കാര്‍ലസ് പ്യുജെമുണ്ട്

മുന്‍ വൈസ്പ്രസിഡന്റ് ഒറിയോള്‍ ജാന്‍ക്വിറാസ് ആണ് കാറ്റലോണിയന്‍ മുന്‍ പ്രസിഡന്റ് കാര്‍ലസ് പ്യുജെമുണ്ടിന്റെ മുഖ്യ എതിരാളി. ബെല്‍ജിയത്തു നിന്ന് പ്രചാരണം നടത്തിയിരുന്ന പ്യുജെമുണ്ട് തെരഞ്ഞെടുപ്പ് ഫലം വന്നതോടെ ആഹ്ലാദം പ്രകടിപ്പിച്ച് രംഗത്തുവന്നു. സ്വാതന്ത്ര്യവാദികള്‍ക്കനുകൂലമായി ജനം വിധിയെഴുതിയതോടെ കാറ്റലോണിയയുടെ സ്വയംഭരണം റദ്ദാക്കിയ സ്‌പെയിന്‍ സര്‍ക്കാറിന്റെ നടപടി ഇതോടെ ഇല്ലാതായതായി പ്യൂജെമുണ്ട് ട്വിറ്ററില്‍ കുറിച്ചു.

ബാര്‍സലോണ അടക്കമുള്ള വടക്കുകിഴക്കന്‍ മേഖലയുടെ നിയന്ത്രണം നേരിട്ട് ഏറ്റെടുത്ത സ്പാനിഷ് പ്രധാനമന്ത്രി മരിയാനോ റജോയ്, ഡിസംബര്‍ 21-ന് ഇടക്കാല തെരഞ്ഞെടുപ്പ് നടത്തുമെന്നും അതുവരെ കാറ്റലോണിയയുടെ ഭരണം മാഡ്രിഡിന്റെ കൈവശമായിരിക്കുമെന്നും വ്യക്തമാക്കി. അതേസമയം, കാറ്റലന്‍ നേതാക്കളെയും പ്രക്ഷോഭകാരികളെയും അറസ്റ്റ് ചെയ്യാന്‍ നീക്കമില്ലെന്നാണറിയുന്നത്.

പതിറ്റാണ്ടുകള്‍ നീണ്ട സമരങ്ങള്‍ക്കും സംഘര്‍ഷങ്ങള്‍ക്കുമൊടുവില്‍ കാറ്റലോണിയ സ്വാതന്ത്ര്യം പ്രഖ്യാപിച്ചത് സ്‌പെയിനിന് കനത്ത തിരിച്ചടിയായിരിക്കുകയാണ്. ഓഹരി വിപണിയില്‍ സ്‌പെയിനിന് വന്‍ തിരിച്ചടി നേരിട്ടു. അതേസമയം, കാറ്റലോണിയയുടെ ഭരണം നേരിട്ട് ഏറ്റെടുക്കുക എന്നത് മാഡ്രിഡ് ആഗ്രഹിക്കുന്നത്ര എളുപ്പം നടക്കില്ലെന്നാണറിയുന്നത്. പൊലീസ്, വിദ്യാഭ്യാസം, ആരോഗ്യം തുടങ്ങിയ പ്രധാന മേഖലകളുടെ നിയന്ത്രണം കാറ്റലന്‍ ഭരണകൂടത്തിനാണ്. കാറ്റലോണിയ പൊലീസിലെ വലിയൊരു വിഭാഗമായ മൊസോസ് എസ്‌ക്വാഡ്ര സ്വാതന്ത്ര്യത്തിന് അനുകൂലവുമാണ്. മാഡ്രിഡിലെ ഗവണ്‍മെന്റിന്റെ നിര്‍ദേശങ്ങള്‍ അനുസരിക്കില്ലെന്നും കാറ്റലോണിയന്‍ ഭരണകൂടത്തിനെതിരെ നീങ്ങില്ലെന്നും ഇവര്‍ വ്യക്തമാക്കിയിട്ടുണ്ട്.

അതേസമയം, വെള്ളിയാഴ്ച നടത്തിയ സ്വാതന്ത്ര്യ പ്രഖ്യാപനം ഫലപ്രാപ്തിയില്‍ എത്തണമെങ്കില്‍ കാറ്റലോണിയക്കും കടമ്പകളേറെ കടക്കാനുണ്ട്. യൂറോപ്യന്‍ യൂണിയനും അമേരിക്കയുമടക്കമുള്ള വന്‍ ശക്തികള്‍ സ്‌പെയിനിന് അനുകൂല നിലപാടാണ് സ്വീകരിച്ചിരിക്കുന്നത്. കാറ്റലന്‍ വിഷയം സ്‌പെയിനിന്റെ ആഭ്യന്തര കാര്യമാണെന്നും ഒക്ടോബര്‍ ഒന്നിലെ ഹിതപരിശോധന നിയമവിരുദ്ധമാണെന്ന സ്‌പെയിനിന്റെ നിലപാടിനെ പിന്തുണക്കുന്നതായും യൂറോപ്യന്‍ യൂണിയന്‍ വ്യക്തമാക്കി.

കാറ്റലോണിയൻ പാർലമെന്റ് പ്രത്യേക പ്രമേയം പാസാക്കിയ 135 അംഗ സഭയിൽ 70 പേർ അനുകൂലമായി വോട്ട് ചെയ്തു. 10 പേർ തീരുമാനത്തെ എതിർത്തപ്പോൾ രണ്ടു പേർ അഭിപ്രായം രേഖപ്പെടുത്തിയില്ലെന്നും സ്പീക്കർ പറഞ്ഞു.

Pido tranquilidad a todos los españoles. El Estado de Derecho restaurará la legalidad en Cataluña. MR

— Mariano Rajoy Brey (@marianorajoy) October 27, 2017

കാറ്റലോണിയയെ അംഗീകരിക്കണമെന്ന് മറ്റ് രാജ്യങ്ങളോട് സ്പീക്കര്‍ അഭ്യര്‍ഥനയും നടത്തി.
അതേസമയം, രാജ്യത്തെ ജനങ്ങളോട് സംയമനം പാലിക്കാന്‍ സ്പാനിഷ് പ്രധാനമന്ത്രി മരിയാനോ റെജോയ് അഭ്യര്‍ഥിച്ചു. ക്രമസമാധാനം സംരക്ഷിക്കണമെന്നും ജനങ്ങള്‍ക്ക് അദ്ദേഹം നിര്‍ദ്ദേശം നല്‍കി.

Updates….

കാറ്റലോനിയയില്‍ സ്വാതന്ത്ര്യം ആവശ്യപ്പെട്ട് നടക്കുന്ന പ്രക്ഷോഭങ്ങള്‍ അടിച്ചമര്‍ത്തുന്നതിന്റെ ഭാഗമായി പ്രത്യേക ഭരണഘടനാ അധികാരം വിനിയോഗിച്ച് മേഖലാ സര്‍ക്കാറിനെ പിരിച്ചു വിടാനും പുതിയ തെരഞ്ഞെടുപ്പ് നടത്താനും സ്പാനിഷ് ഭരണ കൂടം തയാറെടുക്കുന്നതിനിടയിലാണ് നിസഹകരണമെന്ന ഭീഷണിമുഴക്കി കാറ്റലോനിയന്‍ നേതാക്കള്‍ രംഗത്തെത്തിയത്. വെള്ളിയാഴ്ചയാണ് കാറ്റലോനിയയില്‍ നേരിട്ടുള്ള ഭരണത്തിനായി സ്പാനിഷ് സെനറ്റില്‍ വോട്ടെടുപ്പ്.

സ്‌പെയിനിന്റെ സാമ്പത്തിക ജീവനാഡിയായ കാറ്റലോനിയ സ്വാതന്ത്ര്യം പ്രാപിച്ചാല്‍ സ്‌പെയിന്‍ സാമ്പത്തികമായി തകരുമെന്നതിനാല്‍ എന്ത് വിലകൊടുത്തും സ്വാതന്ത്ര്യ ആവശ്യം അടിച്ചമര്‍ത്താനാണ് സ്പാനിഷ് ഭരണകൂടത്തിന്റെ ശ്രമം. അതേ സമയം ഈ മാസം ഒന്നിന് നടത്തിയ ഹിതപരിശോധനയില്‍ സ്വാതന്ത്ര്യത്തിന് അനുകൂലമായ വിധിയെഴുത്തുണ്ടായതായാണ് കാറ്റലോനിയന്‍ നേതാക്കള്‍ അവകാശപ്പെടുന്നത്. സ്പാനിഷ് ഭരണകൂടത്തിന്റെ ഉത്തരവുകള്‍ ലംഘിക്കാനുള്ള തീരുമാനം തങ്ങളുടെ മാത്രം തീരുമാനമല്ലെന്നും ഇത് 70 ലക്ഷം കാറ്റലോനിയന്‍ ജനങ്ങളുടേതാണെന്നും കാറ്റലോനിയന്‍ വിദേശകാര്യ തലവന്‍ റൗള്‍ റൊമേവ അറിയിച്ചു. കാറ്റലോനിയന്‍ സ്വാതന്ത്ര്യ ഹിത പരിശോധനയില്‍ 90 ശതമാനം പേരും സ്വാതന്ത്ര്യത്തിന് അനുകൂലമായാണ് വോട്ടു ചെയ്തതെന്നും അദ്ദേഹം കൂട്ടിച്ചേര്‍ത്തു.

അതേ സമയം കാറ്റലോനിയന്‍ സ്വാതന്ത്ര്യ പോരാട്ടം യൂറോപ്പിലെ മറ്റു രാജ്യങ്ങളിലും സമാന നീക്കത്തിന് സഹായകരമാവുമെന്നതിനാല്‍ യൂറോപ്യന്‍ രാജ്യങ്ങള്‍ ആശങ്കയോടെയാണ് നീക്കത്തെ നോക്കിക്കാണുന്നത്. സ്‌പെയിനില്‍ തന്നെ കാറ്റലോനിയക്കു പിന്നാലെ ഗാലിസിയ, ബാസ്‌ക് എന്നീ മേഖലകളിലും സമാന ആവശ്യം ഉയര്‍ന്നു തുടങ്ങിയിട്ടുണ്ട്. ഇതിനു പുറമെ സ്‌കോട്ട്‌ലന്‍ഡ്, ഫിന്‍ലന്‍ഡ് തുടങ്ങിയ രാജ്യങ്ങളില്‍ യൂറോപ്യന്‍ യൂണിയനെതിരെ നടക്കുന്ന പ്രക്ഷോഭങ്ങള്‍ക്ക് കാറ്റലോനിയന്‍ പ്രക്ഷോഭം ശക്തിപകരുമെന്നാണ് കരുതുന്നത്. കിഴക്കന്‍ ഇറ്റലിയില്‍ രണ്ട് സമ്പന്ന മേഖലകള്‍ ഇതിനോടകം തന്നെ കൂടുതല്‍ ഭരണ സ്വാതന്ത്ര്യം ആവശ്യപ്പെട്ട് രംഗത്തെത്തിയിട്ടുണ്ട്.

സ്‌പെയിന്‍ വിട്ടുപോകണമെന്ന കാറ്റലോണിയന്‍ ജനതയുടെ ഹിതം അംഗീകരിച്ച് മുന്നോട്ടു പോകുമെന്ന് കാറ്റലോണിയ പ്രസിഡന്റ് കാള്‍സ് പ്യൂമോണ്ട് കഴിഞ്ഞ ദിവസം പറഞ്ഞിരുന്നു. പ്രസിഡന്റ് എന്ന നിലയില്‍ കാറ്റലോണിയയെ ഒരു സ്വതന്ത്ര റിപ്പബ്ലിക്ക് ആക്കിമാറ്റുകയെന്ന ഉത്തരവാദിത്ത്വം ഏറ്റെടുക്കുന്നുവെന്നാണ് ബാര്‍സലോണയിലെ കാറ്റലന്‍ പാര്‍ലമെന്റ് യോഗത്തില്‍ അദ്ദേഹം പറഞ്ഞത്. സ്വാതന്ത്ര്യം പ്രഖ്യാപിക്കരുതെന്ന യൂറോപ്യന്‍ കൗണ്‍സില്‍ പ്രസിഡന്റ് ഡോണള്‍ഡ് ടസ്‌കിന്റെ അഭ്യര്‍ഥന തള്ളിയാണു കാറ്റലന്‍ നേതാക്കള്‍ സ്വാതന്ത്ര്യനീക്കം നടത്തിയത്. യൂറോപ്പിന്റെ ഐക്യമാണു വേണ്ടതെന്നും വിഭജനം അംഗീകരിക്കില്ലെന്നുമാണ് യൂറോപ്യന്‍ യൂണിയന്റെ നിലപാട്. വിഭജനത്തെ അംഗീകരിക്കില്ലെന്നു സ്‌പെയിന്‍ വ്യക്തമാക്കിരുന്നു.

സ്വാതന്ത്ര പ്രഖ്യാപനത്തെ തുടര്‍ന്ന് രാജ്യത്തെ പ്രധാന കേന്ദ്രങ്ങളില്‍ സ്‌പെയിന്‍ പോലീസിനെ വിന്യസിച്ചു. വിമാനത്താവളങ്ങളുടെയും പ്രധാന കേന്ദ്രങ്ങളുടെയും നിയന്ത്രണവും മാഡ്രിഡ് ആസ്ഥാനമായുള്ള ഭരണകൂടം ഏറ്റെടുത്തു. സാമ്പത്തിക ഉപരോധമടക്കമുള്ള സമ്മര്‍ദ തന്ത്രങ്ങളിലേക്കു നീങ്ങാന്‍ സ്‌പെയിനും യൂറോപ്യന്‍ യൂണിയനും ഒരുങ്ങിയിട്ടുണ്ട്. 80 ലക്ഷത്തോളം ജനങ്ങളുള്ള കാറ്റലോണിയയിലാണ് സ്‌പെയിനിലെ 16 ശതമാനം ജനങ്ങള്‍ താമസിക്കുന്നത്. ബാഴ്‌സലോണയാണ് തലസ്ഥാനം.

സ്വതന്ത്ര രാഷ്ട്രമാകണം എന്ന കാറ്റലോണിയക്കാരുടെ ആവശ്യമാണ് ഹിതപരിശോധനയില്‍ വരെ എത്തിയത്. സ്‌പെയിന്‍ സര്‍ക്കാര്‍ വോട്ടെടുപ്പു തടയാനുള്ള ശ്രമങ്ങള്‍ നടത്തിയിരുന്നു. ഹിതപരിശോധന നിയമ വിരുദ്ധമാണെന്ന് സ്പാനിഷ് ഭരണ ഘടനാ കോടതിയും വിധിച്ചിരുന്നു. എന്നാല്‍ സ്‌പെയിനില്‍നിന്ന് വിട്ടുപോകാന്‍ ആഗ്രഹിക്കുന്നു എന്നാണ് ഹിതപരിശോധനയില്‍ 90 ശതമാനവും വിധിയെഴുതിയത്.

നിയമ വിരുദ്ധം എന്ന് നേരത്തെ വിശേഷിപ്പിച്ച സ്വാതന്ത്ര്യ നീക്കത്തെ ഭരണഘടനയിലെ 155-ാം വകുപ്പ് ഉപയോഗിച്ച് നേരിടാനാണ് സ്പാനിഷ് ഭരണകൂടത്തിന്റെ നീക്കം. രാജ്യത്തിന്റെ പരമാധികാരത്തെ ബാധിക്കുന്ന തരത്തില്‍ പ്രവര്‍ത്തിക്കുന്ന പ്രവിശ്യകളുടെ സ്വയം ഭരണാധികാരം റദ്ദാക്കാന്‍ ഗവണ്‍മെന്റിന് അധികാരം നല്‍കുന്നതാണ് ഈ വകുപ്പ്. എന്നാല്‍, ഇത്തരം ഒരു നീക്കമുണ്ടായാല്‍ അത് മേഖലയിലെ പ്രതിസന്ധി കൂടുതല്‍ രൂക്ഷമാക്കുമെന്നാണ് കരുതുന്നത്.

സ്‌പെയിന്‍ – കാറ്റലോണിയ സംഘര്‍ഷം ശക്തമാകുമ്പോള്‍ ഫുട്‌ബോള്‍ ലോകത്തെയും അത് ശക്തമായി ബാധിക്കും. ലോകത്ത് ഏറ്റവും കൂടുതല്‍ ആരാധകരുളള ബാഴ്‌സലോണ ലാലീഗയില്‍ നിന്ന് പുറത്ത് പോകേണ്ടി വരും. എസ്പാന്യോള്‍, ജിറോണ തുടങ്ങിയ ക്ലബുകളുടെ ഭാവിയും അനിശ്ചിതതത്ത്വത്തിലാകും. ലാലീഗയില്‍ ബാഴ്‌സയില്ലെങ്കില്‍ എല്‍ ക്ലാസിക്കോ പ്രേമികള്‍ക്ക് അതുണ്ടാക്കുന്ന നിരാശ ചില്ലറയായിരിക്കില്ല. ലോകത്തെ മുഴുവന്‍ ആവേശത്തിലാക്കുന്ന ഏക ക്ലബ് ഫുട്‌ബോള്‍ മത്സരമാണ് മെസിയും റോണോയും നേര്‍ക്കു നേര്‍ വരുന്നത്.

ഒത്തുതീര്‍പ്പ് ചര്‍ച്ചക്ക് ആഹ്വാനം ചെയ്ത് കാറ്റലന്‍ നഗരമായ ബാഴ്‌സലോണയിലും റാലി നടന്നു. കാറ്റലന്‍ നേതാവ് കാള്‍സ് പ്യൂഗ്‌ഡെമൗണ്ട് ചൊവ്വാഴ്ച പാര്‍ലമന്റിനെ അഭിസംബോധന ചെയ്ത് സംസാരിക്കുമ്പോള്‍ സ്വാതന്ത്ര്യ പ്രഖ്യാപനം നടത്തുമെന്നാണ് റിപ്പോര്‍ട്ട്. ഇത് തടയുന്നതിന് സ്പാനിഷ് ഭരണഘടനാ കോടതി തിങ്കളാഴ്ച തുടങ്ങുന്ന കാറ്റലന്‍ പാര്‍ലമെന്റ് സമ്മേളനം നിര്‍ത്തിവെച്ച് ഉത്തരവിട്ടിരുന്നു.

പാര്‍ലമെന്റ് ഏകപക്ഷീയ സ്വതന്ത്ര്യ പ്രഖ്യാപനം നടത്തുമെന്ന് സ്‌പെയിന്‍ ഭയക്കുന്നു. എന്തു വിലകൊടുത്തും സ്വാതന്ത്ര്യ പ്രഖ്യാപനം തടയാനാണ് സ്പാനിഷ് ഭരണകൂടത്തിന്റെ തീരുമാനം. ഹിതപരിശോധനക്കിടെ 900 പേര്‍ക്ക് പരിക്കേറ്റ പൊലീസ് നടപടിയില്‍ സ്പാനിഷ് ഭരണകൂടം കാറ്റലോണിയയോട് മാപ്പുപറഞ്ഞു. പൊലീസുകാര്‍ക്കുവേണ്ടി മാപ്പുപറയുന്നതായി സര്‍ക്കാര്‍ വക്താവ് എന്റിക് മില്ലോ അറിയിച്ചു.

ഹിതപരിശോധന തടയുന്നതിന് പോളിങ് സ്‌റ്റേഷനുകളിലേക്ക് ഇരച്ചുകയറിയ പൊലീസ് വോട്ടര്‍മാരെ ബലമായി നീക്കുകയും ബാലറ്റ് ബോക്‌സുകള്‍ പിടിച്ചെടുക്കുയും ചെയ്തിരുന്നു. രാഷ്ട്രീയ അരക്ഷിതാവസ്ഥക്ക് കാരണമായ ഹിതപരിശോധനയുടെ പശ്ചാത്തലത്തില്‍ നിരവധി കമ്പനികള്‍ കാറ്റലോണിയയില്‍നിന്ന് പുറത്തുപോയിത്തുടങ്ങി.

രാജ്യത്തെ ഏറ്റവും വലിയ ബാങ്കായ കെയിക്‌സ ഫൗണ്ടേഷന്‍ തങ്ങളുടെ ആസ്ഥാനം പാല്‍മയിലേക്ക് മാറ്റുന്നതായി അറിയിച്ചു.  ദിവസങ്ങള്‍ക്കു മുമ്പ് നടന്ന ഹിതപരിശോധനയില്‍ വോട്ടര്‍മാരില്‍ 90 ശതമാനം പേരും സ്വാതന്ത്ര്യത്തെ അനുകൂലിക്കുകയായിരുന്നു.