dembele – Chandrika Daily

ബാലണ്‍ ദ’ഓര്‍: ഡെംബലെയ്ക്ക് പുരസ്‌കാരം; യുവതാര പുരസ്‌കാരം യമാലിന്

webdesk17 — Tue, 23 Sep 2025 04:53:59 +0000

പാരീസ്: പിഎസ്ജിയുടെ ഫ്രഞ്ച് താരമായ ഒസ്മാന്‍ ഡെംബലെയാണ് ഈ വര്‍ഷത്തെ ബാലണ്‍ ദ’ഓര്‍ ജേതാവ്. ബാഴ്‌സലോണയുടെ കൗമാര താരം ലാമിന്‍ യമാല്‍ രണ്ടാം സ്ഥാനത്ത്.

വനിതകളില്‍ ബാഴ്‌സലോണയുടെ ഐറ്റാന ബോണ്‍മാറ്റി തുടര്‍ച്ചയായി രണ്ടാം തവണയും ജേതാവായി. ആഴ്‌സണലിന്റെ മരിയോന കാല്‍ഡെന്റി രണ്ടാം സ്ഥാനത്ത് എത്തി.

ഡെംബലെ 53 മത്സരങ്ങളില്‍ 35 ഗോളും 16 അസിസ്റ്റും നേടി പിഎസ്ജിക്ക് ലീഗ് കപ്പ്, ചാമ്പ്യന്‍സ് ലീഗ് കിരീടങ്ങള്‍ സമ്മാനിച്ചത് നിര്‍ണായകമായി. യമാല്‍ 18 ഗോളും 25 അസിസ്റ്റും നേടി ബാഴ്സയ്ക്ക് ആഭ്യന്തര കിരീടങ്ങള്‍ നേടി കൊടുത്തു.

യുവതാരത്തിനുള്ള കോപ ട്രോഫി യമാലിനും വനിതകളില്‍ ബാഴ്‌സലോണയുടെ വിക്കി ലോപ്പസിനും ലഭിച്ചു. മികച്ച കോച്ച് പുരുഷന്മാരില്‍ പിഎസ്ജിയുടെ ലൂയിസ് എന്റികെയും വനിതകളില്‍ ഇംഗ്ലണ്ടിന്റെ സറീന വിഗ്മാനും.

യാഷിന്‍ ട്രോഫി ഗോള്‍കീപ്പര്‍മാരില്‍ പിഎസ്ജിയുടെ ഡോണറുമ്മക്കും ചെല്‍സിയുടെ ഹന ഹാംപ്ടണും. ബെസ്റ്റ് സ്‌ട്രൈക്കര്‍ക്കുള്ള ഗെര്‍ഡ് മുള്ളര്‍ ട്രോഫി വിക്ടര്‍ യോക്കരസിനും ഇവാ പയോറിനും. മികച്ച ക്ലബ്ബായി പുരുഷന്മാരില്‍ പിഎസ്ജിയും വനിതകളില്‍ ആഴ്സണലും തെരഞ്ഞെടുത്തു.

അര്‍ജന്റീനയുടെ തോല്‍വിക്ക് ശേഷം മെസ്സിയോട് ഫ്രഞ്ച് താരം ഡെംബലെ പറഞ്ഞത്

ചന്ദ്രിക വെബ് ഡെസ്‌ക്‌ — Sun, 01 Jul 2018 05:13:19 +0000

മോസ്‌കോ: ഫ്രാന്‍സിന്റെ മിന്നും വേഗതയില്‍ അടിതെറ്റിയ അര്‍ജന്റീന ലോകകപ്പില്‍ നിന്ന് മടങ്ങുമ്പോള്‍ തന്റെ പ്രതിഭക്ക് മേല്‍ ലോകകിരീടത്തിന്റെ തിലകം ചാര്‍ത്തുകയെന്ന സ്വപ്‌നം ബാക്കിവെച്ചാണ് സൂപ്പര്‍ താരം ലയണല്‍ മെസ്സി റഷ്യയില്‍ നിന്ന് മടങ്ങുന്നത്. അര്‍ജന്റീന ആരാധകരുടെ ഏറെക്കാലത്തെ ആഗ്രഹമാണ് മെസ്സി രാജ്യത്തിനായി ഒരു കിരീടമുയര്‍ത്തുന്ന ദൃശ്യം. എന്നാല്‍ ലോക കിരീടത്തിന്റെ അഭാവം മെസ്സിയെന്ന പ്രതിഭയുടെ മികവിന് ഒരു കുറവല്ലെന്ന് വിമര്‍ശകര്‍ പോലും സമ്മതിക്കും.

ലോകകപ്പ് പ്രീ ക്വാര്‍ട്ടറില്‍ ഫ്രാന്‍സിനോട് തോറ്റ് മെസ്സിയും അര്‍ജന്റീനയും മടങ്ങുമ്പോള്‍ ഈ യാഥാര്‍ത്ഥ്യമാണ് ഫ്രാന്‍സിന്റെ യുവതാരവും ബാഴ്‌സലോണയില്‍ മെസ്സിയുടെ സഹതാരവുമായ ഒസ്മാനെ ഡെംബലെ പങ്കുവെക്കുന്നത്. ‘കരുത്തോടെ നില്‍ക്കൂ…നിങ്ങള്‍ എല്ലായിപ്പോഴും മികച്ചവന്‍ തന്നെയാണ്’ ഡെംബലെ ഫെയ്‌സ്ബുക്കില്‍ കുറിച്ചു. മത്സരത്തിന് ശേഷം മെസ്സിയെ ആശ്വസിപ്പിക്കുന്ന ഫോട്ടോയും ഡെംബലെ പങ്കുവെച്ചിട്ടുണ്ട്. നൈജീരിയക്കെതിരെ മെസ്സി ഗോള്‍ നേടിയപ്പോള്‍ ഡെംബലെ മെസ്സിയെ അഭിനന്ദിച്ചിരുന്നു.

മികച്ച പ്രകടനം കാഴ്ചവെച്ച ഫ്രാന്‍സിന്റെ യുവനിരക്കെതിരെ ശരാശരി പ്രകടനം നടത്തിയ അര്‍ജന്റീന 4-3നാണ് തോറ്റത്. അന്റോണിയോ ഗ്രിസ്മാന്‍, പവാര്‍ഡ്, എംബാപ്പെ എന്നിവരുടെ വകയായിരുന്നു ഫ്രാന്‍സിന്റെ ഗോളുകള്‍. എയ്ഞ്ചല്‍ ഡി മരിയ, മെക്കാര്‍ഡോ, സെര്‍ജിയോ അഗ്യൂറോ എന്നിവരാണ് അര്‍ജന്റീനക്കായി ഗോളുകള്‍ സ്‌കോര്‍ ചെയ്തത്.

വമ്പന്‍ ട്രാന്‍സ്ഫര്‍; ഉസ്മാന്‍ ഡെംബലെ ബാഴ്‌സലോണയില്‍

chandrika — Fri, 25 Aug 2017 19:15:31 +0000

ബാഴ്‌സലോണ: നെയ്മറിന്റെ ശൂന്യത നികത്താന്‍ ബാഴ്‌സലോണ ഫ്രഞ്ച് യുവ താരം ഉസ്മാന്‍ ഡെംബലെയെ സ്വന്തം കൂടാരത്തിലെത്തിച്ചു. 20 കാരനായ ഡെംബലെ ബൊറൂസിയ ഡോട്മണ്ടില്‍ നിന്നും 125 മില്യന്‍ ഡോളറിനാണ് സ്പാനിഷ് ജയന്റ്‌സ് അഞ്ചു വര്‍ഷ കരാറില്‍ സ്വന്തമാക്കിയത്. 125 മില്യന്‍ ഡോളറിന് പുറമെ മറ്റ് ഇനങ്ങളിലായി 42 മില്യന്‍ യൂറോ കൂടി ഡെംബലെക്ക് ലഭിക്കും. ബാഴ്‌സയില്‍ നിന്നും പി.എസ്.ജിയിലേക്ക് നെയ്മറിന്റെ കൂടുമാറ്റം കഴിഞ്ഞാല്‍ ഏറ്റവും വലിയ ട്രാന്‍സ്ഫര്‍ തുകയാണിത്. എഫ്.സി ബാഴ്‌സയും ബൊറൂസിയ ഡോട്മണ്ടും തമ്മില്‍ 125 മില്യന്‍ ഡോളറിന്റെ കരാറിലെത്തിയതായി ബാഴ്‌സലോണ പ്രസ്താവനയിലൂടെ അറിയിച്ചു.

Benvingut @Dembouz!
¡Bienvenido Dembélé!
Welcome Dembélé!
Bienvenue Dembélé!
#BeBarça pic.twitter.com/gTl0YXCEd6

— FC Barcelona (@FCBarcelona) August 25, 2017

ഫ്രാന്‍സിനു വേണ്ടി ഏഴ് മത്സരങ്ങളില്‍ ബൂട്ടണിഞ്ഞിട്ടുള്ള താരം ഞായറാഴ്ച വൈദ്യ പരിശോധക്കായി ബാഴ്‌സലോണയില്‍ എത്തും. കഴിഞ്ഞ വര്‍ഷെ റെന്നിസില്‍ നിന്നും വെറും 15 മില്യന്‍ യൂറോക്കാണ് ഡെംബലെയെ ഡോട്മണ്ട് സ്വന്തമാക്കിയത്. ഫ്രാന്‍സിന്റെ നെതര്‍ലന്‍ഡ്‌സ്, ലക്‌സംബര്‍ഗ് ടീമുകള്‍ക്കെതിരായ ലോകകപ്പ് യോഗ്യത മത്സരങ്ങള്‍ക്കുള്ള ടീമില്‍ നിന്നും ഡെംബലെയെ കോച്ച് ദിദിയര്‍ ഡെഷാംപ്‌സ് ഒഴിവാക്കിയിരുന്നു.

കുട്ടീന്യോയും ഡെംബാലയും ബാഴ്‌സയിലേക്ക്; സ്ഥിരീകരണവുമായി പെപ് സെഗൂര

chandrika — Thu, 17 Aug 2017 18:41:06 +0000

ബാഴ്‌സലോണ: ബ്രസീലിയന്‍ സൂപ്പര്‍ താരം നെയ്മര്‍ പിഎസ്ജിയിലേക്ക് പോയതിന് പിന്നാലെ എല്‍ ക്ലാസിക്കോയില്‍ നേരിട്ട കനത്ത പരാജയത്തിന്റെ ആഘാതത്തിലിരിക്കുന്ന ബാഴ്‌സ ആരാധകരെ തേടി ഒരു ആശ്വാസ വാര്‍ത്ത. നെയ്മറുടെ പകരക്കാരായി രണ്ട് സൂപ്പര്‍ യുവതാരങ്ങളാണ് ബാഴ്‌സയിലേക്കെത്തുന്നത്. ബൊറൂസിയ ഡോട്ട്മണ്ടിന്റെ ഉസ്മാന്‍ ഡെംബാലയും ലിവര്‍പൂളിന്റെ ഫിലിപ്പ് കുട്ടീന്യോയും. ബാഴ്‌സലോണ ജനറല്‍ മാനേജര്‍ പെപ് സെഗൂര ഇക്കാര്യം സ്ഥിരീകരിച്ചിട്ടുണ്ട്. ഇരുവരുമായുളള ബാഴ്‌സയുടെ കരാര്‍ അന്തിമ ഘട്ടത്തിലാണെന്ന് സെഗൂര അറിയിച്ചു. കുട്ടീന്യോയും ഡെംബാലയുടമായുളള കരാര്‍ അവസാന ഘട്ടത്തിലാണ്. ഇരുവരും ഉടന്‍ ബാഴ്‌സലോണ ജെഴ്‌സി അണിയും എന്ന് തന്നെയാണ് പ്രതീക്ഷിക്കുന്നത്. കരാര്‍ ഉറപ്പാണെന്നേ എനിക്ക് ഇപ്പോള്‍ പറയാനാകു. കൂടുതലൊന്നും ഇപ്പോള്‍ പറയാന്‍ നിര്‍വ്വാഹമില്ല. ഇരുവരുടേയും വരവ് ക്ലബിന് ഉണര്‍വ്വേകും’ ടിവി ത്രിയ്ക്ക് നല്‍കിയ അഭിമുഖത്തില്‍ സെഗുര പറഞ്ഞു. അതേ സമയം സെഗുരയുടെ അവകാശ വാദങ്ങള്‍ തെറ്റാണെന്നും ഡെംബാലയെ വിട്ടു നല്‍കുന്നതുമായി ബന്ധപ്പെട്ട് ഒരു തീരുമാനവും ഇതുവരെ ക്ലബ്ബ് എടുത്തിട്ടില്ലെന്നുമാണ് ബൊറൂസിയ സി.ഇ.ഒ ഹാന്‍സ് ജോക്വിം പറയുന്നത്. 20കാരനായ ഡെംബാലയുടേയും 25കാരനായ കുട്ടീന്യോയുടേയും വരവ് ബാഴ്‌സലോണയ്ക്ക് ഒരു പരിധി വരെ നഷ്ടപ്പെട്ട ആത്മവിശ്വാസം തിരിച്ച് പിടിക്കാന്‍ സാധിക്കുമെന്നാണ് വിലയിരുത്തുന്നത്. ബാഴ്‌സലോണയിലേക്ക് ഡെംബാല വരുന്ന വാര്‍ത്തകള്‍ കഴിഞ്ഞ ദിവസങ്ങളില്‍ സ്പാനിഷ് മാധ്യമങ്ങള്‍ സ്ഥിരീകരിച്ചിരുന്നു. 90 മില്യണ്‍ യൂറോയ്ക്കാണ് 20കാരന്‍ ബാഴ്‌സലോണയിലേക്ക് വരുന്നതെന്നാണ് സൂചന. ഡെംബാല ഡോട്ട്മുണ്ട് വിടുന്നതിന്റെ സൂചനയായി ഒരു കാറില്‍ ലഗേജുകള്‍ പാക്ക് ചെയ്യുന്ന ചിത്രവും മാധ്യമങ്ങളില്‍ പ്രചരിക്കുന്നുണ്ട്. കഴിഞ്ഞ സീസണില്‍ ആണ് ബൊറൂസിയ ഡോട്ട്മണ്ടില്‍ 20കാരനായ ഡെംബേല എത്തിയത്. 32 മത്സരങ്ങളില്‍ നിന്ന് ആറ് ഗോളുകളും ഈ യുവതാരം നേടിയിരുന്നു. ഇതിനിടെ ഫ്രഞ്ച് ദേശീയ ടീമിലും അരങ്ങേറിയ ഈ യുവതാരം ഏഴ് മത്സരങ്ങളില്‍ നിന്ന് ഒരു ഗോളും നേടിയിരുന്നു. അതെ സമയം കുട്ടീന്യോയാകട്ടെ ലിവര്‍പൂളിനോട് കടുത്ത നിലപാട് സ്വീകരിച്ചിരിക്കുകയാണെന്നും റിപ്പോര്‍ട്ടുകള്‍ പുറത്ത് വന്നിരുന്നു. ഈ സീസണില്‍ ഇനി ലിവര്‍പൂളിനായി ജഴ്‌സി അണിയില്ലെന്നാണ് കുട്ടീന്യോ പരിശീലകന്‍ യുര്‍ഗന്‍ ക്ലോപ്പിനെ അറിയിച്ചിരിക്കുന്നത്. ഇതോടെയാണ് ക്ലബ് ഒടുവില്‍ കുട്ടീന്യോയെ കൈമാറാന്‍ സന്നദ്ധമായതെന്നാണ് സൂചന. 2013ല്‍ 8.3 മില്യണ്‍ യൂറോയ്ക്കാണ് കുട്ടീന്യോ എസി മിലാനില്‍ നിന്ന് ലിവര്‍പൂളിലെത്തിയത്. 132 മത്സരങ്ങള്‍ ഇതിനോടകം ലിവര്‍പൂളിനായി താരം കളിച്ചിട്ടുണ്ട്.