Delhi pollution – Chandrika Daily

ദീപാവലി: ഡല്‍ഹിയില്‍ അന്തരീക്ഷ മലിനീകരണം രൂക്ഷം; അഞ്ചുവര്‍ഷത്തേക്കാള്‍ കുറവെന്ന് കെജ്‌രിവാള്‍

chandrika — Tue, 29 Oct 2019 05:38:35 +0000

ന്യൂഡല്‍ഹി: ഡല്‍ഹി നഗരത്തിലെ മലിനീകരണ തോത് കഴിഞ്ഞ അഞ്ചുവര്‍ഷത്തേക്കാള്‍ കുറഞ്ഞതായി മുഖ്യമന്ത്രി അരവിന്ദ് കെജ്‌രിവാള്‍. ദീപാവലിക്ക് ശേഷം ഡല്‍ഹിയില്‍ അന്തരീക്ഷ മലിനീകരണം രൂക്ഷമായതായി മലിനീകരണ നിയന്ത്രണ ബോര്‍ഡിന്റെ കണ്ടെത്തലിന് പിന്നാലെയാണ് കെജ്‌രിവാളിന്റെ പ്രതികരണം. നഗരത്തിന്റെ പല ഭാഗങ്ങളിലും മലിനീകരണ തോത് 400ന് അടുത്തെത്തിയെന്നായിരുന്നു റിപ്പോര്‍ട്ട്.
അപ്പുറത്ത് നില്‍ക്കുന്ന ആളെ പോലും കാണാനാകാത്ത തരത്തിലുള്ള പുക മഞ്ഞ് ആവരണത്തോടെയായിരുന്നു നേരം പുലര്‍ന്നത്. വെയില്‍ ഉദിച്ചതോടെ നിലമെച്ചപ്പെട്ടിരുന്നു. എന്നാല്‍ കഴിഞ്ഞ തവണത്തെ അപേക്ഷിച്ച് ഇത്തവണ മലിനീകരണതോത് കുറവാണ്. മൊറാദാബാദ്, നോയിഡ അടക്കമുള്ള ഉത്തര്‍പ്രദേശിന്റെ അതിര്‍ത്തിമേഖലകളിലും ദ്വാരക അടക്കമുള്ള ഹരിയാനയുടെ അതിര്‍ത്തിമേഖലകളിലും അന്തരീക്ഷം അതീവ ഗുരുതരാവസ്ഥയിലാണെന്നും റിപ്പോര്‍ട്ടുണ്ടായിരുന്നു. ഹരിയാനയില്‍ വിളവെടുപ്പ് കഴിഞ്ഞ വയലുകള്‍ കത്തിക്കാന്‍ ആരംഭിച്ചതും മലിനീകരണ തോത് വര്‍ധിപ്പിക്കാന്‍ ഇടയാക്കിയിട്ടുണ്ട്.മുന്‍വര്‍ഷങ്ങളെ അപേക്ഷിച്ച് ഇത്തവണ നഗരവാസികള്‍ പടക്കം പൊട്ടിക്കുന്നതില്‍ നിയന്ത്രണം വരുത്തിയതായും വളരെ കുറവ് വന്നതായും കെജ്‌രിവാള്‍ പറഞ്ഞു. അഞ്ച് വര്‍ഷത്തിനിടയിലെ ദീപാവലിക്ക് ശേഷമുള്ള ഏറ്റവും മികച്ച വായു ഗുണനിലവാരമാണിത്. ഗുരുഗ്രാം, നോയിഡ, ഗാസിയാബാദ് എന്നിവിടങ്ങളില്‍ വലിയ തോതില്‍ പടക്കം പൊട്ടിച്ചതായി തോന്നുന്നുവെന്നും കെജ്രിവാള്‍ പറഞ്ഞു. കേന്ദ്ര മലിനീകരണ നിയന്ത്രണ ബോര്‍ഡിന്റെ ദേശീയ വായു ഗുണനിലവാര സൂചിക പ്രകാരം, രാവിലെ 11 ന് ആനന്ദ് വിഹാറില്‍ ഏറ്റവും മോശം എക്യുഐ 362 ആയിരുന്നു. കഴിഞ്ഞ വര്‍ഷം തലസ്ഥാനത്ത് രേഖപ്പെടുത്തിയ ഏറ്റവും മോശം എക്യുഐ 642 ആയിരുന്നു. 2017 ല്‍ എക്യുഐ 367 ആയിരുന്നു. 2016 ല്‍ 426 ഉം 2015 ല്‍ 327 ഉമായിരുന്നു. കൊണാട്ട് പ്ലേസില്‍ സംഘടിപ്പിച്ച നാല് ദിവസത്തെ ലേസര്‍ ഷോക്ക് നല്ല പ്രതികരണമാണ് ലഭിച്ചത്.
ദീപാവലിയില്‍ പടക്കം പൊട്ടിക്കുന്നതില്‍ നിയനത്രണം വരുത്തിയത് ഹിന്ദു വിരുദ്ധമാണെന്ന് ബിജെപി നേതാക്കള്‍ ആരോപിച്ചതായി കെജ്‌രിവാള്‍ പറഞ്ഞു. ബിജെപി ഡല്‍ഹിയിലെ ജനങ്ങളെ പരിഹസിക്കുകയാണെന്നും അദ്ദേഹം പറഞ്ഞു.

സ്ത്രീകള്‍ക്ക് സൗജന്യ പൊതുഗതാഗത സൗകര്യം പ്രഖ്യാപിച്ച് ഡല്‍ഹി സര്‍ക്കാര്‍

chandrika — Mon, 03 Jun 2019 11:35:04 +0000

മെട്രോ ട്രെയിനിലും പൊതു മേഖലാ ബസ്സുകളിലും സ്ത്രീകള്‍ക്ക് പൂര്‍ണമായി സൗജന്യ യാത്ര ഉറപ്പാക്കുന്ന പദ്ധതിയുമായി ഡല്‍ഹി സര്‍ക്കാര്‍.
മുഖ്യമന്ത്രി അരവിന്ദ് കെജ് രിവാള്‍ തന്നെയാണ് പുതിയ പദ്ധതി പ്രഖ്യാപിച്ചത്്. തീരുമാനം പ്രാബല്യത്തില്‍ വരുന്നതോടെ ബസ്, മെട്രോ ട്രെയിനുകളെ ആശ്രയിക്കുന്ന യാത്രക്കാരുടെ എണ്ണത്തില്‍ വന്‍ കുതിച്ചുചാട്ടമുണ്ടാവുമെന്നാണ് കണക്കുകൂട്ടല്‍.
പൊതുഗതാഗതം ഉപയോഗിക്കുന്നവരുടെ എണ്ണം വര്‍ധിപ്പിക്കുകയും അതുവഴി നിരത്തുകളിലെ ഗതാഗതക്കുരുക്കിന് അറുതി വരുത്തുകയുമാണ് പദ്ധതിയിലൂടെ ലക്ഷ്യമിടുന്നതെന്ന് ആപ്പ് സര്‍ക്കാര്‍ അവകാശപ്പെടുന്നു.
സ്ത്രീകളുടെ സൗജന്യ യാത്ര മൂന്ന് മാസത്തിനകം നടപ്പിലാക്കുമെന്നും പദ്ധതിക്കായി 700 കോടി സര്‍ക്കാര്‍ നീ്ക്കിവെച്ചതായും കെജ്‌രിവാള്‍ അറിയിച്ചു.

Delhi CM Arvind Kejriwal: On all DTC buses, cluster buses and metro trains women will be allowed to travel free of cost so that they have a safe travel experience and can access modes of transport which they were not able to, due to high prices. pic.twitter.com/KVqEWDIJAS
— ANI (@ANI) June 3, 2019

അതേസമയം അടുത്ത വര്‍ഷം നടക്കാനിരിക്കുന്ന നിയമസഭാ തെരഞ്ഞെടുപ്പ് മുന്നില്‍ കണ്ടാണ് ജനകീയ പ്രഖ്യാപനങ്ങള്‍ക്ക് എ.എ.പി സര്‍ക്കാര്‍ ഒരുങ്ങുന്നതെന്നാണ് സൂചന. ലോക്‌സഭാ തെരഞ്ഞെടുപ്പില്‍ നേരിട്ട കനത്ത തിരിച്ചടിയും പുതിയ തീരുമാനങ്ങള്‍ക്ക് പിന്നിലുണ്ടെന്നാണ് വിവരം.

പുതിയ പദ്ധതി തലസ്ഥാന നഗരിയെ വീര്‍പ്പുമുട്ടിക്കുന്ന ഗതാഗതക്കുരുക്കിന് വലിയ തോതില്‍ ആശ്വാസം പകരുമെന്നും കണക്കുകൂട്ടുന്നത്. അന്തരീക്ഷ മലിനീകരണത്തിന്റെ തോത് കുറച്ചുകൊണ്ടുവരാനും ഇത് സഹായിക്കുമെന്നാണ് കരുതുന്നു. ഗതാഗതക്കുരുക്കിന് പരിഹാരമായി നേരത്തെ ഒറ്റ, ഇരട്ട ട്രാഫിക് പരിഷ്‌കാരവുമായി ഡല്‍ഹി സര്‍ക്കാര്‍ രംഗത്തെത്തിയിരുന്നെങ്കിലും പിന്നീട് പലവിധ ഇളവുകള്‍ പ്രഖ്യാപിക്കേണ്ടി വന്നതോടെ ഉദ്ദേശിച്ച ഫലം ലഭിക്കാതെ പോയിരുന്നു.
ഗതാഗത വകുപ്പ് മന്ത്രി കൈലാഷ് ഗെഹ്്‌ലോട്ട് ഇതുസംബന്ധിച്ച് വിവിധ വകുപ്പു മേധാവികളുമായി ചര്‍ച്ചകള്‍ നടത്തി വരികയാണ്. ഗാര്‍ഹിക വൈദ്യുതി കണക്ഷനുകളുടെ ഫിക്‌സഡ് ചാര്‍ജ് വെട്ടിക്കുറക്കുന്ന കാര്യവും സര്‍ക്കാര്‍ പരിഗണനയിലാണ്. ഇതുസംബന്ധിച്ച ഔദ്യോഗിക പ്രഖ്യാപനങ്ങള്‍ ഇന്നുണ്ടാകുമെന്നാണ് സൂചന.

അതേസമയം സൗജന്യ യാത്രാ പദ്ധതി എളുപ്പത്തില്‍ നടപ്പാക്കാന്‍ കഴിയില്ലെന്നാണ് സര്‍ക്കാര്‍ വൃത്തങ്ങള്‍ നല്‍കുന്ന സൂചന. ഡല്‍ഹി ട്രാന്‍സ്‌പോര്‍ട്ട് കോര്‍പ്പറേഷന്റെ നിയന്ത്രണം പൂര്‍ണമായി സംസ്ഥാന സര്‍ക്കാറിനായതിനാല്‍ പൊതുമേഖലാ ബസ്സുകളിലെ സൗജന്യ യാത്രാ പദ്ധതി എളുപ്പത്തില്‍ നടപ്പാക്കാന്‍ കഴിയും. അതേസമയം ഡല്‍ഹി മെട്രോയില്‍ കേന്ദ്ര സര്‍ക്കാറിനും സംസ്ഥാന സര്‍ക്കാറിനും 50:50 സാമ്പത്തിക പങ്കാളിത്തമാണുള്ളത്. അതുകൊണ്ടുതന്നെ കേന്ദ്ര സര്‍ക്കാറിന്റെ അനുമതി കൂടി ഉണ്ടെങ്കില്‍ മാത്രമേ സൗജന്യ യാത്രാ പദ്ധതി നടപ്പാക്കാനാകൂ. നിലവിലെ രാഷ്ട്രീയ സാഹചര്യത്തില്‍ കേന്ദ്രം ഇതിന് തയ്യാറാകുമെന്ന് കരുതുന്നില്ല. മാത്രമല്ല, ഡല്‍ഹി മെട്രോ നാലാംഘട്ട വികസന പ്രവര്‍ത്തനങ്ങളുടെ കാര്യത്തില്‍ ഉള്‍പ്പെടെ കേന്ദ്രവും സംസ്ഥാനവും രണ്ടു തട്ടിലാണ്. സൗജന്യ യാത്രാ പദ്ധതി പ്രഖ്യാപിക്കുകയും കേന്ദ്രം ഇതിന് ഉടക്കുവെക്കുകയും ചെയ്താല്‍ നിയമസഭാ തെരഞ്ഞെടുപ്പില്‍ അതിനെ രാഷ്ട്രീയമായി ഉപയോഗപ്പെടുത്താനാവുമെന്ന കണക്കുകൂട്ടലിലാണ് എ.എ.പി നേതൃത്വം. അതുകൊണ്ടുതന്നെ കേന്ദ്രത്തിന്റെ അനുമതിക്ക് കാത്തുനില്‍ക്കാതെ പദ്ധതി പ്രഖ്യാപിക്കാനാണ് സാധ്യത.

ഒറ്റ-ഇരട്ട ഗതാഗത പരിഷ്‌കരണം ഡല്‍ഹി സര്‍ക്കാര്‍ ഉപേക്ഷിച്ചു

chandrika — Sat, 11 Nov 2017 14:20:26 +0000

ന്യൂഡല്‍ഹി: അന്തരീക്ഷ മലിനീകരണം കുറക്കുന്നതിന്റെ ഭാഗമായി ഒറ്റ- ഇരട്ട ഗതാഗത പരിഷ്‌കരണം വീണ്ടും കൊണ്ടുവരാനുള്ള നീക്കം ഡല്‍ഹി സര്‍ക്കാര്‍ വേണ്ടെന്നു വച്ചു. ദേശീയ ഹരിത ട്രൈബ്യൂണലിന്റെ അനുമതി ലഭിച്ചതിനു തൊട്ടുപിന്നാലെയാണ് പദ്ധതി ഉപേക്ഷിച്ചതായി ഡല്‍ഹി ഗതാഗത വകുപ്പ് മന്ത്രി കൈലാഷ് ഗെഹ്‌ലോട്ട് പറഞ്ഞത്. പരിഷ്‌കരണത്തിന് അനുമതി നല്‍കിയെങ്കിലും വനിതകള്‍ക്കും ഇരുചക്ര വാഹനങ്ങള്‍ക്കും മാത്രമായി ഇളവ് അനുവദിക്കരുതെന്ന് ഹരിത ട്രൈബ്യൂണല്‍ വ്യക്തമാക്കിയിരുന്നു. ഇതാണ് പദ്ധതി ഉപേക്ഷിക്കാന്‍ കാരണമെന്നും ഇന്നലെ അടിയന്തര മന്ത്രിസഭാ യോഗമാണ് ഗതാഗത പരിഷ്‌കരണം ഉപേക്ഷിക്കാന്‍ തീരുമാനിച്ചതെന്നും ഗെഹ്‌ലോട്ട് പറഞ്ഞു.

ഹരിത ട്രൈബ്യൂണല്‍ ഉത്തരവിനെ ബഹുമാനിക്കുന്നു. എന്നാല്‍ നിര്‍ദേശം നടപ്പാക്കുക ദുഷ്‌കരമാണ്. ഡല്‍ഹിയില്‍ 60 ലക്ഷത്തോളം ഇരുചക്ര വാഹനങ്ങള്‍ പ്രതിദിനം നിരത്തിലിറങ്ങുന്നുണ്ടെന്നാണ് കണക്ക്. ഇവയില്‍ പകുതി വാഹനങ്ങള്‍ നിരത്തില്‍നിന്ന് മാറ്റി നിര്‍ത്തിയാല്‍ ചുരുങ്ങിയത് 30 ലക്ഷം പേരെങ്കിലും പൊതുഗതാഗത സംവിധാനത്തെ ആശ്രയിക്കേണ്ടി വരും. ഇത്രയധികം പേരെ ഉള്‍കൊള്ളാനുള്ള ശേഷി നിലവില്‍ ഡല്‍ഹിയിലെ പൊതുഗതാഗത സംവിധാനത്തിന് ഇല്ലെന്ന് മന്ത്രി പറഞ്ഞു. സുരക്ഷ കണക്കിലെടുത്ത് സ്ത്രീകളേയും ഗതാഗത പരിഷ്‌കരണത്തില്‍ ഉള്‍പ്പെടുത്താന്‍ കഴിയില്ല. തിങ്കളാഴ്ച ഹരിത ട്രൈബ്യൂണല്‍ മുമ്പാകെ പുനഃപ്പരിശോധനാ ഹര്‍ജി നല്‍കും. അനുകൂല നിലപാട് ഉണ്ടായാല്‍ മറ്റൊരു ദിവസം മുതല്‍ ഗതാഗത പരിഷ്‌കരണം നടപ്പാക്കുന്നത് ആലോചിക്കുമെന്നും മന്ത്രി പറഞ്ഞു.

പുകമഞ്ഞില്‍ ദുരന്തഭൂമിയായി ഡല്‍ഹി; എക്‌സ്പ്രസ് ഹൈവേയില്‍ കൂട്ടിയിടിച്ചത് 18 വാഹനങ്ങള്‍

chandrika — Wed, 08 Nov 2017 07:57:59 +0000

ന്യൂഡല്‍ഹി: കാഴ്ചമറക്കും വിധം പുകമഞ്ഞ് ശക്തമായതിനാല്‍ ദേശീയ തലസ്ഥാനത്ത് ജനജീവിതം ദുസ്സഹമായി. ഡല്‍ഹി എക്‌സ്പ്രസ് ഹൈവേയില്‍ ശക്തമായ പുകയെത്തുടര്‍ന്ന് 18 വാഹനങ്ങള്‍ കൂട്ടിയിടിച്ചു. ആഗ്ര-നോയിഡ യമുന എക്‌സ്പ്രസ് ഹൈവേയില്‍ വാഹനങ്ങള്‍ ഒന്നിനു പിറകെ ഒന്നായി കൂട്ടിയിടിക്കുകയായിരുന്നു. അപകടത്തിന്റെ ഭീകരത വെളിവാക്കുന്ന ദൃശ്യങ്ങള്‍ സമൂഹമാധ്യമങ്ങളില്‍ പ്രചരിക്കുന്നുണ്ട്. ഇടിച്ച കാറുകളില്‍ നിന്ന് ആളുകള്‍ ഇറങ്ങിയോടുന്നതും വീഡിയോയില്‍ കാണാം. പകല്‍ സമയത്ത് പുകമഞ്ഞിന്റെ കാഠിന്യം വര്‍ധിച്ചതോടെയാണ് കാറുകള്‍ ഒന്നിനു പിറകെ ഒന്നായി കൂട്ടിയിടിച്ചത്. ഇരുപത് മീറ്റര്‍ അടുത്തുള്ളവരെ വരെ കാണാന്‍ സാധിക്കാത്ത വിധം പുക മൂടിയിരിക്കുകയാണ് ഡല്‍ഹിയില്‍. വ്യവസായ ശാലകളില്‍ നിന്നും വാഹനങ്ങളില്‍ നിന്നുമുള്ള പുകയും നവരാത്രി ആഘോഷങ്ങളുടെ ഭാഗമായി പടക്കങ്ങള്‍ പൊട്ടിച്ചപ്പോള്‍ ഉണ്ടായ പുകയും ചേര്‍ന്നാണ് ഡല്‍ഹിയുടെ അന്തരീക്ഷത്തെ മലീമസമാക്കിയത്. മുന്‍കരുതല്‍ നടപടിയുടെ ഭാഗമായി സംസ്ഥാനത്തെ സ്‌കൂളുകള്‍ക്ക് സര്‍ക്കാര്‍ മൂന്നു ദിവസത്തെ അവധി പ്രഖ്യാപിച്ചിട്ടുണ്ട്.

VID-20171108-WA0000