ഒന്നേകാല്‍ മണിക്കൂറോളം സമയമെടുത്ത് രണ്ട് ശുചിമുറികളുടെ ഗ്രില്ലുകള്‍ തകര്‍ത്തിട്ടും ജീവനക്കാര്‍ അറിഞ്ഞില്ല എന്നതു ഗുരുതര വീഴ്ചയാണെന്നും നടപടി വേണമെന്നും റിപ്പോര്‍ട്ടില്‍ പറയുന്നു. മുഴുവന്‍ സമയവും സൂപ്രണ്ടിന്റെ സേവനം വേണമെന്ന ജെജെ ആക്ടും പാലിക്കപ്പെട്ടില്ല. കുട്ടികള്‍ക്കു ലഭിക്കേണ്ട അടിസ്ഥാന സൗകര്യങ്ങളൊ ചികിത്സയോ പരിഗണനയോ ഇവിടെ ലഭിക്കുന്നില്ല.

ബാലാവകാശ കമ്മീഷന്‍ അംഗം നാളെ നേരിട്ട് ബോയ്‌സ് ഹോമിലെത്തി തെളിവെടുപ്പ് നടത്തും. ഇതിനിടയില്‍ കാണാതായ നാലു കുട്ടികളില്‍ മൂന്നു പേരെ പൊലീസ് കണ്ടെത്തിയിരുന്നു. കോഴിക്കോട് സ്വദേശികളായ മൂവരെയും ഷൊര്‍ണൂര്‍ റെയില്‍വേ സ്‌റ്റേഷനില്‍ വച്ചാണ് കണ്ടെത്തിയത്. ഇവര്‍ക്കൊപ്പം ചാടിപ്പോയ യുപി സ്വദേശിയെ കണ്ടെത്താന്‍ ആയിട്ടില്ല.

ബോയ്‌സ്‌ഹോമില്‍ നിന്ന് ഇവര്‍ പുറത്തുകടന്നത് 2 സംഘങ്ങളായിട്ടായിരുന്നു.
ഇന്നലെ ഇവിടെ എത്തിയ മുന്‍ അന്തേവാസികളില്‍ ഒരാളുടെ ഫോണ്‍ കോള്‍ കേന്ദ്രീകരിച്ച് നടത്തിയ അന്വേഷണത്തിലാണ് കോഴിക്കോട് സ്വദേശികളെ കണ്ടെത്തിയത്. രാത്രി 11 മണിക്കായിരുന്നു ശുചിമുറികളുടെ ഗ്രില്‍ തകര്‍ത്ത് ഇവര്‍ പുറത്തുചാടിയത്. പുറത്തു നിന്നുള്ളവരുടെ സഹായം ലഭിച്ചെന്ന് ആദ്യഘട്ടത്തില്‍ പൊലിസിന് വിവരം ലഭിച്ചിരുന്നെങ്കിലും ഇക്കാര്യത്തില്‍ കൂടുതല്‍
വ്യക്തത വരേണ്ടതുണ്ട്.