ദില്ലി തിരുവനന്തപുരം എയര്‍ ഇന്ത്യ വിമാനം പുറപ്പെട്ടാന്‍ ഏറെ വൈകിയതോടെ വിമാനത്താവളത്തില്‍ യാത്രക്കാര്‍ പ്രതിഷേധിച്ചു. പൈലറ്റില്ലെന്ന കാരണം പറഞ്ഞാണ് എയര്‍ ഇന്ത്യ വിമാനം വൈകിപ്പിച്ചത്. എട്ട് മണിക്കൂറിന് ശേഷം രാവിലെ 6 മണിക്കാണ് യാത്രക്കാരെ വിമാനത്തില്‍ കയറ്റിയത്. വിമാനം വൈകിയതോടെ പല രാജ്യങ്ങളില്‍ നിന്ന് വന്ന യാത്രക്കാരാണ് രാത്രിയില്‍ വിമാനത്താവളത്തില്‍ കുടുങ്ങിയത്. കടുത്ത അലംഭാവമാണ് എയര്‍ ഇന്ത്യയുടെ ഭാഗത്ത് നിന്ന് ഉണ്ടായതെന്ന് യാത്രക്കാരുടെ കൂട്ടത്തിലുള്ള പി സി വിഷ്ണുനാഥ് എം.എല്‍.എ പ്രതികരിച്ചു.

കൃത്യസമയത്ത് വിമാനത്തിലേക്ക് കയറാന്‍ വരിനില്‍ക്കാന്‍ അറിയിപ്പ് വന്നെങ്കിലും ഗേറ്റിനു സമീപംഎത്തിയപ്പോഴാണ് വിമാനം വൈകുമെന്ന് ജീവനക്കാര്‍ അറിയിച്ചത്. പുതിയ സമയം അറിയിക്കാന്‍ ജീവനക്കാര്‍ തയ്യാറാവാത്തതിനെത്തുടര്‍ന്ന് യാത്രക്കാര്‍ ബഹളം വെക്കാന്‍ തുടങ്ങി.

ഇത്രയും സമയം യാത്രക്കാര്‍ക്ക് വെള്ളംപോലും നല്‍കാന്‍ വിമാന അധിക#തര്‍ തയ്യാറായില്ലെന്ന് യാത്രക്കാര്‍ പറഞ്ഞു. യാത്രക്കാര്‍ ക്ഷുഭിതരായതോടെ ദുബൈയില്‍ നിന്ന് പകരം വിമാനം വരുന്നുണ്ടെന്നും 12 മണിയോടെ വിമാനം പുറപ്പെടുമെന്നുമുള്ള അറിയിപ്പാണ് വന്നത്. 21 മണിക്കൂറാണ് വിമാനം വൈകിയത്.