തുടക്കം മുതല്‍ ബ്രസീല്‍ വരുതിയിലായ കളിയുടെ 15 ആം മിനിറ്റില്‍ എവര്‍ട്ടണാണ് ആദ്യം ലക്ഷ്യം കണ്ടത്. എന്നാല്‍ 44 ആം മിനിറ്റില്‍ തിയാഗോ സില്‍വയുടെ ഹാന്‍ഡ് ബോളിനെ തുടര്‍ന്ന് ലഭിച്ച പെനാല്‍റ്റിയിലൂടെ പൌലോ ഗൊറേറോയുടെ കാലുകള്‍ പെറു ഒപ്പമെത്തിച്ചു. എന്നാല്‍ ആദ്യ പകുതി അവസാനിക്കും മുന്‍പ് ഗബ്രിയേല്‍ ജീസസിലൂടെ ബ്രസീല്‍ വീണ്ടും ലീഡ് നേടി . എന്നാല്‍ 70 ആം മിനിറ്റില്‍ ഗബ്രിയേല്‍ ജീസസ് രണ്ടാം മഞ്ഞക്കാര്‍ഡ് കണ്ട് പുറത്ത്. ഇതോടെ അവസാന ഇരുപത് മിനിറ്റ് പത്തുപേരുമായി കളിച്ച ബ്രസീല്‍ 90 ആം മിനിറ്റില്‍ റിച്ചാലിസണില്‍ മൂന്നാം ഗോള്‍ നേടി കിരീടം ചൂടുകയായിരുന്നു.

പക്ഷേ ഇന്ന് ഫൈനലില്‍ പെറുവിനെ എതിരിടുമ്പോള്‍ ടീമിന്റെ വലിയ ആശ്വാസമെന്നത് ആദ്യ റൗണ്ടിലെ വമ്പന്‍ വിജയമാണ്. അഞ്ച് ഗോളിനായിരുന്നു അന്ന് ബ്രസീല്‍ പെറുവിനെ കീഴടക്കിയത്.
നെയ്മറില്ലെങ്കിലും ഉജ്ജ്വല ഫോമിലാണ് ഗബ്രിയേല്‍ ജീസസ്. റോബര്‍ട്ടോ ഫിര്‍മിനോയും സെമിയില്‍ മികവ് കാട്ടി. എവര്‍ട്ടണും കൂട്ടീന്യോയും കാസിമിറോയും അലിസണുമെല്ലാം മരക്കാനയില്‍ മിന്നുന്നവരാണ്. പെറുവിയന്‍ സംഘത്തില്‍ സൂപ്പര്‍ താരങ്ങളില്ല. പക്ഷേ രണ്ട് അട്ടിമറികള്‍ നടത്തിയാണ് അവരുടെ വരവ്. ക്വാര്‍ട്ടറില്‍ കൊളംബിയയെയും സെമിയില്‍ സാക്ഷാല്‍ ചിലിയെയും. അതിനാല്‍ ബ്രസീല്‍ ജാഗ്രതയില്‍ പിറകോട്ട് പോവില്ല.

മത്സരത്തില്‍ അഗ്യൂറോ നേടിയ ആദ്യ ഗോളിന് വഴിയൊരുക്കിയത് മെസ്സിയുടെ മനോഹരമായ പാസ് ആയിരുന്നു. ഇതിന് പിന്നാലെയാണ് മെസ്സിക്ക് ചുവപ്പ് കാര്‍ഡ് ലഭിച്ചത്. രണ്ടാം പകുതിയില്‍ ചിലിക്ക് അനുവദിച്ച പെനാല്‍റ്റിയെ സംബന്ധിച്ചും പരാതി ഉയര്‍ന്നിട്ടുണ്ട്. മത്സരത്തില്‍ 2-1ന് ജയിച്ച അര്‍ജന്റീന കോപ്പയില്‍ മൂന്നാം സ്ഥാനം നേടി. സെര്‍ജിയോ അഗ്യൂറോ, പൗലോ ഡിബാല എന്നിവരാണ് അര്‍ജന്റീനക്കായി ഗോള്‍ നേടിയത്.

What how is this red card for #medel and #messi #argchi pic.twitter.com/VYRk4aryGf

— lucas (@lucasorange) July 6, 2019

Entre os melhores! A Argentina terminou no pódio da #CopaAmerica pela quinta vez nas últimas seis edições. pic.twitter.com/ipAX2wg2rT

— Copa América (@CopaAmerica) July 6, 2019

കോച്ച് ലയണല്‍ സ്‌കലോനിയുടെ ആക്രമണ തന്ത്രം തുടക്കം മുതലെ പുറത്തെടുത്ത അര്‍ജന്റീന 12-ാം മിനിറ്റില്‍ തന്നെ ലക്ഷ്യം കണ്ടു. സ്വന്തം ഹാഫില്‍ നിന്നും മെസി പൊടുന്നനെ നീട്ടിയ നീള പാസ് അഗ്യൂറോ തന്റെ തനത് വേഗതയില്‍ വലയിലെത്തിക്കുകയായിരുന്നു. ഗോള്‍ കണ്ടെതോടെ അധിപത്യം പുലര്‍ത്തിയ മെസിയും സംഘവും മൈതാനത്ത് സുന്ദരമായ നീക്കങ്ങളാണ് പുറത്തെടുത്തത്. ആദ്യ ഗോളിന് 10 മിനിറ്റുകള്‍ പിന്നിടുംമുന്നേ ആദ്യ ഇലവനില്‍ തന്നെ അവസരം ലഭിച്ച പൗളോ ഡിബാലയും ലീഡ് ഉയര്‍ത്തി. ബോക്‌സിലേക്ക് വന്നെത്തിയ പന്ത് ഇടതു വിങ്ങിലെ കൃത്യമായ ഇടപടിലൂടെ യുവന്റസ് താരം വലയിലെത്തിക്കുകയായിരുന്നു. കോപ്പയിലെ ഡിബാലയുടെ ആദ്യ ഗോളാണിത്.

തുടര്‍ന്ന് പരുക്കനായി മാറിയ കളിയുടെ ആവേശം പലപ്പോഴും കയ്യാങ്കളിയിലും എത്തി. 37ാം മിനിറ്റില്‍ ചിലിയുടെ ഔട്ട് ലൈനില്‍ വെച്ച് പന്തിനായി നടത്തിയ തള്ളാണ് മെസിയെയും ചിലെ താരം ഗാരി മെദലിനും ചുവപ്പുകാര്‍ഡിലേക്ക് എത്തിച്ചത്. സൂപ്പര്‍താരം ലയണല്‍ മെസ്സി രാജ്യന്തര മത്സരത്തില്‍ ഇത് രണ്ടാം തവണയാണ് ചുവപ്പുകാര്‍ഡ് കണ്ടു പുറത്താവുന്നത്. ആകെ 37 ഫൗളുകള്‍ കണ്ട മല്‍സരത്തില്‍ ഏഴ് മഞ്ഞക്കാര്‍ഡുകളും റഫറി പുറത്തെടുത്തു.

ഇതോടെ 10 പേരുമായി നടന്ന മല്‍സരത്തിന്റെ 59-ാം മിനിറ്റില്‍ പെനാല്‍റ്റിയിലൂടെ അര്‍തുറോ വിദാലാണ് ചിലിയുടെ ആശ്വാസ ഗോള്‍ നേടിയത്. കായികമായി എതിര്‍ത്ത ഗാരി മെദലിനെതിരെ കാര്യമായ ഫൗളൊന്നും ചെയ്യാതിരുന്നിട്ടും മെസിക്കു ചുവപ്പുകാര്‍ഡ് നല്‍കിയതും രണ്ടാം പകുതിയില്‍ ചിലിക്ക് അനുവദിച്ച പെനല്‍റ്റിയും റഫറിയെ വിവാദത്തിലാക്കിയിട്ടുണ്ട്.

അതേസമയം വിവാദ മത്സരത്തില്‍ അര്‍ജന്റീനക്ക് പിന്തുണയുമായി ബ്രസീല്‍ ഇതിഹാസ താരം റിവാള്‍ഡോയും രംഗത്തെത്തി. മത്സരത്തെ സംബന്ധിച്ച് പരാതിപ്പെടാന്‍ അര്‍ജന്റീനയുടെ ഭാഗത്ത് ന്യായമായ കാരണങ്ങളുണ്ടെന്ന് റിവാള്‍ഡോ പറഞ്ഞു.
മത്സരത്തില്‍ ബ്രസീലിനെതിരെ അര്‍ജന്റീനക്ക് രണ്ട് പെനാല്‍ട്ടിക്കുള്ള അര്‍ഹതയുണ്ടായിരുന്നുവെന്നും പ്രമുഖ അറ്റാക്കിങ് മിഡ് ഫീല്‍ഡര്‍ കൂടിയായ താരം വ്യക്തമാക്കി.

https://www.marca.com/en/football/international-football/2019/07/05/5d1f5480ca4741cc0f8b45b4.html

‘ശരിയാണ്, ബ്രസീലിന്റേത് മികച്ച ടീമാണ്. എന്നാല്‍ അര്‍ജന്റീനക്ക് പരാതിപ്പെടാന്‍ ന്യായമായ കാരണങ്ങളുണ്ട്. മത്സരത്തില്‍ അര്‍ജന്റീനക്ക് രണ്ട് പെനാല്‍ട്ടി ലഭിക്കേണ്ടതായിരുന്നു. പക്ഷേ, വാര്‍ സംവിധാനം അതിന് ഉപകാരപ്പെട്ടില്ല.’ സ്‌പോര്‍ട്‌സ് പോര്‍ട്ടലായ മാര്‍സക്ക് നല്‍കിയ അഭിമുഖത്തില്‍ റിവാള്‍ഡോ പറഞ്ഞു.

വാര്‍ സംവിധാനത്തോട് തനിക്ക് യോജിപ്പില്ലെന്ന് ഞാന്‍ നേരത്തെ വ്യക്തമാക്കിയതാണ്. വാര്‍ ഫുട്ബോളിന്റെ ഒഴുക്കിനെ കൊല്ലുന്ന സംവിധാനമാണ്. റഫറിമാരെ മാത്രമാണ് അത് സഹായിക്കുന്നത്. വാര്‍ കാരണം കളി പലതവണ നിര്‍ത്തിവെക്കേണ്ടി വരുന്നു. യൂറോപ്പ് ഫുട്‌ബോളിലും വാര്‍ വലിയ കുഴപ്പങ്ങളുണ്ടാക്കുന്നുണ്ട്. അത് ഫുട്‌ബോളിനെ നശിപ്പിക്കുകയാണെന്നും, 2002 ലോകകപ്പ് ജേതാക്കളായ ബ്രസീല്‍ ടീമംഗം വ്യക്തമാക്കി.

അര്‍ജന്റീനിയന്‍ ആരാധകരെ സംബന്ധിച്ച് വിഷമകരമായിരുന്നു കോപ്പ അമേരിക്ക ഫുട്ബോള്‍ സെമിയില്‍ ബ്രസീലിനോട് ഏറ്റ പരാജയം. റഫറിയാണ് തോല്‍പ്പിച്ചതെന്നാണ് ആരാധകരുടെയും ടീമിന്റെയും ആരോപണം. ബ്രസീലിനോട് പരാജയപ്പെട്ടതിന് പിന്നാലെ ലയണല്‍ മെസിയും സെര്‍ജിയോ അഗ്യൂറോയും ടീം കോച്ച് ലയണല്‍ സ്‌കലോനിയും റഫറിക്കെതിരെ രംഗത്തെത്തിയിരുന്നു. ആരോപണം ഉന്നയിച്ച് മുന്നോട്ട് പോവാന്‍ തന്നെയാണ് അര്‍ജന്റീനയുടെ തീരുമാനം.

മത്സരത്തില്‍ രണ്ട് തവണ പെനല്‍റ്റി അനുവദിക്കാന്‍ തക്കതായ ഫൗളുകളാണ് സംഭവിച്ചത്്. വാര്‍ റഫറിയുടെ നിര്‍ദ്ദേശമുണ്ടായിട്ടും അത് മറികടന്നാണ് റഫറി പെനല്‍റ്റി അനുവദിക്കാതിരുന്നത്. പെനല്‍റ്റിക്കായി അര്‍ജന്റീന നല്‍കിയ അപ്പീലുകള്‍ ശരിയാണെന്ന് വാര്‍ റഫറി ലിയോണ്ടന്‍ ഗോണ്‍സാലസ് മൈതാനത്തെ റഫറിയായ റോഡി സാബ്രാനോയോട് വ്യക്തമാക്കിയതായി മത്സരത്തിന് പിന്നാലെ ചില മാധ്യമങ്ങള്‍ റിപ്പോര്‍ട്ട് ചെയ്തിരുന്നു. ഇതിന്റെ ദൃശ്യങ്ങള്‍ പുറത്തുവന്നിട്ടുണ്ട്.

എതിരില്ലാത്ത രണ്ട് ഗോളുകള്‍ക്കാണ് ബ്രസീല്‍ വിജയിച്ചത്. പെറുവിനെയാണ് ഫൈനലില്‍ ബ്രസീല്‍ നേരിടുന്നത്. മൂന്നാം സ്ഥാനത്തിനായുള്ള പോരാട്ടത്തില്‍ അര്‍ജന്റീന ചിലിയെ നേരിടും.

പോര്‍ട്ടോഅലഗ്രേ: ബ്രസീലില്‍ നടക്കുന്ന കോപ്പ അമേരിക്കയിലെ രണ്ടാം സെമിഫൈനലില്‍ ചിലിയെ അട്ടിമറിച്ച് പെറു. എതിരില്ലാത്ത മൂന്നു ഗോളുകള്‍ നേടിയാണ് പെറു ചിലിയെ പുറത്തിരുത്തിയത്. ഇതോടെ കോപ്പ അമേരിക്കയുടെ ഫൈനല്‍ മത്സരം ബ്രസീലും പെറുവും തമ്മില്‍ നടക്കും. മരക്കാന സ്‌റ്റേഡിയത്തില്‍ ഞായറാഴ്ച രാത്രിയാണ് കലാശപ്പോര്.

ആദ്യ പകുതിയില്‍ തന്നെ എഡിസന്‍ ഫ്‌ളോറസും യോഷിമര്‍ യോട്ടനും പെറുവിനായി ലീഡ് നേടി. ഇഞ്ചുറി ടൈമില്‍ പാബ്ലോ ഗ്വറേറോ കൂടി സ്‌കോര്‍ ചെയ്തതോടെ ചിലിയുടെ പതനം പൂര്‍ണമായി. കരുത്തരായ ആലക്‌സിസ് സാഞ്ചസും അര്‍തുറോ വിദാലും എഡ്വാര്‍ഡോ വാര്‍ഗസും ചിലി നിരയില്‍ അണിനിരന്നിട്ടും കളി പിടിക്കാനായില്ല. എന്നാല്‍ മത്സരത്തിലുടനീളം നല്ല പ്രകടനമാണ് ചിലി കാഴ്ച വെച്ചത്. നിരവധി അവസരങ്ങള്‍ മുതലെടുക്കുന്നതില്‍ അവര്‍ പരാജയപ്പെട്ടു. 1975നു ശേഷം ഇതാദ്യമായാണ് പെറു കോപ്പ അമേരിക്കയുടെ ഫൈനലിലെത്തുന്നത്.

കോപ്പയില്‍ അര്‍ജന്റീന പുറത്തായിരിക്കുന്നു. ഇനിയും രാജ്യത്തിന് വേണ്ടി ഒരു കിരീടം എന്ന മെസ്സിയുടെ സ്വപ്‌നം വെറും സ്വപ്‌ന മാത്രമായി അവശേഷിക്കുന്നു. നിലവില്‍ ഫുട്‌ബോളില്‍ രണ്ട് ഇതിഹാസങ്ങളെയാണ് താരതമ്യം ചെയ്യാറുള്ളത്. പോര്‍ച്ചുഗല്‍ ക്യാപ്റ്റനും സൂപ്പര്‍ താരവുമായ ക്രിസ്റ്റ്യാനോ റൊണാള്‍ഡോയെയും ലയണല്‍ മെസ്സിയെയും.

കളിപ്പാടവത്തില്‍ ആര് കേമന്‍ എന്ന് പറയുന്നത് സാധ്യമല്ല. എന്നാല്‍ മൈതാനത്തെ ആത്മവിശ്വാസത്തില്‍ ക്രിസ്റ്റ്യാനോ ബഹുദൂരം മുന്നിലാണ്.
തന്റെ ടീമിനെതിരെ എതിരാളി ഗോള്‍ നേടിയാല്‍ മൈതാനത്ത് ക്രിസ്റ്റിയാനോ തലകുനിക്കാറില്ല. എന്നാല്‍ മെസ്സി മറിച്ചാണ്. റഷ്യയില്‍ നടന്ന ലോകകപ്പില്‍ മെസ്സിക്കെതിരെ വന്ന വിമര്‍ശനവും ഇതു തന്നെയായിരുന്നു. ഫുട്‌ബോളില്‍ ഒരു രാജ്യത്തിന്റെ ഭാരം ചുമക്കുന്ന താരങ്ങള്‍ തന്നെയാണ് മെസ്സിയും ക്രിസ്റ്റിയാനോയും, എന്നാല്‍ അത് സമ്മര്‍ദ്ദത്തിലേക്ക് വഴിവെക്കുന്നതാണ് മെസ്സിയുടെ പരാജയവും. നിലവിലെ യൂറോപ്പിന്റെ ചാമ്പ്യന്‍മാര്‍ പോര്‍ച്ചുഗലാണ്.

എടുത്ത് പറയാന്‍ മികച്ച താരങ്ങളുടെ പട്ടികയൊന്നും അവര്‍ക്കില്ലെങ്കിലും ടീമിന്റെ പതര്‍ച്ചയിലും ആത്മവിശ്വാസം നല്‍കാന്‍ കഴിയുന്ന ‘സി ആര്‍ 7’ അവരോടൊപ്പമുണ്ട്. മെസ്സി തലകുനിക്കുന്നത് കാണാന്‍ ഫുട്‌ബോള്‍ ലോകം കൊതിക്കില്ല. താലോലിച്ച് വളര്‍ത്തിയ മോഹങ്ങള്‍ നേടാന്‍ കഴിയാതെ വരുമ്പോള്‍ ഒറ്റക്കാവുന്നത് നിങ്ങളല്ല മിശിഹ മറിച്ച് ഫുട്‌ബോള്‍ പ്രേമിയാണ്. ഫുട്‌ബോള്‍ ലോകം കാത്തിരിക്കും പുല്‍മൈതാനത്ത് ഇടം കാല്‍ കൊണ്ടുള്ള താങ്കളുടെ ഇന്ദ്രജാലം തീരും വരെ.

‘അവര്‍ ഞങ്ങളെക്കാളും മികച്ച രീതിയിലായിരുന്നില്ല കളിച്ചിരുന്നത്, രണ്ടാം ഗോളിന് മുന്‍പ് ഞങ്ങളുടെ താരം ബ്രസീല്‍ പെനാല്‍ട്ടി ബോക്‌സില്‍ ഫൗള്‍ ചെയ്യപ്പെട്ടു എന്നാല്‍ റഫറി അത് ഫൗള്‍ ആയി അനുവദിച്ചില്ല. ഓട്ടമെന്റിയും അഗ്യൂറോയും ഇതുപോലെ പെനാല്‍ട്ടി ബോക്‌സില്‍ ഫൗള്‍ ചെയ്യപ്പെട്ടു എന്നാല്‍ അതും ഫൗളായി അനുവദിച്ചില്ല മെസ്സി പറഞ്ഞു.

‘തോല്‍വിയെ ന്യായീകരിക്കാനല്ല എന്റെ ശ്രമം. ഗ്രൗണ്ടില്‍ സംഭവിച്ചത് എന്താണെന്ന് ബോധ്യപ്പെടുത്തല്‍ മാത്രമാണ്’ മെസ്സി കൂട്ടിച്ചേര്‍ത്തു.
നിരവധി തവണ ആവശ്യപ്പെട്ടിട്ടും റഫറി ‘വാര്‍’ ഉപയോഗിക്കാത്തത് ഫുട്‌ബോള്‍ ലോകത്തും ഞെട്ടലാണ് ഉണ്ടാക്കിയിട്ടുള്ളത്.

ബൊലോഹൊറിസോണ്ട: കോപ്പ അമേരിക്ക ടൂര്‍ണമെന്റിലെ ആദ്യ സെമിയില്‍ ബ്രസീലിനു ജയം. ചിരവൈരികളായ ബ്രസീലും അര്‍ജന്റീനയും തമ്മിലുള്ള ഏറ്റുമുട്ടലില്‍ മറുപടിയില്ലാത്ത രണ്ടു ഗോളുകള്‍ക്കാണ് ബ്രസീലിന്റെ ജയം. തുടക്കം മുതല്‍ അക്രമിച്ചു കളിച്ച ബ്രസീല്‍ 19ാം മിനിറ്റില്‍ കിടിലന്‍ പാസിങ്ങിലൂടെ ആദ്യ ഗോള്‍ നേടുകയായിരുന്നു. ഗബ്രിയേല്‍ ജീസസാണ് ഗോള്‍ നേടിയത്. 71ാം മിനിറ്റില്‍ റോബര്‍ട്ടോ ഫിര്‍മിനോയുടെ വകയായിരുന്നു രണ്ടാമത്തെ ഗോള്‍. ജീസസ് നല്‍കിയ പാസില്‍ സുന്ദരമായ ഗോളായിരുന്നു അത്.

കളിയിലുടനീളം ഇരു ടീമുകളും മികച്ച പ്രകടനമാണ് കാഴ്ച വെച്ചത്. ഡാനി ആല്‍വസിന്റെ നേതൃത്വത്തില്‍ ആദ്യ മിനുറ്റില്‍ തന്നെ ബ്രസീലിന്റെ മുന്നേറ്റമായിരുന്നു കണ്ടത്. 15ാം മിനിറ്റില്‍ അര്‍ജന്റീനയുടെ മികച്ച ഒരു മുന്നേറ്റം കോര്‍ണര്‍ വഴങ്ങിയാണ് ബ്രസീല്‍ രക്ഷപ്പെടുത്തിയത്. 19ാം മിനിറ്റില്‍ അര്‍ജന്റീനയുടെ പ്രതിരോധ നിരയിലെ ദൗര്‍ബല്യം മുതലെടുത്ത് ബ്രസീല്‍ ആദ്യ ഗോള്‍ നേടി. ജീസസ് വകയായിരുന്നു ഗോള്‍ നേട്ടം. തുടര്‍ന്ന് മൈതാനത്ത് തുടരെ തുടരെ അര്‍ജന്റീനയുടെ മുന്നേറ്റങ്ങള്‍ കണ്ടെങ്കിലും ഗോള്‍ മാത്രം അകന്നു നിന്നു. മെസിയുടെ തുടരെ തുടരെയുള്ള മുന്നേറ്റങ്ങള്‍ കണ്ടെങ്കിലും ലക്ഷ്യത്തിലെത്തിക്കുന്നതില്‍ മാത്രം പരാജയപ്പെട്ടു.

രണ്ടാം പകുതി അര്‍ജന്റീനയുടെ മുന്നേറ്റത്തോടെയാണ് തുടങ്ങയത്. 51ാമത്തെ മിനുറ്റില്‍ മെസിയുടെ ഷോട്ട് ക്രോസ് ബാറിനു മുകളിലൂടെ പോയി. 56ാം മിനുറ്റില്‍ ബ്രസീല്‍ ഗോള്‍മുഖത്ത് അര്‍ജന്റീനയുടെ തുടരെ തുടരെയുള്ള ഷോട്ടുകള്‍ പായിച്ചെങ്കിലും പന്ത് കണക്ട് ചെയ്യുന്നതില്‍ പരാജയപ്പെടുകയായിരുന്നു. പിന്നീട് മാര്‍കസ് അകുനയെ മാറ്റി ഡിമരിയയെ കളത്തിലിറക്കിയെങ്കിലും കളി പിടിക്കാനായില്ല. ഒരു ഘട്ടത്തില്‍ മെസിയുടെ തകര്‍പ്പനൊരു ഫ്രീകിക് ബ്രസീല്‍ ഗോളി തടുത്തിട്ടു. മറ്റൊരു ഫ്രീകിക് മെസി പാഴാക്കുകയും ചെയ്തു. അവസാനത്തില്‍ ഡിബാലയെ ഇറക്കിയെങ്കിലും തോല്‍ക്കാനായിരുന്നു അര്‍ജന്റീനയുടെ വിധി.

നേരത്തെ പരഗ്വായെ 4-3നു പരാജയപ്പെടുത്തിയാണ് ബ്രസീല്‍ സെമിഫൈനല്‍ ടിക്കറ്റ് നേടിയത്. വെനസ്വേലയെ മറുപടിയില്ലാത്ത രണ്ടു ഗോളുകള്‍ക്ക് തകര്‍ത്ത് അര്‍ജന്റീനയും സെമിഫൈനല്‍ പ്രവേശനം നേടി.

നാളെ നടക്കുന്ന മത്സരത്തില്‍ പൂര്‍ണമായും വിജയം ആര്‍ക്കെന്ന് പ്രവചിക്കാന്‍ സാധിക്കില്ലെങ്കിലും നിലവിലെ ഫോമില്‍ ബ്രസീലിന് അര്‍ജന്റീനയേക്കാള്‍ സാധ്യത കല്‍പ്പിക്കാം. എന്നാല്‍ ലയണല്‍ മെസ്സി എന്ന സൂപ്പര്‍ താരത്തെ മറക്കാന്‍ സാധിക്കില്ല. ബ്രസീലിയന്‍ കോച്ചും താരവും കഴിഞ്ഞ ദിവസം മെസ്സിയുടെ തടയുന്നതിലാണ് പ്രാധാന്യം നല്‍കുന്നതെന്ന് പറഞ്ഞിരുന്നു. നിലവില്‍ കോപ്പയില്‍ ഫോമിലേക്ക് ഉയരാന്‍ മെസ്സിക്ക് സാധിച്ചിട്ടില്ലെങ്കിലും എപ്പോഴും ഫോമിലേക്ക് ഉയരാന്‍ സാധിക്കുന്ന താരമാണ് മെസ്സിയെന്ന് എതിര്‍ ടീമിന് വരെ വ്യക്തമാണ്. അര്‍ജന്റീനയുടെ പ്രതിരോധ നിര പലപ്പോഴും താളം കണ്ടെത്താന്‍ ബുദ്ധിമുട്ടുന്നതാണ് അവരുടെ പ്രധാന തലവേദന.

ബ്രസീല്‍ ടീമില്‍ കളിക്കുന്ന എല്ലാ താരങ്ങളും താളത്തിലാണ്. മികച്ച അറ്റാക്കിങ്, മിഡ്ഫീല്‍ഡ്, പ്രതിരോധം. വലകാക്കാന്‍ സൂപ്പര്‍മാനായി അലിസണ്‍ ബെക്കര്‍. ബ്രസീലിനെ തോല്‍പ്പിക്കാന്‍ അര്‍ജന്റീന നന്നായി വിയര്‍ക്കേണ്ടി വരും. നാളെ ഇന്ത്യന്‍ സമയം രാവിലെ ആറ് മണിക്ക് എല്ലാ പ്രവചനങ്ങളും മാറുമോ എന്ന് കാത്തിരിക്കാം.