ആരോഗ്യമന്ത്രാലയത്തിന്റെ കണക്കുകള്‍ പ്രകാരം 2022ല്‍ ഇന്ത്യയില്‍ 53 ശതമാനം സിസേറിയനാണ് നടന്നത്. 2021ല്‍ പുറത്തിറക്കിയ ദേശീയ കുടുംബാരോഗ്യസര്‍വേയില്‍ ഇത് 47.4 ശതമാനമായിരുന്നു. കഴിഞ്ഞ വര്‍ഷം സര്‍ക്കാര്‍ ആശുപത്രികളില്‍ 15 ശതമാനം സിസേറിയന്‍ നടന്നപ്പോള്‍ സ്വകാര്യമേഖലയില്‍ 38 ശതമാനമാണ് നടന്നത്.

സ്വകാര്യസര്‍ക്കാര്‍ മേഖലകളില്‍ ഏറ്റവുമധികം സിസേറിയനുകള്‍ നടക്കുന്നത് തെലങ്കാനയിലാണ് 54.09 ശതമാനം. കേരളം ആറാം സ്ഥാനത്താണ് 42.41 ശതമാനം. സ്വകാര്യമേഖലയില്‍ ഏറ്റവുംകൂടുതല്‍ സിസേറിയനുകള്‍ നടക്കുന്നത് അന്തമാന്‍ നിക്കോബാര്‍ (95.45), ത്രിപുര (93.72), പശ്ചിമബംഗാള്‍ (83.88), ഒഡിഷ (74.62) എന്നീ സംസ്ഥാനങ്ങളിലാണ്.

ലോകത്തെ ആകെ പ്രസവങ്ങളില്‍ അഞ്ചിലൊന്നും സിസേറിയനാണെന്ന് കണക്ക് വ്യക്തമാക്കുന്നു. അമ്മയ്ക്കും കുഞ്ഞിനും മറ്റ് ആരോഗ്യപ്രശ്‌നങ്ങളില്ലെങ്കില്‍ സിസേറിയന്റെ ആവശ്യമില്ലെന്ന ബോധവത്കരണം വ്യാപകമാക്കാന്‍ ആരോഗ്യപ്രവര്‍ത്തകര്‍ക്ക് നിര്‍ദേശം നല്‍കി.

വിദേശ പഠനം പൂര്‍ത്തിയാക്കി തൈക്കാട് സര്‍ക്കാര്‍ ആസ്പത്രിയില്‍ സേവനമാരംഭിച്ച സര്‍ജന്‍ മേരി പുന്നന്‍ ലൂക്കോസാണ് സംസ്ഥാനത്ത് ആദ്യമായി സിസേറിയന്‍ നടത്തിയത്.
പാളയം സ്വദേശികളായ മിഖായേലിന്റെയും മേരിയുടെയും മകനാണ് ശവരിമുത്തു. നാലാമത്തെ പ്രസവത്തിലാണ് ശവരിമുത്തു പിറന്നത്.

ആദ്യ മൂന്നു പ്രസവത്തിലും മേരിയുടെ കുഞ്ഞുങ്ങള്‍ പ്രസവത്തിലൂടെ മരിച്ചു. സാധാരണ പ്രസവമാണെങ്കില്‍ നാലാമത്തെ കുഞ്ഞും മരിക്കുമെന്ന് ഡോക്ടര്‍മാര്‍ പറഞ്ഞു. ഇതേത്തുടര്‍ന്ന് സിസേറിയന്‍ ആശയം മുന്നോട്ടുവെച്ചത്. കേട്ടപ്പോള്‍ ആദ്യമൊന്ന് ഭയന്നെങ്കിലും പിന്നീട് മേരിയും മിഖായേലും ശസ്ത്രക്രിയക്കു സമ്മതം മൂളി. ഡോ.മേരിയുടെ നേതൃത്വത്തില്‍ ശസ്ത്രക്രിയയിലൂടെ ശവരിമുത്തു പിറന്നു. അത്ഭുത ശിശുവായാണ് ജനങ്ങള്‍ ശവരിമുത്തുവിനെ ആദ്യ നാളുകളില്‍ കണ്ടത്.

ദീര്‍ഘനാള്‍ പട്ടാളത്തില്‍ സേവനമനുഷ്ഠിച്ച ശവരിമുത്തു സര്‍ക്കാര്‍ പ്രസിലെ ജീവനക്കാരനായാണ് പ്രവര്‍ത്തിച്ചത്.