മലബാറിന്റെ സാംസ്‌കാരിക കേന്ദ്രമായിരുന്ന തലശ്ശേരിയില്‍നിന്ന് 1946 ലാണ് ചന്ദ്രിക വാണിജ്യ തലസ്ഥാനമായ കോഴിക്കോട്ടേക്ക് മാറ്റി സ്ഥാപിച്ചത്. അജയ്യമായ മനക്കരുത്ത് മാത്രം മൂലധനമാക്കി കിഴക്കേ നടക്കാവിലെ ചിറക്കല്‍ അബ്ദുറഹിമാന്റെ കെട്ടിടത്തിലാരംഭിച്ച പത്രം ചരിത്രകാരനും ഗവേഷകനും പൊന്നാനിക്കാരനുമായ പ്രൊഫസര്‍ കെ.വി അബ്ദുറഹിമാന്റെ പത്രാധിപത്യത്തിലുമാണ് പ്രവര്‍ത്തനമാരംഭിച്ചത്. 1925 ല്‍ മുഹമ്മദ് അബ്ദുറഹിമാന്‍ സാഹിബിന്റെ ആധിപത്യത്തിലും അല്‍അമീന്‍ പ്രിന്റിങ് ആന്റ് കമ്പനിയുടെ ഉടമസ്ഥതയിലും ആരംഭിച്ച അല്‍അമീന്‍ വാരികയുടെയും ദിനപത്രത്തിന്റെയും വിദ്യാഭ്യാസപരവും രാഷ്ട്രീയവും സാമൂഹ്യവുമായ അമൂല്യ സേവനം തുടി കൊട്ടുന്ന കോഴിക്കോട്ടാണ് അല്‍അമീനില്‍നിന്ന് പത്രപ്രവര്‍ത്തനത്തില്‍ പരിശീലനം നേടിയ വി.സി അബൂബക്കര്‍ ചന്ദ്രികയിലെത്തുന്നത്.

മഹത്തായ പാരമ്പര്യത്തിന്റെ ഉടമകളായ മുസ്‌ലിം സമൂഹത്തിന്റെ തട്ടകത്തിലേക്ക് ചന്ദ്രിക മാറ്റുമ്പോള്‍ അതിനാവശ്യമായ കെട്ടിടം കിട്ടുമോയെന്ന ആശങ്കയുണ്ടായിരുന്നു. എന്നാല്‍ സയ്യിദ് അബ്ദുറഹിമാന്‍ ബാഫഖി തങ്ങളുടെ സ്വാധീനം അനുകൂലമായ സാഹചര്യമൊരുക്കുമെന്ന് സീതി സാഹിബിനറിയാമായിരുന്നു. ബാഫഖി തങ്ങളോടുള്ള ആദരവും ബഹുമാനവുമാണ് എടമേന്‍ കയ്യന്‍ അബ്ദുറഹിമാന്‍ക്ക തന്റെ മനോഹരമായ കെട്ടിടം ചന്ദ്രികക്ക് വേണ്ടി വാടകക്ക് വിട്ട്‌കൊടുത്തത്. കരിയാടന്‍ മൊയ്തു അതിങ്ങനെ രേഖപ്പെടുത്തുന്നു: ‘1941 ഒക്ടോബറില്‍ ദിനപത്രം നിന്നു. ഷാഫി സാഹിബിനെ പിരിച്ചുവിട്ടു.

ചന്ദ്രിക വീണ്ടും വാരികയിലേക്ക് ചുരുങ്ങി. ഒരിക്കല്‍ കൂടി വി.സി അബൂബക്കര്‍ സാഹിബിന്റെ പേരില്‍ വാരികക്ക് ഡിക്ലറേഷന്‍ ഫയല്‍ ചെയ്തു. ഒരു ചെറിയ കെട്ടിടത്തില്‍ (ഉമ്മര്‍ സണ്‍സിന്റെ എടുപ്പ്) വാരിക ആരംഭിക്കുകയും ചെയ്തു. അവിടെ വെച്ച് എ. പി മമ്മു സാഹിബ് മാനേജറും വി.സി അബൂബക്കര്‍ സാഹിബ് പത്രാധിപരുമായി 1946 വരെ ക്‌റൗണ്‍ വലിപ്പത്തില്‍ 12, 16 പേജുകളോടെ ആഴ്ചപ്പതിപ്പായി എല്ലാ വ്യാഴാഴ്ചകളിലും ചന്ദ്രിക മുടങ്ങാതെ പ്രകാശിച്ചുപോന്നു. വാരിക ഒരു നേട്ടമായിരുന്നു. 1946 ല്‍ ഓഹരിയുടമകള്‍ക്ക് ഡിവിഡന്റ് കൊടുക്കാന്‍ കഴിഞ്ഞു. 10000 രൂപ മൂലധനവും 17000 രൂപ ബാങ്കില്‍ നിക്ഷേപവുമുണ്ടായിരുന്നു. ഈ സമ്പാദ്യമാണ് ചന്ദ്രിക കോഴിക്കോട്ടേക്ക് മാറ്റാന്‍ പ്രചോദകമായത്. കണക്കെഴുത്തുകാരനായിരുന്ന കുമാരന്‍ റൈറ്ററേയും പ്രസ്സ് റിപ്പോര്‍ട്ടര്‍ കൃഷ്ണനെയും പത്രം മുനിസിപ്പാലിറ്റിക്ക് പുറത്ത്‌കൊണ്ട്‌പോയി വായിച്ച് കേള്‍പ്പിച്ച് പ്രചാരപ്പെടുത്തിയിരുന്ന കോരന്‍ മാസ്റ്ററേയും മറക്കാന്‍ കഴിയില്ല. പത്രാധിപര്‍ക്ക് ശമ്പളം 20 ഉറുപ്പികയായിരുന്നു. (വകയില്‍ തന്നെ കുറെ കുടിശ്ശിക ബാക്കിയുണ്ടെന്നാണ് വി.സി പറയാറുള്ളത്)’.

ക്രാന്തദര്‍ശിയും കര്‍മ്മ നിരതനുമായിരുന്ന അദ്ദേഹം ചന്ദ്രികയുടെ പുരോഗതിക്കായി പത്രത്തിന്റെ ഓഹരികള്‍ വിറ്റഴിക്കുന്നതിന് തുടക്കം കുറിച്ചു. അദ്ദേഹം മലബാറിലുടനീളം സഞ്ചരിച്ച് ഒരു ലക്ഷം രൂപയുടെ ഓഹരി പിരിച്ചുണ്ടാക്കി. സത്താര്‍ സേട്ടു സാഹിബ് അതിലേറെ ത്യാഗം ചെയ്ത് അതിനസ്തിവാരമുണ്ടാക്കി. കത്തിയവാറില്‍ നിന്ന് സത്താര്‍ സേട്ടു പിരിച്ചുകൊണ്ട് വന്ന 17000 രൂപയായിരുന്നു അതിന്റെ ആത്മവിശ്വാസം. ഈ സമയത്ത് പൊന്നാനിക്കാരന്‍ പ്രൊഫസര്‍ കെ.വി അബ്ദുറഹിമാന്‍ ആയിരുന്നു പത്രാധിപര്‍. തലശ്ശേരിക്കാരന്‍ കരിയാമ്പത്ത് കുഞ്ഞിപ്പക്കി മാനേജറും. എന്നാല്‍ തലശ്ശേരിയില്‍നിന്ന് ചന്ദ്രിക പുറപ്പെടുമ്പോള്‍ ഇടക്കിടെ ലേഖനം അയച്ച് കൊടുത്ത് ചന്ദ്രികയുമായി ബന്ധം പുലര്‍ത്തിയിരുന്ന വിദ്യാര്‍ത്ഥി സി.എച്ച് മുഹമ്മദ്‌കോയ ചന്ദ്രികയില്‍ ചേര്‍ന്നു. എത്ര ലേഖനങ്ങളയച്ചിട്ടും പ്രസിദ്ധീകരിക്കാതെ വന്നപ്പോള്‍ പ്രതികരിക്കാനായി ചന്ദ്രികയിലെത്തിയ സി.എച്ച് മുഹമ്മദ് കോയയെന്ന പ്രതിഭാശാലിയെക്കുറിച്ച് പത്രാധിപരായിരുന്ന വി സിക്ക് അത്ഭുതമായിരുന്നു.

മൊയ്തു സാഹിബ് അത് ഹൃദയ സ്പര്‍ശിയായ വിധം വിവരിക്കുന്നുണ്ട്. അതിങ്ങനെ: ‘പലരില്‍ നിന്ന് ലേഖനങ്ങള്‍ കിട്ടിക്കൊണ്ടിരുന്നു. കൊള്ളാവുന്നവയെടുത്ത് പത്രമാപ്പീസിലെ പതിവ്‌പോലെ ചെയ്യും. ഒരു ചെറു വിദ്യാര്‍ത്ഥിയുടേതെന്ന് തോന്നിക്കുന്ന ലേഖനങ്ങള്‍ മിക്ക ആഴ്ചകളിലും കിട്ടിയിരുന്നു. പ്രസിദ്ധീകരണാര്‍ഹമല്ലെന്ന് കാണുകയാല്‍ പത്രാധിപന്‍മാര്‍ അവയെ വെളിച്ചം കാട്ടിയില്ല.തുരുതുരെ വന്നിരുന്ന കുട്ടിയുടെതെന്ന് കണ്ടാല്‍ വി.സി പറയും ‘ബോറന്‍’.
ഒരു ദിവസം ഉച്ചക്ക് തുര്‍ക്കിത്തൊപ്പിയും കറുത്ത കോട്ടും വെള്ള മുണ്ടും ധരിച്ച കൃശഗാത്രനായൊരു കുട്ടി സലാം ചൊല്ലിക്കൊണ്ട് കയറി വന്നു. ‘വികടന്‍’ (വി.സിയുടെ തൂലികാനാമം) എന്നെ നോക്കി. ഞാന്‍ എ.പിയെ നോക്കി. കുട്ടി ഒന്ന് ബേജാറായി. ഒരു കെട്ട് ലേഖനങ്ങള്‍ മുമ്പില്‍ വെച്ചിരുന്ന വി.സി പറഞ്ഞു. ‘ഇരിക്ക് കുട്ടി’. കുട്ടിയുടെ നോട്ടം ലേഖനക്കെട്ടിലായിരുന്നു. വിരല്‍ ലേഖനക്കെട്ടിന് നേരെ ചൂണ്ടി കുട്ടി പറഞ്ഞു: ‘സര്‍, എന്റെ ലേഖനമാണത്. ഞാനയക്കുന്നതൊന്നും ഇതുവരെ ചന്ദ്രികയില്‍ കൊടുത്തിട്ടില്ല. അത്ര മോശമാണോ എന്റേത്’?

അപരാധ ബോധത്തോടെ വി.സി എന്നെ നോക്കി. അതിലും അപരാധ ബോധത്തോടെ ഞാന്‍ മുഖം തിരിച്ചു. ‘ശരി, വായിച്ച് നോക്കി വേണ്ട തിരുത്തോടെ കൊടുക്കാം’. വി.സി കുട്ടിയെ സമാധാനിപ്പിച്ചു. അപ്പോള്‍ ദീന സ്വരത്തില്‍ കുട്ടി പറഞ്ഞു. ‘എന്റെ ലേഖനങ്ങളൊന്നും ഇത്‌വരെ നോക്കാത്തതില്‍ സങ്കടമുണ്ട്. നേരിട്ടപേക്ഷിക്കാനാണ് ഞാന്‍ അത്തോളിയില്‍നിന്ന് പോന്നിട്ടുള്ളത്’. ഇന്നത്തെ എഴുത്തുകാരിലും വാഗ്മികളിലും ആരുടേയും പിന്നിലല്ലാത്ത പ്രശസ്ത വ്യക്തിയും ചന്ദ്രികയുടെ മുഖ്യ പത്രാധിപരും അസംബ്ലി സ്പീക്കറുമായിരുന്ന മാന്യനും പല പ്രഗല്‍ഭരും പരാജയപ്പെട്ട വിദ്യാഭ്യാസ രംഗത്ത് വ്യക്തിമുദ്ര പതിപ്പിച്ച വിദ്യാഭ്യാസ മന്ത്രിയും സര്‍വ്വോപരി ഇന്ത്യന്‍ മുസ്‌ലിംകളുടെ അനിഷേധ്യ നേതാവുമായ സി.എച്ച് മുഹമ്മദ് കോയാ സാഹിബായിരുന്നു ഈ കുട്ടി’.
തലശ്ശേരിയില്‍ നിന്നിറങ്ങിയിരുന്ന സമയത്ത് ഇടക്കിടെ ചന്ദ്രികയില്‍ പ്രത്യക്ഷപ്പെടാറുള്ള സി.എച്ച് നിത്യ സന്ദര്‍ശകനായി മാറി. പിന്നീടതിലെ ജീവനക്കാരനുമായി. പത്രാധിപരായിരുന്ന പ്രൊഫ. കെ വി അബ്ദുറഹിമാന്‍ ഫാറൂഖ് കോളജില്‍ ജോലി ലഭിച്ച് ചന്ദ്രികയില്‍ നിന്ന് ഒഴിഞ്ഞപ്പോള്‍ അവിടേക്ക് കയറി വന്നത് സിയെച്ചാണ്. ഇങ്ങനെയാണ് സി.എച്ച് പത്രാധിപരായത്.

1934 ല്‍ പ്രതിവാര പത്രമായി തുടങ്ങിയ ചന്ദ്രിക കേന്ദ്ര നിയമ സഭയിലേക്ക് സത്താര്‍ സേട്ടും മുഹമ്മദ് അബ്ദുറഹിമാന്‍ സാഹിബും തമ്മില്‍ നടന്ന വാശിയേറിയ തെരഞ്ഞെടുപ്പിനോടനുബന്ധിച്ച് അല്‍പകാലത്തേക്ക് നിര്‍ത്തിവെക്കേണ്ടിവന്നിട്ടുണ്ട്. തെരഞ്ഞെടുപ്പില്‍ സേട്ടു സാഹിബ് വിജയിച്ചപ്പോള്‍ മറുപക്ഷത്ത് നിന്നിരുന്നവര്‍ മുഴുവന്‍ ചന്ദ്രിക ബഹിഷ്‌കരിച്ച പശ്ചാത്തലത്തിലായിരുന്നു അത്. മറ്റൊരവസരത്തില്‍ രണ്ടാം ലോക യുദ്ധം കാരണം കടലാസിന് ക്ഷാമം നേരിട്ടപ്പോള്‍ പത്രം തുടര്‍ന്ന് നടത്തിക്കൊണ്ട്‌പോകാന്‍ സാധിക്കാതെ വന്നപ്പോള്‍ വീണ്ടും വാരികയാക്കി ചുരുക്കിയ സന്ദര്‍ഭത്തിലും കുറച്ചു കാലത്തേക്ക് നിര്‍ത്തിവെച്ചു.

മുഹമ്മദ്അബ്ദുറഹിമാന്‍ സാഹിബിനനുകൂലമായി ‘അല്‍ അമീനി’ല്‍ പ്രവര്‍ത്തിക്കുകയും ലേഖനമെഴുതുകയും ചെയ്തിരുന്ന വി.സി അബൂബക്കര്‍ ചന്ദ്രിക പത്രാധിപ സമിതിയിലെത്തുന്നത് ഈ ഘട്ടത്തിലാണ്. ഇങ്ങനെ പല വിഷമങ്ങളെയും തരണംചെയ്യേണ്ടിവന്ന മാനേജ്‌മെന്റിന്റെ വിഷമങ്ങളെയും പ്രയാസങ്ങളെയും പത്രാധിപരായിരുന്ന കെ.കെ മുഹമ്മദ് ഷാഫി പ്രതിപാദിച്ചതിങ്ങനെ: ‘ചന്ദ്രികക്ക് വിഷമതകളുടെ കൂമ്പാരങ്ങളെയാണ് ആദ്യകാലത്ത് തരണം ചെയ്യേണ്ടിവന്നത്. പത്രവായന നിഷിദ്ധമാണെന്ന് പറയുന്ന ഒരു വിഭാഗം യാഥാസ്ഥിതികരൊരു ഭാഗത്ത്. ഒരുവിധം നല്ലനിലയില്‍ നടന്ന് വന്നിരുന്ന ‘അല്‍ അമീന്‍’ ഉണ്ടായിരിക്കുമ്പോള്‍ വേറൊരു മുസ്‌ലിം പത്രം ആവശ്യമില്ലെന്ന് പറഞ്ഞു ചന്ദ്രികയെ എതിര്‍ത്തിരുന്ന വേറൊരു കൂട്ടം മറുവശത്ത്.

പുറമെ പത്രവായനയില്‍ അഭിരുചിയില്ലാതിരുന്ന അവസ്ഥ പൊതുവിലും സാമ്പത്തികമായ കഴിവ്‌കേട് വിശേഷിച്ചും. തന്നിമിത്തം 1935 ഫെബ്രുവരിയില്‍ പ്രസിദ്ധീകരണം നിര്‍ത്തേണ്ടിവന്നു. പക്ഷെ സാമ്പത്തിക പരാധീനതക്ക് പരിഹാരമുണ്ടാകുമെന്നുറച്ച് അന്നത്തെ പ്രധാനികളായ സത്താര്‍ സേട്ടു സാഹിബ്, സി. പി മമ്മുക്കേയി സാഹിബ്, ഏ.കെ കുഞ്ഞിമായിന്‍ സാഹിബ്, മുക്കാട്ടില്‍ മൂസ്സ സാഹിബ് എന്നീ മാന്യന്മാര്‍ 500 രൂപ വീതം തരാമെന്ന വാഗ്ദാനവുമായി മുന്നോട്ട്‌വന്നു. അതോടെ 1935 മാര്‍ച്ചില്‍ ചന്ദ്രിക വീണ്ടും വന്നു. പക്ഷെ സംഭാവന വാങ്ങി പത്രം തുടരാനല്ല ഒരു കമ്പനി രൂപീകരിക്കാനാണ് ചന്ദ്രിക പ്രവര്‍ത്തകര്‍ തീരുമാനിച്ചത്. അതിന്റെ ഫലമായി ഇന്ന് പത്രം നടത്തിവരുന്ന മുസ്‌ലിം പ്രിന്റിങ് ആന്റ് പബ്ലിഷിങ് കമ്പനി രൂപീകരിക്കപ്പെട്ടു. അധികം താമസിയാതെ ചന്ദ്രികക്ക് വേണ്ടി ഒരു പ്രസ്സ് വാങ്ങി. മുന്‍ പ്രസാധകനെന്ന നിലയില്‍ തയ്യിലക്കണ്ടി സി മുഹമ്മദിനുണ്ടായിരുന്ന അവകാശം കമ്പനിയിലേക്ക് തീര് വാങ്ങുകയും പത്രത്തിനും പ്രസ്സിനുമുള്ള ഡിക്ലറേഷന്‍ എന്റെ പേരില്‍ വാങ്ങുകയും ചെയ്തു’.

മൊയ്തു കരിയാടന്‍ പറയുന്നതിങ്ങനെ: ‘ഒന്നാമത്തെ മാനേജിങ് ഡയരക്ടര്‍ സി.പി മമ്മുക്കേയിയായിരുന്നു. സത്താര്‍ സേട്ടു സാഹിബ്, മര്‍ഹൂം കെ.എം സീതി സാഹിബ്, ടി.എം മൂസ്സ സാഹിബ്, പി കുഞ്ഞിമുഹമ്മദ് സാഹിബ് എന്നിവരായിരുന്നു സഹായികള്‍. കേയി സാഹിബ് മാനേജിങ് ഡയരക്ടറായതോടെ ചന്ദ്രികക്ക് ഒരു നവോന്മേഷമുണ്ടായിരുന്നു. മുസ്‌ലിം പ്രസ്സിന് അധോഗതി കണ്ടപ്പോള്‍ മര്‍ഹൂം നുച്ചലയകത്ത് മൊയ്തു സാഹിബിന്റെ കമാല്‍ പ്രസ്സ് എടുത്ത് ചന്ദ്രിക പ്രസ്സാക്കി. ആപ്പീസും പ്രസ്സും ഒരു വലിയ എടുപ്പിലേക്ക് (സൊസൈറ്റി ഗോഡൗണ്‍) മാറ്റപ്പെട്ടു.

അവിടെ വെച്ച് ഷാഫി സാഹിബ് പത്രാധിപരും മര്‍ഹൂം എം മൊയ്തു സാഹിബ് പ്രിന്ററും പബ്ലിഷറും പരേതനായ ഒ ശങ്കുണ്ണി മാനേജരുമായി ചന്ദ്രിക ദിനപ്പത്രം പ്രസിദ്ധപ്പെടുത്തിത്തുടങ്ങി. 1939 ല്‍ രണ്ടാം ലോക മഹായുദ്ധം തുടങ്ങിയതോടെ സാമ്പത്തിക വിഷമം കൂടുതല്‍ അനുഭവപ്പെട്ടു. തെക്കേ മലബാറില്‍ പ്രചാരം വളരെ പരിമിതമായിരുന്നു. കോഴിക്കോട്ടെ ദിനപ്പത്രങ്ങളുടെ മത്സരത്തില്‍ ചന്ദ്രികക്ക് ശോഭിക്കാന്‍ സാധിച്ചില്ല. ഇന്നത്തെപ്പോലെ അന്ന് ബസ്സുകളില്ല. തീവണ്ടി സമയവും അനുകൂലമായിരുന്നില്ല. വര്‍ത്താ ഏജന്‍സികളുടെ (റോയിട്ടര്‍, എ.പി. ഐ) ബില്ലുകളയക്കാന്‍ ശങ്കുണ്ണി മാനേജര്‍ പലപ്പോഴും നട്ടം തിരിഞ്ഞിട്ടുണ്ട്. പണത്തിന്റെ തിടുക്കം മൂലം അന്നന്ന് ടൗണില്‍ നിന്ന് കടലാസ് വാങ്ങി പത്രമടിച്ചിട്ടുണ്ട്. ഒരു ദിവസം ഒരു മണി വരേക്കും കടലാസിന് പണമൊക്കാഞ്ഞിട്ട് ശങ്കുണ്ണി മാനേജര്‍ ഈ ലേഖകനെ അദ്ദേഹത്തിന്റെ ഭാര്യക്കൊരു ശീട്ടും തന്നയച്ച് പണ്ടം കൊണ്ടുവന്ന് കടലാസ് വാങ്ങിയിട്ടാണ് പത്രമടിച്ചത്’.

ഈ വിവരമറിഞ്ഞ സി.പി മമ്മുക്കേയി സാഹിബ് കെട്ടുതാലി പണയംവെച്ചതിന് ശങ്കുണ്ണി മാനേജറെ പ്രശംസിക്കുന്നതിന്പകരം ശാസിച്ചുവത്രേ. ഇങ്ങനെ പകുതി ജീവനുമായി നീങ്ങുന്നതിനിടയില്‍ മാനേജിങ് ഡയരക്ടര്‍ സി.പി മമ്മുക്കേയി മരണപ്പെട്ടു. അധികം താമസിയാതെ ശങ്കുണ്ണി മാനേജറും കാലഗതി പ്രാപിച്ചു. ഈ രണ്ട് മഹാരഥന്മാരുടെ മരണം ചന്ദ്രികയെ വീണ്ടും പ്രതിസന്ധിയിലാക്കി. മാനേജിങ് ഡയരക്ടറുടെ സ്ഥാനത്തേക്ക് ഏ.കെ കുഞ്ഞിമായിന്‍ ഹാജി തെരഞ്ഞെടുക്കപ്പെട്ടു. മാനേജറായി സി കുഞ്ഞിമൂസയും നിയമിക്കപ്പെട്ടെങ്കിലും ചന്ദ്രിക രക്ഷപ്പെട്ടില്ല. കെ.എം സീതി സാഹിബ് താമസിച്ചിരുന്ന തിരുവങ്ങാട്ടെ വാടക വീട്ടില്‍നിന്ന് മാറ്റര്‍ കമ്പോസ് ചെയ്യുമ്പോള്‍ ചായക്ക് പോലും കാശില്ലാതെ വിഷമിക്കുന്നതോര്‍ത്ത് ആരും പരാതി പറഞ്ഞില്ല. എല്ലാറ്റിനും സീതി സാഹിബിന്റെ ക്ലര്‍ക്ക് വി മുഹമ്മദ് സാഹിബ് സാക്ഷിയായി.

1935 ല്‍ കേന്ദ്ര നിയമ നിര്‍മ്മാണ സഭയിലേക്ക് വാശിയേറിയ മത്സരം നടന്നു. കെ.എം സീതി സാഹിബിന്റെ സതീര്‍ഥ്യനും സുഹൃത്തും നാട്ടുകാരനുമായ മുഹമ്മദ് അബ്ദുറഹിമാന്‍ സാഹിബും സത്താര്‍സേട്ട് സാഹിബും തമ്മിലായിരുന്നു ഏറ്റുമുട്ടല്‍. ഈ തെരഞ്ഞെടുപ്പില്‍ ചന്ദ്രിക ആരുടെ പക്ഷത്ത് നില്‍ക്കുമെന്നായിരുന്നു എല്ലാവരുടെയും ചുണ്ടുകളില്‍ തത്തിക്കളിച്ചിരുന്നൊരു ചോദ്യം. അര്‍ഥശങ്കക്കിടയില്ലാത്തവിധം ചന്ദ്രിക നിസ്സങ്കോചമായ തീരുമാനമെടുത്തു. ഹാജി സത്താര്‍ സേട്ടു സാഹിബിന്റെ പക്ഷത്ത് നിലയുറപ്പിക്കുകയും ചെയ്തു.
മുഹമ്മദ് അബ്ദുറഹിമാന്‍ സാഹിബും സത്താര്‍ സേട്ടു സാഹിബും തമ്മില്‍ നടന്ന തെരഞ്ഞെടുപ്പിനെത്തുടര്‍ന്ന് ചന്ദ്രിക അല്പകാലത്തേക്ക് നിര്‍ത്തിവെക്കേണ്ടി വന്നതൊഴിച്ചാല്‍ പിന്നീടൊരിക്കലും ഈ സാമുദായിക പത്രം നിര്‍ത്തിവെച്ചിട്ടില്ല.

സി.പി മമ്മുക്കേയി, ഏ.കെ കുഞ്ഞിമായിന്‍ ഹാജി, സത്താര്‍ സേട്ടു, കെ.എം സീതി സാഹിബ് എന്നിവര്‍ അതിന് വേണ്ടി സഹിച്ച ത്യാഗങ്ങള്‍ വളരെ വലുതാണ്. ചന്ദ്രികയുടെ എല്ലാമെല്ലാമായി മാറിയ സി.എച്ച് മുഹമ്മദ് കോയ സാഹിബ് അതിങ്ങനെ വിവരിക്കുന്നു: ‘എന്നാല്‍ സീതി സാഹിബിന്റെയും മറ്റും പരിശ്രമ ഫലമായി പത്രം പുന:നാരംഭിക്കാന്‍ തന്നെ തീരുമാനിച്ചു. സി.പി മമ്മുക്കേയി, സത്താര്‍ സേട്ടു, ഏ.കെ കുഞ്ഞിമായിന്‍ ഹാജി, കടാരന്‍ അബ്ദുറഹിമാന്‍ ഹാജി, മുക്കാട്ടില്‍ മൂസ്സ എന്നിവര്‍ 500 രൂപ വീതം മുടക്കി 400 വരിക്കാരെയും ചേര്‍ത്ത് ശുഭാപ്തി വിശ്വാസത്തോടെ ചന്ദ്രിക വീണ്ടും പുറത്തിറക്കാന്‍ തുടങ്ങി. ഒരു കൊല്ലം കൊണ്ട് വരിക്കാരുടെ സംഖ്യ ആറിരട്ടിയായി. പത്രത്തിന് നല്ല ആദായമുണ്ടായി. ഈ കാലങ്ങളിലൊക്കെയേര്‍പ്പെട്ട രാഷ്ട്രീയവും സാമുദായികവുമായ സമരങ്ങളില്‍ ചന്ദ്രികക്ക് കാര്യമായ പിന്‍ബലം നല്‍കിയത് കെ.എം സീതി സാഹിബിന്റെ കരുത്തുറ്റ തൂലികയായിരുന്നുവെന്ന സംഗതി സ്മരണീയമാണ്. ‘അല്‍ അമീന്‍’, ‘മാതൃഭൂമി’ മുതലായ പത്രങ്ങളുടെ വായ്ത്തല മടക്കിയത് ആ അജയ്യമായ തൂലികയാണെന്ന വസ്തുത അധികമാളുകളും അറിഞ്ഞിരിക്കുകയില്ല’.

1939 ല്‍ രണ്ടാം ലോകമഹാ യുദ്ധം പൊട്ടിപ്പുറപ്പെട്ട പരിതസ്ഥിതിയിലുണ്ടായ കടലാസിന്റെ പഞ്ഞവും തുടര്‍ന്നുണ്ടായ വെറിയും നിമിത്തം പത്രം വരികയാക്കി മാറ്റേണ്ടിവന്നു. ഇത് കേരളത്തിലെ മുസ്‌ലിംലീഗ് പ്രവര്‍ത്തനത്തെയും ബാധിച്ചു. ഒരു ദിനപത്രത്തിന്റെ അഭാവം എത്രമാത്രമുണ്ടെന്ന് മനസ്സിലാക്കിയ നേതാക്കള്‍ക്ക് തല്‍ക്കാലം ക്ഷമിക്കുക മാത്രമേ നിര്‍വാഹമുണ്ടായിരുന്നുള്ളു. ആ പ്രതികൂല സാഹചര്യത്തിലും വാരിക തുടര്‍ന്ന് നടത്തുന്നതില്‍ അന്നത്തെ പത്രാധിപര്‍ കാണിച്ച ഉത്സാഹവും ത്യാഗവും പ്രത്യേകം സ്മരിക്കേണ്ടതുണ്ട്. ദരിദ്രമായ കുട്ടിക്കാലത്ത് തുടങ്ങി 40 കൊല്ലക്കാലം ഇല്ലായ്മയിലും വല്ലായ്മയിലും ഭാഗവാക്കായി, പത്രത്തെ പുരോഗതിയിലെത്തിക്കാന്‍ നിസ്വാര്‍ത്ഥമായും ആത്മാര്‍ത്ഥമായും പ്രവര്‍ത്തിച്ച പത്രാധിപര്‍ വി.സി അബൂബക്കര്‍ സാഹിബ് ചന്ദ്രികയുടെ പഴയ കാലത്തെക്കുറിച്ച് സ്മരിച്ചതിങ്ങനെ: ‘പത്രം അടിച്ച് കഴിഞ്ഞാല്‍ എഡിറ്റോറിയല്‍ സ്റ്റാഫിലെയും മാനേജിങ് സ്റ്റാഫിലെയും അംഗങ്ങള്‍ തന്നെ എണ്ണിത്തിട്ടപ്പെടുത്തി അട്ടി വെക്കാനും പോസ്റ്റല്‍ ചെയ്യാനുള്ളവ മടക്കി സ്റ്റാമ്പൊട്ടിച്ച് പുറത്തേക്ക് കൊണ്ട്‌പോകാനും സഹകരിക്കാറുള്ളത് മനസ്സിലിന്നും പച്ചപിടിച്ച് നില്‍ക്കുന്നു. 1932-33ലാണെന്ന് തോന്നുന്നു, തലശ്ശേരിയില്‍ നിന്ന് തയ്യിലക്കണ്ടി സി മുഹമ്മദ്, മുക്കാട്ടുമ്പ്രത്ത് മൊയ്തു തുടങ്ങി നാലഞ്ച് സുഹൃത്തുക്കള്‍ ചേര്‍ന്ന് ആവശ്യമായ മൂലധനമോ മറ്റ് സൗകര്യങ്ങളൊയില്ലാതെ ഒരു നേരമ്പോക്കെന്നോണമാണ് ചന്ദ്രിക വാരാന്ത പത്രമായി തുടങ്ങിയത്. അവരുടെ തന്നെ കൂട്ടത്തില്‍ പെട്ട കമാല്‍ മൊയ്തു എന്നൊരു സ്‌നേഹിതന്റെ ഹാന്‍ഡ് പ്രസ്സിലായിരുന്നു അച്ചടി. ഞാനന്ന് വിദ്യാര്‍ത്ഥിയായിരുന്നു’.

ബ്രിട്ടീഷ് സര്‍ക്കാരിന്റെ കാലം മുതല്‍ ഭരണകൂടങ്ങളുടെ അവഗണനക്കും അവകാശ നിഷേധങ്ങള്‍ക്കും വിധേയമായി ഇരുളില്‍ കഴിയേണ്ടി വന്ന ജനങഅങളില്‍ അറിവും ആത്മബലവും പകര്‍ന്ന്, അവരെ രാഷ്ട്രീയ പ്രബുദ്ധവും സംഘടിത ശക്തിയുമായി മാറ്റുന്നതില്‍ ഇക്കാലമത്രയും ചന്ദ്രിക വഹിച്ച പങ്ക് ചരിത്രം രേഖപ്പെടുത്തിയതാണ്. നാടിന്റെ സാമൂഹിക വിദ്യാഭ്യാസ വളര്‍ച്ചയിലും സര്‍വതുറകളിലുമുള്ള വികസനത്തിലും അതുല്യ സംഭാവനകളര്‍പ്പിച്ചതാണ് ചന്ദ്രകയുടെ കര്‍മ്മപഥം.രാജ്യത്തിന്റെയും സംസ്ഥാനത്തിന്റെയും രാഷ്ട്രീയ സാമൂഹിക പൊതുമണ്ഡലം പ്രശ്‌ന സങ്കീര്‍ണമായ സാഹചര്യത്തിലൂടെയാണ് കടന്നുപോകുന്നത്.കോവിഡ് മഹാമാരിയെ തുടര്‍ന്നുള്ള ആരോഗ്യ,സാമ്പത്തികപ്രതിസന്ധി നാടിനെ കടുത്ത പ്രയാസത്തിലാക്കിയിരിക്കുന്നു.

ഇത്തരം ആപത്ഘട്ടങ്ങളില്‍ ആശ്വാസം പകരുകയും ജനങ്ങളുടെ ക്ഷേമത്തിനായി പ്രവര്‍ത്തിക്കുകയും വേണ്ട ഭരണകൂടങ്ങള്‍ അഴിമതിയിലും സ്വജനപക്ഷപാതത്തിലും പെട്ട് മുഖം നഷ്ടപ്പെട്ടു കിടക്കുകയാണ്. ഉപജീവനമാര്‍ഗങ്ങള്‍ പോലും നഷ്ടമാകുകയും ഭാവിതവമുറയുംട വിദ്യാഭ്യാസ കാര്യങ്ങള്‍ പോലും അവതാളത്തിലാകുന്ന സന്ദര്‍ഭങ്ങളില്‍ പോലും കേന്ദ്ര സര്‍ക്കാര്‍ കടുത്ത ഫാസിസ്റ്റ് നടപടികള്‍ കൈകൊണ്ടു മുന്നോട്ട്‌പോകുന്നു. ജനവിരുദ്ധവും മനുഷ്യത്വരഹിതവുമായ ഇത്തരം രാഷ്ട്രീയ സമീപനങ്ങളെ തുറന്നുകാണിക്കാനും വേട്ടയാടപ്പെടുന്ന മനുഷ്യരുടെ വേദനകള്‍ ലോകത്തിന് മുന്നില്‍ അറിയിക്കാനും ആദര്‍ശ ധീരതയാര്‍ന്ന മാധ്യമപ്രവര്‍ത്തനവും മാധ്യമങ്ങളും അനിവാര്യമാണ്.

അധികാര കേന്ദ്രങ്ങളുടെ തിന്മകളോട് രാജിയാകാതെ ധീരമായ ചുവടുകളോടെ മുന്നേറുകയാണ് ചന്ദ്രിക.ഈ പ്രയാണത്തിന് കരുത്തേകാന്‍ ചന്ദ്രികയുടെ പ്രചാരണം ഊര്‍ജിതമാക്കാന്‍ മുസ്‌ലിം ലീഗ് ഘടകങ്ങളും അഭ്യുദയകാംക്ഷികളും മുന്നോട്ടുവരണമെന്ന് തങ്ങള്‍ അഭ്യര്‍ത്ഥിച്ചു.പുതിയ വരിക്കാരുടെ ലിസ്റ്റും തുകയും 25 നകം ചന്ദ്രിക യൂണിറ്റുകളില്‍ ഏല്‍പ്പിക്കണമെന്ന് തങ്ങള്‍ അഭ്യര്‍ത്ഥിച്ചു.
വര്‍ത്തമാനകാലത്ത് ചന്ദ്രികയുടെ പ്രചാരണം കൂടുതല്‍ ശക്തിപ്പെടേണ്ടത് അനിവാര്യമാണെന്ന് പികെ കുഞ്ഞാലിക്കുട്ടി എംപി പറഞ്ഞു. പ്രചാരണ വീഡിയോയും പോസ്റ്ററും പാണക്കാട് സയ്യിദ് സാദിഖലി തങ്ങള്‍ പുറത്തിറക്കി. മുസ്‌ലിം ലീഗ് സംസ്ഥാന ജനറല്‍ സെക്രട്ടറി കെപിഎ മജീദ് സ്വാഗതം പറഞ്ഞു. മു സ് ലിം ലീഗ് ജില്ലാ പ്രസിഡന്റ്- സെക്രട്ടറിമാര്‍,ചന്ദ്രിക നിയോജക മണ്ഡലം കോഓര്‍ഡിനേറ്റര്‍മാര്‍,ചര്‍ച്ചയില്‍ പങ്കെടുത്തു. പിവി അബ്ദുല്‍ വഹാബ് എംപി,പ്രതിപക്ഷ ഉപനേതാവ് ഡോ.എംകെ മുനീര്‍,ചന്ദ്രിക ഡയറക്ടര്‍ പിഎംഎ സമീര്‍,ചന്ദ്രിക എഡിറ്റര്‍ സിപി സൈതലവി, ഡെപ്യൂട്ടി ജനറല്‍ മാനേജര്‍ നജീബ് ആലിക്കല്‍ സംസാരിച്ചു.