സ്ത്രീകളുടെ അവകാശങ്ങള്‍ സംരക്ഷിക്കുന്നതില്‍ സമൂഹത്തിന്റെ ഉത്തരവാദിത്തം നിര്‍ണ്ണായകമാണെന്ന് വനിതാ കമ്മീഷന്‍ പറഞ്ഞു. പ്രതിയുടേയും കുടുംബത്തിന്റേയും അറസ്റ്റ് ഉറപ്പാക്കണം എന്നും വനിതാ കമ്മീഷന്‍ ആവശ്യപ്പെട്ടു.

ഡോ. ഷഹനയുടെ ആത്മഹത്യ കുറിപ്പിൽ പ്രതി റുവൈസിനും കുടുംബാംഗങ്ങൾക്കും എതിരെ പരാമർശനമുണ്ടെന്നാണ് പൊലീസ് കണ്ടെത്തൽ. ‘സ്തീധന മോഹം കാരണം ഇന്ന് എന്റെ ജീവിതമാണ് അവസാനിപ്പിക്കുന്നത്… വിവാഹ വാഗ്ദാനം നൽകി എന്റെ ജീവിതം നശിപ്പിക്കുക എന്നതായിരുന്നു അവന്റെ ഉദ്ദേശ്യം. ഒന്നരക്കിലോ സ്വർണവും ഏക്കറുകണക്കിനു വസ്തുവും ചോദിച്ചാൽ കൊടുക്കാൻ എന്റെ വീട്ടുകാരുടെ കൈയിൽ ഇല്ലെന്നുള്ളത് സത്യമാണ്…’ -ഷഹനയുടെ ഈ പരാമർശങ്ങൾ ആത്മഹത്യകുറിപ്പിലുള്ളതായി റിമാൻഡ് റിപ്പോർട്ടിൽ പറയുന്നുണ്ട്.

‘‘റുവൈസ് ഷഹനയോട് ഇങ്ങോട്ട് വന്ന് പ്രൊപ്പോസ് ചെയ്യുകയായിരുന്നു. അവർ വിവാഹാലോചനയുമായി വന്നപ്പോൾ വീട്ടിൽ പോയി സംസാരിച്ചു. റുവൈസിന്റെ പിതാവ് നല്ല സ്ത്രീധനം ചോദിച്ചു. സഹോദരിക്ക് അത്ര ഇഷ്ടമായിരുന്നു. സ്ത്രീധനത്തിന്റെ പേരിൽ വിവാഹത്തിൽ നിന്ന് പിന്മാറിയപ്പോൾ വിഷാദത്തിലേക്ക് പോയി. അതാണ് ഈ സ്റ്റേജിലെത്തിച്ചത്’’- ജാസിം നാസ് പറയുന്നു.

‘‘പിതാവിനെ ധിക്കരിച്ച് വിവാഹം കഴിക്കാൻ റുവൈസ് തയാറായിരുന്നുവെങ്കിൽ രജിസ്റ്റർ വിവാഹം ചെയ്തു കൊടുക്കാനും തയാറായിരുന്നു. എന്നാൽ ഇങ്ങനെയാകുമെന്ന് അറിഞ്ഞില്ല. സഹോദരിക്ക് റുവൈസിനെ വലിയ ഇഷ്ടമായിരുന്നു. പെട്ടെന്ന് വിവാഹത്തിൽ നിന്ന് മാറിയപ്പോൾ അവൾക്ക് സഹിക്കാൻ പറ്റിയില്ല’’.

‘‘സ്ത്രീധനം ചോദിക്കുന്ന കുടുംബത്തിലേക്ക് സഹോദരിയെ അയക്കാൻ ഒട്ടും താൽപര്യമുണ്ടായിരുന്നില്ല. പക്ഷെ അവളുടെ ഇഷ്ടമല്ലേ? മാക്സിമം എന്തുവേണമെങ്കിലും കൊടുക്കാമെന്ന് പറഞ്ഞു. വാപ്പ സമ്മതിക്കുന്നില്ലെന്ന് സഹോദരിയെ വിളിച്ച് റുവൈസ് സംസാരിച്ചു. ആശ്വാസ വാക്കുകളെങ്കിലും പറഞ്ഞിരുന്നുവെങ്കില്‍ ഇങ്ങനെ സംഭവിക്കില്ലായിരുന്നു. പണമാണ് പ്രധാനമെന്ന് അവസാനം റുവൈസ് ഷഹനയോട് പറഞ്ഞു. അത് അവളെ വല്ലാതെ തളർത്തി’’- സഹോദരൻ പറഞ്ഞു.

ആത്മഹത്യാ പ്രേരണക്കുറ്റവും സ്ത്രീധന നിരോധന നിയമവും ചുമത്തിയിരുന്നു. റുവൈസിനെതിരെ ഷഹനയുടെ മാതാവും സഹോദരിയും മൊഴി നൽകി.ഭീമമായ സ്ത്രീധനം നൽകാത്തതിനാൽ വിവാഹത്തിൽ നിന്ന് റുവൈസ് പിന്മാറുകയായിരുന്നു. സ്ത്രീധന ചോദിച്ചതാണ് ആത്മഹത്യയ്ക്ക് കാരണമെന്ന് പരാതി നൽകിയിരുന്നു

കഴിഞ്ഞ ദിവസമാണ് കൂടിയ അളവിൽ അനസ്തേഷ്യ കുത്തിവെച്ച് മരിച്ച നിലയിൽ ഫ്ലാറ്റിൽ ഡോ ഷെഹനയെ കണ്ടെത്തുന്നത്.

ഇതിന് പിന്നാലെയാണ് സംഭവത്തെ കുറിച്ച് അന്വേഷിച്ച് റിപ്പോര്‍ട്ട് നല്‍കാന്‍ വനിത ശിശുവികസന ഡയറക്ടര്‍ക്ക് ആരോഗ്യമന്ത്രി നിര്‍ദേശം നല്‍കിയത്.  ഷഹനയുടെ മരണം വേദനാജനകമെന്ന് വനിതാ കമ്മീഷന്‍ അധ്യക്ഷ പി സതീദേവി പ്രതികരിച്ചു. സംഭവത്തില്‍ ശക്തമായ നടപടി ഉണ്ടാകുമെന്നും സതീദേവി അറിയിച്ചു.

ഷഹന സുഹൃത്തായ ഡോക്ടറുമായി പ്രണയത്തിലായിരുന്നു. വീട്ടുകാര്‍ ചേര്‍ന്ന് വിവാഹം ഉറപ്പിച്ചെങ്കിലും ഉയര്‍ന്ന സ്ത്രീധനം ആവശ്യപ്പെട്ടതായി കുടുംബം ആരോപിക്കുന്നു. 150 പവനും 15 ഏക്കര്‍ ഭൂമിയും ബിഎംഡബ്ല്യൂ കാറുമായിരുന്നു ആവശ്യം. സ്ത്രീധനത്തിന്റെ പേരില്‍ വിവാഹ വാഗ്ദാനത്തില്‍ നിന്നു യുവാവ് പിന്മാറിയതിനു പിന്നാലെയാണ് ഷഹന ആത്മഹത്യ ചെയ്തത് എന്നും കുടുംബം ആരോപിച്ചു.