ദീപ ജയകുമാര്‍ തെരഞ്ഞെടുപ്പ് ഗോദയില്‍; ഉപതെരഞ്ഞെടുപ്പില്‍ മല്‍സരിക്കുമെന്ന് പ്രഖ്യാപനം

chandrika — Fri, 24 Feb 2017 15:33:13 +0000

ചെന്നൈ: രാഷ്ട്രീയ പ്രവേശനത്തിന്റെ ഭാഗമായി ജയലളിതയുടെ സഹോദരപുത്രി ദീപ ജയകുമാര്‍ പുതിയ സംഘടന പ്രഖ്യാപിച്ചു. ‘എം.ജി.ആര്‍ അമ്മ പേരവൈ’ എന്നാണ് സംഘടനയുടെ പേര്. ഉപതെരഞ്ഞെടുപ്പില്‍ അമ്മയുടെ മണ്ഡലമായ ആര്‍.കെ നഗറില്‍ മല്‍സരിക്കുമെന്നും ദീപ വ്യക്തമാക്കി. ജയയുടെ 69ാം പിറന്നാള്‍ ദിനത്തില്‍ സംഘടിപ്പിച്ച ചടങ്ങില്‍ എം.ജി.ആറിന്റെയും ജയലളിതയുടെയും ചിത്രമടങ്ങുന്ന പാര്‍ട്ടി പതാകയും അവര്‍ പുറത്തിറക്കി. അണ്ണാ ഡി.എം.കെയുടെ പൈതൃകം തിരിച്ചുപിടിക്കുകയാണ് തന്റെ ലക്ഷ്യമെന്ന് ദീപ പറഞ്ഞു. ‘ജയലളിതയുടെ യഥാര്‍ത്ഥ പിന്‍ഗാമി താനാണ്. അണ്ണാ ഡി.എം.കെയെ ഗൂഢാലോചന സംഘത്തിന്റെ കയ്യില്‍ നിന്നു മോചിപ്പിക്കും. തമിഴ്‌നാട്ടില്‍ ജനാധിപത്യം കൊലചെയ്യപ്പെട്ടു. അമ്മയുടെ സ്വപ്‌ന പദ്ധതികള്‍ യാഥാര്‍ത്ഥ്യമാക്കാന്‍ പോരാട്ടം തുടരും’- ജയലളിതയുടെ സഹോദരന്‍ ജയകുമാറിന്റെ മകളായ ദീപ കൂട്ടിച്ചേര്‍ത്തു. ശശികലയെ രൂക്ഷമായി വിമര്‍ശിച്ച അവര്‍ 33 വര്‍ഷം അമ്മയെ സേവിച്ചത് പാര്‍ട്ടി ജന.സെക്രട്ടറിയും മുഖ്യമന്ത്രിയും ആകാനുള്ള യോഗ്യതയല്ലെന്നും പറഞ്ഞു. പ്രവര്‍ത്തകരുടെ പിന്തുണയോടെ അണ്ണാ ഡി.എം.കെ പിടിച്ചെടുക്കുകയാണ് ദീപയുടെ ലക്ഷ്യമെന്നാണ് സൂചന. പുതിയ രാഷ്ട്രീയ പാര്‍ട്ടി രൂപീകരിക്കുമെന്ന പ്രഖ്യാപനത്തില്‍ നിന്നും ദീപ പിറകോട്ടുപോയത് ഇതുമൂലമാണെന്നാണ് വിലയിരുത്തല്‍. തന്റെ കീഴില്‍ പാര്‍ട്ടിയെ ഏകോപിപ്പിച്ച് കൊണ്ടുവരാനാണ് ദീപയുടെ ശ്രമം. ശശികലയെ പാര്‍ട്ടി സെക്രട്ടറിയാക്കാനുള്ള നീക്കത്തിനെതിരെ ആദ്യം പ്രതിഷേധമുയര്‍ന്നത് ആര്‍.കെ നഗര്‍ മണ്ഡലത്തിലായിരുന്നു. അമ്മയുടെ പിന്‍ഗാമി ദീപയാണെന്നും ആര്‍കെ നഗറില്‍ മല്‍സരിക്കണമെന്നും ഒരു വിഭാഗം അണികള്‍ ദീപയോട് ആവശ്യപ്പെടുകയും ചെയ്തു. ഇതിനു പിന്നാലെ രാഷ്ട്രീയ പ്രഖ്യാപനവുമായി ദീപ രംഗത്തെത്തിയിരുന്നു. ഉപതെരഞ്ഞെടുപ്പില്‍ മല്‍സരിക്കുമെന്ന് ദീപ വ്യക്തമാക്കിയതോടെ ആര്‍.കെ നഗര്‍ പിടിക്കുകയെന്നത് ശശികല ക്യാമ്പിന് വലിയ പ്രതിസന്ധിയാകും.

ജയലളിതയുടെ അപര പാര്‍ട്ടി പ്രഖ്യാപിച്ചു; പോസ്റ്റര്‍ തലൈവിയെ അനുകരിച്ച്

chandrika — Tue, 17 Jan 2017 08:09:24 +0000

ചെന്നൈ: ജയലളിതയുടെ സഹോദര പുത്രിയും അപരയുമായ ദീപ ജയകുമാര്‍ രാഷ്ട്രീയത്തിലേക്ക്. ചെന്നൈയില്‍ നടന്ന വാര്‍ത്താസമ്മേളനത്തില്‍ ദീപ പുതിയ പാര്‍ട്ടി രൂപീകരിക്കുന്നതായി പ്രഖ്യാപിച്ചു. ജനപിന്തുണ പിടിച്ചുപറ്റുന്നതിന് എംജിആറിന്റെ പ്രശസ്ത വാചകമായ എന്റെ രക്തത്തില്‍ രക്തമായ കൂടപ്പിറകളെ എന്നു പറഞ്ഞുകൊണ്ടായിരുന്നു ദീപ വാര്‍ത്താസമ്മേളനം ആരംഭിച്ചത്. ജയലളിത മരിച്ച് 40 ദിവസം പൂര്‍ത്തിയാകുന്നതിനിടെയാണ് ദീപയുടെ രാഷ്ട്രീയ പ്രവേശന പ്രഖ്യാപനം. ജയലളിതയെ അനുസ്മരിപ്പിക്കുന്ന രീതിയിലായിരുന്നു ദീപയുടെ നടപ്പും ചലനവുമെല്ലാം. കൂടാതെ ദീപയുടെ പോസ്റ്ററും ജയലളിതയെ ഓര്‍മിപ്പിക്കുന്നതായിരുന്നു. വസ്ത്രധാരണവും കൈവീശിക്കാണിക്കുന്നതുമെല്ലാം ജയലളിതയുടേതിനു സമാനമായിരുന്നു.

ജയലളിതയുടെ സ്ഥാനത്തേക്ക് മറ്റൊരാള്‍ വരുന്നത് തനിക്ക് അംഗീകരിക്കാനാവില്ലെന്നും തന്റെ രാഷ്ട്രീയ പ്രവേശനം പ്രവര്‍ത്തകരുടെ ആവശ്യമായിരുന്നുവെന്നും ദീപ പറഞ്ഞു. പാര്‍ട്ടിയുടെ ഭാവി പരിപാടികളെക്കുറിച്ച് ജയലളിതയുടെ ജന്മദിനമായ ഫെബ്രുവരി 24ന് പറയുമെന്നും അവര്‍ പറഞ്ഞു.
ജയലളിതയുടെ തോഴി ശശികല പാര്‍ട്ടിയുടെ നേതൃത്വമേറ്റെടുക്കുന്നതില്‍ അതൃപതിയുള്ള ഒരു വിഭാഗം നേതാക്കള്‍ നേരത്തെ ദീപയുമായി കൂടിക്കാഴ്ച നടത്തിയിരുന്നു.

deepa jayakumar – Chandrika Daily

ദീപ ജയകുമാര്‍ തെരഞ്ഞെടുപ്പ് ഗോദയില്‍; ഉപതെരഞ്ഞെടുപ്പില്‍ മല്‍സരിക്കുമെന്ന് പ്രഖ്യാപനം

ജയലളിതയുടെ അപര പാര്‍ട്ടി പ്രഖ്യാപിച്ചു; പോസ്റ്റര്‍ തലൈവിയെ അനുകരിച്ച്