കുട്ടികളെ മര്‍ദ്ദിക്കുന്നതിനെതിരെയുള്ള മറ്റ് വകുപ്പുകളും കുട്ടിയുടെ അമ്മയ്‌ക്കെതിരെ ചുമത്തിയിട്ടുണ്ട്. കുട്ടിയുടെ അമ്മയുടെയും പിതാവിന്റെയും വിശദവിവരങ്ങളും കുടുംബ പശ്ചാത്തലവും അറിയുന്നതിനായി അന്വേഷണ സംഘത്തിലെ ഉദ്യോഗസ്ഥര്‍ ബംഗാള്‍, ജാര്‍ഖണ്ഡ് സംസ്ഥാനങ്ങളിലേക്ക് പുറപ്പെട്ടിട്ടുണ്ട്. ഇവര്‍ക്ക് ക്രിമിനല്‍ പശ്ചാത്തലം ഉണ്ടോയെന്ന് അറിയുന്നതിന് വേണ്ടിയാണ് അന്വേഷണം അവിടേക്കും നീട്ടിയിരിക്കുന്നത്. കുടുംബ പശ്ചാത്തലവും അന്വേഷിക്കും. മാതവ് കുട്ടിയുമായി ഇവിടെ എത്തിയിട്ട് കുറച്ചുദിവസങ്ങള്‍ മാത്രമേ ആയിട്ടുള്ളു. ഇവര്‍ താമസിക്കുന്ന ഏലൂരുള്ള വീടിന് സമീപത്തുള്ളവര്‍ക്ക് ഇവരെ കുറിച്ച കാര്യമായ അറിവുകളില്ലെന്നും കമ്മീഷണര്‍ പറഞ്ഞു.

ചപ്പാത്തി പരത്തുവാന്‍ ഉപയോഗിക്കുന്ന തടികൊണ്ടുള്ള വസ്തു കൊണ്ടാണ് കുട്ടിയെ മര്‍ദ്ദിച്ചതെന്ന് പ്രാഥമിക അന്വേഷണത്തില്‍ ബോധ്യമായിട്ടുണ്ട്. ഈ വസ്തു വീട്ടില്‍ നിന്നും പൊലീസ് കണ്ടെത്തിയിട്ടുണ്ട്. നിലവില്‍ കുട്ടിയുടെ അമ്മയും ഇക്കാര്യം സമ്മതിച്ചിട്ടുണ്ട്. കുട്ടിയുടെ പിതാവും പൊലീസ് നിരീക്ഷണത്തിലാണ്. പിതാവിന്റെ സാനിധ്യത്തിലാണ് കുട്ടിയെ മര്‍ദ്ദിച്ചതെന്ന് പറയുന്നു. മര്‍ദ്ദനം നടന്നിട്ടും എന്തുകൊണ്ട് മൗനം പാലിച്ചുവെന്നതടക്കമുള്ള കാര്യങ്ങള്‍ പൊലീസ് ഇയാളില്‍ നിന്ന് ചോദിച്ച് അറിയും. കുട്ടിയെ മര്‍ദ്ദിക്കുവാന്‍ പിതാവ് കൂട്ട് നിന്നതായും സംശയിക്കുന്നു. കേസില്‍ അന്വേഷണം വേഗത്തില്‍ പൂര്‍ത്തിയാക്കി കുറ്റപത്രം സമര്‍പ്പിക്കുമെന്നും അദേഹം പറഞ്ഞു.

തലക്ക് പരിക്കേറ്റ നിലയില്‍ ഇതരസംസ്ഥാനക്കാരായ ദമ്പതികളുടെ മൂന്ന് വയസുള്ള മകനെ ബുധനാഴ്ച്ചയാണ് ആലുവയിലെ സ്വകാര്യ ആസ്പത്രിയിലെത്തിച്ചത്. കുഞ്ഞിന്റെ ശരീരത്തില്‍ മര്‍ദ്ദനമേറ്റ മുറിവുകളും പൊള്ളലേറ്റ പാടുകളും പരിശോധനയില്‍ കണ്ടെത്തിയതിനെ തുടര്‍ന്ന് നടത്തിയ ചോദ്യം ചെയ്യലിലാണ് സംഭവം പുറത്തറിഞ്ഞത്. വെന്റിലേറ്ററിന്റെ സഹായത്തോടെയാണ് കുഞ്ഞിന്റെ ജീവന്‍ നിലനിറുത്തിയിരുന്നത്. ശസ്ത്രക്രിയക്ക് ശേഷവും കുട്ടിയുടെ ആരോഗ്യനില അതീവ ഗുരുതരമായി തുടരുകയായിരുന്നു. ഇന്ന് രാവിലെ മരണത്തിന് കീഴടങ്ങുകയായിരുന്നു.

അനുസരണക്കേട് കാട്ടിയതിനാണ് കുഞ്ഞിനെ ഉപദ്രവിച്ചതെന്ന് അമ്മ പൊലീസിന് മൊഴി നല്‍കി. കുഞ്ഞിന്റെ അമ്മയെ മജിസ്‌ട്രേറ്റിന് മുന്നില്‍ ഹാജരാക്കിയ ശേഷം റിമാന്‍ഡ് ചെയ്തു. ഇവര്‍ക്കെതിരെ വധശ്രമം ചുമത്തിയാണ് പൊലീസ് അറസ്റ്റ് ചെയ്തിരിക്കുന്നത്. അതേസമയം, കുട്ടിയുടെ അച്ഛന്‍ ഇപ്പോഴും പൊലീസ് കസ്റ്റഡിയിലാണ്. ബംഗാള്‍ സ്വദേശിയായ ഇയാളുടെ പശ്ചാത്തലം പരിശോധിക്കാനായി ഏലൂര്‍ പൊലീസ് ബംഗാള്‍ പൊലീസുമായി ബന്ധപ്പെട്ടിട്ടുണ്ട്. കുഞ്ഞിന് മര്‍ദ്ദനമേറ്റസമയത്ത് താന്‍ ഉറക്കമായിരുന്നെന്നാണ് ഇയാള്‍ പൊലീസിന് നല്‍കിയ മൊഴി.