defence news – Chandrika Daily

ഹരിപ്പാട് യുവ സൈനിക ഉദ്യോഗസ്ഥന്‍ കുഴഞ്ഞുവീണു മരിച്ചു

webdesk12 — Sun, 05 Feb 2023 14:37:54 +0000

ഹരിപ്പാട്: യുവ കരസേന ഉദ്യോഗസ്ഥന്‍ കുഴഞ്ഞ് വീണ് മരിച്ചു.ഹരിപ്പാട് വെട്ടുവേനി ലതികാഭവനില്‍ ഹരിദാസന്‍ പിള്ളയുടെയും ശ്രീലതയുടെയും മകന്‍ എച്ച്‌. ശ്രീജിത്താണ് (28) മരിച്ചത്. ഞായറാഴ്ച്ച രാവിലെ എട്ട് മണിയോടെയായിരുന്നു സംഭവം. ഹരിപ്പാട് മൂടയില്‍ ശ്രീകൃഷ്ണസ്വാമി ക്ഷേത്രത്തില്‍ തൈപ്പൂയ കാവടി കാണുന്നതിന് ബൈക്കിലെത്തിയ ശ്രീജിത് ദേഹാസ്വാസ്ഥ്യംഅനുഭവപ്പെട്ടതിനെ തുടര്‍ന്ന് തിരികെ വീട്ടിലെത്തി വെള്ളം കുടിക്കുന്നതിനിടയില്‍ കുഴഞ്ഞു വീഴുകയായിരുന്നു.

ഉടന്‍ തന്നെ ഹരിപ്പാട് താലൂക്ക് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. ശ്രീനഗറില്‍ ബദാമി ബാഗ് കണ്‍ടോന്‍ മെന്‍റ് 92 ബേസ് ആശുപത്രിയില്‍ ക്ലര്‍ക്കായിരുന്ന ശ്രീജിത്ത് 45 ദിവസത്തെ അവധിക്കായി കഴിഞ്ഞ 15 നാണ് നാട്ടിലെത്തിയത്. ഭാര്യ: ശ്രുതി വി.കുമാര്‍ . സംസ്കാരം പിന്നീട്.

സൈന്യം ഭാവിക്കുവേണ്ടി സജ്ജരായിരിക്കണം: രാജ്നാഥ് സിങ്

webdesk12 — Mon, 16 Jan 2023 01:38:44 +0000

സൈന്യം ഭാവിക്കുവേണ്ടി സജ്ജരായിരിക്കണമെന്നും റഷ്യ-യുക്രെയ്ന്‍ യുദ്ധത്തില്‍നിന്ന് സൈന്യം പാഠമുള്‍ക്കൊള്ളണമെന്നും കേന്ദ്ര പ്രതിരോധമന്ത്രി രാജ്നാഥ് സിങ് പറഞ്ഞു. ബംഗളൂരുവില്‍ ഞായറാഴ്ച നടന്ന രാജ്യത്തിന്റെ 75ാമത് കരസേന ദിന പരേഡിന്റെ സമാപനച്ചടങ്ങില്‍ സംസാരിക്കുകയായിരുന്നു അദ്ദേഹം. മുമ്ബ് ഇന്ത്യ സംസാരിക്കുമ്ബോള്‍ ആരുമത് ഗൗരവമായെടുത്തിരുന്നില്ലെന്നും എന്നാല്‍, ഇന്ന് ലോകം ഇന്ത്യയെ ശ്രദ്ധയോടെ കേള്‍ക്കുകയാണെന്നും രാജ്നാഥ് സിങ് പറഞ്ഞു.

കാലപ്പഴക്കംചെന്ന സംവിധാനങ്ങളെ സൈന്യത്തില്‍നിന്ന് മാറ്റിക്കൊണ്ടിരിക്കുകയാണ്. മനുഷ്യവിഭവശേഷിയുടെ വികാസമാണ് അഗ്നിപഥ് സ്കീം ലക്ഷ്യമിടുന്നത്. ഏത് സാഹചര്യത്തെയും നേരിടാന്‍ സൈന്യം തയാറാണെന്നും അദ്ദേഹം പറഞ്ഞു.

കശ്മീരില്‍ ഭീകരാക്രമണം; രണ്ട് ചുമട്ടുതൊഴിലാളികള്‍ വെടിയേറ്റ് കൊല്ലപ്പെട്ടു, സൈന്യത്തിനെതിരെ പ്രതിഷേധം

Test User — Fri, 16 Dec 2022 07:28:05 +0000

ജമ്മു കാശ്മീരിലെ രജൗരിയില്‍ ഭീകരര്‍ നാട്ടുകാരായ രണ്ടുപേരെ വെടിവെച്ചു കൊലപ്പെടുത്തി. സൈനിക ക്യാംപിലെ ചുമട്ട് തൊഴിലാളികളായ ഷൈലേന്ദര്‍ കുമാര്‍, കമല്‍ കിഷോര്‍ എന്നിവരെയാണ് കൊല്ലപ്പെടുത്തിയത്.ഇന്ന് പുലര്‍ച്ചെ 6.15 ഓടെയാണ് സൈനിക ക്യാംപിന് പുറത്തുവച്ച്‌ രണ്ടുപേര്‍ക്കും വെടിയേറ്റത്. പരിക്കേറ്റ ഒരാളെ ആശുപത്രിയില്‍ പ്രവേശിപ്പിച്ചു.

വെടിയുതിര്‍ത്തവരെ തിരിച്ചറിഞ്ഞിട്ടില്ലെന്നും തെരച്ചില്‍ തുടരുകയാണെന്നും സൈന്യം വ്യക്തമാക്കി. സുരക്ഷാ ഉദ്യോഗസ്ഥരുടെ വെടിയേറ്റാണ് തൊഴിലാളികള്‍ കൊല്ലപ്പെട്ടതെന്ന് ആരോപിച്ച്‌ നാട്ടുകാരില്‍ ചില‍‌ര്‍ ക്യാംപിന് മുന്നില്‍ പ്രതിഷേധിച്ചു. ജമ്മു – രജൗരി ദേശീയ പാത പ്രതിഷേധക്കാര്‍ ഉപരോധിച്ചു. പിന്നാലെ ഭീകരരാണ് വെടിവച്ചതെന്ന് സൈന്യം വ്യക്തമാക്കി. സൈന്യവും പോലീസും ജില്ലാ ഭരണകൂടവും സ്ഥലത്തെത്തി.