Director Ebrid shyne – Chandrika Daily

കാളിദാസ് നായകനാവുന്ന പൂമരത്തിന്റെ റിലീസ് ഡേറ്റ് പ്രഖ്യാപിച്ചു

chandrika — Mon, 20 Nov 2017 08:01:29 +0000

അനിശ്ചിതത്വങ്ങള്‍ നീങ്ങി കാളിദാസ് ജയറാം നായകനാകുന്ന ‘പൂമരം’ ചിത്രത്തിന്റെ റിലീസ് ഡേറ്റ് പ്രഖ്യാപിച്ചു. പൂമരം ഡിസംബര്‍ 24 ക്രിസ്തുമസ് ചിത്രമായി തിയേറ്ററുകളില്‍ എത്തുമെന്നാണ് അറിയുന്നത്. എബ്രിഡ് ഷൈന്‍ സംവിധാനം ചെയ്യുന്ന ചിത്രം എറണാകുളം മഹാരാജാസ് കോളേജിലാണ് കൂടുതലായും ചിത്രീകരിച്ചിരിക്കുന്നത്.

ആക്ഷന്‍ ഹീറോ ബിജുവിന് ശേഷം എബ്രിഡ് ഷൈന്‍ സംവിധാനം ചെയ്യുന്ന ചിത്രമാണ് പൂമരം. ചിത്രത്തില്‍ നിരവധി പുതുമുഖങ്ങള്‍ അഭിനയിക്കുന്നുണ്ട്. കഴിഞ്ഞദിവസം ‘പൂമരം’ പാട്ടിന്റെ ഒന്നാംവാര്‍ഷികം ആഘോഷിച്ച കാളിദാസ് ജയറാമിന് സാമൂഹ്യമാധ്യമങ്ങളുടെ ട്രോളുകളുണ്ടായിരുന്നു. സിനിമ ഇറങ്ങുന്നതിന് മുമ്പ് തന്നെ പാട്ട് ഹിറ്റായിരുന്നു. ഏറെ ശ്രദ്ധിക്കപ്പെട്ടിരുന്ന പാട്ടിനെ അന്നും സാമൂഹ്യമാധ്യമങ്ങള്‍ ട്രോളുകളിലൂടെയാണ് സ്വീകരിച്ചിരുന്നത്. പാട്ട് റിലീസായി ഒരു വര്‍ഷം ആഘോഷിക്കുമ്പോഴും പൂമരത്തിന് ട്രോളുകളെത്തിയെന്നതാണ് അതിശയിപ്പിക്കുന്നത്. ഒന്നാംവാര്‍ഷികം ആഘോഷിക്കുന്ന ചിത്രം കാളിദാസ് ജയറാം ഫേസ്ബുക്കില്‍ പോസ്റ്റ് ചെയ്തതോടെയാണ് ട്രോളുകള്‍ ചാടിവീണത്. ചിത്രം റിലീസ് ആകുന്നത് വൈകുന്നതിനാണ് ഇത്തവണ ട്രോളുണ്ടായത്. എന്നാല്‍ അതിനുശേഷമാണ് പൂമരം റിലീസ് പ്രഖ്യാപിക്കുന്നത്.

പാട്ടിന്റെ ട്രോളുകള്‍ ഏറെ ആസ്വദിച്ചിരുന്നുവെന്ന് കാളിദാസ് പറഞ്ഞിരുന്നു. കാളിദാസ് തന്നെ അവ ഫേസ്ബുക്കില്‍ പങ്കുവെച്ചിരുന്നു. കാളിദാസ് നായകനാകുന്ന മലയാളത്തിലെ ആദ്യത്തെ ചിത്രമാണ് പൂമരം.

‘പൂമരം’ പാട്ടിന്റെ ഒന്നാം വാര്‍ഷികവുമായി കാളിദാസ്; സിനിമ വൈകുന്നതിനെതിരെ പൊങ്കാലയിട്ട് സാമൂഹ്യമാധ്യമങ്ങള്‍

chandrika — Sun, 19 Nov 2017 09:36:15 +0000

‘പൂമരം’ പാട്ടിന്റെ ഒന്നാംവാര്‍ഷികം ആഘോഷിച്ച കാളിദാസ് ജയറാമിന് സാമൂഹ്യമാധ്യമങ്ങളുടെ പൊങ്കാല. എബ്രിഡ് ഷൈന്‍ സംവിധാനം ചെയ്യുന്ന ചിത്രത്തിലെ ഗാനമാണ് സിനിമ ഇറങ്ങുന്നതിന് മുമ്പ് തന്നെ ഹിറ്റായിരുന്നത്. ഏറെ ശ്രദ്ധിക്കപ്പെട്ടിരുന്ന പാട്ടിനെ അന്നും സാമൂഹ്യമാധ്യമങ്ങള്‍ ട്രോളുകളിലൂടെയാണ് സ്വീകരിച്ചിരുന്നത്. ഇന്നിതാ പാട്ട് റിലീസായി ഒരു വര്‍ഷം ആഘോഷിക്കുമ്പോഴും പൂമരത്തിന് ട്രോളുകളെത്തിയിരിക്കുന്നു. ഒന്നാംവാര്‍ഷികം ആഘോഷിക്കുന്ന ചിത്രം കാളിദാസ് ജയറാം ഫേസ്ബുക്കില്‍ പോസ്റ്റ് ചെയ്തതോടെയാണ് ട്രോളുകള്‍ ചാടിവീണത്. ചിത്രം റിലീസ് ആകുന്നത് വൈകുന്നതിനാണ് ഇത്തവണ ട്രോളുണ്ടായത്. ചിത്രത്തിന്റെ അനിശ്ചിതത്വം നീളുന്ന വേളയില്‍ പൂമരം ക്രിസ്മസിന് തിയേറ്ററുകളില്‍ എത്തും എന്ന് വാര്‍ത്തയുണ്ടായിരുന്നു. എന്നാല്‍ ഏത് ക്രിസ്മസ് എന്നും, എല്ലാ വര്‍ഷവും ക്രിസ്മസ് ഉണ്ടല്ലോ എന്നിങ്ങനെയുള്ള ട്രോളുകളാണ് വരുന്നത്. സംവിധാനം ചെയ്യാന്‍ വൈകിയാല്‍ പ്രിയദര്‍ശന്‍ സംവിധാനം ചെയ്യുമെന്നുമൊക്കെയുള്ള ട്രോളുകളും വ്യാപകമാണ്. നേരത്തെ പാട്ടിന്റെ ട്രോളുകള്‍ ഏറെ ആസ്വദിച്ചിരുന്നുവെന്ന് കാളിദാസ് പറഞ്ഞിരുന്നു.

‘നെഞ്ചില്‍ തൊട്ട് മാപ്പു പറയുന്നു’; എബ്രിഡ് ഷൈന്‍

chandrika — Thu, 05 Oct 2017 09:52:07 +0000

മാധ്യമപ്രവര്‍ത്തകരോട് തട്ടിക്കയറിയ സംഭവത്തില്‍ മാധ്യമപ്രവര്‍ത്തകരോട് മാപ്പു പറഞ്ഞ് സംവിധായകന്‍ എബ്രിഡ് ഷൈന്‍. തന്റെ വികാരം വിവേകത്തിന് മുകളില്‍പോവുകയായിരുന്നുവെന്ന് എബ്രിഡ് പറഞ്ഞു. ഫേസ്ബുക്ക് വീഡിയോയിലാണ് മാധ്യമപ്രവര്‍ത്തകരോട് അദ്ദേഹം മാപ്പു പറഞ്ഞത്. ഒരു സംവിധായകനെന്ന നിലയിലും അല്ലാത്തപ്പോഴും ഞാന്‍ എന്റെ സഹപ്രവര്‍ത്തകരോട് എപ്പോഴും പറയാറുളളത് എല്ലാ കാര്യങ്ങളും സംയമനത്തോടെ വേണം കൈകാര്യം ചെയ്യണമെന്നാണ്. പക്ഷെ ഇന്നലെ എന്റെ വികാരം വിവേകത്തിന് വെളിയില്‍ പോയി. അതൊരു നല്ല മാതൃകയല്ല, അങ്ങനെയായിരുന്നില്ല പെരുമാറേണ്ടയിരുന്നത്. അത് എന്തെങ്കിലും തെറ്റായ സന്ദേശം നല്‍കിയിട്ടുണ്ടെങ്കില്‍ നെഞ്ചില്‍ തട്ടി മാപ്പ് പറയുകയാണെന്നും എബ്രിഡ് പറഞ്ഞു. കോയമ്പത്തൂരിലേക്ക് പോകുന്ന വഴിയാണ് ദിലീപിന്റെ പറവൂരിലുള്ള വീട്ടില്‍ എബ്രിഡ് എത്തുന്നത്. അവിടെ ദൃശ്യങ്ങള്‍ പകര്‍ത്തിയ മാധ്യമപ്രവര്‍ത്തകരോട് എബ്രിഡ് തട്ടിക്കയറുകയായിരുന്നു. ദൃശ്യങ്ങള്‍ പകര്‍ത്തുന്നത് എന്തിനാണെന്ന് ചോദിച്ച ഷൈന്‍ ഇത് തന്റെ സ്വകാര്യതയാണെന്ന് പറഞ്ഞായിരുന്നു തട്ടിക്കയറിയത്. എന്നാല്‍ വാഹനങ്ങള്‍ ബ്ലോക്കായതു കൊണ്ടാണ് ദൃശ്യങ്ങള്‍ പകര്‍ത്തിയതെന്ന് മാധ്യമപ്രവര്‍ത്തകര്‍ മറുപടിയും നല്‍കിയിരുന്നു.

‘ഞാനും 12കൊല്ലം ഈ പണി ചെയ്തതാണ്’; ദിലീപിന്റെ വീട്ടിലെത്തിയ മാധ്യമപ്രവര്‍ത്തകരോട് തട്ടിക്കയറി സംവിധായകന്‍ എബ്രിഡ് ഷൈന്‍

chandrika — Thu, 05 Oct 2017 05:09:21 +0000

ആലുവ: ദിലീപിന്റെ വീട്ടിലെത്തിയ മാധ്യമപ്രവര്‍ത്തകരോട് തട്ടിക്കയറി സംവിധായകന്‍ എബ്രിഡ് ഷൈന്‍. ജാമ്യത്തിലിറങ്ങിയ ദിലീപിന്റെ വീട്ടിലെത്തിയ സന്ദര്‍ശകരുടെ ദൃശ്യങ്ങള്‍ പകര്‍ത്തുന്നതിനിടെയാണ് എബ്രിഡ് പ്രകോപനവുമായി എത്തിയത്. ക്യാമറക്കുമുന്നിലേക്ക് എത്തിയ സംവിധായകനും മാധ്യമപ്രവര്‍ത്തകരും തമ്മില്‍ വാക്കുതര്‍ക്കമുണ്ടാവുകയായിരുന്നു.

പറവൂര്‍ കവലയിലെ വീട്ടില്‍ ദിലീപിനെ കാണാന്‍ സിനിമാരംഗത്തെ പ്രമുഖര്‍ എത്തിയപ്പോഴാണ് സംഭവം. കൂട്ടത്തില്‍ എബ്രിഡ് ഷൈനും ഉണ്ടായിരുന്നു. ഇതിന്റെ ദൃശ്യങ്ങള്‍ മാധ്യമപ്രവര്‍ത്തകര്‍ പകര്‍ത്തുന്നതിനിടെയാണ് ഷൈന്‍ തട്ടിക്കയറിയത്. താനും 12വര്‍ഷം ഈ പണി ചെയ്തിട്ടുണ്ടെന്ന് പറഞ്ഞ് എബ്രിഡ് ഷൈന്‍ കാറില്‍ നിന്നിറങ്ങുകയായിരുന്നു. തനിക്ക് സ്വകാര്യതയുണ്ടെന്നും തന്റെ അനുവാദമില്ലാതെ ദൃശ്യങ്ങള്‍ എടുക്കാന്‍ കഴിയില്ലെന്നുമായിരുന്നു എബ്രിഡ് ഷൈന്റെ വാദം. എന്നാല്‍ റോഡിന് നടുവില്‍ വാഹനം ബ്ലോക്കാക്കി കിടക്കുന്നത് കൊണ്ടാണ് ദൃശ്യങ്ങള്‍ പകര്‍ത്തിയതെന്ന് മാധ്യമപ്രവര്‍ത്തകര്‍ മറുപടി നല്‍കി. അതിനിടെ, ‘ഇതാ ഷൂട്ട് ചെയ്‌തോളൂ’ എന്ന് പറഞ്ഞ് എബ്രിഡ് ഷൈന്‍ ക്യാമറക്കുമുന്നില്‍ നിന്നതും മാധ്യമപ്രവര്‍ത്തകരുമായുള്ള വാക്കുതര്‍ക്കത്തിന് കാരണമായി. ’12വര്‍ഷം ഈ പണി ചെയ്തിട്ടുണ്ടെങ്കില്‍ ഞങ്ങള്‍ ഇവിടെ നില്‍ക്കുന്നതിന്റെ കാരണം ചേട്ടനറിയുമല്ലോ’ എന്ന് ചോദിച്ചതോടെ എബ്രിഡ് ഷൈന്‍ തിരിച്ചു കാറില്‍ കയറുകയായിരുന്നു.

നടി കെ.പി.എ.സി ലളിത ദിലീപിനെ കാണുന്നതിനായി എത്തി. സന്തോഷം ഉള്ളതുകൊണ്ടാണല്ലോ ദിലീപിനെ കാണാനെത്തിയത് എന്നായിരുന്നു കെ.പി.എ.സി ലളിതയുടെ പ്രതികരണം. രാമലീലയുടെ സംവിധായകന്‍ അരുണ്‍ ഗോപിയും, നിര്‍മാതാവ് ടോമിച്ചന്‍ മുളകുപാടവും, ഹരിശ്രീ അശോകന്‍ ഉള്‍പ്പെടെയുള്ള നടന്മാരും ദിലീപിനെ കാണുന്നതിനായി എത്തിയിരുന്നു.