പ്രതി ഉണ്ണിക്കമ്മദിനെ പൊലീസ് രണ്ട് ദിവസത്തേക്ക് കസ്റ്റഡിയില്‍ വാങ്ങി. എയര്‍ഗണ്‍ വില്‍ക്കാന്‍ ലൈസന്‍സ് അപേക്ഷിച്ചിട്ടുണ്ടെന്നും, എന്നാല്‍ അനധികൃതമായി ആയുധങ്ങളും വെടിയുണ്ടകളും ശേഖരിച്ചുവെന്നുമാണ് പൊലീസ് കണ്ടെത്തല്‍.

പരിശോധനയില്‍ 200ലധികം വെടിയുണ്ടകളും 40 പെല്ലറ്റ് ബോക്സുകളും പിടിച്ചെടുത്തു. രണ്ടു തോക്കുകള്‍ക്കുള്ള ലൈസന്‍സ് മാത്രം ഉണ്ടായിരുന്നെങ്കിലും അതിനേക്കാള്‍ കൂടുതലാണ് ഇയാളുടെ കൈവശം ഉണ്ടായിരുന്നതെന്ന് പൊലീസ് പറഞ്ഞു. ‘വേട്ടയ്ക്കും ഹോബിക്കുമായി ആയുധങ്ങള്‍ ശേഖരിച്ചതാണ്’ എന്നാണ് പ്രതിയുടെ വാദം.

ഇതിനിടെ, വെടിയുണ്ടകളുമായി സഹോദരങ്ങളടക്കം നാല് പേരെ പാലക്കാട്ട് വാഹനപരിശോധനയ്ക്കിടെ പൊലീസ് അറസ്റ്റ് ചെയ്തിരുന്നു. ആയുധങ്ങള്‍ എവിടെ നിന്നാണ് എത്തിച്ചതെന്ന് കണ്ടെത്താനാണ് അന്വേഷണം പുരോഗമിക്കുന്നത്.

വീടിന്റെ മുകളില്‍ പൊലീസ് നടത്തിയ പരിശോധനയിലാണ് ഒരു റൈഫിളും 40 തിരകളും ഒരു എയര്‍ഗണ്ണും ആദ്യം കണ്ടെടുത്തത്. തുടര്‍ന്ന് നടത്തിയ വിശദ പരിശോധനയില്‍ വീടിന്റെ താഴ് ഭാഗത്തെ ഷട്ടറിട്ട ഭാഗത്തുനിന്ന് മറ്റു ആയുധ ശേഖരവും കണ്ടെത്തുകയായിരുന്നു. അതേസമയം ആയുധങ്ങള്‍ വില്‍പനക്കായി സൂക്ഷിച്ചവയാണെന്നാണ് മൊഴി.

എന്നാല്‍ ഇയാള്‍ക്ക് ആയുധങ്ങള്‍ വില്‍പന നടത്തുന്നതിനുള്ള ലൈസന്‍സില്ല. ലൈസന്‍സിനായി ജില്ല കലക്ടര്‍ക്ക് അപേക്ഷ സമര്‍പ്പിച്ചിട്ടുണ്ട്. കണ്ടെടുത്ത ആയുധങ്ങള്‍ ഇതുവരെ ഉപയോഗിക്കാത്തതാണെന്ന് പൊലീസ് പറഞ്ഞു.

ഉണ്ണിക്കമ്മദില്‍നിന്ന് എയര്‍ ഗണ്‍ വാങ്ങിയ പാലക്കാട് സ്വദേശിയെ പാലക്കാട് നിന്നും പൊലീസ് പിടികൂടിയിരുന്നു. ഇയാളില്‍നിന്ന് കിട്ടിയ വിവരങ്ങളുടെ അടിസ്ഥാനത്തിലാണ് പാലക്കാട് പൊലീസ് എടവണ്ണ പൊലീസിന് കൈമാറിയത്. എടവണ്ണ ഇന്‍സ്‌പെക്ടര്‍ ബിനുവിന്റെ നേതൃത്വത്തില്‍ എടവണ്ണയിലെ വീട്ടില്‍ പരിശോധന നടത്തിയതോടെയാണ് ആയുധങ്ങള്‍ കണ്ടെടുത്തത്. കോടതിയില്‍ ഹാജരാക്കിയ ഉടന്‍ തുടരന്വേഷണത്തിനായി പ്രതിയെ പൊലീസ് കസ്റ്റഡിയില്‍ വിട്ടു.

ഈ മാസം 13ന് എടവണ്ണ സ്റ്റാന്‍ഡിലാണു സംഭവങ്ങളുടെ തുടക്കം. വണ്ടൂരിലെ കോളേജ് വിദ്യാര്‍ഥിനിയും എടവണ്ണയിലെ സ്‌കൂള്‍ വിദ്യാര്‍ഥിയായ സഹോദരനും എടവണ്ണ ബസ് സ്റ്റാന്‍ഡില്‍ സംസാരിച്ചിരിക്കുകയായിരുന്നു. ഇതു കണ്ടുനിന്നവരിലൊരാള്‍ മൊബൈലില്‍ പകര്‍ത്തി. സഹോദരനും സുഹൃത്തുക്കളും ചോദ്യം ചെയ്തപ്പോള്‍ വാക്കേറ്റമാവുകയും തുടര്‍ന്നു കൂട്ടം ചേര്‍ന്നു മര്‍ദിക്കുകയും അസഭ്യം പറയുകയും ചെയ്തുവെന്നാണു പരാതി. പൊലീസെത്തിയാണു സംഘര്‍ഷം അവസാനിപ്പിച്ചത്.

ഈ സംഭവത്തിനു പിറ്റേന്നു ‘ജനകീയകൂട്ടായ്മ’യുടെ പേരില്‍ വിദ്യാര്‍ഥികള്‍ക്കു മുന്നറിയിപ്പായും വിദ്യാര്‍ഥി പക്ഷത്തിന്റെ മറുപടിയായും ഫ്‌ളക്‌സ് ബോര്‍ഡുകള്‍ വെച്ചിരുന്നു. 5 മണിക്കു ശേഷം ബസ് സ്റ്റാന്‍ഡ് പരിസരത്തു വിദ്യാര്‍ഥികളെ കണ്ടാല്‍ കൈകാര്യം ചെയ്യുമെന്ന മുന്നറിയിപ്പുനല്‍കി ജനകീയ കൂട്ടായ്മ ഫ്‌ളക്‌സ് വയ്ക്കുകയായിരുന്നു.

എന്നാല്‍ ‘രാവിലെ 7 മുതല്‍ വൈകിട്ട് 7 വരെയാണു ബസ് കണ്‍സഷന്‍ സമയമെന്നും 5നു ശേഷം കണ്ടാല്‍ കൈകാര്യം ചെയ്തു കളയുമെന്നു ബോര്‍ഡ് വയ്ക്കാന്‍ അധികാരമില്ലെന്നും’ വിദ്യാര്‍ഥിപക്ഷ’ മെന്ന പേരില്‍ മറുപടി ഫ്‌ളക്‌സും പ്രത്യക്ഷപ്പെട്ടു. പിന്നാലെ പൊലീസെത്തി രണ്ടു ബോര്‍ഡുകളും നീക്കം ചെയ്യുകയായിരുന്നു.