chathis gadh – Chandrika Daily

ഛത്തീസ്ഗഡ് മുഖ്യമന്ത്രി; കോണ്‍ഗ്രസ് പ്രഖ്യാപനം ഇന്ന്

chandrika — Sat, 15 Dec 2018 03:13:11 +0000

ന്യൂഡല്‍ഹി: ഛത്തീസ്ഗഡിലെ കോണ്‍ഗ്രസ് മുഖ്യമന്ത്രിയെ ഇന്നു പ്രഖ്യാപിച്ചേക്കും. മുഖ്യമന്ത്രി സ്ഥാനത്തേക്ക് പരിഗണിക്കുന്ന പി.സി.സി അദ്ധ്യക്ഷന്‍ ഭൂപേഷ് ബാഗല്‍, മുന്‍ പ്രതിപക്ഷ നേതാവ് ടി.എസ്. സിംഗ്‌ദോ, പ്രമുഖ നേതാക്കളായ താമ്രധ്വജ് സാധു, ചരണ്‍ ദാസ് മഹന്ത് എന്നിവരുമായി ഇന്നലെ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ചര്‍ച്ച നടത്തിയിരുന്നു.

ഇന്ന് എ.ഐ.സി.സി നിരീക്ഷകന്‍ മല്ലികാര്‍ജ്ജുന ഖാര്‍ഗെ തലസ്ഥാനമായ റായ്പൂരില്‍ എം.എല്‍.എമാരുമായി അവസാന വട്ട ചര്‍ച്ച നടത്തിയ ശേഷം മുഖ്യമന്ത്രിയെ പ്രഖ്യാപിക്കുമെന്നാണ് സൂചന. കോണ്‍ഗ്രസ് നിയമസഭാ കക്ഷിയോഗവും ഇന്ന് റായ്പൂരില്‍ ചേരുന്നുണ്ട്.

90 അംഗ നിയമസഭയില്‍ 68 സീറ്റും വിജയിച്ചാണ് കോണ്‍ഗ്രസ് ഛത്തീസ്ഗഡില്‍ അധികാരമുറപ്പിച്ചത്. അതേസമയം, അഞ്ച് സംസ്ഥാനങ്ങളിലേക്ക് നടന്ന നിയമസഭ തെരഞ്ഞെടുപ്പുകളില്‍ കോണ്‍ഗ്രസ് വിജയം നേടിയ മധ്യപ്രദേശ്, രാജസ്ഥാന്‍ എന്നിവിടങ്ങളിലെ മുഖ്യമന്ത്രി സ്ഥാനങ്ങളില്‍ തീരുമാനമായിരുന്നു.

കര്‍ഷകരോഷത്തില്‍ വെന്തുരുകി ഛത്തീസ്ഗഡിലെ ബി.ജെ.പി

ചന്ദ്രിക വെബ് ഡെസ്‌ക്‌ — Wed, 12 Dec 2018 03:16:47 +0000

റായ്പൂര്‍: ലോകസഭാ തെരഞ്ഞെടുപ്പിന്റെ സെമിഫൈനലെന്ന് വിശേഷിപ്പിച്ച അഞ്ച് സംസ്ഥാന നിയമസഭകളിലേക്കുള്ള തെരഞ്ഞെടുപ്പില്‍ കോണ്‍ഗ്രസിന് ഏറ്റവും വിസ്മയാവഹമായ വിജയം സമ്മാനിച്ച സംസ്ഥാനമാണ് ഛത്തീസ്ഗഡ്. ഛത്തീസ്ഗഡിലെ വിളനിലങ്ങളില്‍ ആളിക്കത്തിയ കര്‍ഷക രോഷത്തില്‍ ബി.ജെ.പി വെന്തു വെണ്ണീറായി എന്നു പറയുന്നതാവും കൂടുതല്‍ ഉചിതം.
മൂന്നില്‍ രണ്ട് ഭൂരിപക്ഷവുമായാണ് ഇവിടെ കോണ്‍ഗ്രസ് അധികാരത്തില്‍ എത്തിയത്. വോട്ടെടുപ്പ് പൂര്‍ത്തിയായതിനു തൊട്ടു പിന്നാലെ പുറത്തു വന്ന എക്‌സിറ്റ്‌പോള്‍ ഫലങ്ങള്‍ പലതും ഇഞ്ചോടിഞ്ച് പോരാട്ടമോ കോണ്‍ഗ്രസിന് നേരിയ മുന്‍തൂക്കമോ ആണ് പ്രവചിച്ചിരുന്നത്. ബി.ജെ.പി അധികാരത്തുടര്‍ച്ച നിലനിര്‍ത്തുമെന്ന സര്‍വേ ഫലങ്ങളും പുറത്തു വന്നിരുന്നു. ഈ കണക്കുകൂട്ടലുകളെയെല്ലാം നിഷ്പ്രഭമാക്കി, മൂന്നില്‍ രണ്ട് ഭൂരിപക്ഷത്തോടെയാണ് സംസ്ഥാനത്തെ ജനങ്ങള്‍ കോണ്‍ഗ്രസിനെ തെരഞ്ഞെടുത്തത്. ഒന്നര പ്പതിറ്റാണ്ടിനു ശേഷമാണ് സംസ്ഥാനത്ത് കോണ്‍ഗ്രസ് അധികാരത്തില്‍ തിരിച്ചെത്തുന്നത്. രമണ്‍ സിങ് നേതൃത്വം നല്‍കിയ ബി.ജെ.പി സര്‍ക്കാറിന്റെ വലിയ പതനത്തിനാണ് തെരഞ്ഞെടുപ്പ് സാക്ഷിയായത്. 2013ലെ തെരഞ്ഞെടുപ്പില്‍ 50 സീറ്റുണ്ടായിരുന്ന ബി.ജെ.പി ഇത്തവണ വെറും 17 സീറ്റിലേക്ക് കൂപ്പുകുത്തി. 2013ല്‍ 38 സീറ്റുണ്ടായിരുന്ന കോണ്‍ഗ്രസ് 66 സീറ്റുമായാണ് 90 അംഗ നിയമസഭയില്‍ അധികാരത്തിലേറുന്നത്. ബി.എസ്.പിക്ക് മൂന്ന് സീറ്റുണ്ട്. അവരും കോണ്‍ഗ്രസിനെ പിന്തുണച്ചേക്കും.
നരേന്ദ്രമോദിയുടെ നേതൃത്വത്തിലുള്ള കേന്ദ്ര സര്‍ക്കാറിന്റെ ജനദ്രോഹ നയങ്ങള്‍ക്കൊപ്പം കാര്‍ഷിക വിളകളുടെ വിലത്തകര്‍ച്ചയും ഇതിനെതിരെ ഹിന്ദി ഹൃദയഭൂമിയില്‍ പൊട്ടിപ്പുറപ്പെട്ട വലിയ കാര്‍ഷിക സമരങ്ങളുമാണ് രമണ്‍ സിങ് സര്‍ക്കാരിന് ചരമഗീതമെഴുതിയത്. പരമ്പരാഗതമായി ബി.ജെ.പിയെ പിന്തുണച്ചു വന്നിരുന്ന മേഖലകളിലെല്ലാം ഇത്തവണ കോണ്‍ഗ്രസ് വെന്നിക്കൊടി നാട്ടി. മാവോയിസ്റ്റ് സ്വാധീന മേഖലയായ ബസ്താര്‍ റീജിയണിലെ 12 സീറ്റിലും കോണ്‍ഗ്രസിനായിരുന്നു ജയം. രാജ്‌നന്ദ്ഗാവ് മണ്ഡലത്തില്‍ നേരിയ ഭൂരിപക്ഷത്തിനാണ് കോണ്‍ഗ്രസിന്റെ കരുണ ശുക്ലയോട് മുഖ്യമന്ത്രി രമണ്‍സിങ് രക്ഷപ്പെട്ടത്. മന്ത്രിസഭാംഗങ്ങളില്‍ പലരും നിലംപരിശായി.
ഒരു കാലത്ത് ഛത്തീസ്ഗഡ് കോണ്‍ഗ്രസിന്റെ മുഖമായിരുന്ന അജിത് ജ്യോഗി സ്വന്തം പാര്‍ട്ടിയുടെ ബാനറില്‍ തെരഞ്ഞെടുപ്പിനെ നേരിട്ടത് ഇത്തവണ കോണ്‍ഗ്രസ് ക്യാമ്പുകളില്‍ തുടക്കത്തില്‍ വലിയ ആശങ്ക സൃഷ്ടിച്ചിരുന്നു.

ഛത്തീസ് ഘട്ട് തെരഞ്ഞെടുപ്പ്: രാഹുലും മോദിയും ഇന്ന് നേര്‍ക്കുനേര്‍

chandrika — Fri, 09 Nov 2018 02:50:40 +0000

ഛത്തീസ് ഘട്ട്: പ്രധാനമന്ത്രി നരേന്ദ്രമോദിയും രാഹുല്‍ ഗാന്ധിയും ഇന്ന് ഛത്തീസ് ഘട്ടില്‍ പ്രചാരണത്തിനിറങ്ങും. 2019-ലെ തെരഞ്ഞെടുപ്പിന് മുമ്പ് അഞ്ച് സംസ്ഥാനങ്ങളില്‍ നടക്കുന്ന തെരഞ്ഞെടുപ്പ് കോണ്‍ഗ്രസ്സിനും ബി.ജെ.പിക്കും വെല്ലുവിളികളാണ്.

ആദ്യഘട്ട വോട്ടെടുപ്പിന് മുന്നോടിയായി മോദിയും രാഹുലും ഇന്ന് പ്രചാരണം നടത്തും. നക്‌സല്‍ സ്വാധീന മേഖലയായ ബസ്തറിലെ ജഗദാല്‍ പൂരിലില്‍ നിന്നാണ് അഞ്ച് സംസ്ഥാനങ്ങളിലെ തെരഞ്ഞെടുപ്പ് പ്രചാരണത്തിന് മോദി തുടക്കമിടുന്നത്. രണ്ട് ദിവസം ഛത്തീസ് ഘട്ടില്‍ തങ്ങുന്ന രാഹുല്‍, മോദിക്ക് മറുപടി പറയാന്‍ നാളെ ജഗദാല്‍പൂരിലെത്തും. ഇന്ന് രാഹുലിന്റെ പര്യടനം മുഖ്യമന്ത്രി രമണ്‍ സിങ്ങിന്റെ മണ്ഡലമായ രാജ് നന്ദഗാവിലാണെന്നത് ശ്രദ്ധേയമാണ്. ഇന്ന് മണ്ഡലത്തില്‍ തങ്ങുന്ന രാഹുല്‍ അവിടെ റോഡ് ഷോയും നടത്തും.

അതേസമയം, കോണ്‍ഗ്രസ് പ്രചാരണത്തെ മറികടക്കാന്‍ ബി.ജെ.പി തന്ത്രങ്ങള്‍ പയറ്റുകയാണ്. പ്രധാനമന്ത്രിയുടെ 30-ലധികം റാലികള്‍ അഞ്ച് സംസ്ഥാനങ്ങളിലുമായി നടത്താനാണ് പാര്‍ട്ടി പദ്ധതിയിടുന്നത്.