കാലപ്പഴക്കംചെന്ന സംവിധാനങ്ങളെ സൈന്യത്തില്‍നിന്ന് മാറ്റിക്കൊണ്ടിരിക്കുകയാണ്. മനുഷ്യവിഭവശേഷിയുടെ വികാസമാണ് അഗ്നിപഥ് സ്കീം ലക്ഷ്യമിടുന്നത്. ഏത് സാഹചര്യത്തെയും നേരിടാന്‍ സൈന്യം തയാറാണെന്നും അദ്ദേഹം പറഞ്ഞു.

‘അഡ്വാന്‍സ്ഡ് ലൈറ്റ് ഹെലികോപ്റ്ററുമായി (എഎല്‍എച്ച്) സംയോജിപ്പിക്കുന്ന ഹെലിന ആന്റി ടാങ്ക് ഗൈഡഡ് മിസൈലുകള്‍, ലോഞ്ചറുകള്‍, അനുബന്ധ ഉപകരണങ്ങള്‍ എന്നിവയുടെ സംഭരണത്തിനായി ഡിഫന്‍സ് അക്വിസിഷന്‍ കൗണ്‍സില്‍ എഒഎന്‍ (അക്‌സെപ്റ്റന്‍സ് ഓഫ് നെസെസിറ്റി) അംഗീകരിച്ചു. ഈ മിസൈല്‍ ശത്രു ഭീഷണികളെ ചെറുക്കുന്നതിനുള്ള എഎല്‍എച്ചിന്റെ ആയുധവല്‍ക്കരണത്തിന്റെ ഒരു പ്രധാന ഭാഗമാണ്. ഇതിലൂടെ ഇന്ത്യന്‍ സൈന്യത്തിന്റെ ആക്രമണ ശേഷി ശക്തിപ്പെടും’ പ്രതിരോധമന്ത്രാലയം പറഞ്ഞു.

സര്‍ക്കാരിന്റെ പരീക്ഷണസംവിധാനങ്ങള്‍ സ്വകാര്യ ആയുധ നിര്‍മ്മാതാക്കളും ഉപയോഗിക്കുന്നത് പ്രതിരോധമേഖലയ്ക്ക് കൂടുതല്‍ കരുത്ത് നല്‍കുമെന്ന വിശദീകരണമാണ് പ്രതിരോധമന്ത്രാലയം നല്‍കുന്നത്. പ്രതിരോധമേഖലയെ ശക്തിപ്പെടുത്തുന്നതിന് തടസ്സമാകുന്ന പല ഘടകങ്ങളും ഇതോടെ ഇല്ലാതാകുമെന്നും രാജ്‌നാഥ് സിംഗ് പറഞ്ഞു.

രാജ്യത്ത് ഏകദേശം 222 സ്വകാര്യ കമ്പനികളാണ് പ്രതിരോധമേഖലയില്‍ പ്രവര്‍ത്തിക്കുന്നത്. പ്രതിരോധമേഖലയിലും സ്വകാര്യ പങ്കാളിത്തം ഉറപ്പുവരുത്തുന്നതാണ് സര്‍ക്കാരിന്റെ പുതിയ നീക്കം.പ്രതിരോധ മേഖലയിലെ സ്വകാര്യ പങ്കാളിത്തം അനുവദിക്കുന്നതുമായി ബന്ധപ്പെട്ട തീരുമാനത്തിന് മുന്‍പ് യാതൊരു ചര്‍ച്ചയും നടന്നില്ല എന്നത് കൂടുതല്‍ പ്രതിഷേധങ്ങളിലേക്കാണ് വഴിവെക്കുന്നത്.