ഈ മാസം 12ന് ധാക്കയില്‍ നടന്ന പ്രചാരണ റാലിക്കിടെയാണ് അജ്ഞാതന്‍ ഉസ്മാന്‍ ഖാദിക്കെതിരെ വെടിയുതിര്‍ത്തത്. ഗുരുതരമായി പരിക്കേറ്റ ഖാദിയെ വിദഗ്ധ ചികിത്സയ്ക്കായി സിംഗപ്പൂരിലേക്ക് മാറ്റിയിരുന്നുവെങ്കിലും വ്യാഴാഴ്ച അദ്ദേഹം മരിച്ചു. മരണവാര്‍ത്ത പുറത്തുവന്നതോടെയാണ് രാജ്യത്തിന്റെ വിവിധ ഭാഗങ്ങളില്‍ പ്രതിഷേധം അക്രമാസക്തമായത്.

ശൈഖ് ഹസീന സ്ഥാനഭ്രഷ്ടയാക്കപ്പെട്ട് മുഹമ്മദ് യൂനുസിന്റെ നേതൃത്വത്തില്‍ ഇടക്കാല സര്‍ക്കാര്‍ അധികാരമേറ്റ ശേഷം ആദ്യമായാണ് രാജ്യത്ത് ഇത്തരമൊരു കലാപം നടക്കുന്നത്. പ്രതിഷേധക്കാര്‍ പിരിഞ്ഞുപോകണമെന്ന് സര്‍ക്കാര്‍ ആവശ്യപ്പെടുകയും ഖാദിയെ കൊലപ്പെടുത്തിയവരെ കണ്ടെത്തി കര്‍ശന ശിക്ഷ നല്‍കുമെന്ന് പ്രഖ്യാപിക്കുകയും ചെയ്തു. യുവാക്കള്‍ക്കിടയില്‍ വലിയ സ്വാധീനമുണ്ടായിരുന്ന ഖാദി, ഫെബ്രുവരിയില്‍ നിശ്ചയിച്ചിരിക്കുന്ന തെരഞ്ഞെടുപ്പില്‍ മത്സരിക്കാന്‍ തയ്യാറെടുക്കുന്നതിനിടെയാണ് കൊല്ലപ്പെട്ടത്.

പ്രക്ഷോഭത്തിനിടെ പ്രതോം അലോ, ഡെയ്‌ലി സ്റ്റാര്‍ എന്നീ പ്രമുഖ ബംഗ്ലാദേശി മാധ്യമങ്ങളുടെ ഓഫിസുകള്‍ അടിച്ചു തകര്‍ക്കുകയും തീയിടുകയും ചെയ്തു. ഇതേ തുടര്‍ന്ന് വെള്ളിയാഴ്ച ഈ പത്രങ്ങള്‍ അച്ചടിച്ച പതിപ്പുകള്‍ പ്രസിദ്ധീകരിച്ചില്ല. ഓണ്‍ലൈന്‍ എഡിഷനുകളെയും ആക്രമണം ബാധിച്ചു. അര്‍ധരാത്രിയോടെ ഉണ്ടായ ആക്രമണത്തില്‍ തീപിടിച്ച ഡെയ്‌ലി സ്റ്റാര്‍ ഓഫിസില്‍നിന്ന് 25ലധികം മാധ്യമപ്രവര്‍ത്തകരെ അഗ്‌നിശമന സേന രക്ഷപ്പെടുത്തി.

ബംഗ്ലാദേശ് സ്ഥാപക പ്രസിഡന്റ് ശൈഖ് മുജീബുര്‍ റഹ്‌മാന്റെ ധാക്കയിലെ വസതിയിലേക്കും പ്രക്ഷോഭകാരികള്‍ ആക്രമണം നടത്തി. ധാക്കയിലെ ഇന്ത്യന്‍ ഹൈകമീഷനു മുന്നിലും പ്രതിഷേധക്കാര്‍ കുത്തിയിരുന്ന് പ്രതിഷേധിച്ചു. തുറമുഖ നഗരമായ ചിറ്റഗോങ്ങിലേക്കും പ്രക്ഷോഭം വ്യാപിച്ചതായി റിപ്പോര്‍ട്ടുണ്ട്.

രാജ്യത്തെ ക്രമസമാധാനനില വിലയിരുത്താന്‍ ഇടക്കാല സര്‍ക്കാര്‍ തലവന്‍ മുഹമ്മദ് യൂനുസ് ഉന്നതതല യോഗം വിളിച്ചിട്ടുണ്ട്. ഉച്ചതിരിഞ്ഞ് നടക്കുന്ന യോഗത്തില്‍ സുരക്ഷാ സാഹചര്യം വിശദമായി അവലോകനം ചെയ്യും. ഉസ്മാന്‍ ഖാദിയുടെ മരണത്തില്‍ അനുശോചിച്ച് ശനിയാഴ്ച ദേശീയ ദുഃഖാചരണം പ്രഖ്യാപിച്ചിട്ടുണ്ട്.