C.Divakaran – Chandrika Daily

‘ധനമന്ത്രിക്കെന്താ കൊമ്പുണ്ടോ’ വി.എസിനും തോമസ് ഐസക്കിനുമെതിരെ ആഞ്ഞടിച്ച് സി.ദിവാകരന്‍

web desk 1 — Sun, 19 May 2019 03:13:20 +0000

തിരുവനന്തപുരം: വി.എസ്. സര്‍ക്കാറിന്റെ കാലത്ത് ധനമന്ത്രി തോമസ് ഐസക്ക് അനാവശ്യമായി ഫയലുകള്‍ പിടിച്ചുവെക്കാറുണ്ടായിരുന്നുവെന്നും സി.പി.ഐ മന്ത്രിമാരെ തഴയുന്ന സമീപനമാണ് അദ്ദേഹം സ്വീകരിച്ചിരുന്നതെന്നും മുന്‍ മന്ത്രി സി.ദിവാകരന്‍. ധനമന്ത്രിക്കെന്താ കൊമ്പുണ്ടോ എന്നു ചോദിച്ച് പ്രതിഷേധിച്ച് ഫയലുകള്‍ എടുത്തെറിയേണ്ടി വന്നിട്ടുണ്ടെന്നും ദിവാകരന്‍ വെളിപ്പെടുത്തി. ഉദ്യോഗസ്ഥരുടെ ശമ്പള പരിഷ്‌ക്കണവുമായി ബന്ധപ്പെട്ട ഫയല്‍ ധനമന്ത്രി തഞ്ഞുവെച്ചതിനെ തുടര്‍ന്നുണ്ടായ വാക്കുതര്‍ക്കത്തിലാണ് താന്‍ ഫയല്‍ വലിച്ചെറിഞ്ഞത്. റവന്യു മന്ത്രിയുടെ പ്രൈവറ്റ് സെക്രട്ടറി ഡി.സാജുവിന്റെ അനുസ്മരണയോഗത്തിലായിരുന്നു സി.ദിവാകരന്റെ വെളിപ്പെടുത്തല്‍. വി.എസ്.സര്‍ക്കാറിന്റെ കാലത്ത് ധനമന്ത്രിയില്‍നിന്നുള്‍പ്പെടെ സി.പി.ഐ മന്ത്രിമാര്‍ക്ക് വേണ്ടത്ര പിന്തുണ കിട്ടിയില്ലെന്ന ആക്ഷേപം അന്നേ ശക്തമായിരുന്നു. സി.പി.എമ്മിലെ വിഭാഗീയത രൂക്ഷമായിരുന്ന അക്കാലത്ത് വി.എസിനോടായിരുന്നു സി.പി.ഐക്ക് താല്‍പര്യം.അതിന്റെ അമര്‍ഷം ധനകാര്യമന്ത്രി ഉള്‍പ്പെടെയുള്ള പിണറായി പക്ഷക്കാരായ മന്ത്രിമാര്‍ സി.പി.ഐ മന്ത്രിമാരോട് തീര്‍ത്തിരുന്നു. എന്നാല്‍ ഇക്കാര്യത്തില്‍ അന്നത്തെ ഒരു സി.പി.ഐ മന്ത്രി തന്നെ പരസ്യമായ വെളിപ്പെടുത്തല്‍ ഉണ്ടാകുന്നത് ആദ്യമാണ്. വി.എസ്.മന്ത്രിസഭയില്‍ ഭക്ഷ്യ സിവില്‍ സപ്ലൈസ് മന്ത്രിമായിരുന്നു ദിവാകരന്‍. പിണറായി സര്‍ക്കാര്‍ അധികാരത്തിലേറിയശേഷവും സി.പി.എമ്മിനെയും പിണറായിയെയും വിമര്‍ശിക്കുന്നതില്‍ പിശുക്കുകാട്ടാതിരുന്ന സി.പി.ഐ നേതൃത്വം അടുത്തകാലത്ത് നിലപാട് മാറ്റി പിണറായിയോട് അമിത വിധേയത്വം കാട്ടുന്നതായി വിമര്‍ശനുമുണ്ട്. സി.പി.ഐയുടെ ഈ നിലപാടുമാറ്റവും ദിവാകരന്റെ പ്രസംഗത്തില്‍ നിഴലിച്ചു. വി.എസ്.അദ്ധ്യക്ഷനായ ഭരണപരിഷ്‌ക്കാര കമ്മീഷന്‍ എന്താണ് ചെയ്യുന്നതെന്നും ദിവാകരന്‍ ചോദിച്ചു.

സിപിഐ ദേശീയ കൗണ്‍സിലില്‍ നിന്ന് പുറത്താക്കല്‍; സി.ദിവാകരന്റെ പ്രതികരണം

chandrika — Sun, 29 Apr 2018 05:47:13 +0000

കൊല്ലം: സിപിഐ ദേശീയ കൗണ്‍സിലില്‍ നിന്ന് പുറത്താക്കിയ സംഭവത്തില്‍ കേരള നേതൃത്വത്തെ രൂക്ഷമായി വിമര്‍ശിച്ച് ദിവാകരന്‍ രംഗത്ത്.
തനിക്ക് ഗോഡ്ഫാദര്‍ ഇല്ലാത്തതു കൊണ്ടാണ് പാര്‍ട്ടി ദേശീയ കൗണ്‍സിലില്‍ നിന്ന് ഒഴിവാക്കിയത്.

ആരുടെയും സഹായത്തോടെ തുടരാന്‍ താന്‍ ആഗ്രഹിക്കുന്നില്ല. സുധാകര്‍ റെഡ്ഡിയുടെ തണലില്‍ കമ്മിറ്റിയിലേക്ക് വരേണ്ടതില്ല. സി.ദിവാകരന്‍ എന്നും സി.ദിവാകരന്‍ തന്നെയായിരിക്കും. കൗണ്‍സിലില്‍ നിന്ന് തന്നെ ഒഴിവാക്കിയതില്‍ നിരാശയില്ലെന്നും അദ്ദേഹം പറഞ്ഞു. പ്രസിഡന്റ് സ്ഥാനത്തു നിന്നല്ലല്ലോ ഒഴിവാക്കിയത്.

പാര്‍ട്ടിയുടെ ദേശീയ കൗണ്‍സിലില്‍ നിന്നല്ലേ. തനിക്കു വേണ്ടി കേരളത്തില്‍ നിന്ന് ആരെങ്കിലും സംസാരിച്ചോ എന്ന് അറിയില്ല. പാര്‍ട്ടിക്കാരനായി തന്നെ തുടരുമെന്നും അദ്ദേഹം പറഞ്ഞു. സംഭവത്തില്‍ പ്രതിഷേധിച്ച് കേരളത്തില്‍ നിന്നുള്ള പ്രതിനിധി യോഗത്തില്‍ നിന്നും ദിവാകരന്‍ വിട്ടനില്‍ക്കുകയും ചെയ്തതോടെ പാര്‍ട്ടി തീരുമാനത്തിലെ അതൃപ്തി പരസ്യമായിരിക്കുകയാണ്.

സി.ദിവാകരനെ സി.പി.ഐ ദേശീയ കൗണ്‍സില്‍ നിന്ന് ഒഴിവാക്കി

chandrika — Sun, 29 Apr 2018 05:31:14 +0000

കൊല്ലം: സി.പി.ഐ ദേശീയ കൗണ്‍സിലില്‍ കാനം പക്ഷത്തിന്റെ ആധിപത്യം. മുതിര്‍ന്ന നേതാവ് സി.ദിവാകരനടക്കം നാലു പേരെ സി.പി.ഐ ദേശീയ കൗണ്‍സിലില്‍ നിന്ന് ഒഴിവാക്കി. സി.എന്‍ ചന്ദ്രന്‍, സത്യന്‍ മൊകേരി, കമലാ സദാനന്ദന്‍ എന്നിവരാണ് കൗണ്‍സിലില്‍ നിന്ന് ഒഴിവാക്കപ്പെട്ട മറ്റു മൂന്നു പേര്‍.
ദേശീയ കൗണ്‍സിലില്‍ കേരളത്തില്‍ നിന്ന് പുതുതായി അഞ്ചു പേരുണ്ട്. എന്‍.രാജന്‍, എന്‍ അനിരുദ്ധന്‍, പി.വസന്തം, കെ.പി രാജേന്ദ്രന്‍, ഇ.ചന്ദ്രശേഖരന്‍, മഹേഷ് കക്കത്ത് എന്നിവരാണ് പുതുതായി കൗണ്‍സിലിലെത്തിയവര്‍.
സി.പി.ഐ ദേശീയ കൗണ്‍സില്‍ നിന്ന് ഒഴിവാക്കിയവരില്‍ രണ്ടു പേര്‍ ഇസ്മായില്‍ പക്ഷക്കാരാണ്. പുതുതായി ഉള്‍പ്പെട്ടവരാകട്ടെ കാനം പക്ഷക്കാരും.