ന്യൂഡല്‍ഹി: അധികാരത്തിലെത്തുന്നതോടെ നിതി ആയോഗ് പിരിച്ചു വിട്ട് ആസൂത്രണ കമ്മീഷന്‍ പുന:സ്ഥാപിക്കുമെന്ന് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. നേരത്തെ ആസൂത്രണ കമ്മിഷന്‍ ഒഴിവാക്കിയാണ് നരേന്ദ്ര മോദി സര്‍ക്കാര്‍ നിതി ആയോഗ് കൊണ്ടു വന്നത്. ഇത് കടുത്ത വിമര്‍ശനത്തിനു വിധേയമായിരുന്നു. അധികാരത്തിലെത്തുന്നതോടെ വീണ്ടും ആസൂത്രണ കമ്മിഷന്‍ കൊണ്ടു വരുമെന്നാണ് രാഹുല്‍ വ്യക്തമാക്കുന്നത്.

ഇതേ അഭിപ്രായം ഉന്നയിച്ച് തൃണമൂല്‍ കോണ്‍ഗ്രസ് നേതാവും പശ്ചിമ ബംഗാള്‍ മുഖ്യമന്ത്രിയുമായ മമതാ ബാനര്‍ജിയും രംഗത്തെത്തിയിരുന്നു. ഭരണത്തിലെത്തുന്നതോടെ ആസൂത്രണ കമ്മിഷന്‍ പുന:സ്ഥാപിക്കുമെന്നും നിതി ആയോഗ് ഉപയോഗിക്കാന്‍ കൊള്ളില്ലെന്നും അവര്‍ വ്യക്തമാക്കിയിരുന്നു. പുതിയ ജി.എസ്.ടി പുന:പരിശോധിക്കുമെന്നും മമത പറഞ്ഞു.

കോണ്‍ഗ്രസിന്റെ പ്രകടനപത്രിക അടുത്ത ആഴ്ച പുറത്തിറങ്ങുമെന്നാണ് സൂചന. കോണ്‍ഗ്രസിന്റെ പ്രകടന പത്രിക ഒരു വ്യക്തിയുടെ കാഴ്ചപ്പാടായിരിക്കില്ല, മറിച്ച് ജനങ്ങളുടെ ശബ്ദമായിരിക്കുമെന്നും രാഹുല്‍ പറഞ്ഞു.

രാജ്യത്ത് അധികാരത്തില്‍ വന്നാല്‍ നോട്ടു നിരോധിച്ച തീരുമാനത്തിന് എതിരായി ഞങ്ങള്‍ അന്വേഷണം നടത്തും. കേന്ദ്ര സര്‍ക്കാര്‍ എടുത്തുമാറ്റിയ പ്ലാനിങ് കമ്മീഷനെയും തിരികെ കൊണ്ടു വരും. പ്ലാനിങ് കമ്മിഷനു പകരം കൊണ്ടു വന്ന നിതി ആയോഗിനെ ഉപയോഗിക്കാന്‍ കൊള്ളില്ലെന്നും മമത പറഞ്ഞു. പുതിയ ജി.എസ്.ടിയെ സംബന്ധിച്ചും വിശദമായി പരിശോധിച്ച ശേഷം അത് ജനങ്ങള്‍ക്ക് ഉപകാരപ്രദമാണെങ്കില്‍ മാത്രം നിലനിര്‍ത്തുമെന്നും മമത കൂട്ടിച്ചേര്‍ത്തു.

ബി.എസ്.എഫ് മുന്‍ ഡയറക്ടര്‍ ജനറല്‍ കെ.കെ ശര്‍മയെ തെരഞ്ഞെടുപ്പുമായി ബന്ധപ്പെട്ട് പശ്ചിമ ബംഗാളിലെയും ജാര്‍ഖണ്ഡിലെയും പ്രത്യേക പൊലീസ് ഒബ്‌സര്‍വറായി നിയമിച്ച നടപടിയെ മമത വിമര്‍ശിച്ചു. പൊലീസ് ഓഫിസറായിരുന്ന കാലത്ത് ആര്‍.എസ്.എസ് പരിപാടിയില്‍ യൂണിഫോം ധരിച്ച് പങ്കെടുത്തയാളാണ് കെ.കെ ശര്‍മയെന്ന് മമത ചൂണ്ടിക്കാട്ടി.