തൃശൂര്‍: ടിപി ചന്ദ്രശേഖരന്‍ വധക്കേസില്‍ ജയില്‍ ശിക്ഷയില്‍ കഴിയുന്ന പ്രതി ഷാഫിയുടെ കൈയില്‍ വീണ്ടും മൊബൈല്‍ ഫോണ്‍. തൃശൂര്‍ വിയ്യൂര്‍ സെന്‍ട്രല്‍ ജയിലില്‍ പുലര്‍ച്ചെ നാടകീയമായി നടത്തിയ റെയ്ഡിലാണ് ഷാഫിയുടെ പക്കല്‍ നിന്ന് രണ്ട് മൊബൈല്‍ ഫോണ്‍ പിടികൂടിയത്. രണ്ടും സ്മാര്‍ട്ട് ഫോണാണ്. തൃശൂര്‍ പൊലീസ് കമ്മീഷണര്‍ യതീഷ് ചന്ദ്രയുടെ നേതൃത്വത്തിലുള്ള അന്വേഷണത്തിലാണ് മൊബൈല്‍ ഫോണുകള്‍ കണ്ടെടുത്തത്. ഇതിനു മുമ്പും രണ്ടു വട്ടം ജയിലില്‍ ഫോണ്‍ ഉപയോഗിച്ചതിന് ഷാഫിയെ പിടികൂടിയിട്ടുണ്ട്.

വിയ്യൂര്‍ ജയിലില്‍ ഫോണ്‍ ഉപയോഗിക്കുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തില്‍ തൃശൂര്‍ പൊലീസ് കമ്മീഷണര്‍ യതീഷ് ചന്ദ്രയുടെ നേതൃത്വത്തില്‍ പുലര്‍ച്ചെ ജയിലിലെത്തി പരിശോധന നടത്തുകയായിരുന്നു. നാലു ഫോണുകളാണ് പിടികൂടിയത്. രണ്ടെണ്ണം ഷാഫിയുടെ പക്കല്‍ നിന്നായിരുന്നു.