card – Chandrika Daily

ഹെല്‍ത്ത് കാര്‍ഡ്: നടപടിക്രമങ്ങളുമായി ആരോഗ്യവകുപ്പ്

webdesk13 — Sat, 04 Feb 2023 13:15:23 +0000

ഭക്ഷ്യസുരക്ഷ ഉറപ്പാക്കാന്നതിന്റെ ഭാഗമായി ഹെല്‍ത്ത് കാര്‍ഡ് അനുവദിക്കുന്നതുമായി ബന്ധപ്പെട്ട് ആരോഗ്യ വകുപ്പ് ഡയറക്ടര്‍ സര്‍ക്കുലര്‍ പുറത്തിറക്കി. ഡോക്ടര്‍മാര്‍ നടപടി ക്രമങ്ങള്‍ പാലിക്കുന്നുവെന്ന് ജില്ല മെഡിക്കല്‍ ഓഫീസര്‍മാര്‍ ഉറപ്പ് വരുത്തണം. അപേക്ഷകനെ ഡോക്ടര്‍ നേരിട്ട് പരിശോധിക്കണം. രക്ത പരിശോധന, ശാരീരിക പരിശോധന, കാഴ്ച ശക്തി പരിശോധന, ത്വക്ക്, നഖങ്ങള്‍ എന്നിവയുടെ പരിശോധന നടത്തണം. തുടങ്ങിയ നിര്‍ദേശങ്ങളാണ് സര്‍ക്കുലറിലുള്ളത്.

കൂടാതെ, ടൈഫോയ്ഡ്, മഞ്ഞപ്പിത്തം ലക്ഷണങ്ങളുണ്ടെങ്കില്‍ പരിശോധന, ക്ഷയ രോഗ ലക്ഷണമുണ്ടെങ്കില്‍ കഫ പരിശോധന, മുതലായ വിലയിരുത്തി ബോധ്യപ്പെട്ടതിന് ശേഷം മാത്രമേ സര്‍ട്ടിഫിക്കറ്റ് നല്‍കാവൂ. വിരശല്യത്തിനെതിരെയുള്ള വാക്‌സിന്‍ നല്‍കണം. ടൈഫോയ്ഡിനെതിരെയുള്ള വാക്‌സിന്‍ പൂര്‍ത്തീകരിക്കണമെന്നും സര്‍ക്കുലറില്‍ പറയുന്നു.

ഭക്ഷ്യസുരക്ഷ ഉറപ്പാക്കാന്‍ സര്‍ക്കാര്‍ പ്രഖ്യാപിച്ച ഹെല്‍ത്ത് കാര്‍ഡ് ഒരു പരിശോധനയുമില്ലാതെ പണം കൊടുത്താല്‍ ഇഷ്ടം പോലെ ലഭിക്കുന്നുവെന്ന് ആക്ഷേപമുയര്‍ന്നിരുന്നു. ഈ സാഹചര്യത്തിലാണ് പുതിയ ഉത്തരവ്.

ഹയ്യ കാര്‍ഡ് വഴി ഇനിയും രാജ്യത്തിനു പുറത്തുള്ളവര്‍ക്കു ഖത്തറിലെത്താം: കാലാവധി അടുത്ത വര്‍ഷം ജനുവരി 24 വരെ

webdesk13 — Mon, 30 Jan 2023 10:50:11 +0000

അശ്‌റഫ് തൂണേരി

ദോഹ: ഖത്തര്‍ ഫിഫ ലോകകപ്പ് ആരാധകര്‍ക്കും സംഘാടകര്‍ക്കുമായി പുറത്തിറക്കിയ ഹയ്യ കാര്‍ഡ് വഴി ഇനിയും രാജ്യത്തിനു പുറത്തുള്ളവര്‍ക്കു ഖത്തറിലെത്താമെന്നും കാലാവധി അടുത്ത വര്‍ഷം ജനുവരി 24 വരെ ഉണ്ടായിരിക്കുമെന്നും ഖത്തര്‍ ആഭ്യന്തര മന്ത്രാലയം അറിയിച്ചു. രാജ്യത്തിന് പുറത്തുള്ള ഹയ്യ കാര്‍ഡ് ഉടമകള്‍ക്ക് 2024 ജനുവരി 24 വരെ ഖത്തറില്‍ പ്രവേശിക്കാന്‍ കഴിയും. ഒപ്പം ചില വ്യവസ്ഥകളും നിബന്ധനകളും പാലിക്കുകയും വേണം.

സ്ഥിരീകരിച്ച ഹോട്ടല്‍ ബുക്കിങ് അല്ലെങ്കില്‍ കുടുംബാംഗങ്ങള്‍ക്കോ സുഹൃത്തുക്കള്‍ക്കൊപ്പമോ ഉള്ള താമസ സൗകര്യത്തിനുള്ള തെളിവ് ഹയ്യ പോര്‍ട്ടലിലൂടെ നല്‍കണം. കൂടാതെ
ഖത്തറിലെത്തുമ്പോള്‍ പാസ്‌പോര്‍ട്ടില്‍ മൂന്ന് മാസത്തില്‍ കുറയാത്ത കാലാവധി വേണം.
ഖത്തറില്‍ താമസിക്കുന്ന കാലയളവില്‍ ആരോഗ്യ ഇന്‍ഷുറന്‍സ് പരിരക്ഷ വേണം.യാത്രക്ക് മുമ്പ് തന്നെ ഇത് ഉറപ്പുവരുത്തേണ്ടതാണ്.

തിരിച്ചു പോകാനുള്ള വിമാന ടിക്കറ്റ് മുന്‍കൂര്‍ ബുക്ക് ചെയ്യണം.
‘ഹയ്യ വിത്ത് മി’ ഹയ്യ കാര്‍ഡ് ഉടമകള്‍ക്ക് മൂന്ന് കുടുംബാംഗങ്ങളെയോ സുഹൃത്തുക്കളെയോ വരെ ഖത്തറിലേക്ക് കൊണ്ടുവരാനാവും. നിരക്ക് ഈടാക്കാതെ മള്‍ട്ടിപ്പിള്‍ എന്‍ട്രി പെര്‍മിറ്റ് ആണ് അനുവദിക്കുക. 2024 ജനുവരി 24 വരെ കാലയളവില്‍ നിരവധി തവണ രാജ്യം സന്ദര്‍ശിക്കാം.
വിമാനത്താവളത്തിലോ മറ്റു പ്രവേശന മാര്‍ഗങ്ങളിലോ സന്ദര്‍ശകര്‍ക്ക് ഇഗേറ്റ് വഴി പുറത്തുകടക്കാനാവുമെന്ന പ്രത്യേകതയുമുണ്ട്. അതുകൊണ്ട് തന്നെ എമിഗ്രേഷന്‍ കൗണ്ടറില്‍ കാത്തു നില്‍ക്കേണ്ടി വരില്ല.

2022 ഖത്തര്‍ ഫിഫ ലോകകപ്പിനായി അനുവദിച്ച എല്ലാ ഹയ്യ കാര്‍ഡ് ഉടമകള്‍ക്കും വ്യവസ്ഥകള്‍ പാലിച്ചു ഖത്തര്‍ സന്ദര്‍ശിക്കാവുന്നതാണെന്ന് ഖത്തര്‍ ആഭ്യന്തര മന്ത്രാലയം വിശദീകരിച്ചു.

90 വര്‍ഷം മുമ്പത്തെ വിവാഹക്ഷണക്കത്ത് വൈറലാകുന്നു !

Chandrika Web — Sat, 31 Dec 2022 15:58:25 +0000

വിവാഹക്ഷണപത്രികകള്‍ എന്നും കൗതുകം നിറഞ്ഞതാണ്. ഏറ്റവും പുതുമയുള്ളതാകണം അതെന്നാണ് എല്ലാവരും ആഗ്രഹിക്കുക. ഇവിടെ പക്ഷേ കാലപ്പഴക്കമാണ് ഈയൊരു വിവാഹക്ഷണക്കത്തിനെ ശ്രദ്ധേയമാക്കുന്നത്.
ഒന്നും രണ്ടുമല്ല, 90 വര്‍ഷം മുമ്പത്തെ കല്യാണക്കത്താണ് ഇവിടെ ഒരാള്‍ പോസ്റ്റ് ചെയ്തിരിക്കുന്നത്. തന്റെ മുതുമുത്തച്ഛന്റെ കല്യാണകത്ത് ട്വിറ്ററില്‍ ഇട്ടത് സോണല്‍ ഭട്ട്‌ലയാണ്. ഉര്‍ദുഭാഷയില്‍ എഴുതിയ കത്തിന്റെ വിവാഹത്തീയതി ഏപ്രില്‍ 23, 1933. അഥവാ ഹിജറ വര്‍ഷം ദുല്‍ഹജ്ജ് 27, 1351.
മകന്റെ വിവാഹം ക്ഷണിച്ച് ബ്രൗണ്‍ വെള്ളകാര്‍ഡിലാണ് കത്ത് തയ്യാറാക്കപ്പെട്ടിട്ടുള്ളത്. അല്ലാഹുവിന്റെ തിരുനാമത്തില്‍ പ്രവാചകനന്ദിപ്രകടനത്തോടെയുള്ള കത്തില്‍ മകന്‍ ഹാഫിസ് മുഹമ്മദിന്റെ വിവാഹച്ചടങ്ങിന് എത്തണമെന്നാണ്പിതാവ് മുഹമ്മദ് ഇബ്രാഹിം ഹാഫിസ് ഷഹാബുദീന്‍ പറയുന്നത്. വരന്റെ വീട് കിഷന്‍ഗഞ്ചിലാണെന്നും കൃത്യം 11.30ന് വരനും സംഘവും നിക്കാഹിന് (സുന്നത്) പുറപ്പെടുമെന്നും വലീമ (സല്‍കാരം) ക്ക് കൃത്യസമയം പങ്കെടുത്താല്‍ അത് സന്തോഷകരമാണെന്നും കത്തില്‍ രേഖപ്പെടുത്തിയിട്ടുണ്ട്.