ധാരണപത്രം ഒപ്പുവച്ച് സംസ്ഥാനങ്ങള്‍ വിദ്യാഭ്യാസ പദ്ധതികള്‍ ഏറ്റെടുക്കുന്നത് രാജ്യത്ത് ആദ്യമാണെന്നും ദേശീയ വിദ്യാഭ്യാസ നയത്തോട് ശക്തമായ വിയോജിപ്പ് പ്രകടിപ്പിക്കുന്ന കേരളം ഉള്‍പ്പെടെയുള്ള സംസ്ഥാനങ്ങളെയാണ് പിഎംശ്രീ പ്രധാനമായും ഉന്നം വയ്ക്കുന്നതെന്നും ലേഖനത്തില്‍ പറയുന്നു. ദേശീയ വിദ്യാഭ്യാസ നയം നടപ്പാക്കാനുള്ള ധാരണപത്രം ഒപ്പുവയ്ക്കുകയാണെങ്കില്‍ മാതൃകാ വിദ്യാലയങ്ങള്‍ സംസ്ഥാനത്ത് പ്രവര്‍ത്തനം ആരംഭിക്കുമെന്നും ലേഖനത്തില്‍ ചൂണ്ടിക്കാട്ടുന്നു. പുരോഗമന നവോത്ഥാന നായകരെയും അവരുടെ ആശയങ്ങളും പാഠപുസ്തകങ്ങളില്‍നിന്ന് ഒഴിവാക്കിയും ഭഗവത്ഗീത ഉള്‍പ്പെടുത്തിയും പഠനഭാരം കുറയ്ക്കാനെന്ന പേരില്‍, പുരോഗമന ആശയങ്ങളും മുഗള്‍ ഭരണകാലവും ഉള്‍പ്പെടുന്ന പാഠഭാഗങ്ങള്‍ എന്‍സിഇആര്‍ടി ഒഴിവാക്കിയതും നമ്മള്‍ കണ്ടതാണെന്നും ലേഖനം വ്യക്തമാക്കുന്നു.

ഇന്ത്യയുടെ അറിവിലും പൈതൃകത്തിലും അഭിമാനം കൊള്ളുക, ഭാരതത്തിന്റെ നാഗരിക ധാര്‍മികതയിലും മൂല്യങ്ങളിലും അഭിമാനം കൊള്ളുക, ഏക ഭാരതം ശ്രേഷ്ഠ ഭാരതം എന്ന ചൈതന്യം കുട്ടികളില്‍ വര്‍ധിപ്പിക്കുക…’ എന്നിങ്ങനെ പിഎംശ്രീ പദ്ധതി രേഖയിലും ദേശീയ വിദ്യാഭ്യാസ പദ്ധതിയിലെന്നപോലെ കേന്ദ്ര സര്‍ക്കാരിന്റെ ഗൂഢലക്ഷ്യം പച്ചയായി പ്രഖ്യാപിച്ചിട്ടുണ്ട്. മാതൃകാ വിദ്യാലയങ്ങളില്‍ ഇനി എന്താണ് നടക്കാന്‍ പോകുന്നതെന്ന് വ്യക്തമാണെന്നും മതനിരപേക്ഷതയെന്ന ഭരണഘടനാമൂല്യം കാറ്റില്‍പ്പറത്തിക്കൊണ്ട് ഒരു മതാധിഷ്ഠിത വിദ്യാഭ്യാസക്രമം ഇന്ത്യയില്‍ നടപ്പാക്കിത്തുടങ്ങിയിരിക്കുന്നു എന്നാണ് നാം ഭയപ്പാടോടെ തിരിച്ചറിയേണ്ടതാണെന്നും ലേഖനത്തില്‍ പറയുന്നു.