മുസ്‌ലിം ലീഗിന് ഏറ്റവും കൂടുതല്‍ അംഗങ്ങളുള്ള കാസര്‍ഗോഡ്, കണ്ണൂര്‍, വയനാട്, കോഴിക്കോട്, മലപ്പുറം, പാലക്കാട് ജില്ലകളില്‍ നിന്നും ഒരു വാര്‍ഡ്, ഡിവിഷന്‍ എന്നിവിടങ്ങളില്‍ നിന്നും അഞ്ചില്‍ കുറയാത്ത പുതിയ അര്‍ധവാര്‍ഷിക വരിക്കാരെയാണ് ചേര്‍ക്കേണ്ടത്. പുറമെ ഒരു വര്‍ഷം, നാല്, മൂന്ന് മാസ വരിക്കാരെയും ചേര്‍ക്കണം. തൃശൂര്‍ മുതല്‍ തിരുവനന്തപുരം വരെയുള്ള ജില്ലകളില്‍ നിന്നും ഒരു നിയോജക മണ്ഡലത്തില്‍ നിന്നും 100ല്‍ കുറയാത്ത പുതിയ അര്‍ധവാര്‍ഷിക വരിക്കാരെയും ചേര്‍ക്കണം.

സംസ്ഥാന തലത്തില്‍ കൂടുതല്‍ വരിക്കാരെ ചേര്‍ത്ത് ഒന്നും രണ്ടും മൂന്നും സ്ഥാനം നേടുന്നവര്‍ക്ക് മുസ്‌ലിം ലീഗ് സംസ്ഥാന കമ്മിറ്റി പ്രത്യേക ഉപഹാരം നല്‍കുമെന്ന് സംസ്ഥാന ജനറല്‍ സെക്രട്ടറി പിഎം.എ സലാം അറിയിച്ചു. ജില്ലാ തലത്തില്‍ ഒന്നും രണ്ടും മൂന്നും സ്ഥാനം നേടുന്നവര്‍ക്ക് ചന്ദ്രികയുടെ ഉപഹാരവും ഉണ്ടാകും.

കാമ്പയിന്‍ വിജയിപ്പിക്കുന്നതിനായി ജില്ലാ, മണ്ഡലം കമ്മിറ്റികള്‍ അടിയന്തരമായി യോഗം ചേര്‍ന്ന് കീഴ്ഘടകങ്ങള്‍ക്ക് കര്‍ശന നിര്‍ദേശം നല്‍കണം. കാമ്പയിന്‍ പ്രത്യേകം മോണിറ്റര്‍ ചെയ്ത് ക്വാട്ട പൂര്‍ത്തീകരിക്കാന്‍ അതത് കമ്മറ്റികള്‍ ജാഗ്രത പാലിക്കണമെന്നും പിഎം. എ സലാം അറിയിച്ചു.

ബാഫഖി തങ്ങള്‍ മാനേജിങ് ഡയരക്ടറായപ്പോള്‍ എല്ലാ പിന്തുണയുമായി ഡയരക്ടര്‍ ബോര്‍ഡ് അംഗങ്ങളും സഹായത്തിനെത്തി. കോഴിക്കോട് വൈ.എം.സി.എ റോഡിലെ കെട്ടിടവും കൂറ്റന്‍ ഷെഡ്ഡും ഗോഡൗണും സ്വന്തമാക്കിയപ്പോള്‍തന്നെ സാമ്പത്തിക ഞെരുക്കം വല്ലാതെ അലട്ടിയിരുന്നു. പ്ലാറ്റ് ബെഡ് റോട്ടറി മെഷീനുമെത്തി ജോബ് സെക്ഷനും കൂടി തുടങ്ങിയപ്പോള്‍ ചന്ദ്രികക്ക് വേണ്ടി പണം നല്‍കാനും പണം പിരിക്കാനും പ്രചരിപ്പിക്കാനുമായി ഊര് ചുറ്റാനിറങ്ങി. തെക്കന്‍ കര്‍ണ്ണാടകത്തില്‍പെട്ട കാസര്‍കോട് അവിഭക്ത കണ്ണൂര്‍ ജില്ലാ പ്രസിഡണ്ടായിരുന്ന പടന്നയിലെ പൗരപ്രമുഖന്‍ വി.കെ.പി അബ്ദുല്‍ ഖാദര്‍ ഹാജിയും ഏറനാട്ടിന്റെ മുക്കിലും മൂലയിലും മഞ്ചേരി കുരിക്കള്‍ കുടുംബത്തിലെ അതികായന്മാരായ എം. പി.എം ഹസ്സന്‍ കുട്ടി കുരിക്കളും അഹമ്മദ് കുരിക്കളും ചന്ദ്രികയെ വ്യാപകമാക്കി. എം.കെ ഹാജി ചന്ദ്രികയുടെ സന്ദേശം മറുനാട്ടിലെത്തിക്കാന്‍ കച്ച മുറുക്കി. അദ്ദേഹത്തിന്റെ പണവും ഊര്‍ജ്ജസ്വലമായ പ്രവര്‍ത്തനവുംകൊണ്ട് അത് വിജയിക്കുകയുമുണ്ടായി. എന്‍.എ മമ്മുഹാജി, പി.കെ ഉമ്മര്‍ഖാന്‍, വി. പി അലി തുടങ്ങി നിരവധി പേരെ ചന്ദ്രികയുടെ ഇണപിരിയാത്ത കൂട്ടുകാരാക്കി ഓഹരി വര്‍ധിപ്പിക്കാനാണ് സി.കെ.പി ചെറിയ മമ്മുക്കേയി തന്റെ ഡയരക്ടര്‍ പദവി ഉപയോഗപ്പെടുത്തിയത്. പിന്നീട് മാനേജിങ് ഡയരക്ടര്‍മാരായിവന്ന പി. എം.എസ്.എ പൂക്കോയ തങ്ങള്‍, സയ്യിദ് ഉമര്‍ ബാഫഖി തങ്ങള്‍, സയ്യിദ് മുഹമ്മദ് അലി ശിഹാബ് തങ്ങള്‍ എന്നിവര്‍ പൂര്‍വ്വീകര്‍ തുടങ്ങിവെച്ച സംശുദ്ധമായ സ്‌നേഹ സൗഹൃദത്തിന്റെയും ആത്മാര്‍ത്ഥതയുടെയും അഭിമാനത്തിന്റെയും പൈതൃകം നിലനിര്‍ത്തി.

സയ്യിദ് മുഹമ്മദ് അലി ശിഹാബ് തങ്ങള്‍ക്ക് ഈജിപ്തില്‍ പഠിക്കുന്ന കാലത്ത്തന്നെ ചന്ദ്രികയുമായി ബന്ധമുണ്ട്. ഖലീല്‍ ജിബ്രാന്റെ കഥകളെ പ്രണയിച്ചും കേരളത്തില്‍ ജീവിച്ച് അറബിയില്‍ കവിതയെഴുതിയും അത്ഭുതപ്പെടുത്തിയ ശിഹാബ് തങ്ങള്‍ക്ക് എഴുത്തൊരു ഇഷ്ട വിഷയവുമായിരുന്നു. അറിയാതെ വന്നെത്തിയ രാഷ്ട്രീയ തിരക്കുകളില്‍ ശിഹാബ് തങ്ങളിലെ സാഹിത്യകാരന്‍ മലയാളിക്ക് നഷ്ടമായി. അറബി ഭാഷയില്‍ മാസ്റ്റര്‍ ബിരുദമുണ്ടായിരുന്ന ശിഹാബ് തങ്ങളുടെ രചനകള്‍ നിരവധി ലോക പ്രശസ്ത സാഹിത്യ പ്രസിദ്ധീകരണങ്ങളില്‍ വന്നിട്ടുണ്ട്. ഈജിപ്തില്‍ പഠിക്കുന്ന കാലത്ത് അദ്ദേഹം ചന്ദ്രികയിലും എഴുതിയിരുന്നു. ചന്ദ്രികയുമായി ശിഹാബ് തങ്ങളുടെ ബന്ധം ആരംഭിക്കുന്നതങ്ങനെയാണ്. എന്നാല്‍ പതിനഞ്ച് കൊല്ലങ്ങള്‍ക്ക്പിറകെ അദ്ദേഹം ചന്ദ്രികയുടെ അമരത്തെത്തിയതോടെ കമ്പനിയുടെ വികസന പ്രവര്‍ത്തനങ്ങള്‍ക്ക് ഊക്ക് വര്‍ധിച്ചു. ചന്ദ്രിക മെല്ലെ മെല്ലെ പുരോഗതിയിലേക്ക് കുതിപ്പ് തുടങ്ങി. ഓരോ കാലഘട്ടത്തിലും വികസന പ്രവര്‍ത്തനങ്ങള്‍ക്ക് വേഗത കൂട്ടാന്‍ ഡയരക്ടര്‍മാര്‍ കഠിനമായി യത്‌നിച്ച്‌കൊണ്ടിരുന്നു.

ചന്ദ്രികയുടെ കോഴിക്കോട് ആപ്പീസില്‍ റോട്ടറി പ്രസ്സ് സ്ഥാപിച്ചത് 1970 ലാണ്. വൈ.എം. സി. എ റോഡിലെ ഇരുനില കെട്ടിടത്തില്‍ അന്നത്തെ മുഖ്യമന്ത്രിയായിരുന്ന സി അച്യുതമേനോന്റെ അധ്യക്ഷതയില്‍ ഗവര്‍ണ്ണര്‍ വിശ്വനാഥനാണ് ഉദ്ഘാടനം നിര്‍വഹിച്ചത്. കാലത്തിന്റെ കുതിപ്പ് കാണാതെ പോകുന്നത് പുരോഗതിയെ ലക്ഷ്യമാക്കി പ്രവര്‍ത്തിക്കുന്ന നേതൃത്വത്തിന് ഭൂഷണമല്ലെന്ന് മനസ്സിലാക്കിയ അവര്‍ പിന്നെയും പിന്നെയും ചിന്തിച്ചു. സാങ്കേതിക വിദ്യയുടെ വളര്‍ച്ച കണ്ടറിഞ്ഞ സി.എച്ച് ആഗ്രഹിച്ച ഓഫ്‌സെറ്റ് പ്രസ്സ് സ്വായത്തമാക്കാന്‍ മാനേജ്‌മെന്റ് തീരുമാനിച്ചു. സയ്യിദ് മുഹമ്മദ് അലി ശിഹാബ് തങ്ങളും ഡയരക്ടര്‍ ഇന്‍ചാര്‍ജ്ജായിരുന്ന പി സീതിഹാജിയും മറ്റ് ബോര്‍ഡംഗങ്ങളും നാട്‌നീളെ സഞ്ചരിച്ച് ദൗത്യം വിജയിപ്പിക്കാന്‍ വിശ്രമമില്ലാതെ കഠിനാധ്വാനം ചെയ്തു. സാമ്പത്തിക ക്ലേശം തരണംചെയ്യാന്‍ മുമ്പ് ഏ.കെ കുഞ്ഞിമായിന്‍ ഹാജി എന്‍ കുഞ്ഞാലി ഹാജിയെയും പിന്നീട് സയ്യിദ് അബ്ദുറഹിമാന്‍ ബാഫഖി തങ്ങള്‍ പല പ്രമുഖരെയും സമീപിച്ച് പണം സ്വരൂപിച്ച പോലെ സയ്യിദ് മുഹമ്മദ് അലി ശിഹാബ് തങ്ങളും രംഗത്തിറങ്ങി. പ്രവര്‍ത്തകന്മാര്‍ അകമഴിഞ്ഞ് സഹായിച്ചതിന്റെ ഫലമായി 1988 ഡിസംബര്‍ 31 ന് ഇബ്രാഹിം സുലൈമാന്‍ സേട്ടുവിന്റെ അധ്യക്ഷതയില്‍ സയ്യിദ് മുഹമ്മദ് അലി ശിഹാബ് തങ്ങള്‍ കോഴിക്കോട് ഓഫ്‌സെറ്റ് പ്രസ് ഉദ്ഘാടനം ചെയ്തു.

തുടര്‍ന്ന് ചന്ദ്രികയുടെ ചിന്ത പ്രധാന കേന്ദ്രങ്ങളില്‍ എഡിഷന്‍ ആരംഭിക്കുന്നതിലായി. കൊച്ചിയാണ് ആദ്യം തെരഞ്ഞെടുത്ത പട്ടണം. എറണാകുളത്തിന്റെ കണ്ണായ ഭാഗത്ത് ജഡ്ജസ് അവന്യുവില്‍ ഓഫീസും സ്ഥലവും സ്വന്തമാക്കി 1992 ആഗസ്ത് 31 ന് എറണാകുളം എഡിഷനും ആരംഭിച്ചു. മാനേജിങ് ഡയരക്ടര്‍ വിജ്ഞാന കുതുകിയായ സയ്യിദ് മുഹമ്മദ് അലി ശിഹാബ് തങ്ങള്‍ക്ക് അറിവിനോടുള്ള ആഭിമുഖ്യം കാരണം ചന്ദ്രിക കുടുംബത്തില്‍ നിന്നൊരു വനിതാപ്രസിദ്ധീകരണത്തിന് അനുമതി നല്‍കിക്കൊണ്ട് പച്ചക്കൊടി വീശി. 1996 ജനുവരിയില്‍ കോഴിക്കോട്‌നിന്ന് മഹിളാചന്ദ്രികയും പുറത്തിറങ്ങി. ചന്ദ്രികയുടെ നവീകരണ പദ്ധതികള്‍ അങ്ങനെ ഓരോന്നോരോന്നായി പൂര്‍ത്തീകരിച്ച് കൊണ്ടിരുന്നു.

1946 ല്‍ ചന്ദ്രിക തലശ്ശേരിയില്‍ നിന്ന് കോഴിക്കോട്ടേക്ക് പറിച്ച്‌നടുമ്പോഴത്തെ ഓര്‍മ്മ പുതുക്കാനും സ്മരണകളയവിറക്കാനും ന്യൂനപക്ഷ സമുദായ സന്ദേശങ്ങള്‍ കൈമാറാനും കണ്ണൂര്‍ പട്ടണത്തില്‍ എഡിഷന്‍ വേണമെന്ന് നിശ്ചയിക്കുകയും സംസ്ഥാപനത്തിനായി അഹോരാത്രം പരിശ്രമിക്കുകയും ചെയ്തു. 1994 ഏപ്രില്‍ 14 ന് മലബാര്‍ ജില്ലാ മുസ്‌ലിംലീഗിന്റെ സ്ഥാപക പ്രസിഡന്റായിരുന്ന സുല്‍ത്താന്‍ അബ്ദുറഹിമാന്‍ ആലി രാജയുടെ നാട്ടില്‍ കണ്ണൂര്‍ എഡിഷനും ഉദ്ഘാടനം ചെയ്തു.

വിവര സാങ്കേതിക വിദ്യയുടെ വ്യാപനം വളരെ പെട്ടെന്നാണ് ലോകത്ത് സംഭവിച്ച്‌കൊണ്ടിരിക്കുന്നത്. ഇതിനിടയില്‍ തൊഴില്‍ തേടി മലയാളികള്‍ പല ദിക്കുകളിലേക്കും സഞ്ചാരം തുടങ്ങിയിരുന്നു. റംഗൂണിലും സിലോണിലും മലേഷ്യയിലും ഗള്‍ഫിലുമൊക്കെ അവരെത്തി. ഇന്ത്യയില്‍ തന്നെ മുംബൈയിലും കല്‍ക്കട്ടയിലും മദ്രാസിലും മൈസൂരിലും ആന്ധ്രയിലുമൊക്കെ മലയാളികളുടെ സാന്നിധ്യം വളരെയേറെയുണ്ടായി. നാട്ടുവിശേഷമറിയാനുള്ള മലയാളികളുടെ വാഞ്ഛ മലയാള പ്രസിദ്ധീകരണങ്ങളുടെ ആവശ്യകതയിലേക്ക് വിരല്‍ ചൂണ്ടി. ഇതിന്റെ പ്രാധാന്യം കണക്കിലെടുത്ത് 2002 നവംബര്‍ 1 ന് മുംബൈ എഡിഷനും ഉദ്ഘാടനം ചെയ്തു.

2004 ല്‍ ചന്ദ്രിക മാനേജിങ് ഡയരക്ടര്‍ സയ്യിദ് മുഹമ്മദ് അലി ശിഹാബ് തങ്ങളുടെ അധ്യക്ഷതയില്‍ ഡയരക്ടര്‍ ബോര്‍ഡ് യോഗം ചേര്‍ന്ന് ഗള്‍ഫില്‍ ചന്ദ്രിക തുടങ്ങാന്‍ തീരുമാനമെടുത്തു. ഇതിന്‌വേണ്ടി ദുബൈ കേന്ദ്രമാക്കി പ്രവര്‍ത്തനം നടത്താന്‍ എക്‌സിക്യുട്ടിവ് ഡയരക്ടര്‍ ഇ അഹമ്മദിനെയും ഗള്‍ഫില്‍ ചുമതലയുണ്ടായിരുന്ന പി.വി അബ്ദുല്‍ വഹാബിനെയും ഉത്തരവാദപ്പെടുത്തി. 2005 ജനുവരി 26 ന് ദുബൈ എഡിഷന്‍ പ്രാബല്യത്തില്‍ വന്നു. 2007 സെപ്തംബറില്‍ മുത്തുകളുടെ രാജ്യമായ ബഹ്‌റൈനിലും 2009 ഏപ്രില്‍ 5 ന് അധിനിവേശത്തിനെതിരെ ധീരോദാത്തമായി ചെറുത്ത്‌നിന്ന് വൈദേശികാധിപത്യത്തില്‍ നിന്ന് അമ്മനാടിനെ മോചിപ്പിക്കാന്‍ പടനയിച്ച മാപ്പിളമാരുടെ മണ്ണില്‍ മലപ്പുറം എഡിഷനും ശിഹാബ് തങ്ങള്‍ ഉദ്ഘാടനം ചെയ്തു. അതോടൊപ്പം ചന്ദ്രിക കുടുംബത്തില്‍ നിന്ന് ശിഹാബ് തങ്ങളുടെ കാലത്ത് പുറത്തിറക്കിയ രണ്ട് പ്രസിദ്ധീകരണങ്ങളാണ് ബാലചന്ദ്രികയും പ്രവാസ ചന്ദ്രികയും. ഇതിനിടയില്‍ നിരവധി ജില്ലാ ബ്യുറോകളും ടൗണ്‍ ബ്യുറോകളും ആരംഭിച്ചു. 2011 ജൂണില്‍ ആരംഭിച്ച ഖത്തര്‍, സഊദി എഡിഷനുകളും കോട്ടയം എഡിഷനും ശിഹാബ് തങ്ങളുടെ മരണശേഷം സയ്യിദ് ഹൈദരലി ശിഹാബ് തങ്ങള്‍ മാനേജിങ് ഡയരക്ടറായതില്‍ പിന്നെയാണ് തുടങ്ങിയത്.

സി.എച്ചിനെതിരെയുള്ള തെരഞ്ഞെടുപ്പ് കേസ്സില്‍ വിധി പ്രസ്താവിച്ച് ഹൈക്കോടതി ജഡ്ജി ഇങ്ങനെ പരാമര്‍ശിക്കുകയുണ്ടായി: ‘ഞങ്ങളെ സംബന്ധിച്ചിടത്തോളം കോയ എന്ന് പറഞ്ഞാല്‍ ‘ചന്ദ്രിക’ യും ‘ചന്ദ്രിക’ എന്നാല്‍ കോയയുമാണ്’. സുപ്രീംകോടതി ആ വിധി പിന്നീട് തള്ളിക്കളഞ്ഞെങ്കിലും ചന്ദ്രികയും സി.എച്ചും തമ്മിലുള്ള ബന്ധം ജഡ്ജിയുടെ പരാമര്‍ശത്തില്‍നിന്ന് വ്യക്തമാണ്. ബന്ധങ്ങളും സമ്പര്‍ക്കങ്ങളും സുദൃഢമാക്കാനും വിശാലമാക്കാനും എഴുത്തില്‍ പരിശീലനം നേടാനും ആഴ്ചപ്പതിപ്പ് പലര്‍ക്കും വളരെയധികം ഉപകാരപ്പെട്ടു. സാഹിത്യകാരന്‍മാരെ കണ്ട്പിടിക്കലും പരിശീലിപ്പിക്കലും പത്രാധിപരുടെ ജോലിയാണെന്ന് സി.എച്ച് വിശ്വസിച്ചു. അതിന്‌വേണ്ടി കഠിനമായി പ്രയത്‌നിച്ചു. ‘ദുനിയാവിന്റെ ചെറിയ കഷ്ണമായ അഖില കേരളത്തിന്റെ പ്രധാന പൊലീസ് മന്ത്രി’യെന്ന് വൈക്കം മുഹമ്മദ് ബഷീര്‍ ഉള്‍ക്കിടിലത്തോടെ വിശേഷിപ്പിച്ച സി.എച്ച് എണ്ണമറ്റ പ്രതിഭകളെ സൃഷ്ടിച്ച് അത്ഭുതങ്ങള്‍ കാട്ടി. ചരിത്ര കേരളത്തിനൊരിക്കലും മറക്കാനാവാത്ത പ്രവര്‍ത്തനം നടത്തിയ പി.എ സെയ്ത് മുഹമ്മദ് എന്ന സ്വതന്ത്ര ചിന്തകനായ ചരിത്ര ഗവേഷകന്റെ നിസ്സീമമായ കഴിവ് പ്രകടമാക്കുന്നതിന് വേദിയൊരുക്കിക്കൊടുത്ത സി. എച്ച് അമ്പതുകളില്‍ ആസ്വാദകരിലനുഭൂതി നല്‍കിയ കവികള്‍ക്കും കൂട്ട്‌നിന്നപ്പോള്‍ ആഴ്ചപ്പതിപ്പിന്റെ താളുകള്‍ മാത്രമല്ല സമ്പന്നമായത്. കാലയവനികക്കുള്ളില്‍ മറഞ്ഞുപോയവരും അല്ലാത്തവരും അതില്‍ പെടും.

കാവ്യമയമുള്ള ഓജസ്സുറ്റ ശൈലിയില്‍ യാത്രാനുഭവങ്ങളുടെ ആനന്ദം അനുവാചകന് ആവോളം നല്‍കിയ എസ്.കെ പൊറ്റക്കാട്, സാമൂഹ്യ പരിഷ്‌കരണം ഉന്നംവെച്ച് കഥകളെഴുതിയ എന്‍.പി മുഹമ്മദ്, കലാ സൗന്ദര്യത്തിന്റെ അനശ്വര സ്മാരകങ്ങള്‍ തീര്‍ത്ത എം.ടി വാസുദേവന്‍ നായര്‍, നാട്ടിന്‍ പുറത്തിന്റെ നന്മകളും കര്‍ഷക ജീവിതത്തിന്റെ ആനന്ദവും പ്രകൃതി മനോഹാരിതയും പ്രതിപാതിക്കുന്നതിനിടയില്‍ പ്രേമത്തിന്റെ ഇക്കിളിയും സ്‌നേഹത്തിന്റെ പൂത്തിരിയും ഘടിപ്പിച്ച തെരുവത്ത് രാമന്‍, മണ്ണാലത്ത് ശ്രീധരന്‍, നവീനമായ ആത്മപ്രകാശന ശൈലി ആവിഷ്‌കരിച്ച എഴുത്തുകാരുടെ മുന്‍നിരയില്‍ 1960 കളില്‍ തന്നെ സ്ഥാനമുറപ്പിച്ച എം മുകുന്ദന്‍, നല്ലതിന്റെയും നല്ലവരുടെയും ലോകങ്ങളിലേക്ക് നോക്കാനുള്ള സൗഭാഗ്യകരമായ സിദ്ധി നേടിയ പൊന്നാനിക്കാരായ ഉറൂബ്, ഇടശ്ശേരി, സാഹിത്യത്തില്‍ നിലയുറപ്പിച്ച പുനത്തില്‍ കുഞ്ഞബ്ദുള്ള, കലാ സാഹിത്യശാഖക്ക് പുതിയ സ്വരവും ഭാവവും മുഖവും നല്‍കിയ യു.എ ഖാദര്‍, ഭാവഗാനത്തിന്റെ ചാരുത കൈവരുത്തിയ ടി. പത്മനാഭന്‍, കഥാസാഹിത്യത്തില്‍ പുതിയൊരു സൗന്ദര്യതലം സൃഷ്ടിച്ച പള്ളിക്കര വി.പി, ഖലീല്‍ ജിബ്രാന്റെ സാഹിത്യത്തെ മലയാളികള്‍ക്ക് പരിചയപ്പെടുത്തിയ, പില്‍ക്കാലത്ത് ചന്ദ്രികയുടെ മാനേജിങ് ഡയക്ടറായിവന്ന സയ്യിദ് മുഹമ്മദ് അലി ശിഹാബ് തങ്ങള്‍ തുടങ്ങിയവര്‍ ഈ പട്ടികയില്‍ പെടും. സാര്‍വകാലികവും സാര്‍വ ലൗകികവുമായ വിഷയങ്ങള്‍ക്ക് പ്രാധാന്യംനല്‍കി ചന്ദ്രികയിലൂടെ സൂക്ഷ്മമായ ആവിഷ്‌കാരം നടത്തിയവരാണ് കേശവദേവും മുട്ടത്ത് വര്‍ക്കിയും പി.എ മുഹമ്മദ് കോയയും ഉറൂബും തകഴിയും വെട്ടൂരുമെല്ലാം.

ആഴ്ചപ്പതിപ്പിന്റെ ആരംഭകാലത്ത് പഴയ തലമുറക്കാരും പുതിയ തലമുറക്കാരുമായ ഒരു കൂട്ടം കഥാകൃത്തുക്കള്‍ അതിലണിനിരന്നപ്പോള്‍ കേരളത്തിലെ മുസ്‌ലിംകള്‍ക്ക് മാത്രമല്ല ഇതര മത വിഭാഗങ്ങള്‍ക്കും ഇഷ്ട വാരികയായി അത് മാറി. അങ്ങനെ സാമൂഹ്യ ജീവിതത്തില്‍ പുതിയൊരു യുഗം ആഗ്രഹിച്ചവര്‍ക്കൊക്കെ ചന്ദ്രിക വേദിയൊരുക്കി കൊടുത്തു. എസ്.വി സൈനുദ്ദീന്‍ (സൈന്തവന്‍) ഹാസ്യ സാഹിത്യത്തില്‍ പകരക്കാരനില്ലാതെ വിളയാടി. എലത്തൂര്‍ നിവാസിയായ ഉസ്മാന്‍ കോയ (മിയാന്‍) എന്ന തൂലികാനാമത്തില്‍ ഹാസ്യപംക്തി കൈകാര്യം ചെയ്തതും ഇതേ കാലഘട്ടത്തിലായിരുന്നു. വേളൂര്‍ കൃഷ്ണന്‍ കുട്ടിയും തിക്കോടിയനും നര്‍മ സല്ലാപവുമായി പ്രത്യക്ഷപ്പെട്ടപ്പോള്‍ ചിരിയുടെ മൂടി തുറന്ന് ‘സരസന്‍’, ‘വികടന്‍’എന്നീ തൂലികാ നാമത്തില്‍ വി.സി അബൂബക്കറും നര്‍മത്തിന്റെ അത്തര്‍ പൂശിയ അക്ഷരങ്ങളുമായി പത്രാധിപര്‍ സി.എച്ചും ഇവര്‍ക്ക് പിന്തുണയേകി.

ചന്ദ്രികയോട് ഏറെ കടപ്പെട്ടവരാണ് കഥാകൃത്തുക്കള്‍. ചന്ദ്രികയില്‍നിന്നാണ് പലര്‍ക്കും പ്രഥമ പ്രതിഫലം കിട്ടിയതെന്ന് അവര്‍ തന്നെ പല വേദികളില്‍ പറയുകയും ചിലയിടങ്ങളില്‍ എഴുതി വെക്കുകയും ചെയ്തിട്ടുണ്ട്. എം.ടി വാസുദേവന്‍ നായരും ഡോ. പുനത്തില്‍ കുഞ്ഞബ്ദുല്ലയും ടി പത്മനാഭനും യു.എ ഖാദറും തുടങ്ങി ഒട്ടനവധി പേര്‍ ഇക്കാര്യം വ്യക്തമാക്കിയിട്ടുമുണ്ട്. യു.എ ഖാദറിന്റെ വളര്‍ച്ചയില്‍ ചന്ദ്രികയുടെ പങ്ക് ചെറുതല്ല. 1952 ലാണ് ‘കണ്ണുനീര്‍ കലര്‍ന്ന പുഞ്ചിരി’ എന്ന കഥ ചന്ദ്രിക ആദ്യമായി പ്രസിദ്ധീകരിക്കുന്നത്. അദ്ദേഹത്തിന്റെ തന്നെ മറ്റൊരു കഥയാണ് ‘പാംബൂച്ചിക്കുഞ്ഞിന്റെ കല്യാണം’ ചന്ദ്രിക പ്രസിദ്ധീകരിച്ച് പത്ത് വര്‍ഷത്തിന് ശേഷമാണ് ‘റസിയ സുല്‍ത്താന’എന്ന നോവല്‍ ചന്ദ്രിക പ്രസിദ്ധീകരിച്ചത്. അദ്ദേഹത്തിന്റെ ആദ്യത്തെ നോവലും ഇതായിരുന്നു. ആഴ്ചപ്പതിപ്പിന് കനപ്പെട്ട സംഭാവനകള്‍ നല്‍കിയ യു.എ ബീരാനും ടി.ജി നെടുങ്ങാടിയും എന്‍.ഇ.ഐ അഹമ്മതും എം.വി ദേവനും കെ. പി.എം ആലി ആലുവയും ചന്ദ്രികയിലൂടെ വളര്‍ന്നവരാണ്. നൂറുകണക്കിന് കഥകള്‍ ചന്ദ്രികക്ക് നല്‍കിയ ഹബീബ് വലപ്പാട് വാരികയെ ഒരിക്കലും മറക്കാത്ത കഥാകൃത്താണ്.

വളരെയേറെ പ്രത്യേകതകള്‍ നിറഞ്ഞതായിരുന്നു 1980 കളുടെ സ്വാതന്ത്ര്യ ദിനപ്പതിപ്പുകള്‍. അതിലണിനിരന്ന എഴുത്തുകാര്‍ വി.എസ് കേരളീയന്‍, പി.എ സെയ്തുമുഹമ്മദ്, എം ഗോവിന്ദന്‍ കുട്ടി, എസ്.എം സര്‍വര്‍, വിനയന്‍, എ പോള്‍, എ.പി.എ സാദിഖ്, തെരുവത്ത് രാമന്‍, കെ ഹംസത്ത്, ഇ.പി സുമിത്രന്‍, ടി.എം പുരുഷോത്തമന്‍, അബ്ദുല്‍ ഖാദര്‍ ഖാരി, പി.കെ ശരത്കുമാര്‍ എന്നിവരാണെങ്കില്‍ പിന്നീട് വന്ന പതിപ്പുകളില്‍ എ.എന്‍.പി ഉമ്മര്‍ കുട്ടി, എന്‍.വി കൃഷ്ണവാരിയര്‍, എ.പി.പി നമ്പൂതിരി, പി.സി കുട്ടികൃഷ്ണന്‍, ഒ അബു, സി കൃഷ്ണന്‍ നായര്‍, പ്രൊഫ. സയ്യിദ് മുഹിയുദ്ധീന്‍ ഷാ, വി.ആര്‍ കൃഷ്ണയ്യര്‍, കെ.എ കൊടുങ്ങല്ലൂര്‍, ഇ വാസു, തിക്കോടിയന്‍, ഡോ. സി.കെ കരീം, മുഷ്താഖ് തുടങ്ങിയവര്‍ സ്ഥിരം എഴുത്തുകാരാവുകയായിരുന്നു.

ഈ കാലയളവിലെ ആദ്യത്തെ കഥകളെക്കുറിച്ചന്വേഷിക്കുമ്പോള്‍ കണ്ടെത്തുന്നത് യു.എ ബീരാന്‍ ഭാഷാന്തരം ചെയ്ത് പ്രസിദ്ധീകരിച്ച ആന്റന്‍ ചെക്കോവിന്റെ ‘ട്യൂട്ടര്‍’ എന്ന കഥാ വിവര്‍ത്തനമാണ്. ടി പത്മനാഭന്റെ ‘ജീവിതത്തിലെ ഒരേട്’ മറ്റൊരു കഥയായ ‘ഫിലോസഫര്‍’, ‘മലയാളി സര്‍വന്റ്’എന്നിവ വായിക്കാന്‍ തുടങ്ങിയാല്‍ മുഴുമിപ്പിക്കാതെ അവസാനിപ്പിക്കില്ല. അത് വായിച്ച് തീര്‍ക്കുംവരെ ഒറ്റയിരുപ്പായിരിക്കും. കാരൂര്‍ നീലകണ്ഠപ്പിള്ളയുടെ ‘കേത്തുപാറ്റി’ന്റെയും വൈക്കം മുഹമ്മദ് ബഷീറിന്റെ ‘ന്‍ടുപ്പാപ്പാക്ക് ഒരാനേര്‍ണ്ടാന്ന്’ എന്ന കഥയുടെയും പാലാ നാരായണന്‍ നായരുടെ ‘മനുഷ്യന്‍’ എന്ന കൃതിയുടെയും എം ഗോവിന്ദന്റെ ‘അന്വേഷണത്തിന്റെ ആരംഭ’ത്തിന്റെയും നിരൂപണങ്ങള്‍ക്ക് കോളങ്ങളും പേജുകളും നല്‍കിയത് ചന്ദ്രിക തന്നെയായിരുന്നു. സി.എച്ചിന്റെ ‘ഇന്ത്യാ ചരിത്രവും’, എം.വി ദേവന്റെ റേഡിയോ നാടകവും എം.ജി.എസ് നാരായണന്റെ ‘ജീവിക്കുന്ന രക്തസാക്ഷികള്‍’എന്ന കവിതയും ചന്ദ്രികയില്‍ തന്നെയാണ് അച്ചടിച്ച് വന്നത്. ഒട്ടേറെ യുവപ്രതിഭകളുടെ സൃഷ്ടികളും ചന്ദ്രികയിലൂടെ വെളിച്ചം കണ്ടിട്ടുണ്ട്.

വിദ്യാഭ്യാസത്തിലും മാതൃഭാഷാഭ്യാസനത്തിലും കേരളത്തില്‍ വളരെ പിന്നാക്കം നിന്നിരുന്ന മുസ്‌ലിംകള്‍ക്ക് സാഹിത്യ രംഗത്ത് വളരാന്‍ അധികമൊന്നും പ്രസിദ്ധീകരണങ്ങളുണ്ടായിരുന്നില്ല. കേരളത്തിലെ മുസ്‌ലിം പത്രപ്രവര്‍ത്തനത്തിന് വക്കം അബ്ദുല്‍ ഖാദര്‍ മൗലവി നൂറ്റാണ്ട് മുമ്പ് രൂപം നല്‍കിയ ‘മുസ്‌ലിം’ മാസികയും ‘സ്വദേശാഭിമാനി’യെന്ന വൃത്താന്ത പത്രവുമാണുള്ളത്. ഈ രണ്ട് പ്രസിദ്ധീകരണങ്ങളേ മുസ്‌ലിംകള്‍ക്ക് സാമുദായികമായ ഉന്നമനത്തിനും ഉണര്‍വ്വിനും അതിപ്രധാനമായ നായകത്വം വഹിച്ചിരുന്ന നേതാക്കളുടെ സ്ഥാനങ്ങളെയും പ്രവൃത്തികളെയും വരച്ച് കാണിക്കാന്‍ അന്നുണ്ടായിരുന്നുള്ളു. ഈ കാലഘട്ടത്തില്‍ തന്നെയാണ് പ്രസിദ്ധ മതപ്രബോധകനായിരുന്ന സനാഉല്ലാ മക്തി തങ്ങള്‍ ‘ജനോപകാരി’യെന്ന പേരില്‍ വൃത്താന്ത പത്രം നടത്തുന്നത്. പി മുഹമ്മദ് ഹാജി കൊച്ചിയില്‍ നിന്ന് ‘മലബാര്‍ ഇസ്‌ലാം’ ആരംഭിച്ചതും പ്രതിഭാശാലിയും പരിഷ്‌കൃതാശയക്കാരനുമായിരുന്ന സി. സൈതാലിക്കുട്ടി മാസ്റ്റര്‍ തിരൂരില്‍ നിന്ന് ‘റഫീഖുല്‍ ഇസ്‌ലാ’മും പൊന്നാനിയില്‍ നിന്ന് ‘ഇസ്‌ലാഹുല്‍ ഇഖ്‌വാനും’ വൃത്താന്ത പത്രങ്ങളായി നടത്തിയതും ഈ പതിപ്പില്‍ ചരിത്ര വിഷയങ്ങളായിട്ടുണ്ട്.
കെ.എം സീതി സാഹിബ് ഇത് സംബന്ധിച്ച് ചന്ദ്രികയില്‍ രേഖപ്പെടുയതിങ്ങനെ: ‘ഇസ്‌ലാം മതത്തെയും സംസ്‌കാരത്തെയും സംബന്ധിച്ച വിജ്ഞാനപ്രദവും സരളഭാഷയില്‍ എഴുതപ്പെട്ടതുമായ പല ലേഖനങ്ങളും ‘മുസ്‌ലിം’ മാസികയില്‍ പ്രസിദ്ധീകരിച്ചിരുന്നു. ‘മുസ്‌ലിം’ മാസിക ആലപ്പുഴയിലെ ‘മുസ്‌ലിം പ്രിന്റിങ് ആന്റ് പബ്ലിഷിങ് കമ്പനി’ ഏറ്റെടുത്തു ആലപ്പുഴയില്‍നിന്ന് വൃത്താന്ത പത്രമായി പ്രസിദ്ധീകരിക്കാന്‍ തുടങ്ങി. ‘സ്വദേശാഭിമാനി’യും ‘മുസ്‌ലി’മുമായുള്ള സമ്പര്‍ക്കത്തിലൂടെ ഒട്ടനവധി എഴുത്തുകാരും പത്രപ്രവര്‍ത്തകരും ഉയര്‍ന്ന്‌വന്നു’.

സീതിസാഹിബിന്റെ രാഷ്ട്രീയ ലേഖനവും തന്റെ ഇസ്‌ലാമിക കഥയും വള്ളത്തോളിന്റെയും ജി ശങ്കരക്കുറുപ്പിന്റെയും സൃഷ്ടികള്‍ക്ക് പുറമെ പി.വി മുഹമ്മദ് മൗലവി, ഒ അബു, എം.സി അപ്പുണ്ണി നമ്പ്യാര്‍, ഒതയോത്ത് ബാലകൃഷ്ണന്‍, അബൂബക്കര്‍ മുന്‍ഷി ഫാസില്‍, ടി.ജി നെടുങ്ങാടി, എസ്.എം സര്‍വര്‍ മറ്റുമുള്ള സാഹിത്യവിഭവങ്ങളും കവിതകളും ചേര്‍ത്ത് പതിപ്പ് സമ്പന്നമാക്കിയതും സി.എച്ചായിരുന്നു.

സാഹിത്യത്തില്‍ വര്‍ണ്ണചിത്രങ്ങള്‍ വരക്കാന്‍ അക്ഷരങ്ങളുപയോഗിക്കുന്ന കൗശലമത്രയെളുപ്പമല്ല. എന്നാലത് സാധ്യമാക്കിയ സാഹിത്യകാരനാണ് സി.എച്ച്. അദ്ദേഹത്തിന്റെ വ്യക്തിത്വം തിരക്ക്പിടിച്ച രാഷ്ട്രീയ ജീവിതത്തിനിടയിലും മനസ്സില്‍ സാഹിത്യത്തെ കുടിയിരുത്താന്‍ സാധിക്കുന്നതായിരുന്നു. നൂതന വിജ്ഞാനങ്ങള്‍ സ്വായത്തമാക്കാനുള്ള സദാന്വേഷിയായിരുന്ന സി.എച്ചിന്റെ മനസ്സും ഹൃദയവും സാഹിത്യ സമ്പാദനത്തിനായി വെമ്പല്‍ കൊണ്ടു. ചിന്തകരോടും സാഹിത്യനായകരോടും സംശയങ്ങള്‍ ചോദിച്ച് പരിഹാരം കണ്ടെത്തി. സ്വന്തം സംസ്‌കാരത്തെയും സാഹിത്യത്തെയും രാഷ്ട്രത്തെയും കുറിച്ച് ആഴത്തില്‍ പഠിക്കാന്‍ ആ ഹൃദയം ത്രസിച്ച്‌കൊണ്ടിരുന്നു. തന്റേതായ ശൈലിയില്‍ ഭാരതീയ സംസ്‌കൃതിയെയും ഇസ്‌ലാമിക സംസ്‌കാരത്തെയും യോജിപ്പിച്ച് സാധാരണക്കാരന് ബോധ്യമാകുന്ന തരത്തില്‍ അവതരിപ്പിക്കുന്ന സി.എച്ചിന്റെ ഭാഷാ ശൈലി അപാരം തന്നെയാണ്. പുതിയ പുതിയ ആശയങ്ങളുടെ, ചിന്തയുടെ സ്ഫുലിംഗങ്ങള്‍ അത്‌കൊണ്ട്തന്നെ അദ്ദേഹത്തിന്റെ പദങ്ങള്‍ക്കൊപ്പം ചിറക്‌വിരിച്ചു. പച്ചപ്പ്‌കൊണ്ട് സൗന്ദര്യം തീര്‍ത്ത ശാദ്വലസ്ഥലികളെ കണ്ടെത്താന്‍ രാഷ്ട്രീയ സമ്മര്‍ദ്ദങ്ങളുടെ ഊഷരഭൂവില്‍ വിരാചിക്കുമ്പോഴും, അദ്ദേഹത്തിന് സാധിച്ചത് അത് കൊണ്ടാണ്.

മുസ്‌ലിം പ്രിന്റിങ് ആന്റ് പബ്ലിഷിങ് കമ്പനിയുടെ മാനേജറായിരുന്ന സയ്യിദ് ഖാജാ ഹുസൈന്‍ അതിന് കരുത്തുറ്റ പിന്‍ബലം നല്‍കി. ഇദ്ദേഹത്തിന്റെ കാലം സുവര്‍ണമായിരുന്നുവെന്ന് പറയുന്നവരുടെ കൂട്ടത്തില്‍ സി.എച്ചുമുണ്ടായിരുന്നു. കരിയാമ്പത്ത് കുഞ്ഞിപ്പക്കി തലശ്ശേരി ബ്രണ്ണന്‍ കോളജ് അധ്യാപകനായിപ്പോയപ്പോള്‍ വന്ന ഒഴിവിലേക്ക് സി.വി കുഞ്ഞമ്മദ് മാനേജറായി. പിടിപ്പത് ജോലിയും തുച്ഛമായ ശമ്പളവുംകൊണ്ട് പിടിച്ച്‌നില്‍ക്കാനാവാതെ ഇദ്ദേഹം മാനേജര്‍ സ്ഥാനം ഒഴിഞ്ഞപ്പോഴാണ് സയ്യിദ് ഖാജാഹുസൈന്‍ ചന്ദ്രികയുടെ മാനേജറായത്. റിട്ടയേര്‍ഡ് മുസ്‌ലിം വിദ്യാഭ്യാസ ഇന്‍സ്‌പെക്ടറായിരുന്ന ഇദ്ദേഹത്തിന്റെ പട്ടാളച്ചിട്ടയോടെയുള്ള പെരുമാറ്റവും കൃത്യനിഷ്ഠയും സഹപ്രവര്‍ത്തകരോടുള്ള സ്‌നേഹ വാത്സല്യവുമാണ് ചന്ദ്രികയെ പുരോഗതിയിലേക്ക് നയിച്ചതെന്ന അഭിപ്രായക്കാരാണ് അന്ന് ചന്ദ്രികയില്‍ പ്രവര്‍ത്തിച്ചിരുന്നവരിലധികവും.

ചന്ദ്രികയുടെ പുരോഗതിയില്‍ അഭിമാനം കൊണ്ടിരുന്ന കെ.എം സീതി സാഹിബിന്റെയും പത്രപ്രവര്‍ത്തനം ജീവിതത്തിന്റെ ഭാഗമാക്കി മാറ്റിയിരുന്ന സി.എച്ചിന്റെയും സ്വപ്‌നത്തിന്റെ സാക്ഷാല്‍ക്കാരത്തിനായി യത്‌നിച്ച മാനേജര്‍ സയ്യിദ് ഖാജാഹുസൈന്‍ ചന്ദ്രിക ആഴ്ചപ്പതിപ്പ് വളര്‍ത്തിയെടുക്കുന്നതില്‍ വിജയിച്ചു. സന്ദര്‍ഭോചിത പ്രത്യേക പതിപ്പുകളിറക്കി വായനക്കാരെ ആകര്‍ഷിക്കാന്‍ വെമ്പല്‍കൊണ്ട ഇദ്ദേഹത്തിന് ഈ രണ്ട് നേതാക്കളുടെയും താങ്ങും തണലും സയ്യിദ് അബ്ദുറഹിമാന്‍ ബാഫഖി തങ്ങളുടെ പൂര്‍ണ്ണ പിന്തുണയുമുണ്ടായിരുന്നു. കേരളത്തിന്റെ തലയെടുപ്പുള്ള സാഹിത്യകാരന്‍മാര്‍ക്ക് ഒന്നിച്ച് ചേരാനുള്ള നല്ലൊരവസരമാണ് ചന്ദ്രിക ആഴ്ചപ്പതിപ്പ് നല്‍കുന്നതെന്ന് സി.എച്ച് പറയുകയും അതിന്‌വേണ്ടി പ്രവര്‍ത്തിക്കുകയും ചെയ്തു. വൈവിധ്യമാര്‍ന്ന വിഭവങ്ങളെ വായനക്കാരുടെ വരുതിയില്‍ വരുത്താനതിനായി. സാംസ്‌കാരിക നവോത്ഥാനത്തിന് ഇതിന്റെ പ്രകാശനം വഴി തെളിയിച്ചു.

ചന്ദ്രിക പത്രം 1946 ല്‍ കോഴിക്കോട്‌നിന്നും ദിനപ്പത്രമായി പുറത്തിറക്കാനുള്ള തയ്യാറെടുപ്പ് പൂര്‍ത്തിയായി. സി.എച്ചിന്റെ ഗുരുഭൂതനായ സയ്യിദ് അബ്ദുറഹിമാന്‍ ബാഫഖി തങ്ങളുടെ പേരിലായിരുന്നു കോഴിക്കോട് സിറ്റിയിലെ മുഖ്യ ഏജന്‍സി. ഇത് സംബന്ധമായ മുഴുവന്‍ വിഷയങ്ങളും കൈകാര്യം ചെയ്യാന്‍ ബാഫഖി തങ്ങള്‍ സി.എച്ചിനെയാണേല്‍പ്പിച്ചിരുന്നത്. ആ മഹാനുഭാവന്റെ ഭാവി മുന്‍കൂട്ടിക്കണ്ട് സി.എച്ചിനെ ചന്ദ്രികയിലേക്ക് കൈപിടിച്ച് കൂട്ടിക്കൊണ്ട് വന്ന തന്റെ രാഷ്ട്രീയാചാര്യനായ കെ.എം സീതി സാഹിബ് അദ്ദേഹത്തെ ചന്ദ്രികയുടെ പത്രാധിപ സമിതിയിലേക്ക് നിയോഗിച്ചു. പ്രസിദ്ധീകരണം തുടങ്ങിയ ഫെബ്രുവരി മുതല്‍ സി.എച്ച് ചന്ദ്രികയുടെ സഹപത്രാധിപരായി ചുമതലയേറ്റു. ഇതോടെ സി.എച്ച് ഒരു മുഴുവന്‍ സമയ പത്രപ്രവര്‍ത്തകനായി മാറി.

സയ്യിദ് അബ്ദുറഹിമാന്‍ ബാഫഖി തങ്ങളുടെ പരിലാളനയേറ്റ് വളര്‍ന്ന ചന്ദ്രികയെ സ്വന്തം വീടായാണ് സി.എച്ച് കണക്കാക്കിയിരുന്നത്. സി. എച്ച് മുഖ്യമന്ത്രിയായപ്പോള്‍ ചന്ദ്രികയിലേക്ക് കടന്ന്‌വന്ന അദ്ദേഹത്തോട് ഇതേക്കുറിച്ച് ചോദിച്ചപ്പോള്‍ ‘എന്റെ വീട്ടിലേക്ക് ഞാന്‍ ചെല്ലുന്നത് ഉമ്മയെ അറിയിച്ചിട്ടല്ലല്ലോ’ എന്നായിരുന്നു മറുപടി. ചന്ദ്രികയെ സ്വന്തം വീടായി കണക്കാക്കിയവര്‍ക്കേ പെട്ടെന്നിങ്ങനെ പറയാന്‍ പറ്റൂ. അതിന് മറ്റൊരു കാരണം കൂടിയുണ്ട്. ഏത് പാതിരാത്രിയിലായാലും പൊതുയോഗം കഴിഞ്ഞ് പോരുമ്പോള്‍ സി.എച്ച് നേരെ ചന്ദ്രികയിലേക്കാണ് പോകുക. ചന്ദ്രിക പത്രാധിപ സമിതിയില്‍ അദ്ദേഹത്തിന്റെ സഹപ്രവര്‍ത്തകനായിരുന്ന ഡോ. എന്‍.എ കരീം അതേക്കുറിച്ച് രേഖപ്പെടുത്തിയതിങ്ങനെ: ‘സ്വാതന്ത്ര്യാനന്തരം മലബാറിലുടനീളം മുസ്‌ലിംലീഗ് പുനരുജ്ജീവിപ്പിക്കുന്നതില്‍ തലമൂത്ത നേതാക്കള്‍ക്കൊപ്പം ഓടിനടന്ന് പ്രവര്‍ത്തിക്കുകയും പ്രസംഗിക്കുകയും ചെയ്യുന്നതിനിടയില്‍ യുവസഹജമായ ഊര്‍ജ്ജസ്വലതയോടും പ്രസരിപ്പോടും കൂടി പത്രാധിപ ജോലിയും പ്രഗല്‍ഭമായിത്തന്നെ സി. എച്ച് നിര്‍വഹിച്ചിരുന്നു. തലേ ദിവസത്തെ പ്രവര്‍ത്തനം മൂലമുള്ള ഉറക്കച്ചടവോടുകൂടിയാണ് അക്കാലത്ത് പല ദിവസങ്ങളിലും സി.എച്ച് ആപ്പീസില്‍ കയറിവന്നിരുന്നത്. വന്ന്കഴിഞ്ഞാല്‍ തിരക്കിട്ട് പത്രങ്ങളും ന്യൂസ് ഏജന്‍സി വാര്‍ത്തകളും ഓടിച്ചുവായിച്ച് അര മണിക്കൂറിനകം അന്നത്തെ മുഖപ്രസംഗം എഴുതിത്തീര്‍ക്കും. ഉടന്‍ തന്നെ കാത്തിരിക്കുന്ന അനുയായികളും ആരാധകന്‍മാരുമായി സ്ഥലം വിടുകയും ചെയ്യും. വലിയ തിരക്കില്ലാത്ത ദിവസങ്ങളാണെങ്കില്‍ എഴുതിയ മുഖപ്രസംഗവുമായി ഞങ്ങളുടെ ഡെസ്‌കിലേക്ക് വരും. എന്നിട്ടത് എല്ലാവരെയും വായിച്ചുകേള്‍പ്പിക്കും. ഇതിനിടയില്‍ സഹജമായ വൈഭവത്തോട്കൂടി കുറെ ഫലിതങ്ങള്‍ പൊട്ടിക്കുകയും ചെയ്യും.

ഒരു ചെറിയ കുടുംബം പോലെയായിരുന്നു അന്നത്തെ പത്രാധിപ സമിതി. അംഗങ്ങള്‍ കുറവായിരുന്നത്‌കൊണ്ട് ഓരോരുത്തര്‍ക്കും നല്ല ജോലിയുണ്ടായിരുന്നു. എങ്കിലും എല്ലാവരും സന്തോഷത്തോടും സഹകരണത്തോടുംകൂടി ജോലി ചെയ്തിരുന്നു. അതിനുള്ള പ്രചോദനം ഊട്ടിത്തന്നിരുന്നത് പത്രധിപരായിരുന്ന സി.എച്ചിന്റെ സ്‌നേഹമധുരമായ പെരുമാറ്റമായിരുന്നു. ഞങ്ങളില്‍ ഒരാളായി മാത്രമേ അദ്ദേഹം തന്നെ കണ്ടിരുന്നുള്ളു. എല്ലാവരോടും വ്യക്തിപരമായി അടുത്ത മമതാബന്ധമാണ് അദ്ദേഹം പുലര്‍ത്തിയിരുന്നത്. ചന്ദ്രിക പത്രാധിപരാകുന്ന കാലത്ത് അദ്ദേഹം 25 വയസ്സ് തികയാത്തൊരു യുവാവായിരുന്നുവെങ്കിലും 60 കാരനായ വി അബ്ദുല്‍ ഖയ്യും അടക്കമുള്ള ആ പത്രാധിപ സംഘത്തെ അനാവശ്യമായ അധികാര വിനിയോഗമില്ലാതെ അദ്ദേഹം പ്രഗല്‍ഭമായി നയിച്ചു’.

‘സി.എച്ച്’ എന്ന പദം പത്രപ്രവര്‍ത്തന രംഗത്തും രാഷ്ട്രീയ മേഖലയിലും കുതിച്ചുയരുകയായിരുന്നു. കോഴിക്കോട് മുനിസിപ്പല്‍ ഓഫീസിലെ താല്‍ക്കാലിക ജോലിയും കുറുമ്പ്രനാട് ലീഗ് ഓഫീസ് സെക്രട്ടറി ജോലിയും കഴിഞ്ഞപ്പോഴേക്കും സി.എച്ച് ചന്ദ്രികയുമായി ഔദ്യോഗിക ബന്ധം സ്ഥാപിച്ച് കഴിഞ്ഞിരുന്നു. വിദ്യാര്‍ത്ഥിയായിരിക്കെ തന്നെ സി.എച്ച് സ്വന്തം പേര് വെച്ചും ‘എം.കെ അത്തോളി’ എന്ന തൂലികാ നാമത്തിലും ലേഖനങ്ങളെഴുതുമായിരുന്നു. മുസ്‌ലിംലീഗിന്റെ ഔദ്യോഗിക പത്രമായ ‘ഡോണി’ന്റെ കോഴിക്കോട് ലേഖകനായും ഈ സമയത്ത് പ്രവര്‍ത്തിച്ചിട്ടുണ്ട്.
അങ്ങനെ ‘ചന്ദ്രിക സി.എച്ചും’ ‘സി.എച്ച് ചന്ദ്രിക’യുമായി മാറി. അതിന്റെ എല്ലാമായിരുന്ന സി. എച്ച് ചന്ദ്രികയിലെ ഒരു സാധാരണ ജീവനക്കാരന്‍ മാത്രമാണെന്ന ഔദ്യോഗിക ബന്ധം പലര്‍ക്കുമറിയില്ല. സി.എച്ചെന്ന പത്രാധിപര്‍ ഏത് തിരക്കിനിടയിലും ചന്ദ്രികക്ക് വേണ്ടി മുഖപ്രസംഗമെഴുതുമായിരുന്നു. പ്രസംഗവേദികളിലിരുന്ന് പോലും അത് നിര്‍വഹിച്ചു. ചന്ദ്രികയുടെ പത്രാധിപരെന്ന സമുന്നത പദവിയില്‍ വിരാചിക്കുമ്പോഴും ശിപായിപ്പണി മുതല്‍ പത്രാധിപര്‍ വരെയുള്ള സകല ജോലിയും അദ്ദേഹത്തിന് വശമായിരുന്നു. അദ്ദേഹത്തിന്റെ രചനാ വൈഭവം അനിതരസാധാരണവും അപാരവുമായിരുന്നു. സി.എച്ച് ഒന്നാംതരം കഥകളെഴുതിയിട്ടുണ്ട്. രസികന്‍ കഥകളും രചിച്ചിട്ടുണ്ട്. സാഹിത്യപരവും സാംസ്‌കാരികവുമായ പ്രബന്ധങ്ങളുമെഴുതിയിട്ടുണ്ട്. അദ്ദേഹത്തിന്റെ മതാതീതമായ ഹൃദയ വിശാലതയെ മനസ്സിലാക്കാന്‍ ഈ എഴുത്തുകള്‍ മാത്രം മതി. എഴുതുന്നതെന്തായാലും തല പുകഞ്ഞാലോചിക്കേണ്ടിവരുന്നില്ല. വെറുതെയൊരിക്കലും ഇരിക്കുകയില്ല. ലേഖനം, മുഖ ലേഖനം, എഡിറ്റിങ്, മറുപടി, പ്രസ്താവന അങ്ങനെ നീളുന്നു എഴുത്ത് പട്ടിക. ന്യായവും സത്യവുമാണെന്ന് മനസ്സില്‍ തോന്നുന്നതെന്തും സഹൃദയനാണെങ്കിലും, വെട്ടിത്തുറന്ന് പറയുന്ന പ്രകൃതക്കാരനായിരുന്നു.

ഒരിക്കല്‍ സി.എച്ച് പറഞ്ഞതിങ്ങനെ: ‘സമുദായത്തിന്റെ വിളക്കുമാടമാണ് ചന്ദ്രിക. സമുദായത്തെ ചിന്തിപ്പിക്കാന്‍ പഠിപ്പിക്കേണ്ട ബാധ്യത കൂടി അതിനുണ്ട്’.

ചന്ദ്രിക പത്രാധിപ സമിതി അംഗമായിരുന്ന ടി.സി മുഹമ്മദ് സി.എച്ചിന്റെ സവിശേഷ സ്വഭാവത്തെ വിശേഷിപ്പിച്ചതിങ്ങനെ: ‘അത്തോളി ഗ്രാമം അദ്ദേഹത്തിന്റെ പെറ്റുമ്മയാണെങ്കില്‍ കോഴിക്കോട് നഗരം പോറ്റുമ്മയാണെന്ന് പറയാറുണ്ടല്ലോ. അത്‌പോലെ നടക്കാവിലെ ക്രസന്റ്ഹൗസ് സ്വന്തം ഭവനമാണെങ്കില്‍ ചന്ദ്രിക സി.എച്ചിന്റെ രണ്ടാം ഭവനമായിരുന്നു. എവിടെ പോകുമ്പോഴും എവിടെ നിന്ന് വരുമ്പോഴും രണ്ടാം ഭവനത്തില്‍കയറി രണ്ട് തമാശ പൊട്ടിച്ചാലല്ലാതെ അദ്ദേഹം നീങ്ങില്ല. കോഴിക്കോട്ടാണെങ്കില്‍ ഉറങ്ങാന്‍ കിടക്കുമ്പോഴും ഉറങ്ങി എഴുന്നേല്‍ക്കുമ്പോഴും സി.എച്ചിന് ചന്ദ്രിക വേണം. രാത്രിയെത്ര വൈകിയെത്തിയാലും ശരി അപ്പോള്‍ അച്ചടിച്ച എഡിഷന്‍ വായിച്ചേ ഉറങ്ങാന്‍ കിടക്കൂ. ആര്‍ക്ക് മുമ്പിലും ഒരിക്കലും തല കുനിച്ചിട്ടില്ലാത്ത ആത്മാഭിമാനമാണ് സി.എച്ചിന്റേത്. നിര്‍ഭയത്വം അദ്ദേഹത്തിന്റെ ജന്മസിദ്ധിയായിരുന്നു. എ.കെ കുഞ്ഞിമായിന്‍ ഹാജി ചന്ദ്രിക മാനേജിങ് ഡയരക്ടറായിരുന്നപ്പോള്‍ അദ്ദേഹത്തിന്റെ ജാമാതാവ് കെ.പി മുഹമ്മദ് മുസ്‌ലിംലീഗ് സ്ഥാനാര്‍ഥിക്കെതിരെ മത്സരിച്ചിരുന്നു. മാനേജിങ് ഡയരക്ടറുടെ ജാമാതാവിനെ കണക്കിന് കശക്കിവിടാന്‍ സ്റ്റേജില്‍ സി. എച്ചിന് അശേഷം ധൈര്യക്കുറവുണ്ടായില്ല. ഇക്കാരണത്തിന് സി.എച്ചിനെ ചന്ദ്രികയില്‍നിന്ന് പിരിച്ചുവിടണമെന്ന്‌വരെ ഏ.കെ കുഞ്ഞിമായിന്‍ ഹാജിയോട് ജാമാതാവിന്റെ ആള്‍ക്കാര്‍ വാശിപിടിച്ച് നോക്കി. പക്ഷേ ഹാജി അതിന് വഴങ്ങിയില്ല. ജാമാതാവിന്റെ തെരഞ്ഞെടുപ്പ് ഫണ്ടിലേക്ക് എന്ത് സഹായവും ചെയ്യാമെന്ന് പറയുകയല്ലാതെ പത്രാധിപരെ ചോദ്യംചെയ്യാന്‍ മാതൃകായോഗ്യരായ എം.ഡി തയ്യാറായില്ല. മറ്റുള്ളവര്‍ സര്‍വകലാശാലകളില്‍ പഠിച്ചുകൊണ്ടിരുന്ന കാലത്ത് കോയാ സാഹിബ് ജീവിതായോധനക്കളരിയില്‍ ഇറങ്ങിക്കഴിഞ്ഞിരുന്നു. ആ കളരി ചന്ദ്രികയായിരുന്നു. അത്‌കൊണ്ടാവണം അദ്ദേഹത്തിനയവിറക്കാനുള്ള ചെറുപ്പക്കാല സ്മരണകള്‍ അധികവും ചന്ദ്രികയുമായി ബന്ധപ്പെട്ടതായത്’.