Cow Death – Chandrika Daily

അലഞ്ഞുനടന്ന പശുക്കുട്ടി വാഹനമിടിച്ച് ചത്തു; ഡ്രൈവറെ ക്രൂരമായി മർദിച്ച് ഗോ സംരക്ഷകർ

webdesk14 — Thu, 04 Jul 2024 15:52:53 +0000

ശ്രീനഗർ: കശ്മീരിലെ കത്വയിൽ പശു കിടാവ് വണ്ടിയിടിച്ച് ചത്തതിനെ തുടർന്ന്, ഡ്രൈവർക്ക് ക്രൂര മർദനം. വാഹനത്തിന് മുന്നിലേക്ക് പശു കിടാവ് ചാടിയതാണ് അപകടത്തിനു കാരണം. സംഭവസ്ഥലത്ത് ഗോരക്ഷകരെന്ന് അവകാശപ്പെട്ട് എത്തിയ രൺവീർ സിങ് എന്നയാളും കൂട്ടാളികളും ചേർന്ന് ഡ്രൈവർ രമേഷിനെ പുറത്തേക്ക് വലിച്ചിടുകയും വടി ഉപയോഗിച്ച് ക്രൂരമായി മർദിക്കുകയും ചെയ്തു.

ഗുരുതര പരിക്കേറ്റ ഡ്രൈവർ രമേശ് കുമാറിനെ ആശുപത്രിയിൽ പ്രവേശിപ്പിച്ചു. സംഭവത്തിന്റെ വിഡിയോ സാമൂഹിക മാധ്യമങ്ങളിൽ പ്രചരിക്കുന്നുണ്ട്. അറിയാതെ സംഭവിച്ചതാണെന്നും തന്നെ മർദിക്കരുതെന്നും രമേശ് പറയുന്നത് വിഡിയോയിൽ കാണാം. എന്നാൽ, ഇത് ചെവികൊള്ളാതെ അക്രമിസംഘം മർദനം തുടർന്നു. സംഭവത്തെ തുടർന്ന് പ്രദേശത്ത് സംഘർഷാവസ്ഥ സൃഷ്ടിച്ചു. രമേശ് കുമാറിന്റെ കുടുംബവും നാട്ടുകാരും പ്രതിഷേധവുമായി രംഗത്തിറങ്ങി. രവീന്ദർ സിങ്ങിനെയും മറ്റു അക്രമികളെയും അറസ്റ്റ് ചെയ്യണമെന്ന് പ്രതിഷേധക്കാർ ആവശ്യപ്പെട്ടു.

ബുലന്ദ്ഷഹര്‍ കത്തുമ്പോള്‍ ‘ഷോ’ ആസ്വദിച്ച് യോഗിയും മന്ത്രിമാരും

chandrika — Tue, 04 Dec 2018 14:02:59 +0000

ലക്‌നോ: പശുവിനെ ചൊല്ലി ബുലന്ദ്ഷഹര്‍ കത്തിയെരിയുമ്പോള്‍ ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥും ഉപമുഖ്യമന്ത്രിമാരും ലൈറ്റ് ആന്റ് സൗണ്ട് ഷോ’ ആസ്വദിക്കുന്ന തിരക്കില്‍. പശുവിനെ കശാപ്പ് ചെയ്തുവെന്ന് ആരോപിച്ചാണ് ഹിന്ദു സംഘടനകള്‍ സംഘര്‍ഷമുണ്ടാക്കുകയും പൊലീസ് ഇന്‍സ്പെക്ടര്‍ അടക്കം രണ്ടു പേര്‍ കൊല്ലപ്പെടുകയും ചെയ്തപ്പോഴാണ് മുഖ്യമന്ത്രി പ്രദേശത്തേക്ക് തിരിഞ്ഞുപോലും നോക്കാതെ ഷോ ആസ്വദിക്കാന്‍ പോയത്. യോഗിയോടൊപ്പം ഉപമുഖ്യമന്ത്രിമാരായ കേശവ് പ്രസാദ് മൗര്യയും ദിനേഷ് ശര്‍മ്മയുമാണ് ഗൊരഖ്പുരില്‍ ലൈറ്റ് ആന്റ് സൗണ്ട് ഷോ ആസ്വദിച്ച് നേരം പോക്കിയത്. രാജസ്ഥാനില്‍ തെരഞ്ഞെടുപ്പ് പ്രചാരണത്തിന് ഉപമുഖ്യമന്ത്രിമാര്‍ കഴിഞ്ഞദിവസമാണ് തിരിച്ചെത്തിയത്. ഇവര്‍ ഒരുമിച്ച് ഷോ ആസ്വദിക്കുന്ന ചിത്രങ്ങള്‍ യോഗി ആദിത്യനാഥ് തന്നെയാണ് ട്വീറ്റ് ചെയ്തത്. ബുലന്ദ്ഷഹര്‍ കത്തിയെരിയുമ്പോള്‍ യോഗി ഷോ ആസ്വദിക്കുന്നു’ എന്ന അടിക്കുറിപ്പോടെ ഈ ചിത്രം സമൂഹ മാധ്യമങ്ങളില്‍ പ്രചരിക്കുകയാണ്. ഇന്നലെ ഛത്തീസ്ഗഡ് മുഖ്യമന്ത്രി രമണ്‍ സിങിനൊപ്പം കബാഡി പരിപാടിയിലും യോഗി പങ്കെടുത്തിരുന്നു. എന്നാല്‍ സംഭവം വിവാദമാകുമെന്ന് ഭയന്ന് മാധ്യമങ്ങള്‍ക്ക് പരിപാടിയില്‍ വിലക്ക് ഏര്‍പ്പെടുത്തി. സംഘര്‍ഷം രൂക്ഷമായിട്ടും മുഖ്യമന്ത്രിയോ മുതിര്‍ന്ന മന്ത്രിമാരോ എത്തിനോക്കാത്തത് കലാപം ആസൂത്രിതമാണെന്ന സംശയം ബലപ്പെടുത്തുന്നു.

സ്ത്രീകളേക്കാള്‍ സുരക്ഷിതര്‍ പശുക്കള്‍: മോദിക്കെതിരെ വീണ്ടും ശിവസേന

chandrika — Tue, 24 Jul 2018 03:45:10 +0000

ന്യൂഡല്‍ഹി: ബി.ജെ.പി- ശിവസേന തര്‍ക്കം കൂടുതല്‍ കലുഷിതമാവുന്നു. കേന്ദ്ര സര്‍ക്കാരിന്റെ ഭരണ പരാജയങ്ങള്‍ക്കെതിരെ വിമര്‍ശനവുമായി വീണ്ടും ശിവസേന അധ്യക്ഷന്‍ ഉദ്ധവ് താക്കറെ രംഗത്തെത്തി. സ്ത്രീകള്‍ക്ക് സുരക്ഷയൊരുക്കാന്‍ സാധികാത്ത സര്‍ക്കാര്‍ പശുക്കള്‍ക്ക് സംരക്ഷണമൊരുക്കുകയാണെന്നാണ് താക്കറെയുടെ ആക്ഷേപം.
വര്‍ധിച്ചുകൊണ്ടിരിക്കുന്ന ആള്‍ക്കൂട്ട കൊലപാതകങ്ങളും ഭരണപരാജയമായാണ് ഉദ്ധവ് ചൂണ്ടിക്കാണിച്ചത്. ബിജെപിയുടെ ഹിന്ദുത്വ അജണ്ട വ്യാജമാണ്. ഞങ്ങള്‍ സര്‍ക്കാരിന്റെ ഭാഗം തന്നെയാണ്. പക്ഷേ എന്തെങ്കിലും തെറ്റു കണ്ടാല്‍ പ്രതികരിക്കും. ഞങ്ങള്‍ ഭാരതീയ ജനതയുടെ സുഹൃത്തുക്കളാണ്; അല്ലാതെ പാര്‍ട്ടിയുടേതല്ല- അദ്ദേഹം വ്യക്തമാക്കി.
ഈ രാജ്യത്ത് പശുക്കള്‍ സുരക്ഷിതരാണ്. പക്ഷേ സ്ത്രീകള്‍ ഒട്ടും സുരക്ഷിതരല്ല. പശുവിനെ കൊന്നുതിന്നണമെന്ന് ഞങ്ങള്‍ പറയുന്നില്ല. പക്ഷേ, ഗോരക്ഷയുടെ പേരില്‍ മറ്റുള്ളവര്‍ ബീഫ് കഴിക്കുന്നുണ്ടോ ഇല്ലയോ എന്ന് നിരീക്ഷിക്കുന്നത് നാണക്കേടാണ്. അത് ഹിന്ദുത്വമല്ല. ഇത്തരത്തില്‍ രാജ്യത്ത് ബലമായി അടിച്ചേല്‍പ്പിക്കപ്പെടുന്ന ഹിന്ദുത്വ അജണ്ട അംഗീകരിക്കാനാവില്ല. നമ്മുടെ സ്ത്രീകള്‍ അരക്ഷിതരാണ്. പക്ഷേ നിങ്ങള്‍ പശുക്കളെ രക്ഷിക്കാന്‍ നടക്കുകയാണ്.- ബിജെപിയെ വിമര്‍ശിച്ചകൊണ്ട് അദ്ദേഹം പറഞ്ഞു.
ദേശീയതയെക്കുറിച്ചും ദേശവിരുദ്ധതയെക്കുറിച്ചുമുള്ള ബിജെപിയുടെ കാഴ്ചപ്പാട് തെറ്റാണ്. സര്‍ക്കാരിനെ വിമര്‍ശിക്കുന്നവരെല്ലാവരും ദേശവിരുദ്ധരാണെന്ന ധാരണ തെറ്റാണ്. എംപിമാര്‍ ജനങ്ങളുടെ പ്രതിനിധികളാണ്. അവര്‍ക്ക് ചോദ്യം ചോദിക്കാനുള്ള അവകാശമുണ്ട്. ഉദ്ധവ് താക്കറേ പറഞ്ഞു.
പാര്‍ലമെന്റിന്റെ അകത്തും പുറത്തും ബിജെപിക്കെതിരെ രൂക്ഷമായ വിമര്‍ശനങ്ങളാണ് ശിവസേന ഉന്നയിച്ചുകൊണ്ടിരിക്കുന്നത്. ശിവസേനയുടെ തോളില്‍ കയറി നിന്ന് ചെവികടിക്കാന്‍ ആരെയും അനുവദിക്കില്ലെന്ന് ബിജെപിയെ സൂചിപ്പിച്ച് കഴിഞ്ഞ ദിവസം ഉദ്ധവ് താക്കറെ തുറന്നടിച്ചിരുന്നു.

പശുക്കളെ മോഷ്ടിച്ചെന്ന് ആരോപിച്ച് മുസ്‌ലിംകളെ കൊലപ്പെടുത്തിയ ഗോരക്ഷാ പ്രവര്‍ത്തകരുടെ കോടതി ചിലവ് വഹിക്കും: ബി.ജെ.പി എം.പി നിശികാന്ത് ദൂബെ

chandrika — Sun, 17 Jun 2018 09:49:58 +0000

പശുക്കളെ മോഷ്ടിച്ചെന്ന് ആരോപിച്ച് മുസ്‌ലിംകളെ കൊലപ്പെടുത്തിയ ഗോരക്ഷാ പ്രവര്‍ത്തകരുടെ കോടതി ചിലവ് വഹിക്കുമെന്ന വിവാദ പ്രസ്താവനയുമായി ബി.ജെ.പി എം.പി നിശികാന്ത് ദൂബെ. സംഭവത്തിനെതിരെ പ്രതിഷേധം ശക്തമാകുന്നതിനിടെയാണ് എം.പിയുടെ പ്രസ്താവന. കഴിഞ്ഞ ജൂണ്‍ 13ന് ജാര്‍ഖണ്ഡിലെ ഗൊദ്ദയിലാണ് ചാര്‍കു അന്‍സാരി (35), മൂര്‍ത്താസാ അന്‍സാരി (30) എന്നിവര്‍ ഗോരക്ഷാ പ്രവര്‍ത്തകരുടെ മര്‍ദ്ദനത്തില്‍ കൊല്ലപ്പെട്ടത്. ഈ മണ്ഡലത്തില്‍ നിന്നുള്ള എം.പിയാണ് ദൂബെ.

പശുക്കളെ മോഷ്ടിച്ചതിന് ഗ്രാമത്തിലെ എല്ലാവരും ചേര്‍ന്നിട്ടാണ് യുവാക്കളെ മര്‍ദ്ദിച്ചത്. പിന്നെ എന്തിനാണ് നാല് പേരെ മാത്രം പ്രതിയാക്കിയത്. പാവപ്പെട്ട വ്യക്തികള്‍ക്ക് സൗജന്യമായി നിയമപരമായ സഹായം ലഭിക്കാന്‍ ഭരണഘടനാ അവകാശമുണ്ട്. അത്തരം വ്യക്തികള്‍ക്ക് സൗജന്യ നിയമ സഹായം ചെയ്യേണ്ടത് സംസ്ഥാനത്തിന്റെ കടമയാണ്. ഞാന്‍ ഈ പ്രദേശത്തെ ജനപ്രതിനിധിയാണ്. അവരെ സഹായിക്കാനുള്ള അവരുടെ കുടുംബത്തിന്റെ അഭ്യര്‍ത്ഥന ഞാന്‍ സ്വീകരിക്കുന്നു. സുപ്രീംകോടതി വരെ പോയിട്ടാണെങ്കിലും ഗോരക്ഷകരെ നിയമത്തിന്റെ പിടിയില്‍ നിന്ന് പുറത്തു കൊണ്ടുവരും ദൂബെ പറഞ്ഞു.

13 പശുക്കളെ മോഷ്ടിച്ചെന്നാരോപിച്ചാണ് ചാര്‍കു അന്‍സാരിയേയും മൂര്‍ത്താസാ അന്‍സാരിയേയും അടക്കം അഞ്ചുപേരെ ഗോരക്ഷാ പ്രവര്‍ത്തകര്‍ പിടികൂടിയത്. എന്നാല്‍ സംഘത്തിലെ മൂന്നുപേര്‍ ഓടി രക്ഷപ്പെടുകയായിരുന്നു. ഏതാണ്ട് 100 പേരടങ്ങുന്ന സംഘമാണ് ചാര്‍കുവിനേയും മൂര്‍ത്താസായേയും മര്‍ദ്ദിച്ച് കൊലപ്പെടുത്തിയത്. എന്നാല്‍ ഇവരില്‍ പശുക്കളെ നഷ്ടപ്പെട്ടുവെന്ന് പറയുന്നവരെയാണ് ഇപ്പോള്‍ കേസില്‍ പൊലീസ് പ്രതി ചേര്‍ത്തിരിക്കുന്നത്. ഇവര്‍ക്കൊപ്പം കണ്ടാലറിയാവുന്ന 100 പേര്‍ക്കെതിരെയും കേസ് എടുത്തിട്ടുണ്ട്.

മര്‍ദ്ദനത്തില്‍ കൊല്ലപ്പെട്ടവരുടെ കുടുംബത്തിന് സഹായം കൊടുക്കാന്‍ താങ്കള്‍ തയാറാണോ എന്ന് മാധ്യമപ്രവര്‍ത്തകര്‍ ചോദിച്ചപ്പോള്‍ തന്നോട് ആരും സഹായം അഭ്യര്‍ത്ഥിച്ചിട്ടില്ലെന്നും അങ്ങനെ ചെയ്താല്‍ സഹായം നല്‍കുമെന്നുമായിരുന്നു അദ്ദേഹത്തിന്റെ മറുപടി.

ജയ്പൂരില്‍ കാളയുടെ കുത്തേറ്റ വിദേശി മരിച്ചു

chandrika — Sun, 19 Nov 2017 15:19:39 +0000

ജയ്പൂര്‍: നഗരത്തിലെ മനാക് ചൗകിന് സമീപം ട്രിപ്പോളി ഗേറ്റില്‍ കാളയുടെ കുത്തേറ്റ് അര്‍ജന്റീനന്‍ പൗരന്‍ മരിച്ചു. 29കാരനായ ജോണ്‍ പാബ്ലോ ലാമ്പിയാണ് മരിച്ചത്.

#Jaipur: A foreign national dies after being attacked by a bull in Manak Chowk police station area. He was rushed to a hospital after injuries, and later succumbed pic.twitter.com/v8TZNU6JUA

— ANI (@ANI) November 19, 2017

കാളയുടെ കുത്തേറ്റ ഇയാളെ ആസപ്ത്രിയല്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല. നഗരത്തിലൂടെ കാഴ്ച കണ്ടു നടക്കുന്നതിനിടെ കാള ഇയാളെ ആക്രമിക്കുകയായിരുന്നു.

അതിനിടെ അര്‍ജന്റീനന്‍ പൗരന്റെ മരണത്തെ തുടര്‍ന്ന് നഗരത്തിലെ അനധികൃത ഗോശാലകള്‍ പൊളിച്ചു നീക്കല്‍ നടപടി മുന്‍സിപ്പല്‍ കോര്‍പ്പറേഷന്‍ ആരംഭിച്ചു.

പെഹ്‌ലുഖാന്‍ വധം: നീതി തേടി കുടുംബം; ഡല്‍ഹിയില്‍ സമരം തുടങ്ങി

chandrika — Sat, 16 Sep 2017 17:39:36 +0000

ന്യൂഡല്‍ഹി: രാജസ്ഥാനിലെ ആള്‍വാറില്‍ പശുഭീകരര്‍ ആക്രമിച്ചുകൊലപ്പെടുത്തിയ പെഹ്‌ലുഖാന്റെ കുടുംബം നീതി തേടി ഡല്‍ഹിയില്‍ സമരത്തിന്. മക്കളും അടുത്ത ബന്ധുക്കളും അടങ്ങുന്ന കുടുംബമാണ് ജന്തര്‍മന്ദറില്‍ ഏകദിന ഉപവാസം നടത്തിയത്. അക്രമികളെ നിയമത്തിനു മുന്നില്‍ കൊണ്ടുവരാന്‍ നടപടി സ്വീകരിച്ചില്ലെങ്കില്‍ സമരം ശക്തമാക്കുമെന്ന് കുടുംബം പറഞ്ഞു. പെഹ്‌ലുഖാന്‍ വധത്തിലെ ആറ് പ്രതികള്‍ക്കും ക്ലീന്‍ ചിറ്റ് നല്‍കി രാജസ്ഥാന്‍ പൊലീസ് കോടതിയില്‍ അന്വേഷണ റിപ്പോര്‍ട്ട് സമര്‍പ്പിച്ച പശ്ചാത്തലത്തിലാണ് കുടുംബം സമരം ഡല്‍ഹിയിലേക്ക് പറിച്ചു നട്ടത്.

സമരവേദിയിലെത്തും മുമ്പ് മുതിര്‍ന്ന കോണ്‍ഗ്രസ് നേതാവ് ദിഗ്‌വിജയ് സിങുമായി കൂടിക്കാഴ്ച നടത്തിയ കുടുംബം ഡല്‍ഹിയില്‍ വാര്‍ത്താ സമ്മേളനവും നടത്തി. പിതാവിനെ ആക്രമിക്കുന്നതിന്റെ വീഡിയോ മാധ്യമങ്ങളിലൂടെ ലോകം മുഴുവന്‍ കണ്ടതാണ്. ആ വീഡിയോയില്‍ കാണുന്നവര്‍ അല്ല തന്റെ പിതാവിനെ കൊന്നതെങ്കില്‍ പിന്നെ ആരാണെന്ന് പൊലീസ് പറയണമെന്ന് പെഹ്‌ലുഖാന്റെ മകന്‍ ഇര്‍ഷാദ് മാധ്യമങ്ങളോട് പറഞ്ഞു.
പിതാവിനൊപ്പം തന്നെയും പശുഭീകരര്‍ ആക്രമിച്ചിരുന്നു. സംഭവത്തിലെ ഇരയും പിതാവിന്റെ കൊലപാതകത്തിലെ ദൃക്‌സാക്ഷിയുമാണ് താന്‍. എന്നിട്ടും ഒരിക്കല്‍പോലും രാജസ്ഥാന്‍ പൊലീസ് തന്നെ വിളിപ്പിക്കുകയോ പ്രതികളെ തിരിച്ചറിയാന്‍ ആവശ്യപ്പെടുകയോ ചെയ്തിട്ടില്ല. 13 പ്രതികളുള്ളതില്‍ ആറു പേര്‍ക്കാണ് പൊലീസ് ക്ലീന്‍ ചിറ്റ് നല്‍കിയത്. ഇവര്‍ പുറത്തിറങ്ങുന്നത് തങ്ങളുടെ കുടുംബത്തിലെ മറ്റ് അംഗങ്ങള്‍ക്ക് കൂടി ഭീഷണിയാണ്. താന്‍ ജീവിച്ചിരിക്കുന്നിടത്തോളം കാലം നീതിക്കു വേണ്ടിയുള്ള നിയമപോരാട്ടം തുടരും. എന്നാല്‍ രാജസ്ഥാനിലാണെങ്കില്‍ അത് സാധ്യമാവില്ല. അതുകൊണ്ട് കേസ് രാജസ്ഥാന് പുറത്തേക്ക് മാറ്റണം. സുപ്രീംകോടതിയില്‍ മാത്രമാണ് ഇനി തങ്ങള്‍ക്ക് വിശ്വാസമുള്ളതെന്നും ഇര്‍ഷാദ് ഖാന്‍ കൂട്ടിച്ചേര്‍ത്തു.
പെഹ്‌ലുഖാന്റെ ഭാര്യ ജെബുന, എട്ടു വയസ്സുള്ള മകന്‍ ഇന്‍സാദ്, അമ്മാവന്‍ ഹുസൈന്‍ ഖാന്‍, ബന്ധുക്കളായ ഹകാമദ്ദീന്‍, ജമീല്‍ അഹമ്മദ് എന്നിവരും സമരത്തില്‍ പങ്കെടുക്കാന്‍ ഡല്‍ഹിയില്‍ എത്തിയിരുന്നു.

ചത്ത പശുക്കളെ കശാപ്പുകാര്‍ക്ക് വിറ്റ ബിജെപി നേതാവ് അറസ്റ്റില്‍

chandrika — Sun, 27 Aug 2017 01:49:07 +0000

ഛത്തീസ്ഗഢ്: പട്ടിണി മൂലവും രോഗം മൂലവും ചത്ത പശുക്കളെ അറവുകാര്‍ക്ക് വിറ്റ ബിജെപി നേതാവ് അറസ്റ്റില്‍. ബിജെപി നേതാവ് ഹരിഷ് വര്‍മയാണ് അറസ്റ്റിലായത്. പശുവിന്റെ എല്ലും തോലുമുള്‍പ്പെടെ ഇയാള്‍ വില്‍പന നടത്തിയതായും പൊലീസ് അറിയിച്ചു.

പശു സംരക്ഷണ സമിതിയായ ഗോ സേവാ ആയോഗ് പൊലീസിനു നല്‍കിയ പരാതിയെ തുടര്‍ന്നാണ് നടപടി.

ഛത്തീസ്ഗഢ് കാര്‍ഷിക കന്നുകാലി സംരക്ഷണ നിയമത്തിലെ നാല്, ആറ് വകുപ്പുകള്‍ പ്രകാരവും മൃഗങ്ങളോടുള്ള ക്രൂരത തടയുന്നതിനുള്ള നിയമത്തിലെ 11-ാം വകുപ്പു പ്രകാരവുമാണ് കേസെടുത്തിരിക്കുന്നത്.

300ഓളം പശുക്കള്‍ ഭക്ഷണം കിട്ടാതെ ചത്ത സംഭവത്തില്‍ ഹരീഷ് വര്‍മയെ നേരത്തെ പൊലീസ് അറസ്റ്റു ചെയ്തിരുന്നു.