ആശുപത്രിയുടെ ഒരു നില ദാവൂദിന് വേണ്ടി മാത്രം നീക്കിവച്ചിരിക്കുകയാണ്. ആശുപത്രിയിലെ ഉന്നത അധികൃതരേയും അടുത്ത കുടുംബാംഗങ്ങളേയും മാത്രമാണ് ഇവിടേക്ക് പ്രവേശിപ്പിക്കുന്നത്. ദാവൂദിനെക്കുറിച്ച് കൂടുതൽ വിവരങ്ങൾ ലഭിക്കാനുള്ള ശ്രമത്തിലാണ് മുംബൈ പൊലീസ്. രണ്ടാം വിവാഹത്തിനു ശേഷം ദാവൂദ് കറാച്ചിയിലാണ് താമസിക്കുന്നതെന്ന് ദാവൂദിന്റെ സഹോദരിയുടെ മകൻ വെളിപ്പെടുത്തിയിരുന്നു.

അതീവ സുരക്ഷയുള്ള ആര്‍തര്‍ റോഡ് ജയിലില്‍ മാത്രമേ തന്നെ തടവില്‍ പാര്‍പ്പിക്കാവൂ എന്നതാണ് ദാവൂദിന്റെ പ്രധാന നിബന്ധന. മുതിര്‍ന്ന അഭിഭാഷകനും കേന്ദ്രമന്ത്രിയുമായിരുന്ന രാം ജത്മലാനിയോട് ദാവൂദ് കീഴടങ്ങാനുള്ള സന്നദ്ധത അറിയിച്ചിരുന്നു. എന്നാല്‍ അന്ന് ഉപാധികള്‍ അംഗീകരിക്കാന്‍ കേന്ദ്രസര്‍ക്കാര്‍ തയ്യാറാവാതിരുന്നതാണ് ചര്‍ച്ചകള്‍ വഴിമുട്ടാന്‍ കാരണമെന്ന് കെസ്വാനി പറഞ്ഞു.

ആറ് മാസം മുമ്പ് മഹാരാഷ്ട്ര നവനിര്‍മാണ്‍ സേന തലവന്‍ രാജ് താക്കറെയും സമാനമായ വെളിപ്പെടുത്തല്‍ നടത്തിയിരുന്നു. ദാവൂദ് കീഴടങ്ങാന്‍ ആഗ്രഹിക്കുന്നുവെന്നും അതിനായി മോദി ഗവണ്‍മെന്റുമായി വിലപേശല്‍ നടത്തുന്നുണ്ടെന്നുമായിരുന്നു അന്ന് താക്കറെ പറഞ്ഞത്.

കാലിലുണ്ടായ പഴുപ്പിനെ തുടര്‍ന്ന് 61 കാരനായ ദാവൂദ് പാകിസ്ഥാനില്‍ ചികിത്സയിലാണെന്ന് കഴിഞ്ഞ വര്‍ഷം വാര്‍ത്തകളുണ്ടായിരുന്നു. ലിയാഖത് നാഷനല്‍ ഹോസ്പിറ്റലിലും കമ്പൈന്‍ഡ് മിലിട്ടറി ഹോസ്പിറ്റലിലുമാണ് അന്ന് ചികില്‍സ നടന്നത്. രോഗം കാരണം നടക്കാന്‍ വരെ ദാവൂദ് ബുദ്ധിമുട്ടുകയാണെന്നും റിപ്പോര്‍ട്ടിലുണ്ടായിരുന്നു. എന്നാല്‍, ദാവൂദിന് എന്ത് സംഭവിച്ചാലും അക്കാര്യം വെളിപ്പെടുത്താന്‍ പാകിസ്താന്‍ തയ്യാറാകില്ലെന്നാണ് ഇന്ത്യ കരുതുന്നത്.

മുംബൈ സ്ഫോടന പരമ്പരയുടെ സൂത്രധാരനും അധോലോക കുറ്റവാളിയുമായ ദാവൂദ് ഇബ്രാഹിമിനെ കൈമാറണമെന്നാവശ്യപ്പെട്ട് ഇന്ത്യ പല തവണ പാകിസ്താനെ സമീപിച്ചിരുന്നു. അപ്പോഴെല്ലാം ദാവൂദ് രാജ്യത്തില്ലെന്നാണ് പാക്സ്ഥാന്‍ വ്യക്തമാക്കിയത്.

മുംബൈ സ്‌ഫോടന പരമ്പരയുടെ സൂത്രധാരനും അധോലോക കുറ്റവാളിയുമായ ദാവൂദ് കറാച്ചിയില്‍ ഉണ്ടെന്നതായി വ്യക്തമാക്കുന്ന നിരവധി തെളിവുകള്‍ ഇന്ത്യ നേരത്തെ കൈമാറിയിരുന്നെങ്കിലും അതെല്ലാം പാകിസ്താന്‍ നിഷേധിക്കുകയായിരുന്നു.

നേരത്തെ ഒളികാമറ ഓപ്പറേഷനിലൂടെ ദേശിയ ചാനല്‍ നടത്തിയ അന്വേഷണത്തില്‍ പാകിസ്താനിലുള്ള ദാവൂദിന്റെ വീടിന്റെ നമ്പര്‍ അടക്കമുള്ള വിവരങ്ങള്‍ പുറത്തുവന്നിരുന്നു. കറാച്ചിയിലെ സമ്പന്നര്‍ താമസിക്കുന്ന മേഖലയാണ് ക്ലിഫ്റ്റണില്‍ കഴിയുന്ന ദാവൂദിന്റെ വിലാസം, ഡി 3, ബ്ലോക്ക് 14 എന്നാണെന്ന് ചാനല്‍ പുറത്തുവിട്ട വിവരം.