കോഴിക്കോട്: മഹാപ്രളയത്തില്‍ അകപ്പെട്ട് ദുരിതമനുഭവിക്കുന്ന കേരളീയ ജനങ്ങള്‍ക്ക് കൈത്താങ്ങായി കേരള സ്‌റ്റേറ്റ്  പ്രൈവറ്റ്‌ ബസ് ഓപറേറ്റേഴ്‌സ് ഫെഡറേഷന്റെ കീഴില്‍ പതിനായിരത്തിലധികം ബസുകള്‍ സര്‍വീസ് തുടങ്ങി. മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കുന്നതിനായി പതിനായിരത്തോളം സ്വകാര്യ ബസുകളാണ് ഇന്ന് (സെപ്തംബര്‍ 3ന്) കാരുണ്യയാത്ര നടത്തുന്നത്. കാസര്‍കോഡ്, കണ്ണൂര്‍ എന്നീ രണ്ടു ജില്ലകളില്‍ നേരത്തെ ആഗസ്റ്റ് 30ന് പ്രൈവറ്റ്‌ ബസ് കാരുണ്യയാത്ര നടത്തിയിരുന്നു.

ടിക്കറ്റ് നല്‍കി പണം വാങ്ങുന്നതിന് പകരം ബക്കറ്റില്‍ സംഭാവന ശേഖരിക്കുന്ന കണ്ടക്ടര്‍

ടിക്കറ്റ് നല്‍കി പണം വാങ്ങുന്നതിന് പകരം ബക്കറ്റില്‍ ശേഖരിക്കുന്ന രീതിയിലാണ് യാത്രക്കാരില്‍ നിന്നും ബസ് കണ്ടക്ടര്‍മാര്‍ സംഭാവന സ്വീകരിക്കുന്നത്. 14 ജില്ലകളില്‍ നിന്നും സ്വരൂപിക്കുന്ന തുക തിരുവനന്തപുരത്ത് ചേരുന്ന ഫെഡറേഷന്റെ സംസ്ഥാന കൗണ്‍സില്‍ യോഗത്തില്‍ സംസ്ഥാന ഭാരവാഹികള്‍ മുഖ്യമന്ത്രിക്ക് നേരിട്ട് കൈമാറും. ഒരു ദിവസത്തെ കളക്ഷന്‍ മുഴുവന്‍ നഷ്ടപ്പെട്ടവര്‍ക്ക് നല്‍കുകയാണ് ലക്ഷ്യം.

സ്വന്തം വാഹനങ്ങളില്‍ സ്ഥിരമായി യാത്ര ചെയ്യുന്നവര്‍ കാരുണ്യ യാത്ര നടത്തുന്ന ബസുകളില്‍ യാത്ര ചെയ്തും വിദ്യാര്‍ത്ഥികള്‍ കണ്‍സഷന്‍ ഒഴിവാക്കിയും പരമാവധി തുക സംഭാവനയായി നല്‍കിയാണ് പദ്ധതിയോട് സഹകരിക്കുന്നത്.

അഞ്ചുകോടി രൂപയുടെ സഹായം മുന്‍പ് തമിഴ്‌നാട് കേരളത്തിന് നല്‍കിയിരുന്നു. ആവശ്യമെങ്കില്‍ കൂടുതല്‍ സഹായം നല്‍കുമെന്നും അന്ന് തമിഴ്‌നാട് അറിയിച്ചിരുന്നു. അതിനിടെ മഹാരാഷ്ട്ര മുഖ്യമന്ത്രി ദേവേന്ദ്ര ഫട്‌നാവിസ് 20 കോടിയുടെ സഹായം പ്രഖ്യാപിച്ചു. നേരത്തെ 5 കോടി പ്രഖ്യാപിച്ചിരുന്നു. തെലങ്കാന 25 കോടി രൂപ ധനസഹായം നല്‍കിയിരുന്നു.

ഡല്‍ഹി മുഖ്യമന്ത്രി അരവിന്ദ് കെജ്‌രിവാളും 10 കോടി രൂപ ധനസഹായം നല്‍കിയിട്ടുണ്ട്. 10 കോടി രൂപയുടെ സഹായം പഞ്ചാബ് മുഖ്യമന്ത്രി അമരീന്ദര്‍ സിംഗ് പ്രഖ്യാപിച്ചിരുന്നു. കര്‍ണാടക 10 കോടി രൂപ, പുതുച്ചേരി 1 കോടിരൂപ നല്‍കിയിരുന്നു. തമിഴ്‌നാട്, തെലുങ്ക് സിനിമാ ലോകവും സഹായവുമായി രംഗതെത്തിയിരുന്നു. മുഖ്യമന്ത്രിയുടെ ദുരിതാശ്വാസ നിധിയിലേക്ക് നടന്‍ വിജയ് സേതുപതി 25 ലക്ഷം രൂപയും നടന്‍ ധനുഷ് 15 ലക്ഷം രൂപയും നല്‍കിയിട്ടുണ്ട്. തെലുങ്ക് നടന്‍ രാംചരണ്‍ തേജ 60 ലക്ഷം രൂപയും 10 ടണ്‍ അരിയും നല്‍കും. ഭാര്യ ഉപാസന കാമിനേനി 1.20 കോടി രൂപ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കി. നടന്‍ പ്രഭാസ് 1 കോടി രൂപ നല്‍കും. നടന്‍ അല്ലു അര്‍ജുന്‍ 25 ലക്ഷം രൂപയാണ് നല്‍കിയത്.ആം ആദ്മി എംപിമാരും മന്ത്രിമാരും എംഎല്‍എമാരും ഒരുമാസത്തെ ശമ്പളം ദുരിതാശ്വാസ നിധിയിലേക്ക് നല്‍കും.

ഓഖി ചുഴലിക്കാറ്റ് ദുരന്തത്തില്‍ 52 മത്സ്യ തൊഴിലാളികള്‍ മരണപ്പെട്ടിട്ടുണ്ടെന്നും 91 പേരെ കാണാതായെന്നുമാണ് ഫിഷറീസ് ഡയറക്ടറേറ്റിലെ വിവരാവകാശ ഓഫീസറുടെ മറുപടി. മരിച്ചവരില്‍ ഒരാള്‍ കാസര്‍ക്കോട് സ്വദേശിയും ബാക്കിയുള്ളവര്‍ തിരുവനന്തപുരം സ്വദേശികളുമാണ്. തിരുവന്തപുരം സ്വദേശികളാണ് കാണാതായവരെല്ലാം. മരിച്ചവരുടെ കുടുംബങ്ങള്‍ക്ക് 20 ലക്ഷം രൂപ വീതം സര്‍ക്കാര്‍ നഷ്ട പരിഹാരമായി നല്‍കി. ദുരിത ബാധിതരെ സഹായിക്കാന്‍ ഫിഷറീസ് വകുപ്പ് സംഭാവനയൊന്നും സ്വീകരിച്ചില്ല. എന്നാല്‍ പൂര്‍ണമായും നാശ നഷ്ടം സംഭവിച്ച മത്സ്യ ബന്ധന യാനങ്ങളുടെയും അനുബന്ധ ഉപകരണങ്ങളുടെയും നഷ്ടം കണക്കാക്കി 3.08 കോടി രൂപയുടെ പ്രൊപ്പോസല്‍ സര്‍ക്കാരിലേക്ക് സമര്‍പ്പിച്ചു. ഇത് ഇപ്പോഴും സര്‍ക്കാരിന്റെ പരിഗണനയിലാണ്. പരിക്ക് പറ്റിയ മത്സ്യ തൊഴിലാളികള്‍ക്കായി 8.68 രൂപ മത്സ്യ തൊഴിലാലി ക്ഷേമ നിധി ബോര്‍ഡില്‍ നിന്ന് നല്‍കിയിട്ടുണ്ടെന്നും വകുപ്പ് വ്യക്തമാക്കുന്നു. എന്നാല്‍ ഓഖി ദുരിത ബാധിതര്‍ക്കുള്ള നഷ്ട പരിഹാരമായി വിതരണം ചെയ്യാന്‍ കേന്ദ്ര സര്‍ക്കാര്‍ എത്ര തുക നല്‍കിയെന്നതിനെ കുറിച്ചും എത്ര തുക ചെലവഴിച്ചു എന്നതിനെ കുറിച്ചും ഫിഷറീസ് വകുപ്പിന് ധാരണയില്ല.
സംസ്ഥാന ദുരന്ത നിവാരണ വകുപ്പിന്റെ രേഖകള്‍ പ്രകാരം 60 പേരാണ് ഓഖി ദുരന്തത്തില്‍ മരിച്ചത്. തിരുവനന്തപുരം-54, കൊല്ലം-2, എറണാകുളം-2, കണ്ണൂര്‍-1, കാസര്‍ക്കോട്-1 എന്നിങ്ങനെയാണ് ജില്ല തിരിച്ചുള്ള കണക്ക്. ഓഖി ദുരിതാശ്വാസവുമായി ബന്ധപ്പെട്ട കേന്ദ്ര പ്രതികരണ നിധിയില്‍ നിന്ന് 133 കോടി രൂപയും പ്രധാനമന്ത്രിയുടെ ദുരിതാശ്വാസ നിധിയില്‍ നിന്ന് 116 ലക്ഷം രൂപയുമാണ് കേരളത്തിന് ലഭിച്ചത്. ഇതിന് പുറമെ 2018 മാര്‍ച്ച് 24 വരെ 103.5 കോടി രൂപ മുഖ്യമന്ത്രിയുടെ ദുരിതാശ്വാസ സഹായ നിധിയിലേക്ക് സംഭാവനയായും ലഭിച്ചു.

കഴിഞ്ഞ നിയമസഭ സമ്മേളനത്തില്‍ റവന്യു വകുപ്പ് മന്ത്രി ഇ.ചന്ദ്രശേഖരന്‍ സബ്മിഷന് മറുപടിയായി നല്‍കിയ രേഖകള്‍ പ്രകാരം 38.33 കോടി രൂപ മാത്രമാണ് ഓഖി ദുരന്ത നിവാരണത്തിനായി ചെലവഴിച്ചിട്ടുള്ളത്. ഇതില്‍ 18.44 കോടി രൂപയും തിരുവനന്തപുരം ജില്ലയിലാണ് ചെലവഴിച്ചത്. എന്നാല്‍ മാര്‍ച്ച് 24 വരെ ഓഖി ദുരിതാശ്വാസവുമായി ബന്ധപ്പെട്ട പ്രവര്‍ത്തനങ്ങള്‍ക്കായി 25.09 കോടി രൂപ മാത്രമാണ് വിവിധ ജില്ലകള്‍ക്കായി അനുവദിച്ചതെന്നാണ് ധനകാര്യ വകുപ്പിന്റെ വിവരാവകാശ മറുപടി രേഖയില്‍ പറയുന്നത്. കേന്ദ്ര പ്രതികരണ നിധിയില്‍ നിന്ന് ലഭിച്ച 133 കോടി സംസ്ഥാന പ്രതികരണ നിധിയിലേക്കാണ് വകയിരുത്തിയത്. സംസ്ഥാന ദുരന്ത പ്രതികരണ നിധി മാനദണ്ഢ പ്രകാരമാണ് ഈ തുക വിനിയോഗിക്കേണ്ടത്. സാമ്പത്തിക വര്‍ഷം അവസാനിച്ചതിനാല്‍ ഈ തുക ധനകാര്യ വകുപ്പിന് സറണ്ടര്‍ ചെയ്തതെന്നും ധനകാര്യ വകുപ്പിന്റെ രേഖകളില്‍ വ്യക്തമാണ്. ഓഖി ദുരന്തത്തിനിരയാവരെ സഹായിക്കുന്നതില്‍ സംസ്ഥാന സര്‍ക്കാര്‍ അലംഭാവം കാട്ടിയെന്ന് ലത്തീന്‍ കത്തോലിക്ക സഭ നേരത്തെ ആരോപിച്ചിരുന്നു. പണം ചെലവഴിച്ചതില്‍ സംശയമുണ്ടെന്നും സോഷ്യല്‍ ഓഡിറ്റ് വേണമെന്നും സഭ നേതൃത്വം ആവശ്യമുയര്‍ത്തിയിരുന്നു.

കോഴിക്കോട്: ബേപ്പൂരില്‍ നിന്നു പുറപ്പെടേണ്ട എംവി മിനിക്കോയി എന്ന കപ്പല്‍ ചുഴലിക്കാറ്റിനെ തുടര്‍ന്ന്് യാത്ര മാറ്റി. കടല്‍ ശാന്തമായ ശേഷമേ ഇനി യാത്ര പുറപ്പെടൂ. ലക്ഷദ്വീപ് തീരത്ത് കനത്ത തോതില്‍ ഓഖി ചുഴലിക്കാറ്റ് വീശിയടിക്കുന്ന സാഹചര്യത്തിലാണ് കപ്പല്‍ യാത്ര മാറ്റിയത്. എറണാകുളത്ത് നിന്ന് പുറപ്പെടേണ്ട എംവി കവരത്തിയും യാത്ര റദ്ദാക്കി.
ചുഴലിക്കാറ്റില്‍ ലക്ഷദ്വീപില്‍ കനത്ത നഷ്ടങ്ങള്‍ക്ക് സാധ്യതയയുണ്ട്്്. മിനിക്കോയിയില്‍ ഹെലിപ്പാഡ് മുങ്ങിയതോടെ വ്യോമഗതാഗതവും അസാധ്യമായിരിക്കുകയാണ്. ഇന്നലെ വൈകീട്ട് ഏഴ് മണി വരെ ഫോണ്‍ ബന്ധങ്ങള്‍ സാധ്യമായിരുന്നു. അതിനുശേഷം സംസാരിക്കാനാവുന്നില്ല. വൈദ്യുതി ഉല്‍പാദനവും വിതരണവും പ്രതിസന്ധിയിലായതോടെ മിനിക്കോയ് ഏറെക്കുറെ ഇരുട്ടിലായി. ബോട്ടുകള്‍ മുങ്ങിപ്പോയി. മത്സ്യബന്ധനത്തിനു പോയതല്ലെങ്കിലും മഴക്കാലം എന്ന നിലക്ക് കാലാവസ്ഥാ വ്യതിയാനത്തെ അവഗണിച്ചതിനാല്‍ ബോട്ടുകള്‍ സുരക്ഷിതമാക്കിയിരുന്നില്ല. കപ്പലുകളില്‍ യാത്ര ചെയ്‌തെത്തുന്നവരെ ചെറിയ ബോട്ടുകളാണ് തീരത്ത്് എത്തിക്കുന്നത്. ബോട്ടുകളില്ലാതായതോടെ കപ്പല്‍ യാത്ര പൂര്‍ണമായും അസാധ്യമായി. പല മേഖലകളിലേക്കും പുറപ്പെട്ട കപ്പലുകള്‍ പലതും തിരിച്ചുവിളിച്ചു. മിനിക്കോയിയിലേക്കു പോയവ മറ്റു പല ദ്വീപുകളിലും ഇറക്കിവിടുകയായിരുന്നു. അഗത്തി, കവരത്തി തുടങ്ങിയ സ്ഥലങ്ങളിലാണ് ഈ യാത്രക്കാരുള്ളത്.
കോണ്‍ക്രീറ്റ് അല്ലാത്ത വീടുകളുടെ എല്ലാം റൂഫുകള്‍ പറന്നുപോയി. വീടു തകര്‍ന്നവര്‍ കോണ്‍ക്രീറ്റ് വീടുകളിലെത്തി അഭയം തേടിയിരിക്കുകയാണ്. ഭീമന്‍ തിരമാലയെത്തിയാല്‍ സ്ഥിതി കൂടുതല്‍ വഷളാകും. ലക്ഷദ്വീപ് അരമീറ്റര്‍ മാത്രം ഉയരത്തിലാണുള്ളത്്. എന്നാല്‍ ആറ് മീറ്റര്‍ വരെ ഉയരത്തില്‍ തിരയടിക്കാന്‍ സാധ്യതയുണ്ടെന്നാണ് പ്രവചനം. അരക്കിലോമീറ്റര്‍ തിരയടിച്ചാല്‍ കടലിന്റെ മറുവശം എത്തുമെന്നിരിക്കെ പത്ത് കിലോമീറ്റര്‍ വരെ ദൂരത്തില്‍ അടിക്കാന്‍ സാധ്യതയുണ്ടെന്ന പ്രവചനവും ഏറെ ഭീതിയുളവാക്കുന്നു. രക്ഷാപ്രവര്‍ത്തനത്തിനു പോലും സാധ്യതയില്ലാത്ത വിധം ഗുരുതരമാണ് സ്ഥിതി. അയ്യായിരത്തിലേറെ ആളുകളെ ഒഴിപ്പിക്കല്‍ പ്രായോഗികമായി സാധ്യമല്ല. ഇപ്പോഴത്തെ സ്ഥിതി തുടര്‍ന്നാല്‍ തന്നെ കുടിവെള്ളം പോലും കിട്ടാത്ത സ്ഥിതിയുണ്ടാകും.

തിരുവനന്തപുരം: ഓഖി ചുഴലിക്കാറ്റിനെക്കുറിച്ച് മുന്നറിയിപ്പ് ലഭിക്കാന്‍ വൈകിയെങ്കിലും രക്ഷാപ്രവര്‍ത്തനങ്ങള്‍ ഊര്‍ജിതമാണെന്ന് മുഖ്യമന്ത്രി പിണറായി വിജയന്‍. ചുഴലിക്കാറ്റില്‍പ്പെട്ട മത്സ്യത്തൊഴിലാളികളെ രക്ഷപ്പെടുത്തുന്നതിന് സാധ്യമായ എല്ലാ നടപടികളും സ്വീകരിച്ചിട്ടുണ്ടെന്നും മുഖ്യമന്ത്രി വാര്‍ത്താസമ്മേളനത്തില്‍ പറഞ്ഞു. നാവികസേനയുടെയും വ്യോമസേനയുടെയും കോസ്റ്റ് ഗാര്‍ഡിന്റെയും സംയുക്തമായ രക്ഷാപ്രവര്‍ത്തനമാണ് ഇപ്പോള്‍ നടക്കുന്നത്. എത്രപേരെ കാണാതായെന്ന കാര്യത്തില്‍ കൃത്യമായ കണക്ക് ലഭ്യമായി വരുന്നതേയുള്ളൂ. വ്യാഴാഴ്ച ഉച്ചക്ക് 12 ഓടെയാണ് ചുഴലിക്കാറ്റിനെക്കുറിച്ച് മുന്നറിയിപ്പ് ലഭിച്ചത്. അതിന് ശേഷം അടിയന്തര നടപടികള്‍ സ്വീകരിച്ചു.
കണ്ടെത്തിയ മത്സ്യത്തൊഴിലാളികള്‍ സുരക്ഷിതരാണ്. കടലില്‍ 33 വള്ളങ്ങളിലുള്ള തൊഴിലാളികളെ രക്ഷാപ്രവര്‍ത്തകര്‍ കടലില്‍ കണ്ടെത്തിയിരുന്നു. എന്നാല്‍, തൊഴിലാളികള്‍ വള്ളം ഉപേക്ഷിച്ച് കപ്പലില്‍ കയറാന്‍ തയാറാകുന്നില്ല. ഭക്ഷണം ലഭിച്ചാല്‍ മതി കടലില്‍ തന്നെ തുടരാമെന്നാണ് അവരുടെ നിലാപാട്. അല്ലെങ്കില്‍ വള്ളം കരയിലേക്ക് എത്തിക്കണമെന്നാണ് തൊഴിലാളികള്‍ ആവശ്യപ്പെടുന്നത്. അവര്‍ക്ക് വെള്ളവും ഭക്ഷണവും എത്തിക്കാന്‍ നടപടി സ്വീകരിച്ചിട്ടുണ്ട്. നേവിയുടെയും എയര്‍ഫോഴ്‌സിന്റെയും ഹെലികോപ്റ്ററുകളും രംഗത്തുണ്ട്. എന്നാല്‍ കാലാവസ്ഥ അനുകൂലമല്ലാത്തത് തടസം സൃഷ്ടിക്കുന്നതായും മുഖ്യമന്ത്രി പറഞ്ഞു. ഏഴോളം കപ്പലുകള്‍ രക്ഷാപ്രവര്‍ത്തനത്തിനായി പ്രവര്‍ത്തിക്കുന്നുണ്ട്. കോസ്റ്റ് ഗാര്‍ഡിന്റെ രണ്ട് കപ്പലും നേവിയുടെ നാല് കപ്പലുകളും രക്ഷാപ്രവര്‍ത്തനത്തില്‍ ഏര്‍പ്പെട്ടിട്ടുണ്ട്. വിഴിഞ്ഞത്ത് കണ്‍ട്രോള്‍ റൂം തുറന്ന് പ്രവര്‍ത്തനമാരംഭിച്ചിട്ടുണ്ട്. തീരദേശത്തുള്ളവരെ ഒഴിപ്പിക്കുന്നതിന് 13 ക്യാമ്പുകള്‍ തുറന്നിട്ടുണ്ടെന്നും മുഖ്യമന്ത്രി പറഞ്ഞു. മര്‍ച്ചന്റ് നേവി അധികൃതരുമായി ബന്ധപ്പെട്ടതനുസരിച്ച് 10 പേരെ മര്‍ച്ചന്റ് നേവി രക്ഷിച്ചിട്ടുണ്ട്.
ചുഴലിക്കാറ്റ് ഇപ്പോള്‍ 200 കിലോമീറ്റര്‍ ദൂരത്തേക്ക് നീങ്ങിയതായാണ് കാലാവസ്ഥാ നിരീക്ഷണകേന്ദ്രം അറിയിച്ചിട്ടുള്ളതെന്നും ഇന്നലെ രാവിലെ വിളിച്ചുചേര്‍ത്ത വാര്‍ത്താസമ്മേളനത്തില്‍ മുഖ്യമന്ത്രി വ്യക്തമാക്കി. കാറ്റ് ഉള്‍ക്കടലിലേക്ക് നീങ്ങിയ നിലക്ക് കരയില്‍ അനുഭവപ്പെടുന്ന കാറ്റിന്റെ ശക്തി കുറഞ്ഞിട്ടുണ്ടെങ്കിലും രക്ഷാപ്രവര്‍ത്തനത്തിന് മത്സ്യത്തൊഴിലാളികള്‍ കടലിലിറങ്ങരുതെന്നും സര്‍ക്കാര്‍ നടത്തുന്ന രക്ഷാപ്രവര്‍ത്തനത്തില്‍ വിശ്വാസമര്‍പ്പിക്കണമെന്നും മുഖ്യമന്ത്രി ആവശ്യപ്പെട്ടു. ഇപ്പോള്‍ ലക്ഷദ്വീപിലും കേരളത്തിലും ഒരേപോലെ രക്ഷാപ്രവര്‍ത്തനം നടത്തേണ്ട സാഹചര്യമാണുള്ളത്. കൂടുതല്‍ വിമാനങ്ങള്‍ എത്തിക്കുന്നതിന് കേന്ദ്രസര്‍ക്കാരുമായി ബന്ധപ്പെടുമെന്നും അദ്ദേഹം പറഞ്ഞു.
അതേസമയം, മുന്നറിയിപ്പ് നേരത്തെ നല്‍കിയിരുന്നുവെന്ന് തിരുവനന്തപുരം ജില്ലാ കലക്ടര്‍ കെ. വസുകി പറഞ്ഞു. മുന്‍കരുതല്‍ നടപടികള്‍ നേരത്തെ സ്വീകരിച്ചിരുന്നു. കടലില്‍ നിന്നും തിരിച്ചുവരാത്തത് 185 മത്സ്യത്തൊഴിലാളികളാണ്. രക്ഷാപ്രവര്‍ത്തനം കാര്യക്ഷമമായി പുരോഗമിക്കുന്നുണ്ടെന്നും കലക്ടര്‍ വാര്‍ത്താസമ്മേളനത്തില്‍ അറിയിച്ചു.