തിരുവനന്തപുരം: യൂണിവേഴ്‌സിറ്റി കോളജ് വിദ്യാര്‍ത്ഥി അഖില്‍ ചന്ദ്രനെ കുത്തിക്കൊലപ്പെടുത്താന്‍ ശ്രമിച്ച എസ്.എഫ്.ഐ അക്രമത്തിനെതിരെ എം.എസ്.എഫ് നടത്തിയ ‘ചലോ സെക്രട്ടറിയേറ്റി’ല്‍ പ്രതിഷേധമിരമ്പി. കഴിഞ്ഞ ദിവസങ്ങളില്‍ വിവിധ വിദ്യാര്‍ത്ഥി സംഘടനകള്‍ ഈ വിഷയത്തില്‍ പ്രതിഷേധവുമായി രംഗത്തെത്തിയെങ്കിലും സമീപകാലത്ത് തലസ്ഥാനം കണ്ട ഏറ്റവും വലിയ പ്രതിഷേധത്തിനാണ് ഭരണസിരാകേന്ദ്രം സാക്ഷിയായത്.
പ്രവര്‍ത്തകരുടെ പങ്കാളിത്തം കൊണ്ട് ശ്രദ്ധേയമായ മാര്‍ച്ചിന് ആവേശം പകരാന്‍ പ്രതിപക്ഷ ഉപനേതാവ് ഡോ.എം.കെ മുനീറും മുസ്‌ലിം യൂത്ത്‌ലീഗ് സംസ്ഥാന ജനറല്‍ സെക്രട്ടറി പി.കെ ഫിറോസും എത്തി. എം.എല്‍.എമാരായ ടി.എ അഹമ്മദ് കബീര്‍, പ്രൊഫ. ആബിദ് ഹുസൈന്‍ തങ്ങള്‍, ടി.വി ഇബ്രാഹിം, എം. ഉമ്മര്‍, മുസ്‌ലിം ലീഗ് സംസ്ഥാന സെക്രട്ടറി ബീമാപള്ളി റഷീദ് തുടങ്ങിയ നേതാക്കള്‍ സെക്രട്ടറിയേറ്റിന് മുന്നില്‍ എം.എസ്.എഫ് പ്രവര്‍ത്തകരെ അഭിവാദ്യം ചെയ്തു.ജില്ലയിലെ എസ്.ടി.യു നേതൃത്വവും അഭിവാദ്യമര്‍പ്പിച്ച് പ്രകടനം നടത്തി.
എസ്.എഫ്.ഐയുടെ അക്രമരാഷ്ട്രീയത്തിനെതിരെ ശക്തമായ താക്കീത് നല്‍കാന്‍ ‘ചലോ സെക്രട്ടറിയേറ്റി’ലൂടെ എം.എസ്.എഫിന് കഴിഞ്ഞത് മുസ്‌ലിം വിദ്യാര്‍ത്ഥി ഫെഡറേഷന്റെ സമരചരിത്രത്തില്‍ പുതിയ അധ്യായം എഴുതിച്ചേര്‍ക്കുന്നതായി. എം.എസ്.എഫ് സംസ്ഥാന പ്രസിഡന്റ് മിസ്ഹബ് കീഴരിയൂരും ജനറല്‍ സെക്രട്ടറി എം.പി നവാസും നേതൃത്വം നല്‍കിയ പ്രതിഷേധ പ്രകടനം മ്യൂസിയം ജംഗ്ഷനില്‍ നിന്ന് 12 മണിയോടെയാണ് ആരംഭിച്ചത്. കോരിച്ചൊരിയുന്ന മഴയത്തും അണമുറിയാതെ ഒഴുകിയെത്തിയ ഹരിത രാഷ്ട്രീയത്തിന്റെ പുതുതലമുറ, വിദ്യാര്‍ത്ഥി പ്രക്ഷോഭങ്ങള്‍ക്കുതന്നെ മാതൃകയായി. കലാലയാന്തരീക്ഷം സമാധാനപരമാകണമെന്ന മുദ്രാവാക്യം ഉറക്കെ പറയുമ്പോഴും രക്തക്കറവീണ യൂണിവേഴ്‌സിറ്റി കോളജിനെ ജനാധിപത്യപരമായി വീണ്ടെടുക്കലാണ് എം.എഫ്.എഫിന്റെ ലക്ഷ്യമെന്ന് പ്രസിഡന്റ് മിസ്ഹബ് കീഴരിയൂര്‍ പറഞ്ഞു. അക്രമത്തിന്റെ പാതയില്‍ നിന്ന് പിന്തിരിയാന്‍ എസ്.എഫ്.ഐ തയാറാകണമെന്നും കേരളത്തിന്റെ പൊതുബോധം എസ്.എഫ്.ഐക്ക് എതിരായി ചിന്തിച്ചുതുടങ്ങിയിട്ട് കാലമേറെയായെന്ന് അവര്‍ മനസിലാക്കണമെന്നും ജനറല്‍ സെക്രട്ടറി എം.പി നവാസ് പറഞ്ഞു.മിസ്ഹബ് കീഴരിയൂര്‍, എം.പി നവാസ് എന്നിവര്‍ക്കൊപ്പം ഭാരവാഹികളായ യൂസുഫ് വല്ലാഞ്ചിറ, ഷരീഫ് വടക്കയില്‍, ഷബീര്‍ ഷാജഹാന്‍, ഹാഷിം ബംബ്രാണി, ഫൈസല്‍ ചെറുകുന്നോന്‍, നിഷാദ്.കെ.സലീം, കെ. കെ.എ അസീസ്, സല്‍മാന്‍ ഹനീഫ്, എ.പി അബ്ദുസമദ്, കെ.ടി റഊഫ്, മുഫീദ തെസ്‌നി, ഷഫീഖ് വഴിമുക്ക്, നൗഫല്‍ കുളപ്പട, അജേഷ് കോടനാട്, വിപിന്‍ എം എന്നിവര്‍ പ്രതിഷേധ പ്രകടനത്തിന് നേതൃത്വം നല്‍കി.

കോഴിക്കോട്: വിവിധ ആവശ്യങ്ങള്‍ ഉന്നയിച്ച് എം.എസ്.എഫ് സംസ്ഥാന കമ്മിറ്റി സെക്രടറിയേറ്റിലേക്ക് നടത്തിയ വിദ്യാര്‍ത്ഥി മാര്‍ച്ചിന് നേരെ പൊലീസ് നടത്തിയ നരനായാട്ട് അങ്ങേയറ്റം അപലപനീയവും ധിക്കാരപരവുമാണെന്ന് മുസ്‌ലിം യൂത്ത് ലീഗ് സംസ്ഥാന പ്രസിഡന്റ് സയ്യിദ് മുനവ്വറലി ശിഹാബ് തങ്ങളും ജനറല്‍ സെക്രട്ടറി പി.കെ ഫിറോസും പറഞ്ഞു. അവകാശ സമരങ്ങളെ ചോരയില്‍ മുക്കി അമര്‍ച്ച ചെയ്യാമെന്നത് ഇടത് സര്‍ക്കാരിന്റെ വ്യാമോഹം മാത്രമാണ്.
കൊലപാതകികളും ഗുണ്ടകളുമായ വിദ്യാര്‍ത്ഥി നേതാക്കള്‍ തലസ്ഥാനത്ത് സ്വൈര്യ വിഹാരം നടത്തുമ്പോള്‍ ആണ് സമാധാനപരമായി ജനാതിപത്യ രീതിയില്‍ സമരം നടത്തിയ എം.എസ്.എഫ് നേതാക്കളെ പോലീസ് ക്രൂരമായി മര്‍ദിച്ചത്. മുസ്‌ലിം ലീഗ് സംസ്ഥാന സെക്രട്ടറി ബീമപള്ളി റഷീദ്, എം.എസ്.എഫ് സംസ്ഥാന പ്രസിഡന്റ് മിസ്ഹബ് കീഴരിയൂര്‍ ഉള്‍പ്പെടെ നിരവധി നേതാക്കള്‍ക്കും പ്രവര്‍ത്തകര്‍ക്കും മാരകമായി പരുക്കേല്‍ക്കുകയുണ്ടായി. പൊലീസ് മുറ കൊണ്ട് മാത്രം സര്‍ക്കാരിന് മുന്നോട്ട് പോകാനാകില്ലെന്ന് നേതാക്കള്‍ പറഞ്ഞു. പൊലീസ് നരനായാട്ടില്‍ പ്രതിഷേധിച്ച് ഇന്ന് പഞ്ചായത് മുനിസിപ്പല്‍ തലങ്ങളില്‍ മുസ്്‌ലിംലീഗ് നടത്തുന്ന പ്രതിഷേധ പ്രകടനങ്ങള്‍ വിജയിപ്പിക്കണമെന്നും നേതാക്കള്‍ ആഹ്വാനം ചെയ്തു.

തിരുവനന്തപുരം: യൂണിവേഴ്‌സിറ്റി കോളജ് സംഭവത്തില്‍ പ്രതിഷേധിച്ച് ഭരണസിരാകേന്ദ്രത്തെ വിറപ്പിച്ച എം.എസ്.എഫ് മാര്‍ച്ചിനുനേരെ പൊലീസ് അതിക്രമം. മുസ്‌ലിം ലീഗ് സംസ്ഥാന സെക്രട്ടറി ബീമാപള്ളി റഷീദും എം.എസ്.എഫ് സംസ്ഥാന പ്രസിഡന്റ് മിസ്ഹബ് കീഴരിയൂരും ഉള്‍പെടെ ആറ് നേതാക്കള്‍ക്ക് പരിക്കേറ്റു. എം.എസ്.അഎഫ് പാലക്കാട് ജില്ലാ സെക്രട്ടറി ബിലാല്‍ മുഹമ്മദ്, യൂത്ത് ലീഗ് മുന്‍ തിരഅുവനന്തപുരം ജില്ലാ പ്രസിഡന്റ് ഷഹീര്‍ജി അഹമ്മദ്, എം.എസ്.എഫ് നേതാക്കളായ ഷഫീഖ് വഴിമുക്ക്, അംജദ് കുരീപ്പള്ളി എന്നിവരാണ് പരിക്കേറ്റ മറ്റുള്ളവര്‍.
യൂണിവേഴ്‌സിറ്റി കോളജിന് മുന്നില്‍ എം.എസ്.എഫ് പ്രവര്‍ത്തകരെ പൊലീസ് വളഞ്ഞിട്ട് തല്ലുന്ന വിവരം അറിഞ്ഞാണ് മുസ്‌ലിംലീഗ് സംസ്ഥാന സെക്രട്ടറി ബീമാപള്ളി റഷീദ് എത്തിയത്. ബീമാപള്ളി ഉള്‍പെടെയുള്ള മുതിര്‍ന്ന നേതാക്കള്‍ നില്‍ക്കുന്ന സ്ഥലത്തേക്ക് യാതൊരു മുന്നറിയിപ്പുമില്ലാതെ പൊലീസ് ഗ്രഡേഡ് പ്രയോഗിക്കുകയായിരുന്നു. ആംബുലന്‍സിലും പൊലീസ് വാഹനങ്ങളിലുമാണ് പരിക്കേറ്റവരെ മെഡിക്കല്‍ കോളജിലെത്തിച്ചത്. ഗ്രനേഡ് ആക്രമണത്തില്‍ ബോധംകെട്ടുവീണ ബീമാപള്ളി റഷീദിനെ മാധ്യമപ്രവര്‍ത്തകരാണ് താങ്ങിയെടുത്ത് ആംബുലന്‍സില്‍ കയറ്റിയത്. നിരവധി മാധ്യമപ്രവര്‍ത്തകര്‍ക്കും പരിക്കേറ്റു. ഡോ.എം.കെ മുനീറും എന്‍. ഷംസുദ്ദീന്‍ എം.എല്‍.എയും പരിക്കേറ്റവരെ മെഡിക്കല്‍ കോളജില്‍ സന്ദര്‍ശിച്ചു.
ഇന്നലെ ഉച്ചക്ക് 12.30 ഓടെയാണ് എം.എസ്.എഫ് പ്രകടനമായി സെക്രട്ടേറിയറ്റിന് മുന്നില്‍ എത്തിയത്. നൂറുകണക്കിന് പ്രവര്‍ത്തകര്‍ പങ്കെടുത്ത സമരം പ്രതിപക്ഷ ഉപനേതാവ് ഡോ. എം.കെ മുനീര്‍ ഉദ്ഘാടനം ചെയ്തു. മറ്റ് നേതാക്കളുടെ പ്രസംഗങ്ങള്‍ക്ക് ശേഷം പ്രവര്‍ത്തകര്‍ യൂണിവേഴ്‌സിറ്റി കോളജിലേക്ക് പ്രകടനം നടത്തി. ഈ സമയം സെക്രട്ടറിയേറ്റിന് മുന്നിലുണ്ടായിരുന്ന പൊലീസ് സംഘം ഇവരെ പിന്തുടരുകയും യൂണിവേഴ്‌സിറ്റി കോളജിന്റെ പ്രധാന ഗേറ്റിന് മുന്നില്‍ വലയം തീര്‍ക്കുകയുമായിരുന്നു. പ്രവര്‍ത്തകരുടെ ഭാഗത്തുനിന്ന് ശക്തമായ മുദ്രാവാക്യം വിളി മാത്രമാണുണ്ടായത്. സെക്രട്ടറിയേറ്റിലെ ബാരിക്കേഡുകള്‍ക്ക് മുന്നില്‍ സംയമനം പാലിച്ച പൊലീസ് യൂണിവേഴ്‌സിറ്റി കോളജിന് മുന്നില്‍ തുടക്കത്തില്‍ തന്നെ കണ്ണീര്‍വാതകം പ്രയോഗിക്കുകയായിരുന്നു മൂന്നു തവണ കണ്ണീര്‍ വാതകം പ്രയോഗിച്ചു. പിന്നാലെ ഗ്രനേഡ് പൊട്ടിക്കുകയും ചെയ്തു.
തുടര്‍ന്ന് ലാത്തിച്ചാര്‍ജ് നടത്തി. ചിതറിയോടിയ പ്രവര്‍ത്തകരെ പൊലീസ് ഓടിച്ചിട്ടുതല്ലി. കുറച്ചു പ്രവര്‍ത്തകര്‍ സ്‌പെന്‍സര്‍ ജംഗ്ഷനില്‍ നിന്ന് ബേക്കറിയിലേക്കുള്ള റോഡില്‍ നിലയുറപ്പിച്ചെങ്കിലും യൂണിവേഴ്‌സിറ്റി കോളജിന് മുന്നിലുണ്ടായിരുന്ന പൊലീസുകാരില്‍ ഒരു വിഭാഗം ഇവിടേക്ക് വന്ന് ഇവരെ മര്‍ദ്ദിക്കുകയായിരുന്നു. വി.ജെ.ടി ഹാളിനുമുന്നിലും പാളയം സാഫല്യം കോംപ്ലക്‌സിനു സമീപത്തുമായി നിന്ന് മുദ്രാവാക്യം വിളിച്ച പ്രവര്‍ത്തകര്‍ക്കു നേരെയും പൊലീസ് ആക്രമണമുണ്ടായി. ഡെപ്യൂട്ടി കമ്മിഷണര്‍ ആര്‍. ആദിത്യയുടെ നേതൃത്വത്തിലായിരുന്നു പൊലീസ് നടപടി. മുന്‍കൂട്ടി പദ്ധതിയിട്ടതുപോലെ പൊലീസുകാര്‍ ഗ്രനേഡ് നിറച്ച ബാഗുകളുമായാണ് യൂണിവേഴ്‌സിറ്റി കോളജിന് മുന്നിലേക്ക് വന്നത്. എം.എസ്.എഫ് പ്രകടനം മ്യൂസിയം ജംഗ്ഷനില്‍ നിന്ന് ആരംഭിച്ചപ്പോള്‍ മുതല്‍ ശക്തമായ മഴയായിരുന്നു. എന്നാല്‍ മഴ വകവെക്കാതെ എം.എസ്.എഫ് ശക്തമായ പ്രതിഷേധമാണുയര്‍ത്തിയത്. കലാലയങ്ങളിലെ അക്രമം അവസാനിപ്പിച്ച് വിദ്യാര്‍ഥികള്‍ക്ക് പഠനാന്തരീക്ഷം ഉറപ്പാക്കുക, വിദ്യാര്‍ഥി പ്രവേശനത്തിലെ രാഷ്ട്രീയ ഇടപെടല്‍ അവസാനിപ്പിക്കുക, കേരള വി.സിയെയും പി.എസ്.സി ചെയര്‍മാനെയും പിരിച്ചുവിടുക തുടങ്ങിയ ആവശ്യങ്ങള്‍ ഉന്നയിച്ചാണ് എം.എസ്.എഫ് ചലോ സെക്രട്ടേറിയറ്റ് മാര്‍ച്ച് നടത്തിയത്.

തിരുവനന്തപുരം: വര്‍ഗീയതയെ ചെറുക്കുമെന്ന് പറയുന്ന എസ്.എഫ്.ഐക്ക് അവരുടെ വര്‍ഗം തന്നെ ഇല്ലാതാകുന്ന സ്ഥിതിയാണെന്ന് പ്രതിപക്ഷ ഉപനേതാവ് ഡോ.എം.കെ മുനീര്‍. എം.എസ്.എഫ് സെക്രട്ടറിയേറ്റ് മാര്‍ച്ച് ‘ചലോ സെക്രട്ടറിയേറ്റ്’ ഉദ്ഘാടനം ചെയ്യുകയായിരുന്നു അദ്ദേഹം. യൂണിവേഴ്‌സിറ്റി കോളജില്‍ വിദ്യാര്‍ത്ഥികള്‍ക്ക് സമാധാനപരമായി പഠിക്കാന്‍ അവസരം നല്‍കിയില്ലെങ്കില്‍ എം.എസ്.എഫിനും യൂത്ത് ലീഗിനും പിന്നാലെ മുസ്‌ലിം ലീഗ് സമരം ഏറ്റെടുക്കുമെന്നും അദ്ദേഹം പറഞ്ഞു.
എസ്.എഫ്.ഐയെ സഹായിക്കാന്‍ മുന്നില്‍നില്‍ക്കുന്ന പൊലീസുകാരുടെ കാക്കി യൂണിഫോം എ.കെ.ജി സെന്ററില്‍ നിന്നുള്ള പണം കൊണ്ട് വാങ്ങിയതല്ലെന്ന് ഓര്‍ക്കണം. എല്ലാക്കാലവും പിണറായി വിജയന്‍ കേരളത്തില്‍ മുഖ്യമന്ത്രിയായിരിക്കില്ലെന്നും അവര്‍ തിരിച്ചറിയണം. യൂണിവേഴ്‌സിറ്റി കോളജില്‍ അഖിലിനെ കുത്തിയ ശിവരഞ്ജിത്തിന് കള്ള സീല്‍ ഉണ്ടാക്കാനും ഉത്തരക്കടലാസ് കൈവശം വെക്കാനുമെല്ലാം പൊലീസിന്റെ കൂടി ഒത്താശയുണ്ടായിരുന്നെങ്കില്‍ അതിനെ ചോദ്യം ചെയ്യാന്‍ ഇവിടെ കരുത്തുള്ള വിദ്യാര്‍ത്ഥി പ്രസ്ഥാനമുണ്ട്. ശിവരഞ്ജിത്തിന്റെ വീട് റെയ്ഡ് ചെയ്ത പൊലീസ് ഉദ്യോഗസ്ഥനെ സ്ഥലം മാറ്റിയിരിക്കുകയാണ്. എസ്.എഫ്.ഐക്കാര്‍ ആഗ്രഹിക്കുന്നത് മാത്രം കാമ്പസുകളില്‍ നടക്കണമെന്നാണ് അവര്‍ പറയുന്നത്. ഇപ്പോള്‍ യൂണിവേഴ്‌സിറ്റി കോളജിലെ എസ്.എഫ്.ഐ യൂണിറ്റ് പിരിച്ചുവിട്ടിട്ടുണ്ട്. സി.പി.ഐയുടെ വിദ്യാര്‍ത്ഥി സംഘടനയായ എ.ഐ.എസ്.എഫിനു പോലും പ്രവേശനമില്ലാത്ത കാമ്പസാണിത്. എല്ലാ സംഘടനകള്‍ക്കും പ്രവര്‍ത്തിക്കാന്‍ അവസരമുണ്ടാക്കിയില്ലെങ്കില്‍ ചവിട്ടിത്തുറന്ന് പ്രവര്‍ത്തനം ആരംഭിക്കുമെന്നും മുനീര്‍ പറഞ്ഞു.
വിദ്യാര്‍ത്ഥിനി ആത്മഹത്യക്ക് ശ്രമിച്ച സംഭവവുമായി ബന്ധപ്പെട്ട് യൂണിവേഴ്‌സിറ്റി കോളജിലെ എസ്.എഫ്.ഐ യൂണിയന്‍ ഓഫീസിനെ കുറിച്ച് താന്‍ നിയമസഭയില്‍ മന്ത്രി കെ.ടി ജലീലിനോട് ഒരു ചോദ്യം ഉന്നയിച്ചിരുന്നു. ആ മുറി അടച്ചുപൂട്ടിയെന്നാണ് പ്രിന്‍സിപ്പല്‍ റിപ്പോര്‍ട്ട് നല്‍കിയെന്നാണ് അദ്ദേഹം അതിന് നല്‍കിയ മറുപടി. എന്നാല്‍ എസ്.എഫ്.ഐയുടെ യൂണിയന്‍ ഓഫീസിന് വാതില്‍ പോലുമില്ല. മന്ത്രി രേഖാമൂലം നല്‍കിയ മറുപടിയിലൂടെ നിയമസഭയെ തെറ്റിദ്ധരിപ്പിക്കുകയായിരുന്നു. മന്ത്രി ജലീലിനെതിരെ അവകാശലംഘനത്തിന് പരാതി നല്‍കും. മന്ത്രിയെ കൊണ്ട് ഇക്കാര്യത്തില്‍ നിയമസഭയില്‍ തന്നെ മറുപടി പറയിക്കും. യൂണിവേഴ്‌സിറ്റി കോളജ് പ്രിന്‍സിപ്പലിന്റെ പേര് വിശ്വംഭരന്‍ എന്നാല്‍ പേരിനര്‍ത്ഥം ലോകം ഭരിക്കുന്നവന്‍ എന്നാണെങ്കിലും ഒരു കോളജ് പോലും മര്യാദക്ക് ഭരിക്കാന്‍ അദ്ദേഹത്തിന് കഴിയുന്നില്ലെന്നും മുനീര്‍ പറഞ്ഞു.
എം.എസ്.എഫ് സംസ്ഥാന പ്രസിഡന്റ് മിസ്ഹബ് കീഴരിയൂര്‍ അധ്യക്ഷത വഹിച്ചു. യൂത്ത്‌ലീഗ് സംസ്ഥാന ജനറല്‍ സെക്രട്ടറി പി.കെ ഫിറോസ് മുഖ്യപ്രഭാഷണം നടത്തി. സംസ്ഥാന ജനറല്‍ സെക്രട്ടറി എം.പി നവാസ്, എം.എല്‍.എമാരായ ടി.എ അഹമ്മദ് കബീര്‍, പ്രൊഫ. ആബിദ് ഹുസൈന്‍ തങ്ങള്‍, ടി.വി ഇബ്രാഹിം, എം. ഉമ്മര്‍, മുസ്‌ലിം ലീഗ് സംസ്ഥാന സെക്രട്ടറി ബീമാപള്ളി റഷീദ്, തിരുവനന്തപുരം ജില്ലാ പ്രസിഡന്റ് പ്രൊഫ. തോന്നയ്ക്കല്‍ ജമാല്‍, യൂത്ത്‌ലീഗ് സംസ്ഥാന വൈസ് പ്രസിഡന്റ് ഫൈസല്‍ ബാഫഖി തങ്ങള്‍, അഡ്വ, സുള്‍ഫിക്കര്‍ സലാം, കുറുക്കോളി മൊയ്തീന്‍ സംബന്ധിച്ചു.
അതിനിടെ യാതൊരു പ്രകോപനവുമില്ലാതെ മാര്‍ച്ചിനുനേരെ പൊലീസ് അതിക്രമമുണ്ടായി. യൂണിവേഴ്‌സിറ്റി കോളജിന് മുന്നില്‍ എം.എസ്.എഫ് പ്രവര്‍ത്തകരെ പൊലീസ് വളഞ്ഞിട്ട് തല്ലുകയായിരുന്നു. വിവരം അറിഞ്ഞെത്തിയ മുസ്‌ലിംലീഗ് നേതാക്കള്‍ക്കും പരിക്കേറ്റു. യാതൊരു മുന്നറിയിപ്പുമില്ലാതെ പൊലീസ് ഗ്രഡേഡ് പ്രയോഗിക്കുകയുമുണ്ടായി.

അത്യുജ്ജ്വലമായ മാര്‍ച്ചാണ് എം.എസ്.എഫ് സംസ്ഥാന കമ്മിറ്റിയുടെ ആഭിമുഖ്യത്തില്‍ ഇന്ന് തിരുവനന്തപുരത്ത് സംഘടിപ്പിച്ചത്. എസ്.എഫ്.ഐ ക്രിമിനലുകളെ നിലക്കു നിര്‍ത്തണമെന്നും പാര്‍ട്ടി ഗുണ്ടകള്‍ക്ക് പിന്‍വാതില്‍ നിയമനം നല്‍കരുതെന്നും വിദ്യാര്‍ത്ഥികള്‍ക്ക് പഠിക്കാന്‍ അവസരം നല്‍കണമെന്നുമാവശ്യപ്പെട്ടാണു ഇന്ന് വിദ്യാര്‍ത്ഥികള്‍ തെരുവിലിറങ്ങിയത്.

സെക്രട്ടേറിയറ്റിന് മുന്നിലും യൂണിവേഴ്‌സിറ്റി കോളേജിനു മുന്നിലും സംഘടിപ്പിച്ച പ്രതിഷേധത്തില്‍ ആയിരക്കണക്കിന് വിദ്യാര്‍ത്ഥികളാണ് അണി നിരന്നത്. സമാധാനപരമായി പ്രതിഷേധിച്ച വിദ്യാര്‍ത്ഥികളെയും നേതാക്കളെയും പോലീസ് തല്ലിച്ചതക്കുകയാണുണ്ടായത്. സമരത്തെ അഭിവാദ്യം ചെയ്യാനെത്തിയ മുസ്‌ലിം ലീഗ് സംസ്ഥാന സെക്രട്ടറി ബീമാപ്പള്ളി റഷീദ് സാഹിബിനും പോലീസ് അതിക്രമത്തില്‍ പരിക്കേറ്റു.

തിരുവനന്തപുരം നഗരിയെ അക്ഷരാര്‍ത്ഥത്തില്‍ ഇളക്കി മറിച്ച പ്രതിഷേധം സംഘടിപ്പിച്ച എം.എസ്.എഫ് സഹപ്രവര്‍ത്തകരെ അഭിനന്ദിക്കുന്നു.

നിങ്ങള്‍ ഒറ്റക്കല്ല. യൂത്ത് ലീഗ് ഈ സമരത്തില്‍ നിങ്ങളോടൊപ്പമുണ്ട്. പോലീസ് അതിക്രമത്തില്‍ പ്രതിഷേധിച്ച് നാളെ സംസ്ഥാന വ്യാപകമായി യൂത്ത് ലീഗ് പഞ്ചായത്ത് തലത്തില്‍ പ്രകടനം നടത്തും.ഒപ്പം ശനിയാഴ്ച കലക്ട്രേറ്റിലേക്ക് മാര്‍ച്ചുമുണ്ട്. ഈ നെറികെട്ട സര്‍ക്കാറിനെതിരെ യുവജന വിദ്യാര്‍ത്ഥി പ്രക്ഷോഭം ഒരുമിച്ച് മുന്നോട്ടു നീങ്ങട്ടെ…

യൂണിവേഴ്‌സിറ്റി കോളജിലെ സംഘര്‍ഷത്തിലും ഉത്തരക്കടലാസ് ചോര്‍ച്ചക്കുമെതിരെ എം.എസ്.എഫ് പ്രവര്‍ത്തകര്‍ ഇന്നു നടത്തിയ ചലോ സെക്രട്ടറിയേറ്റ് മാര്‍ച്ച് ഉജ്ജ്വലമായി. സംസ്ഥാന സര്‍ക്കാരിന്റെ വിവിധ വിദ്യാഭ്യാസ നിലപാടുകളിലുള്ള പ്രതിഷേധം കൂടി ഉണര്‍ത്തിയായിരുന്നു മാര്‍ച്ച്.

തലസ്ഥാനം ഇന്നു വരെ കണ്ട സമരമുഖങ്ങളില്‍ നിന്ന് വേറിട്ട അനുഭവമായിരുന്നു മുസ്ലിം ലീഗിന്റെ ഈ വിദ്യാര്‍ഥി പ്രസ്ഥാന പ്രവര്‍ത്തകര്‍ നടത്തിയ പ്രതിഷേധം. മികച്ച ആള്‍ബലവും സംഘടനാ സംവിധാനത്തിന്റെ മേന്മയും കൂടി ഉള്‍ച്ചേര്‍ന്ന ഒന്നായിരുന്നു ഇത്.

ന്യായമായ ആവശ്യത്തിന്റെ മേല്‍ നടത്തിയ സമാധാനപരമായ ചെറുത്തുനില്‍പ്പിനെ കണ്ണീര്‍ വാതകവും ജലപീരങ്കിയും പ്രയോഗിച്ചാണ് പൊലിസ് നേരിട്ടത്.

ആയിരത്തോളം വരുന്ന എം.എസ്.എഫ് പ്രവര്‍ത്തകരായിരുന്നു സമര ഗെയ്റ്റിനു മുന്നില്‍ തടിച്ചുകൂടിയത്. സര്‍വകലാശാല കോളജിലെ സംഘര്‍ഷമുണ്ടായ സാഹചര്യത്തില്‍ സംസ്ഥാന സര്‍ക്കാരിനെതിരെ വളരെ ആവേശത്തോടെയാണ് എം.എസ്.എഫ് യുവാക്കള്‍ മുദ്രാവാക്യം മുഴക്കിയത്.

എസ്.എഫ്.ഐ ഗുണ്ടകളെ നിലക്കു നിര്‍ത്തണമെന്നും പാര്‍ട്ടി ഗുണ്ടകള്‍ക്ക് മത്സര പരീക്ഷകളില്‍ പിന്‍വാതില്‍ നിയമനം നല്‍കരുതെന്നും വിദ്യാര്‍ഥികള്‍ക്ക് സമാധാനപൂര്‍ണമായി പഠിക്കാന്‍ അവസരം ഒരുക്കി നല്‍കണമെന്നും ഉറക്കെ ഉറക്കെ ആവശ്യപ്പെട്ട്് അവര്‍ തെരുവില്‍ മുദ്രാവാക്യം വിളിച്ചു.

മാര്‍ച്ച് യൂണിവേഴ്‌സിറ്റി കോളജിലേക്ക് പോകാന്‍ ശ്രമിക്കുന്നതിനിടെ സംഘര്‍ഷമുണ്ടായി. എം.എസ്.എഫ് സംസ്ഥാന പ്രസിഡന്റ് മിസ്ഹബ് കീഴരിയൂര്‍ ഉള്‍പ്പെടെ നിരവധി പ്രവര്‍ത്തകര്‍ക്ക് പൊലീസ് ലാത്തിച്ചാര്‍ജില്‍ പരിക്കേറ്റു. സമരത്തെ അഭിവാദ്യം ചെയ്യാനെത്തിയ മുസ്ലിംലീഗ് സംസ്ഥാന സെക്രട്ടറി ബീമാപള്ളി റഷീദിനും പരിക്കേറ്റു. ഇവരെല്ലാം സമീപത്തെ ആശുപത്രിയില്‍ ചികിത്സ തേടി.

അതേസമയം സംഭവത്തില്‍ അപലപിച്ച് പി.കെ കുഞ്ഞാലിക്കുട്ടി എം.പി അടക്കം നിരവധി പേര്‍ രംഗത്തെത്തി. സര്‍ക്കാറിന് തിരുത്താന്‍ കഴിയുന്നില്ലെങ്കില്‍ സ്വയം ഒഴിഞ്ഞു പോവണമെന്നും എസ്.എഫ്.ഐയുടെ അക്രമ സമരത്തിന് എതിരെ പ്രതികരിക്കുന്നവരെ അടിച്ച് ഒതുക്കുകയാണെന്നും പി.കെ കുഞ്ഞാലിക്കുട്ടി പറഞ്ഞു.

പോലീസ് അതിക്രമത്തില്‍ പ്രതിഷേധിച്ച് നാളെ സംസ്ഥാന വ്യാപകമായി യൂത്ത് ലീഗ് പഞ്ചായത്ത് തലത്തില്‍ പ്രകടനം നടത്തും. ശനിയാഴ്ച കലക്ട്രേറ്റിലേക്ക് മാര്‍ച്ചും സംഘടിപ്പിക്കും.