Chris Gayle – Chandrika Daily

തുടക്കത്തിലെ പ്രകടനം നിലനിര്‍ത്താനായില്ല; പഞ്ചാബ് പുറത്തേക്ക്

chandrika — Fri, 18 May 2018 10:20:11 +0000

മുംബൈ: ഐ.പി.എല്‍ സീസണില്‍ ആദ്യ ഏഴ്് മല്‍സരങ്ങളില്‍ അഞ്ചിലും വിജയം വരിച്ചവരാണ് കിംഗ്‌സ് ഇലവന്‍ പഞ്ചാബ്. വളരെ ശക്തമായി സീസണ് തുടക്കമിട്ട ടീം പക്ഷേ ഇപ്പോള്‍ പുറത്താവലിന്റെ വക്കിലാണ്. കഴിഞ്ഞ ദിവസം മുംബൈയോടും പരാജയപ്പെട്ട ടീമിന് ചാമ്പ്യന്‍ഷിപ്പില്‍ ഇനി ഒരു മല്‍സരം മാത്രമാണ് ബാക്കി. അത് ജയിച്ചാലും പ്ലേ ഓഫ് സാധ്യത ഉറപ്പുമില്ല. ഏപ്രില്‍ അവസാനത്തില്‍ ഒരാഴ്ച്ച അവധിയെടുത്ത ടീമിന് രണ്ടാം വരവില്‍ തൊട്ടതെല്ലാം പിഴക്കുകയാണ്. വ്യക്തിഗത പ്രകടനങ്ങളെ അമിതമായി ആശ്രയിക്കുന്നതാണ് ടീമിന്റെ തകര്‍ച്ചക്ക് പ്രധാന കാരണം. ബാറ്റിംഗില്‍ രണ്ട് പേര്‍ മാത്രമാണ് നട്ടെല്ല്. ഓപ്പണര്‍മാരായ കെ.എല്‍ രാഹുലും ക്രിസ് ഗെയിലും. അപാര ഫോമിലാണ് രാഹുല്‍ കളിക്കുന്നത്. 652 റണ്‍സാണ് അദ്ദേഹം ഇതിനകം നേടിയത്. ആറ് അര്‍ധ ശതകങ്ങള്‍ സ്വന്തമാക്കി. കഴിഞ്ഞ മല്‍സരത്തില്‍ മുംബൈയെ ഒറ്റക്ക് തോല്‍പ്പിക്കാന്‍ കഴിയുന്ന തരത്തില്‍ കളിച്ചപ്പോഴാണ് അവസാനത്തില്‍ ജസ്പ്രീത് ബുംറയുടെ ബൗണ്‍സറില്‍ വീണത്. ക്രിസ് ഗെയിലാവട്ടെ സ്ഥിരതയില്ലാത്ത പ്രകടനക്കാരനാണ്. ഒരു സെഞ്ച്വറി സ്വന്തമാക്കിയെങ്കിലും നിര്‍ണായക ഘട്ടത്തില്‍ അദ്ദേഹത്തിന്റെ സേവനം ടീമിന് ഉപകാരമാവുന്നില്ല. 368 റണ്‍സാണ് ഇതിനകം അദ്ദേഹം നേടിയത്. യുവരാജ്‌സിംഗ്, മായങ്ക് അഗര്‍വാള്‍, കരണ്‍ നായര്‍ എന്നിവരെല്ലാമുണ്ടെങ്കിലും ആരും വിശ്യാസ്യത പുലര്‍ത്തുന്നില്ല. ബൗളിംഗില്‍ ഓസ്‌ട്രേലിയക്കാരന്‍ ആന്‍ഡ്ര്യു ടൈ മാത്രമാണ് സ്ഥിരത കാട്ടുന്നത്. 24 വിക്കറ്റുകളാണ് ഇതിനകം ടൈ വീഴ്ത്തിയത്. അഫ്ഗാനിസ്താന്‍ സ്പിന്നര്‍ മുജിബ് റഹ്മാനും ഭേദമാണ്. ഇവര്‍ കഴിഞ്ഞല്‍ ടീമിന്റെ നായകന്‍ ആര്‍.അശ്വിന്‍ പോലും ദുരന്തമാണ്. മുംബൈ വിക്കറ്റ് നഷ്ടമില്ലാതെ 37 എന്ന ഘട്ടത്തില്‍ നിന്നുമാണ് ടൈ വരുന്നതും സ്‌ക്കോര്‍ മൂന്ന് വിക്കറ്റിന് 59 റണ്‍സ് ആക്കി മാറ്റിയതും. പക്ഷേ മറുഭാഗത്ത് നിന്ന് അദ്ദേഹത്തിന് കാര്യമായ പിന്തുണ ലഭിക്കുന്നില്ല. ഈ കാര്യം മല്‍സര ശേഷം ടൈ തുറന്ന് പറയുകയും ചെയ്തു. മുംബൈക്കെതിരെ ജയിക്കാന്‍ കഴിയാതിരുന്നത് വേദനാജനകമാണെന്നാണ് ടൈ വ്യക്തമാക്കിയത്. 186 റണ്‍സ് ചേസ് ചെയ്യാന്‍ കഴിയാതെ വരുന്നത് ടീമിന്റെ പരാജയമാണ്. രാഹുലിനെ പോലെ മറ്റുളളവര്‍ ബാറ്റേന്തണം. എന്നെയും മുജീബിനെയും പോലെ പന്തെറിയണം. അവിടെയാണ് ടീം വിജയിക്കുകയെന്നും ടൈ പറഞ്ഞു.
12 പോയന്റുമായി ആറാം സ്ഥാനത്താണ് ടീം ഇപ്പോള്‍. അവസാന മല്‍സരം ശക്തരായ ചെന്നൈയുമായാണ്. ആ മല്‍സരം ജയിച്ചാലും മുംബൈയും രാജസ്ഥാനും സ്വന്തം മല്‍സരങ്ങള്‍ തോല്‍ക്കാനും പഞ്ചാബ് പ്രാര്‍ത്ഥിക്കണം. കാരണം നെറ്റ് റണ്‍റേറ്റില്‍ അവര്‍ വളരെ പിറകിലാണ്.

തകര്‍ത്താടി ഗെയിലിസം; പഞ്ചാബിന് സുന്ദര ജയം

chandrika — Thu, 19 Apr 2018 19:57:27 +0000

ചണ്ഡിഗര്‍: പ്രായം എത്രയായാല്‍ എന്താ….! ക്രിസ് ഗെയില്‍ ക്രിസ് ഗെയില്‍ തന്നെ…. തന്നെ എഴുതിത്തള്ളിയവര്‍ക്ക് മുന്നിലേക്ക് അദ്ദേഹം പതിനൊന്ന് സിക്‌സറുകള്‍ പായിച്ചു. പന്ത് പലപ്പോഴും സ്‌റ്റേഡിത്തിന് പുറത്തുമായി. കരീബീയന്‍ വന്യതയുടെ സമസ്താലങ്കാരമായ ചാമ്പ്യന്‍ ബാറ്റ്‌സ്മാന്റെ സെഞ്ച്വറി വെടിക്കെട്ടില്‍ പതുങ്ങിപ്പോയ ഹൈദരാബാദുകാര്‍ക്ക് അതേ നാണയത്തില്‍ മറുപടി നല്‍കാന്‍ അധികമാരുമുണ്ടായിരുന്നില്ല. പഞ്ചാബ് സുന്ദരമായി ജയിച്ചു. ആര്‍. അശ്വിന്‍ നയിച്ച പഞ്ചാബ് ക്രിസ് ഗെയില്‍ പുറത്താവാതെ നേടിയ 104 റണ്‍സ് മികവില്‍ മൂന്ന് വിക്കറ്റിന് 193 റണ്‍സ് നേടിയപ്പോല്‍ ഹൈദരാബാദുകാരുടെ പ്രതീക്ഷയത്രയും യൂസഫ്് പത്താന്‍ എന്ന വെടിക്കെട്ടുകാരനിലായിരുന്നു. പഴയ ഫോമിന്റെ നിഴല്‍ മാത്രമായ യൂസഫ് 19 റണ്‍സുമായി മടങ്ങിപ്പോള്‍ നായകന്‍ വില്ല്യംസണ്‍ മാത്രമാണ് പൊരുതി നിന്നത്.
ആദ്യം ബാറ്റ് ചെയ്ത പഞ്ചാബിനായി കെ.എല്‍ രാഹുലും ക്രിസ് ഗെയിലുമാണ് ഇന്നിംഗ്‌സിന് തുടക്കമിട്ടത്. 53 റണ്‍സ് വരെയെത്തി ഈ സഖ്യം.

രാഹുല്‍ 18 ല്‍ പുറത്തായപ്പോള്‍ ഗെയില്‍ സംഹാര രൂപിയായി. ഭുവനേശ്വര്‍ കുമാറും റാഷിദ് ഖാനും ഹുദയുമെല്ലാം അടി വാങ്ങി. പന്ത് മാലപ്പടക്കത്തിന് തീ കൊടുത്ത പോലെ ഗ്യാലറിയിലേക്ക് പാഞ്ഞു. സിംഗിളുകളും ഡബിളുകളും നേടാന്‍ സ്വതവേ മടിയനായ ഗെയില്‍ നിന്ന നില്‍പ്പില്‍ തന്നെ പന്തിനെ പ്രഹരിക്കുകയായിരുന്നു. 63 പന്തുകളാണ് അദ്ദേഹം നേരിട്ടത്. ഇതില്‍ പതിനൊന്ന് തവണ പന്ത് ഗ്യാലറിയിലെത്തിയപ്പോള്‍ നേടിയ ബൗണ്ടറി ഒന്നേ ഒന്ന് മാത്രം. 165.07 ആയിരുന്നു അദ്ദേഹത്തിന്റെ സ്‌ക്കോറിംഗ് ശരാശരി. മലയാളിയായ കരണ്‍ നായര്‍ 31 റണ്‍സുമായി ഗെയിലിന് കൂട്ടുനിന്നു.

വലിയ റണ്‍ പിന്തുടരാനെത്തിയ ഹൈദരാബാദിന് തുടക്കത്തില്‍ തന്നെ വൃദ്ധിമാന്‍ സാഹയെ നഷ്ടമായി. ഫോമിലുള്ള ശിഖര്‍ ധവാനാവട്ടെ പരുക്കുമായി മടങ്ങുകയും ചെയ്തു. യൂസഫ് മൂന്ന് ബൗണ്ടറികളുമായി പ്രതീക്ഷ നല്‍കിയെങ്കിലും കൂറ്റനടിക്കുള്ള ശ്രമത്തില്‍ പുറത്തായി. അശ്വിനും യുവരാജും സുവര്‍ണാവസരങ്ങള്‍ നഷ്ടമാക്കിയത് ഉപയോഗപ്പെടുത്താന്‍ ഹൈദരാബാദിനായില്ല.
നായകന്‍ വില്ല്യംസണ്‍ പുറത്തായതോടെ ചെറുത്തുനില്‍പ്പും അവസാനിച്ചു. പിന്നെയെല്ലാം പഞ്ചാബിന് അനുകൂലമായി. ഇന്ന് നടക്കുന്ന മല്‍സരത്തില്‍ ചെന്നൈയും രാജസ്ഥാന്‍ റോയല്‍സും ഏറ്റുമുട്ടും.

വെട്ടിക്കെട്ട് സെഞ്ച്വറിയുമായി വിണ്ടും ക്രിസ് ഗെയില്‍, സിക്‌സറില്‍ റെക്കോര്‍ഡ്

chandrika — Fri, 08 Dec 2017 14:04:06 +0000

ധാക്ക : ബംഗ്ലാദേശ് പ്രീമിയര്‍ ലീഗില്‍ മിന്നും സെഞ്ച്വറിയുമായി വെസ്റ്റ്ഇന്‍ഡീസ് വെട്ടിക്കെട്ട് ബാറ്റ്‌സ്മാന്‍ ക്രിസ് ഗെയില്‍. രംഗ്പൂര്‍ റൈഡേഴ്‌സിനായി കളിക്കുന്ന താരം വെറും 45 പന്തിലാണ് ശതകം പൂര്‍ത്തിയാക്കിയത്. ലീഗില്‍ ഗെയിലിന്റെ നാലാം സെഞ്ച്വറിയാണിത്. മത്സരത്തില്‍ 14 സിക്‌സും 6 ഫോറും ഗെയില്‍ 126 റണ്‍സുമായി പുറത്താകാതെ ടീമിനെ വിജയം നേടിക്കൊടുത്ത ശേഷമാണ് താരം കളം വിട്ടത്. തന്റെ ബാറ്റില്‍ നിന്നും 14 സികസുകള്‍ പറത്തിയ ഗെയില്‍ ടി-20യില്‍ 800 സിക്‌സറുകള്‍ നേടുന്ന ആദ്യ താരമെന്ന് റെക്കോര്‍ഡിന് ഉടമയായി.

ഖുല്‍ന ടൈറ്റല്‍സിനെതിരെ എലിമിനേറ്ററിലായിരുന്നു ഗെയ്‌ലിന്റെ വെട്ടികെട്ട് പ്രകടനം. ആദ്യം ബാറ്റു ചെയ്ത ഖുല്‍ന ടൈറ്റല്‍സ് 20 ഓവറില്‍ 167 നേടിയപ്പോള്‍ ഗെയ്‌ലിന്റെ സെഞ്ച്വറി മികവില്‍ 15.2 ഓവറില്‍ രംഗ്പൂര്‍ റൈഡേഴ്‌സ് ലക്ഷ്യം മറികടന്നു. ഇതോടെ റൈഡേഴ്‌സ് ബംഗ്ലാദേശ് പ്രീമിയര്‍ ലീഗ് ഫൈനലില്‍ പ്രവേശിച്ചു.

എനിക്കിപ്പോഴും ചെറുപ്പം തന്നെയാണെന്നാണ് തോന്നുന്നത്. നിര്‍ണായ മത്സരത്തില്‍ ഉത്തരവാദിത്വം ഏറ്റെടുത്ത് മികച്ച കളി പുറത്തെടുക്കാനായതില്‍ സന്തോഷമുണ്ട്. സമ്മര്‍ദ്ദത്തിനിടയില്‍ മുഹമ്മദ് മിതുനുമായുള്ള കൂട്ടുക്കെട്ട് കളിയില്‍ നിര്‍ണായകമായി. മത്സര്ത്തിന് ഒരുക്കിയ പിച്ചും മിക്ച്ചതായിരുന്നു. 39 കാരനായ ക്രിസ് ഗെയില്‍ കളിക്കു ശേഷം പ്രതികരിച്ചു.

ഫോം നഷ്ടമായത്തിന് തുടര്‍ന്ന് പാക് പ്രീമിയര്‍ ലീഗിടക്കം പിന്നോക്കം പോയ ക്രിസ് ഗെയില്‍ ബംഗ്ലാദേശ് പ്രീമിയര്‍ ലീഗില്‍ മിന്നും പ്രകടനവുമായി വിമര്‍ശകര്‍ക്ക് മറുപടി നല്‍കുകയാണ്

യുവതിയെ ലൈംഗികാവയവം കാണിച്ചെന്ന ആരോപണം; ഓസ്‌ട്രേലിയന്‍ മാധ്യമത്തിനെതിരായ മാനനഷ്ട കേസില്‍ ക്രിസ് ഗെയിലിന് വിജയം

ചന്ദ്രിക വെബ് ഡെസ്‌ക്‌ — Mon, 30 Oct 2017 13:51:07 +0000

സിഡ്‌നി: ഓസ്‌ട്രേലിയന്‍ മാധ്യമമായ സിഡ്‌നി മോണിങ് ഹെറാള്‍ഡ് പ്രസിദ്ധീകരിച്ച ലൈംഗിക ആരോപണത്തിനെതിരായ മാനനഷ്ട കേസില്‍ വെസ്റ്റ് ഇന്‍ഡീസ് ക്രിക്കറ്റ് താരം ക്രിസ് ഗെയിലിനു വിജയം. 2015 ലോകകപ്പിനിടെ ഡ്രസ്സിങ് റൂമില്‍ വെച്ച് മസ്സാജ് തെറാപ്പിസ്റ്റ് ആയ ലിയാനി റസല്‍ എന്ന യുവതിയെ ഗെയ്ല്‍ സ്വകാര്യ ശരീരഭാഗം കാണിച്ചുവെന്ന വെളിപ്പെടുത്തല്‍ പ്രസിദ്ധീകരിച്ചതിനെ തുടര്‍ന്നാണ് 38-കാരന്‍ സിഡ്‌നി മോണിങ് ഹെറാള്‍ഡ് ഉടമകളായ ഫയര്‍ഫാക്‌സ് മീഡിയക്കെതിരെ കേസ് നല്‍കിയത്. ആരോപണം സ്ഥാപിക്കാനുതകുന്ന തെളിവുകള്‍ പത്രത്തിന്റെ കൈവശം ഇല്ലെന്നും വാര്‍ത്ത പൊതുതാല്‍പര്യം ഉണര്‍ത്തുന്നതല്ലെന്നും ന്യൂ സൗത്ത് വെയില്‍സ് സുപ്രീം കോടതിയിലെ നാലംഗ ജൂറി കണ്ടെത്തി.

വിവാദത്തില്‍ നേരത്തെ ജൂറിക്കു മുമ്പാകെ ഹാജരായ ലിയാനി റസല്‍, ഡ്രസ്സയ്ന്‍ ഓവലിലെ ട്രെയിനിങ് സെഷനിടെ ഗെയില്‍ തന്റെ ടവല്‍ അഴിച്ച് സ്വകാര്യ ഭാഗം കാണിച്ചെന്നും ‘ഇതാണോ നീ അന്വേഷിക്കുന്നത്?’ എന്ന് ചോദിച്ചെന്നും മൊഴി നല്‍കിയിരുന്നു. അപമാനിക്കപ്പെട്ട താന്‍ നിര്‍ത്താതെ ഏറെ നേരം കരഞ്ഞെന്നും ലിയാനി പറഞ്ഞു. എന്നാല്‍, അങ്ങനെ ഒരു സംഭവം നടന്നിട്ടില്ലെന്ന് ഗെയ്‌ലും സഹ കളിക്കാരന്‍ ഡ്വെയ്ന്‍ സ്മിത്തും ജൂറി മുമ്പാകെ അവകാശപ്പെട്ടു.

ടെലിവിഷന്‍ റിപ്പോര്‍ട്ടറായ മെല്‍ മക്ലോഫിനോട് ഗെയില്‍ അശ്ലീലച്ചുവയില്‍ സംസാരിച്ചത് വിവാദമായതിനെ തുടര്‍ന്ന് ലിയാനി റസ്സല്‍, ദി ഏജ് പത്രത്തിന്റെ സ്‌പോര്‍ട്‌സ് എഡിറ്ററെ ബന്ധപ്പെട്ട് തന്റെ അനുഭവം വിവരിച്ചിരുന്നു. ഡ്വെയ്ന്‍ സ്മിത്ത് ലൈംഗിക ചുവയുള്ള സന്ദേശം തനിക്ക് അയച്ചെന്നും ലിയാനി ആരോപിച്ചിരുന്നു.

Turns out this vile, lying masseuse, Leanne Russell lied against cricketing superstar Chris Gayle. pic.twitter.com/9TQ0uA5iK5

— This Fernandez Rocks (@HA_Fernandez) October 30, 2017

ഗെയ്‌ലിനെതിരായ പ്രതികാര ബുദ്ധിയോടുള്ള നീക്കമാണ് ആരോപണത്തിനു പിന്നിലുള്ളതെന്ന് വിന്‍ഡീസ് താരത്തിനു വേണ്ടി ഹാജരായ ബാരിസ്റ്റര്‍ ബ്രൂസ് മക്ലിന്‍ടോക്ക് വാദിച്ചു. കായിക മേഖലയിലെ വനിതകള്‍ക്കു വേണ്ടിയാണ് താന്‍ നിലകൊള്ളുന്നതെന്ന് ലിയാനിയും പറഞ്ഞു.

അതേസമയം, ജൂറി വിധിക്കെതിരെ അപ്പീല്‍ പോകുമെന്ന് ഫയര്‍ഫാക്‌സ് മീഡിയ വ്യക്തമാക്കി. ശരിയായ വിചാരണയല്ല നടന്നതെന്നും ഭാവികാര്യങ്ങള്‍ ആലോചിച്ചു തീരുമാനിക്കുമെന്നും പത്രത്തിന്റെ വക്താവ് അറിയിച്ചു.

ടി 20യില്‍ ഗെയിലിന് വീണ്ടും റെക്കോര്‍ഡ്

chandrika — Sun, 17 Sep 2017 17:33:08 +0000

ഡര്‍ഹം: വിന്‍ഡീസ് ടീമിലേക്ക് മടങ്ങിയെത്തിയ വെടിക്കെട്ട് ഓപണിങ് ബാറ്റ്‌സ്മാന്‍ ക്രിസ് ഗെയില്‍ കുട്ടി ക്രിക്കറ്റില്‍ പുതിയ റെക്കോര്‍ഡിട്ടു. രാജ്യാന്തര ടി 20 ക്രിക്കറ്റില്‍ 100 സിക്‌സര്‍ തികക്കുന്ന ആദ്യ താരമെന്ന റെക്കോര്‍ഡ് ഇനി വിന്‍ഡീസുകാരന് സ്വന്തം.

ഇംഗ്ലണ്ടിനെതിരായ ആദ്യ ടി 20 മത്സരത്തിനിടെയാണ്, തന്റെ 52-ാം മത്സരത്തില്‍ (49-ാം ഇന്നിങ്‌സ്) ഇടം കയ്യന്‍ സീമര്‍ ഡേവിഡ് വില്ലിയെ സിക്‌സറിനു പറത്തിയാണ് താരം ഈ നേട്ടം കൈവരിച്ചത്. മത്സരത്തില്‍ 21 പന്തില്‍ മൂന്ന് ബൗണ്ടറികളും നാലു സിക്‌സറുകളുമടക്കം 40 റണ്‍സെടുത്ത ഗെയില്‍ വിന്‍ഡീസിന് ശക്തമായ അടിത്തറയിടുകയും ചെയ്തു.

ടി 20യില്‍ മിക്ക റെക്കോര്‍ഡുകളും 37 കാരനായ ജമൈക്കക്കാരനൊപ്പമാണ്. ഫസ്റ്റ്ക്ലാസ് രാജ്യാന്തര മത്സരങ്ങളുള്‍പ്പെടെ കൂടുതല്‍ സെഞ്ച്വറികള്‍ (18), അര്‍ധ സെഞ്ച്വറികള്‍ (65), സിക്‌സറുകള്‍ (772), ബൗണ്ടറികള്‍ (804), ഇതിനു പുറമെ ടി ട്വന്റിയിലെ വേഗതയാര്‍ന്ന സെഞ്ച്വറിയും ഗെയിലിന്റെ പേരിലാണ് (30 പന്തില്‍), ടി 20യിലെ ഉയര്‍ന്ന സ്‌കോറായ 175 നോട്ട് ഔട്ടും ഗെയിലിനു സ്വന്തം.

Bang! Chris Gayle becomes the first player to hit T20I sixes #ENGvWI pic.twitter.com/LAU4sdMUrJ

— ICC (@ICC) September 16, 2017

ഇംഗ്ലണ്ടിനെതിരായ മത്സരത്തില്‍ ഗെയിലിനു പുറമെ 51 റണ്‍സെടുത്ത എവിന്‍ ലൂയിസിന്റേയും 28 റണ്‍സെടുത്ത റോവ്മാന്‍ പവലിന്റേയും ബാറ്റിങ് കരുത്തില്‍ ആദ്യം ബാറ്റു ചെയ്ത വിന്‍ഡീസ് ഒമ്പത് വിക്കറ്റിന് 176 റണ്‍സ് അടിച്ചെടുത്തു. മറുപടി ബാറ്റിങ്ങിനിറങ്ങിയ ഇംഗ്ലണ്ട് 155 റണ്‍സിന് പുറത്തായി.

വിന്‍ഡീസ് ജയം 21 റണ്‍സിന്. 43 റണ്‍സെടുത്ത അലക്‌സ് ഹെയില്‍സ്, 30 റണ്‍സെടുത്ത ജോസ് ബട്‌ലര്‍ എന്നിവരൊഴികെ ആര്‍ക്കും ഇംഗ്ലീഷ് നിരയില്‍ കാര്യമായ സ്‌കോര്‍ നേടാനായില്ല. വിന്‍ഡീസിനു വേണ്ടി കെസ്‌റിക് വില്യംസ്, കാര്‍ലോസ് ബ്രത് വെയ്റ്റ് എന്നിവര്‍ മൂന്നു വിക്കറ്റുകള്‍ വീഴ്ത്തി.

Huge hitting from Gayle to become the first player to hit 100 IT20 sixes!

WI 40/0 #ENGvWI

Follow: https://t.co/Y5NV0iqvZd pic.twitter.com/pWD34esZtZ

— England Cricket (@englandcricket) September 16, 2017