രാജ്യവ്യാപകമായി നടക്കുന്ന ഓപ്പറേഷന്‍ നംഖോര്‍യുടെ ഭാഗമായി കേരളത്തിലെ കൊച്ചി, കോഴിക്കോട്, കോട്ടയം, തിരുവനന്തപുരം, മലപ്പുറം ജില്ലകളിലായി 18 കേന്ദ്രങ്ങളില്‍ പരിശോധന തുടരുന്നു.

പൃഥ്വിരാജിന്റെ ലാന്‍ഡ് റോവറും ദുല്‍ഖര്‍ സല്‍മാന്റെ നിസാന്‍ പട്രോളും കസ്റ്റംസ് കസ്റ്റഡിയിലെടുക്കും. ഭൂട്ടാന്‍ പട്ടാളം അഞ്ച് ലക്ഷം രൂപയ്ക്ക് വിറ്റ വാഹനങ്ങള്‍ ഹിമാചല്‍ പ്രദേശില്‍ രജിസ്റ്റര്‍ ചെയ്ത് 40 ലക്ഷം രൂപ വരെ വിലയ്ക്ക് കേരളത്തില്‍ വിറ്റതായി കണ്ടെത്തി.

കേരളത്തില്‍ അമ്പതിലധികം വാഹന ഇടപാട് ക്രമക്കേട് കണ്ടെത്തിയിട്ടുണ്ടെന്നും, 20ഓളം വാഹനങ്ങള്‍ നികുതി വെട്ടിച്ച് കടത്തിയതായും കസ്റ്റംസ് വ്യക്തമാക്കി.

മമ്മൂട്ടിയുടെ കൊച്ചിയിലെ പനമ്പിള്ളി നഗറിലെ വീടുകളിലും തിരുവനന്തപുരത്തെ വീടുകളിലും പരിശോധന നടന്നു. ദുല്‍ഖര്‍ 2010 മോഡല്‍ ലാന്‍ഡ് റോവര്‍ ഡിഫെന്‍ഡര്‍ വാങ്ങിയതായി കസ്റ്റംസ് കണ്ടെത്തി.

150ഓളം വാഹനങ്ങള്‍ ഭൂട്ടാനില്‍നിന്ന് കടത്തിയതായും, ഇതില്‍ 30-40 എണ്ണം കേരളത്തില്‍ വിറ്റതായും വിവരമുണ്ട്. 10 ലക്ഷം രൂപയ്ക്ക് വാങ്ങിയ വാഹനങ്ങള്‍ 35-45 ലക്ഷം വരെ വിറ്റതായി കണ്ടെത്തി. ഇടനിലക്കാര്‍ വ്യാജരേഖകള്‍ നല്‍കി പലരെയും കബളിപ്പിച്ചെന്നാണ് സംശയം.

സംസ്ഥാനത്തെ വിവിധ ആഡംബര വാഹന ഷോറൂമുകളിലും യൂസ്ഡ് കാര്‍ ഡീലര്‍ഷിപ്പുകളിലും പരിശോധന തുടരുന്നു. കോഴിക്കോട്, മലപ്പുറം ജില്ലകളിലായി ഏഴ് കേന്ദ്രങ്ങളില്‍ റെയ്ഡ് നടത്തി, 11 വാഹനങ്ങള്‍ കസ്റ്റഡിയിലെടുത്തു.