കത്തോലിക്കാ കോണ്‍ഗ്രസ് നേതൃ സംഗമത്തിലായിരുന്നു പാംപ്ലാനിയുടെ വിമര്‍ശനം. കേന്ദ്ര-സംസ്ഥാന ബജറ്റുകളില്‍ മലയോര കര്‍ഷകര്‍ക്ക് ഒന്നും ലഭിക്കുന്നില്ലെന്നും പാംബ്ലാനി പറഞ്ഞു.

കര്‍ഷകന്റെ കൃഷിഭൂമിയുടെ നികുതി വര്‍ധിപ്പിക്കുന്നത് സംസ്ഥാന സര്‍ക്കാരിന്റെ ഏറ്റവും വലിയ ആദായമായി മന്ത്രി കരുതുന്നുവെങ്കില്‍ സര്‍ക്കാര്‍ കര്‍ഷകന്റെ മഹത്വമറിയുന്നില്ലെന്നേ പറയാനുള്ളൂവെന്നും പ്രസംഗത്തിനിടെ ജോസഫ് പാംപ്ലാനി വ്യക്തമാക്കി.

സര്‍ക്കാരിന്റെ ഈ സമീപനം തീര്‍ത്തും കര്‍ഷക വിരുദ്ധമാണെന്നും അദ്ദേഹം കൂട്ടിച്ചേര്‍ത്തു.

ഭൂനികുതി സ്ലാബുകളുടെ നിരക്ക് 50 ശതമാനം വര്‍ധിപ്പിച്ചെന്നായിരുന്നു ധനമന്ത്രിയുടെ പ്രഖ്യാപനം. സര്‍ക്കാര്‍ ഭൂമിയുടെ പാട്ടനിരക്ക് പരിഷ്‌കരിക്കുമെന്നും ധനമന്ത്രി പ്രഖ്യാപിച്ചിരുന്നു.

ജിഎസ്ടി നഷ്ടപരിഹാരത്തിന്റെ നഷ്ടം ഉള്‍പ്പെടെ സാമ്പത്തിക പ്രതിസന്ധി നേരിടുന്ന കേരളം 24,000 കോടി രൂപയുടെ പാക്കേജ് ആവശ്യപ്പെട്ടിരുന്നു. കൂടാതെ, വിഴിഞ്ഞം തുറമുഖ വികസനത്തിനായി 5000 കോടി രൂപയുടെ സാമ്പത്തിക സഹായവും കേന്ദ്രത്തോട് ആവശ്യപ്പെട്ടിരുന്നു. എന്നാല്‍, ഈ ആവശ്യം പരിഗണിക്കപ്പെടാതെ പോയതില്‍ സംസ്ഥാന സര്‍ക്കാരും പ്രതിപക്ഷവും ഒരുപോലെ അതൃപ്തിയാണ് പ്രകടിപ്പിക്കുന്നത്.

കേരളം ബജറ്റിലേക്ക് മുന്നോട്ടുവച്ച മറ്റു പ്രധാന ആവശ്യങ്ങളില്‍ പ്രവാസി ക്ഷേമത്തിനായി 3940 കോടി രൂപ, മനുഷ്യവന്യജീവി സംഘര്‍ഷം പരിഹരിക്കാനായി 1000 കോടി രൂപ, കാലാവസ്ഥാ വ്യതിയാനം മൂലമുണ്ടാകുന്ന ദുരിതങ്ങള്‍ക്കായി 4500 കോടി രൂപ, കടലേറ്റം തടയാന്‍ 2329 കോടി രൂപ, നെല്ലുസംഭരണത്തിനായി 2000 കോടി രൂപ, ഉന്നത വിദ്യാഭ്യാസ മേഖലയിലേക്കായി 2117 കോടി രൂപ എന്നിവയും ഉള്‍പ്പെട്ടിരുന്നു. എന്നാല്‍, ഇവയൊന്നും അംഗീകരിക്കപ്പെട്ടില്ല.

അതേസമയം തിരഞ്ഞെടുപ്പ് നടക്കുന്ന ബിഹാറിനായി കേന്ദ്രം പ്രത്യേക പദ്ധതികള്‍ പ്രഖ്യാപിച്ചതാണ് വിവാദം വര്‍ദ്ധിപ്പിക്കുന്നത്. മഖാന കൃഷിക്ക് ബോര്‍ഡ്, പുതിയ വിമാനത്താവളങ്ങള്‍, കനാല്‍ നിര്‍മാണം, ഐഐടി പട്‌ന വികസനം, ഫുഡ് ടെക്‌നോളജി ഇന്‍സ്റ്റിറ്റിയൂട്ട് തുടങ്ങിയ പദ്ധതികള്‍ക്ക് ബജറ്റില്‍ മുന്‍ഗണന നല്‍കിയിട്ടുണ്ട്. ഇതിനെ കേരളം നേരുള്ള അവഗണനയായി വിലയിരുത്തുന്നു.

ഇതിനിടെ, കേന്ദ്രമന്ത്രി ജോര്‍ജ് കുര്യന്റെ വിവാദ പരാമര്‍ശം കൂടുതല്‍ ചര്‍ച്ചയ്ക്ക് വഴി തുറക്കുന്നു. ‘കേരളം പിന്നാക്കം നില്‍ക്കുന്ന സംസ്ഥാനമെന്ന് പ്രഖ്യാപിച്ചാല്‍ മാത്രമേ സഹായം ലഭിക്കൂ’ എന്ന അഭിപ്രായം മലയാളി സമൂഹത്തില്‍ ശക്തമായ പ്രതികരണമാണ് ഉണര്‍ത്തിയിരിക്കുന്നത്. ഇത് കേരളത്തിന്റെ പുരോഗതിയെ അപമാനിക്കുന്നതായി സംസ്ഥാന സര്‍ക്കാര്‍ പ്രതികരിച്ചു. വിനോദസഞ്ചാര മേഖലയില്‍ കേരളത്തിന് ഒന്നും ലഭിച്ചില്ലെന്ന പരാതിയെ മറികടക്കാനായി കേന്ദ്രമന്ത്രി സുരേഷ് ഗോപി രംഗത്തെത്തി. ‘കേരളം നിലവിളിച്ചാല്‍ കാര്യമില്ല, ലഭിക്കുന്ന ഫണ്ട് ഉചിതമായി ഉപയോഗിക്കേണ്ടതാണ്’ എന്നായിരുന്നു അദ്ദേഹത്തിന്റെ പ്രതികരണം.

കേന്ദ്ര സര്‍ക്കാരിന്റെ സമീപനത്തിനെതിരെ കേരളത്തില്‍ ശക്തമായ രാഷ്ട്രീയ പ്രതികരണമാണ് ഉയരുന്നത്. ബിജെപി ഒഴികെയുള്ള പാര്‍ട്ടികള്‍ കേന്ദ്ര ബജറ്റിനെ സംസ്ഥാനത്തോട് കാട്ടിയ അവഗണനയെന്നാണ് വിശേഷിപ്പിക്കുന്നത്.