിനു മുമ്പ് തനിക്കു കുളിക്കമമെന്നാവശ്യപ്പെട്ടു. എന്നാല്‍ ഏറെ സമയമായിട്ടും പുറത്തിറങ്ങാതെ വന്നപ്പോള്‍ വാതില്‍ പൊളിച്ചു അകത്തേക്കു കയറിയപ്പോഴേക്കും അങ്കന്‍ മരിച്ചിരുന്നു. ഒരു പ്ലാസ്റ്റിക് ബാഗുകൊണ്ട് തല പൊതിഞ്ഞ് നൈലോണ്‍ കയര്‍ കഴുത്തില്‍ മുറുക്കി കെട്ടിയിരുന്നു. ശ്വാസം മുട്ടിയാണ് അങ്കന്‍ മരിച്ചത്. കുഴഞ്ഞു വീണു കിടന്ന അങ്കനെ ഉടന്‍ ആശുപത്രിയിലെത്തിച്ചെങ്കിലും മരംമം സ്ഥിരീകരിക്കുകയായിരുന്നു.

അതേസമയം ഡെറാഡൂണില്‍ ഗെയിമിനിരയായ അഞ്ചാം ക്ലാസുകാരനെ അധ്യാപകര്‍ മരണത്തില്‍ നിന്ന് രക്ഷപ്പെടുത്തിയതായും റിപ്പോര്‍ട്ടുണ്ട്.