economic survey report – Chandrika Daily

തൊഴില്‍ സുരക്ഷയില്‍ കത്തിവീഴും; രാജസ്ഥാന്‍ മോഡല്‍ വാദവുമായി സാമ്പത്തിക സര്‍വേ

chandrika — Thu, 04 Jul 2019 19:28:07 +0000

ന്യൂഡല്‍ഹി: തൊഴില്‍ സുരക്ഷിതത്വം ഇല്ലാതാക്കുന്ന തരത്തിലുള്ള നിയമ നിര്‍മാണങ്ങള്‍ക്ക് കേന്ദ്ര സര്‍ക്കാര്‍ വീണ്ടും കോപ്പു കൂട്ടുന്നുവെന്ന സൂചന നല്‍കി പാര്‍ലമെന്റിന്റെ മേശപ്പുറത്തു വച്ച സാമ്പത്തിക സര്‍വേ. പൊതു ബജറ്റിനു മുന്നോടിയായി കേന്ദ്ര ധനമന്ത്രി നിര്‍മ്മലാ സീതാരാമന്‍ സഭയില്‍ വെച്ച സാമ്പത്തിക സ്ഥിതിവിവര റിപ്പോര്‍ട്ടിലാണ് തൊഴില്‍ അവസര വളര്‍ച്ചക്കും വ്യവസായ വളര്‍ച്ചക്കും തടസ്സം രാജ്യത്ത് നിലവിലുള്ള തൊഴില്‍ നിയമങ്ങളാണെന്ന വാദം കേന്ദ്ര സര്‍ക്കാര്‍ ആവര്‍ത്തിക്കുന്നത്. ഒന്നാം മോദി സര്‍ക്കാറിന്റെ കാലത്ത് തൊഴില്‍ നിയമങ്ങള്‍ പൊളിച്ചെഴുതാനും 40ല്‍ അധികം നിയമങ്ങള്‍ റദ്ദാക്കി കോര്‍പ്പറേറ്റ് താല്‍പര്യങ്ങള്‍ സംരക്ഷിക്കുന്ന തരത്തിലുള്ള നാല് നിയമങ്ങള്‍ കൊണ്ടുവരാനും ശ്രമം നടന്നിരുന്നു. എന്നാല്‍ പ്രതിപക്ഷ കക്ഷികളുടേയും തൊഴില്‍ സംഘടനകളുടേയും കടുത്ത എതിര്‍പ്പിനെതുടര്‍ന്ന് തീരുമാനത്തില്‍നിന്ന് സര്‍ക്കാര്‍ തല്‍ക്കാലത്തേക്ക് പിന്‍വാങ്ങുകയായിരുന്നു. ഇതാണ് വീണ്ടും പൊടിതട്ടിയെടുക്കുന്നത്.
നോട്ടു നിരോധനവും ജി.എസ്.ടി നടപ്പാക്കലും കാരണം സാമ്പത്തിക മേഖലയ്ക്കുണ്ടായ തളര്‍ച്ചയെ തൊഴില്‍ നിയമങ്ങള്‍ പൊളിച്ചെഴുതി മറികടക്കാമെന്ന വിചിത്ര വാദമാണ് കേന്ദ്രം ഉന്നയിക്കുന്നത്. രാജസ്ഥാന്‍ മോഡല്‍ എന്ന ആശയവും ഇതിനായി സാമ്പത്തിക സര്‍വേയില്‍ കേന്ദ്രം മുന്നോട്ടു വെക്കുന്നു. തൊഴില്‍ നിയമങ്ങള്‍ ഭേദഗതി ചെയ്ത ശേഷമുള്ള അഞ്ചു വര്‍ഷത്തിനിടെ രാജസ്ഥാനില്‍ തൊഴില്‍ അവസരങ്ങളും തൊഴില്‍ ശേഷിയും ഗണ്യമായി വര്‍ധിച്ചെന്നാണ് സാമ്പത്തിക സര്‍വേ പറയുന്നത്. തൊഴില്‍ നിയമങ്ങള്‍ കര്‍ക്കശമായ സംസ്ഥാനങ്ങളേയും കര്‍ശനമല്ലാത്ത സംസ്ഥാനങ്ങളേയും രണ്ടു തട്ടാക്കി തിരിച്ചുള്ള പട്ടികയും കേന്ദ്രം അവതരിപ്പിക്കുന്നു. പഞ്ചാബ്, ഹരിയാന, ഗുജറാത്ത്, രാജസ്ഥാന്‍, ഉത്തര്‍പ്രദേശ്, ഒഡീഷ, മഹാരാഷ്ട്ര തുടങ്ങിയ സംസ്ഥാനങ്ങളെയാണ് ഫ്‌ളക്‌സിബിള്‍ തൊഴില്‍ നിയമങ്ങള്‍ ഉള്ള സംസ്ഥാനങ്ങളായി പറയുന്നത്. ഈ സംസ്ഥാനങ്ങളെ അപേക്ഷിച്ച് കര്‍ക്കശ തൊഴില്‍ നിയമങ്ങള്‍ ഉള്ള പശ്ചിമബംഗാള്‍, അസം, ഝാര്‍ഖണ്ഡ്, കേരളം, ബിഹാര്‍ എന്നിവിടങ്ങളില്‍ തൊഴില്‍ അവസര വളര്‍ച്ച കുറവാണെന്നാണ് കേന്ദ്ര വാദം.
കോര്‍പ്പറേറ്റ് താല്‍പര്യങ്ങള്‍ സംരക്ഷിക്കുന്ന തരത്തിലുള്ള കേന്ദ്ര സര്‍ക്കാറിന്റെ തൊഴില്‍ നിയമ ഭേദഗതി നീക്കത്തിനെതിരെ നേരത്തെ രാജ്യവ്യാപക പ്രതിഷേധം ഉയര്‍ന്നിരുന്നു. സ്ഥിരം തൊഴില്‍ ഇല്ലാതാക്കാനും ഉള്ള സ്ഥിരം തൊഴിലുകള്‍ക്ക് തന്നെ കാലപരിധി വെക്കാനും കരാര്‍ വല്‍ക്കരണം വ്യാപകമാക്കാനും വ്യവസ്ഥ ചെയ്യുന്നതാണ് തൊഴില്‍ മന്ത്രാലയത്തിന്റെ പരിഗണനയിലുള്ള നിര്‍ദിഷ്ട നിയമ ഭേദദതി.

സാമ്പത്തിക വളര്‍ച്ച; സര്‍ക്കാര്‍ കണക്ക് അതിശയോക്തിപരമെന്ന് റിപ്പോര്‍ട്ടുകള്‍

chandrika — Thu, 02 Mar 2017 16:29:24 +0000

ന്യൂഡല്‍ഹി: നോട്ടുനിരോധനം നിലനിന്ന 2016-17ന്റെ മൂന്നാം ത്രൈമാസ പാദത്തില്‍ രാജ്യം ഏഴു ശതമാനം സാമ്പത്തിക വളര്‍ച്ച കൈവരിച്ചുവെന്ന കേന്ദ്ര സര്‍ക്കാര്‍ വാദം പൊള്ളയാണെന്ന് വിമര്‍ശനം. സ്റ്റാറ്റിസ്റ്റിക്കല്‍ മന്ത്രാലയം പുറത്തുവിട്ടത് പെരുപ്പിച്ചു കാണിച്ച കണക്കുകളാണെന്ന് വിവിധ സാമ്പത്തിക പഠന ഏജന്‍സികള്‍ ആരോപിച്ചു.

നോട്ടു നിരോധനം രാജ്യത്തിന്റെ സാമ്പത്തിക വളര്‍ച്ചയെ ഗുരുതരമായി ബാധിക്കുമെന്ന് ധനകാര്യ വിദഗ്ധരും ഈ മേഖലയിലുള്ള വിവിധ ഏജന്‍സികളും നേരത്തെ തന്നെ ചൂണ്ടിക്കാട്ടിയിരുന്നു. 2016-17 സാമ്പത്തിക വര്‍ഷത്തെ ഇന്ത്യയുടെ വളര്‍ച്ച 6.6 ശതമാനമായി സാമ്പത്തിക വളര്‍ച്ച കുറയുമെന്നായിരുന്നു അന്താരാഷ്ട്ര നാണയ നിധി(ഐ.എം.എഫ്)യുടെ വിലയിരുത്തല്‍. 6.9 ശതമാനം വളര്‍ച്ചയാണ് ഫിച്ച് റേറ്റിങ് പ്രവചിച്ചിരുന്നത്. മൂഡീസ് ഉള്‍പ്പെടെയുള്ള ഏജന്‍സികളും സാമ്പത്തിക വളര്‍ച്ച കുറയുമെന്ന് പ്രവചിച്ചിരുന്നു. നികുതി വരുമാനത്തില്‍ ഉള്‍പ്പെടെ വര്‍ധനവുണ്ടാകുന്നതിനാല്‍ അടുത്ത സാമ്പത്തിക വര്‍ഷം മുതല്‍ കാര്യങ്ങള്‍ മെച്ചപ്പെടുമെന്നും ഈ ഏജന്‍സികള്‍ വ്യക്തമാക്കിയിരുന്നു. എന്നാല്‍ ഈ കണക്കുകൂട്ടലുകളെല്ലാം അസ്ഥാനത്താക്കുന്ന റിപ്പോര്‍ട്ടാണ് കേന്ദ്ര സര്‍ക്കാര്‍ കഴിഞ്ഞ ദിവസം പുറത്തുവിട്ടത്. ഒക്ടോബര്‍ – ഡിസംബര്‍ കാലയളവില്‍ (നോട്ടുനിരോധനം നിലനിന്നത് നവംബര്‍ എട്ടു മുതല്‍ ഡിസംബര്‍ 30 വരെയാണ്) 7 ശതമാനം സാമ്പത്തിക വളര്‍ച്ച രേഖപ്പെടുത്തിയെന്നും നടപ്പുവര്‍ഷത്തെ ആകെ സാമ്പത്തിക വളര്‍ച്ച 7.1 ശതമാനമാകുമെന്നുമാണ് കേന്ദ്രം അവകാശപ്പെട്ടിരുന്നത്.
നോട്ടു നിരോധനം ഏറ്റവും കൂടുതല്‍ ബാധിച്ചത് കൃഷിയേയും അസംഘടിത വ്യവസായ, തൊഴില്‍ മേഖലകളെയുമാണ്. ഈ മേഖലകളെ ഒഴിവാക്കിയാണ് കേന്ദ്ര സര്‍ക്കാര്‍ സാമ്പത്തിക വളര്‍ച്ചാ നിരക്ക് കണക്കുകൂട്ടിയതെന്നാണ് യു.എസ് ആസ്ഥാനമായ സാമ്പത്തിക ഗവേഷണ ഏജന്‍സിയായ മൂഡീസിന്റെ വിമര്‍ശനം. ഇതാണ് ഉയര്‍ന്ന വളര്‍ച്ചാ നിരക്ക് രേഖപ്പെടുത്താന്‍ കാരണം. ഈ മേഖലകളെക്കൂടി ഉള്‍പ്പെടുത്തിയെങ്കില്‍ മാത്രമേ യതാര്‍ത്ഥ വളര്‍ച്ചാ നിരക്ക് മനസ്സിലാക്കാനാകൂവെന്നും മൂഡീസിന്റെ സേര്‍േവറിന്‍ ഗ്രൂപ്പ് അസോസിയേറ്റ് എം.ഡി മേരി ഡിറോണ്‍ പറഞ്ഞു.
പ

സാമ്പത്തിക സര്‍വേ: ഇന്ത്യയെക്കുറിച്ച് അഞ്ചു കാര്യങ്ങള്‍

chandrika — Tue, 31 Jan 2017 12:53:11 +0000

അഞ്ഞൂറിന്റെയും ആയിരത്തിന്റെയും നോട്ടുകള്‍ അസാധുവാക്കിയതിനു ശേഷമുള്ള രാജ്യത്തെ ആദ്യ ബജറ്റ് അവതരണം നാളെ നടക്കും. ഇതിനു മുന്നോടിയായി കേന്ദ്ര ധനമന്ത്രി അരുണ്‍ജെയ്റ്റ്‌ലി സാമ്പത്തിക സര്‍വേ റിപ്പോര്‍ട്ട് ലോക്‌സഭയുടെ മേശപ്പുറത്തുവെച്ചു. ഇന്ത്യയെ സംബന്ധിച്ച് സര്‍വേ റിപ്പോര്‍ട്ടിലുള്ള അഞ്ചു കാര്യങ്ങള്‍….
1. തൊഴില്‍ കുടിയേറ്റം
-ഒമ്പതു ദശലക്ഷം ആളുകള്‍ തൊഴില്‍ സംബന്ധിയായി രാജ്യത്തിന്റെ വിവിധ ഭാഗങ്ങളിലേക്ക് കുടിയേറിയതായി സൂചിപ്പിക്കുന്നു. റെയില്‍വെ പാസഞ്ചര്‍ ട്രാഫിക് ഡാറ്റയുടെ അടിസ്ഥാനത്തിലാണ് ഈ കണ്ടെത്തല്‍

2. സാമൂഹ്യ പ്രശ്‌നങ്ങള്‍ ചര്‍ച്ച ചെയ്യപ്പെടുന്നില്ല
– സാമൂഹ്യ പ്രശ്‌നങ്ങളോടുള്ള മുഖംതിരിഞ്ഞ സമീപനമാണ് രാജ്യത്തെ ഏറ്റവും വലിയ വെല്ലുവിളി. 40 ശതമാനം ദരിദ്ര ജനങ്ങളില്‍ 29 ശതമാനത്തിനു മാത്രമാണ് സര്‍ക്കാറിന്റെ സഹായധനമെത്തുന്നത്. മറ്റുള്ളവ അഴിമതിയില്‍ ഇല്ലാതാകുന്നു.

3. നികുതി
– ഇന്ത്യയില്‍ നൂറു വോട്ടര്‍മാരില്‍ ഏഴു പേര്‍ നികുതി ദായകരാണ്. ഇത് ജി-20 രാജ്യങ്ങളില്‍ 13 സ്ഥാനത്തേക്ക് ഉയരാന്‍ കാരണമായി.

4. വ്യാവസായിക വ്യവഹാരം ചൈനയേക്കാള്‍ കൂടുതല്‍
– ചൈനയേക്കാള്‍ കൂടുതല്‍ വ്യാവസായിക വ്യവഹാരം ഇന്ത്യയില്‍ നടക്കുന്നുണ്ടെന്നാണ് സൂചിപ്പിക്കുന്നത്. ഇന്ത്യയുടെ ആഭ്യന്തര വ്യവസായവും വന്‍കിട രാജ്യങ്ങള്‍ക്കു സമാനമാണ്.

5. ക്രഡിറ്റ് റേറ്റിങ്
-ചൈനയുടെ ക്രഡിറ്റ് റേറ്റിങ് എ+ല്‍ നിന്ന് എഎ-ലേക്ക് മാറിയിരുന്നു. അതേസമയം ഇന്ത്യയുടേതാകട്ടെ ബിബിബി- ആയി തുടരുകയാണ്.